永發茶餐廳

又係12月之星生日飯局，尋日打完邊爐今日又打！今次去上水呢間永發茶餐廳，已經好耐冇食過喇，我都好鍾意佢個湯底同埋雞，佢D雞係好厚肉同埋唔肥，仲好滑！對上一次已經係幾年前食，因為好少入去上水咁遠，咁岩今次有幾個住大埔同馬鞍山，想過嚟食，今次就佢哋一次，唔使佢地出九龍，我地入去新界！

我因為在旺角撞見好友，一齊行咗一陣間街，所以遲咗入去，去到都要等位，因為晚飯時間都好多人，呢度個格局係茶餐廳咁樣，所以等位都有少少亂，而且D枱都有少少逼夾，今次多左兩個人，一個係新加入群組嘅，另一個就係組員嘅丈夫，大家都係相識嘅，第一次咁多人一齊食，我地叫咗醉雞鍋，個個都話隻雞好味，所以要叫多一隻，同時要加返酒落個湯度，D牛肉雖然個樣麻麻地，不過牛味都幾重，整體來講都好好食！呢度D侍應阿姐都幾搞笑，我地仲請左包薯片比佢食！

我地成晚傾計又喺度想當年，好開心，切埋蛋糕就走啦，今晚新加入果兩個都有揸車，可以車我哋返去，一架新界一架九龍啱啱好！