無敵破壞王 2 打爆互聯網 Wreck-it Ralph 2 Ralph breaks the internet

Ralph 同Vanellope 係好朋友，他們一起生活在遊戲機中心內，有各自的遊戲機，因為他們是遊戲裏面的角色，有一天遊戲機中心的店主購入了一部可以上互聯網的遊戲機，他們為了尋找 Vanellope 的遊戲機配件，闖入了互聯網世界，首次踏足互聯網世界，他們認識了新朋友，嘗試在互聯網世界內賺錢，希望能購買到遊戲機配件.......!

這個電影已經係第二集，我冇睇過第一集，不過大致上都估計到講乜，佢有D似 Toy story ，遊戲機內的卡通人物，在遊戲機中心關門後都會活動，由於係迪士尼嘅製作，𥚃面都加左唔少迪士尼元素，仲有成班公主，都幾搞笑！

三和叙

呢個幾星期食到好飽濟，食左幾日火鍋，日日出街食，好想在家食個蔬菜沙律，清清腸胃，原本今晚要做節，但媽媽身體不適，所以取消了，諗住回家休息，但好友相約去食好西，見係日本野，應該唔太油膩，可以一試！

這家店子開業不久，現在仍是試業，大厦應該是新起的，店子樓高三層，每一層都很細，地下一層是爐端燒，另外兩層，一層是鐵板燒，另一層是壽司，店員說在爐端燒一層可以 order 壽司，但壽司一層不能 order 爐端燒及鐵板燒，原因是要上上落落，怕食物凍了，而壽司刺身本身是凍的，所以沒有影響，這店下午5:00後才開門，只做 Happy hour 和晚市，今天冬至，鐵板燒冇位，只有壽司和爐端燒，我地本來想食壽司，之後改坐爐端燒果層，可以食兩樣！佢每層大約只有十個位，兩張四人枱同圍住壽司枱/爐端燒枱坐，如果食壽司，又棟 Omakase 的話，就只可以坐壽司吧，方便師傅與人客互動！

我地上完又落，去返地下食爐端燒，叫左幾串食物試下先，先叫左佐賀和牛、牛舌、雞肉丸、豚肉露筍卷、白鱔、雞翼，每樣都係一小串，試完覺得牛舌、雞肉丸同白鱔好食，所以再叫多兩串，佐賀牛就太油了，燒過的和牛已經迫出了一些油份，但仍然很膩，證明油花好多！另外叫左壽司，有大拖羅同赤貝，仲有天婦羅蕎麥麵同銀鱈魚西京燒，壽司都唔錯，大拖羅入口即溶，只係冇日本咁好食！個天婦羅做得幾好，蕎麥麵都好食！銀鱈魚較日本的好食！仲叫左個燒和牛胸腹，呢個好食又唔油膩，正！

我同好友都有D飽，但她男友未飽，所以叫左燒雞肝、油甘魚壽司、牡丹蝦同燒裙邊壽司，後面果幾樣就麻麻地，整體來說，爐端燒做得比壽司好，店員很耐心解說，服務態度友善，亦有日藉店員，下次會考慮試下食鐵板燒！

倫哥火鍋私房菜

停左一晚，又再打邊爐，今晚又係同另一班同事聖誕gathering，去咗西環果間分店，又係訂咗間房，呢個分店因為有酒牌，所以我地可以叫酒飲，叫咗一支 sake，不過味道麻麻地！所以叫另外一支，部份人就飲啤酒汽水，呢間同尖沙咀果間嘅分別係冇咗刺身，我覺得其實唔使刺身都夠食，今次我地只係叫左兩部雞煲，冇食到咁飽，所以打邊爐火鍋配料要再 refill 幾次，同埋男士偏多，其中有兩個仲好拆得，所以都叫左幾多嘢食，食完飯又係交換禮物，今次我交換左一個 diffuser 返嚟，而我買嘅係實用嘅牙刷機！

3D 4DX 水行俠 Aquaman

1985年，在一個狂風暴雨的晚上，燈塔的負責人Thomas 發現了受傷的 Atlanna ，將她救了回家，兩人在燈塔旁的小屋生活，並誕下了兒子 Arthur，原本平淡的生活，因 Atlanta 是亞特蘭斯女王的身份而改變，她為保丈夫和兒子的安全，被迫返回亞特蘭斯，更被當成祭品獻給海濠國....她的兒子 Arthur 自小已可以與魚類溝通，亦一直由母親派來教導他的 Nuidis 所訓練，Arthur 長大後，有一天，因他同母異父的弟弟，想攻打人類，弟弟的未婚妻前來尋找 Arthur ，希望能阻止其弟...!

套戲成144分鐘，好長！不過冇乜冷場，所以都唔覺咁長，角色本身都吸引，我地睇4DX 好多噴水場面，雖然噴好多次水，我地都冇 off 噴水掣！好多打鬥場面，所以搖得好厲害！整體套戲都好睇，節奏明快，只係海盜個 part 可以刪減，不過已經鋪棑海盜下集再出現！同埋男主角件俠衣成件金色唔太型！有D土豪 feel ！

thaya

今日去左西環食午餐，去咗呢間泰國菜館，呢幾日忙忙忙忙忙！加上打咗幾日邊爐，食飯都冇乜胃口，所以諗住食泰國嘢醒胃D，可能今日太忙，都覺得有D飽，我都冇留意睇個餐牌叫咗D乜，應該一個係金邊粉，另一個係四季豆，味道都不過不失！

馬仔四季火鍋

又又又打邊爐！今次係好友生日飯局，約咗好友們去九龍城食，在九龍城街市樓上的熟食中心，呢間比較傳統街坊類型嘅火鍋店，用Gas爐同埋個鴛鴦煲都係舊式果種，牛肉唔會鋪到靚靚咁俾你，就咁成舊擺上碟，雖然牛肉價錢都唔平要$300一碟，但係其他配料個價錢都好平，我地自己買咗支 sake 嚟飲，呢度嘅好處就係唔使開瓶費又唔使切餅費，食物嘅質素都唔錯，樣樣都好新鮮，只係環境有點殘舊，間中有老鼠在屋頂上出現，只要佢唔跌落黎就冇事！

除咗食傳統嘅火鍋仲有食傳統嘅蛋糕，所以今晚嘅消費都好低！好友買嘅蛋糕都係一D細餅店嘅蛋糕，近年好多朋友都覺得D大型連鎖餅店，做嘅蛋糕唔係咁好食，收費又好貴，好多人都返璞歸真，情願幫襯一D舊式小店買蛋糕！

席間我地問好友同最近用 App 新相識女朋友的近況，好友自從離婚後，短短幾個月已經先後交過兩個女朋友，所以話香港地女多男少，男人都唔使驚搵唔到女朋友，反而身邊都好多剩女，所以其貌不揚的好友都可以變左搶手貨！

倫哥尚品火鍋私房菜

連續第四晚打邊爐了！今晚同同事一齊聖誕gathering，講好左每人要買一份禮物交換，價錢要$150至$200 ，我買咗個風筒比較實用D！

今晚去左尖沙咀呢間火鍋店，我地book左一間房，先食住雞煲等，我地叫左中辣同大辣，個雞煲都幾好味，所以我地叫多兩個，到人齊果陣一齊再食，食完雞煲佢又會比碗燉湯我地，然後仲有每人一隻好細隻嘅鮑魚，跟住就會上刺身，其實食完刺身都已經飽！跟住再上海鮮拼盤，份量都好多，其實我地唔係好食得晒，因為仲有其他火鍋配料，食到咁上下我地就玩交換禮物，我就收到一份高達模型！對我來講係完全冇用，所以諗住將佢送俾同我一齊放飛機嘅朋友，因為我記得佢架車上面有高達公仔，不過唔肯定果隻係咪真係高達！交換完禮物再食埋糖水就走，真係食到非常之飽！

怒啤

今晚約咗好友打邊爐，冇錯！已經係第三日打邊爐！因為有一個未收工，所以行住街等，行咗去信和中心睇野，見到有間手工啤酒店，個名叫做怒啤，入去睇下，都有好多選擇，我地每人揀咗一支，即刻開來飲下試試，我揀咗果支係陳皮啤，㗳落都有少少陳皮味，好友嘅蜂蜜啤，蜂蜜味都好重，甜甜地好易入口，而另一支係咸檸啤，小小鹹味，冇乜檸味，都幾得意！下次可以買D返屋企夏天飲！

永發茶餐廳

又係12月之星生日飯局，尋日打完邊爐今日又打！今次去上水呢間永發茶餐廳，已經好耐冇食過喇，我都好鍾意佢個湯底同埋雞，佢D雞係好厚肉同埋唔肥，仲好滑！對上一次已經係幾年前食，因為好少入去上水咁遠，咁岩今次有幾個住大埔同馬鞍山，想過嚟食，今次就佢哋一次，唔使佢地出九龍，我地入去新界！

我因為在旺角撞見好友，一齊行咗一陣間街，所以遲咗入去，去到都要等位，因為晚飯時間都好多人，呢度個格局係茶餐廳咁樣，所以等位都有少少亂，而且D枱都有少少逼夾，今次多左兩個人，一個係新加入群組嘅，另一個就係組員嘅丈夫，大家都係相識嘅，第一次咁多人一齊食，我地叫咗醉雞鍋，個個都話隻雞好味，所以要叫多一隻，同時要加返酒落個湯度，D牛肉雖然個樣麻麻地，不過牛味都幾重，整體來講都好好食！呢度D侍應阿姐都幾搞笑，我地仲請左包薯片比佢食！

我地成晚傾計又喺度想當年，好開心，切埋蛋糕就走啦，今晚新加入果兩個都有揸車，可以車我哋返去，一架新界一架九龍啱啱好！