迪士尼新春報喜賀豬年

過年前去一轉迪士尼，睇下有冇賀年物品可以買，應該點都有D利是封可以買到，今日遲咗少少入去，新年冇乜特別嘅 promotion ，主要係購物儲印花，今年豬年，所以搵左三隻小豬做主題，好多產品都有果三隻豬，入到去已經做完巡遊，所以淨係去咗玩 Ironman ，今日超多人，而且好多都係國內遊客，周圍都係國語，我以為農曆新年期間先至會多人，點知新年前都已經咁多，我冇乜嘢睇啱，就真係淨係買咗利是封，今年Duffy 利是封都幾靚，有少少立體，一套10個，剛剛好 Duffy 同 friends ，Shellie May、Stella Lou、Gelatoni 同 Cookie 五個造型，每款兩個利是封！我只係買咗一包，用來包比最熟嘅人！

失驚無神一家人 Instant family

Pete 同 Ellie 結婚多時，一直在事業上衝，年紀開始大，令佢地諗下一代嘅問題，經過思考佢地決定嘗試做寄養家庭，原先想要一個幾歲大嘅小朋友，卻遇上15歲的 Lizzie，感覺有緣份，但她卻有兩個弟妹 Juan 和 Lita，兩夫婦要一瓶收有三個小孩，一下子來了三個小孩，而Lizzie 正值反叛期，兩夫妻都搞到一頭煙......！

故事有笑有淚，不少照顧小孩的情節，令很多為人父母者有所共鳴，理想中的寄養或領養，與現實中要面對嘅問題，真係唔容易應付，套戲係改編自真實故事，相信寄養或者領養嘅過程𥚃面，雙方要面對嘅困難亦都唔少，真係要少D愛心都做唔到！

名代宇奈とと

整完頭髮，去返iSquare食晚飯，今朝已經見到有間鰻魚店，所以特登去試吓，呢度淨係做鰻魚，門口有個炭爐，可以隔住玻璃睇到師傅在燒鰻魚，我叫咗一個鰻魚重 上，佢有好多款唔同價錢嘅鰻魚飯，主要係個份量多少分別，當然可以叫一條整鰻魚食啦，唔少得要叫一個燒鰻魚肝，不過就冇試到個湯喇，通常去日本食鰻魚飯必定有一個湯，因為有D咳，所以叫咗杯柚子蜜算喇，個鰻魚好好食，出乎意料之外地好食，同日本食嘅質素差唔多，唔怪得佢門口要預備定位比人排隊啦，不過趁晚飯時間之前去食就唔使排隊啦！呢個一定要再嚟食，平時去整頭髮一定去食山頭火食拉麵，以後睇怕要改去呢度食鰻魚飯了！

忠孝東路

今日約咗師傅整頭髪，因為要整幾個鐘，所以先去食D嘢，近近地去咗iSquare食嘢，呢度有幾間食店都轉左手，見到呢間忠考東路係新開嘅，顧名思義係食台灣野，餐牌只有午餐選擇，同埋好多台式飲品，我地叫咗一個牛肉麵同埋三杯雞，味道就一般啦，叫做試吓咁囉！

食完野就去整頭髮，幾個鐘頭時間咁長一於煲劇，嚟緊會做皓鑭傳，先上網睇左先，因為係延禧攻略原班人馬，大家都有所期待，見到佢入邊角色好多都係延禧入面嘅演員，不過忠嘅繼續做忠，奸繼續做奸，而且成套戲嘅套路都好似延禧，暫時睇咗幾集都覺得OK，冇延禧咁好睇，但係都唔錯，要睇多幾集先知好唔好追！

相識多年嘅髮型師，嫁左去台灣都有一段時間，不過佢周不時返香港，差唔多有八成時間都係在香港，今次搵佢整完頭髮之後，佢話要返台灣有排都唔再返來，希望佢在台灣生活得愉快啦！要搵個第二個師傅都唔係咁容易夾得到喇！

福岡.烏龍魚男

今日去咗灣仔食午餐，試吓呢間日式食店，主打叫做魚男九段剌身/壽司 ，主要係有一個木製嘅架，分開九層，每層有唔同嘅食物，我地叫咗一個九段刺身，另外叫咗一個鰻魚飯，九段刺身上面有拖羅、牡丹蝦、海膽等等，刺身嘅新鮮程度都OK，味道都唔差，符合個價錢，鰻魚飯亦都一般，不過不失！

綠林甜品

食完飯都幾飽，不過大家都想食甜品，食飯果陣有12個人，甜品就得8個人去，見到佢有栗子粒露，係冬季限定，所以叫咗碗食，又加咗湯圓，我地幾個都係叫左幾款甜品，跟住大家見到有榴槤 pancake ，都想試，先發覺原來幾乎全台都食榴槤，總之無人抗拒，叫咗兩個榴槤 pancake 大家一齊share食，個個都話好好味，呢度D甜品都做得幾好，唔錯！

增煇藝廚

有同事辭咗職，返到新年就走喇，今晚約齊成班人一齊同佢食咗 farewell dinner 先，因為過年大家都會忙，去咗深水埗呢間好出名嘅小菜，其實都想試好耐，一直都冇機會，今次就一齊試吓佢，佢最出名嘅係豉油雞，當然要叫啦，店員話要等40分鐘，咁我哋都有叫其他小菜食住先，我地叫咗炸大腸、胡椒豬肚湯、雞蛋焗魚腸、啫啫芥蘭煲、秋葵炒廣島蠔、鬼馬油炸鬼等等，都叫咗十幾個餸，佢份量都唔係太大，都係每人一件左右、所以都要加多幾個餸炒飯食，老實說小菜質素唔係想像中咁好，尤其是係豉油雞，雞皮果部份係好味嘅，但係雞肉就冇乜味，簡單D講唔入味，係個湯同炸大腸最好，如果要等位等好耐，我就一定唔會揀呢間！

Malty

因為有同事升職，所以今晚請食飯，未夠鐘我地就先去飲野，去左尖沙咀一間酒吧飲野，每人叫左杯野飲，又叫咗個炸魷魚食，全程大家剝花生，食花生都食到飽，今晚又要去食火鍋，又係雞煲加火鍋，今次我唔係點食火鍋淨係食雞煲，因為驚太飽，上次食左幾日火鍋之後都滯左好耐，所以依家都唔係咁想食火鍋！