尋晚去完國泰城食飯，今朝又去附近的機場！
二月去左大阪，四月去左東京，六月去名古屋！第一次去名古屋，上網睇過下有乜野地方好去，如果市區就唔多地方去，附近郊區比較多，例如白川鄕、立山黑部等，雖然話附近，但係交通都要近兩小時，記低資料，到時去到再決定去邊！
去名古屋的航班唔頻密，揀左早上機10:10am，今次都係搭國泰，一早6:30出門，諗住搭第一班小巴去轉機場巴士，可惜慢左一步，送車尾！下一班車要成十分鐘先有車，去到巴士站，仲有5分鐘有巴士，依家多左條線，搭唔到呢班可以搭第二條線！巴士遲左一分鐘到，好 full ！冇位坐都唔緊要，最討厭D人放行李放得好自私，其實要打直放，好多人橫放佔多左空間，其他人放唔到行李！如果情況許可，我會移返直D喼，不過盡量唔想掂人地個喼，費事有爭抝！我睇住自己個喼，一路企到去機場，35分鐘便到達T1，好快！
差不多去到機場果陣收到 massage 話要 delay 個幾鐘！早D通知就唔使咁早出門啦！去到機場先至七點幾！有排等！先去印登機証，已經上網 Check in 左，可以印登機證，同行李貼紙，然後自助行李寄艙，上次去大阪已經有自助寄艙，今次都可以，其實有傳統地勤人員幫你寄，或者自助，只係人手辦理要排隊，將來都會自助化，不如早D學定！
Check in 完再去行下，其實冇乜好行，加上肚餓，快快趣趣過關！先去食早餐，今朝機場都好多人，去到 Spaghetti house 剛剛好剩返一、兩張枱，我一個人坐張4人半圓枱，有D唔好意思，不過冇枱喇！見到餐牌多左款半熟蛋早餐，就試下佢，個餐有煙肉，我唔食，叫佢走左煙肉，除左蛋，仲有茄汁豆、粟米、火腿，有個芝士 sauce 幾好味！食完早餐坐低慢慢嘆返杯咖啡！大把時間，坐左成個鐘，見原來好多人等位，就埋單走人！
慢慢四圍行下影下相，見到原來gate 60果邊都有一間 Disney store ! 等到10:55am，又話再 delay ，因為好大雨！話由11:35 delay 到11:50， 到上左機之後又再 delay ，原本10:10飛，最後要12:30先飛！不過我認為 delay 唔緊要，最緊要安全！本來三點幾到名古屋，最後5:15先到，降落前見到彩虹呢！
首次踏足名古屋，過關好快，基本上得我搭果班機既人，呢度安排都係先打指模影相，再另一條隊過關，咁就快D，所以過左關要等行李！等左幾個字，件行李濕晒，應該在香港淋濕左，因為日本冇落雨！唔知入面會唔會濕左！先去搵火車搭，指示好清楚，我搭 sky 火車，類似東京的NEX，即係機場快線，全車指定席，¥1230，最近班車17分鐘後18:07pm，車程預計半小時左右，18:35 到名古屋駅！上車後見一班港人上車後自己搵位坐，呢度全部指定席，唔知佢地點買飛入閘，不過佢地好快發現係指定席，所以好快落左車，全程車中間只停左神宮前駅、金山兩個站之後，就到名古屋駅，火車準時到達，出咗閘之後搵唔到應該由邊個出口出，因為呢度只係指示轉邊條線嘅位置，冇指示邊個地標出口，個車站都好舊！一行出街就見到 Marriott 酒店，跟住開Google Map搵，但係地圖唔係點郁，最後兜咗一個大圈，原來我要搵既出口就在酒店後面！呢個車站有好多個出口都有D亂，最後搵到噴泉出口，一出去就見到 Bic camera 旁邊就係我今次住嘅酒店 Meitetsu new grand hotel ！
去到酒店已經7:00pm，即刻 check in，間酒店雖說有個 New 字但係好舊！淨係見佢仲係用鎖匙，就知幾舊！一出電梯覺得有陣味，好似煙味咁，燈光仲好昏暗......好在間房都乾淨冇味！放低行李即刻出去搵嘢食，因為真係好肚餓！先去一去高島屋，落去B2見到水果有水蜜桃、車厘子同埋提子，即刻每樣買一份，買完即刻去食嘢，見附近有個らまいもん通り，入面有幾家食店，見有一家叫做香樂，有鰻魚飯食，就食呢間！店員是老婆婆，餐牌只有日文，指住個大鰻魚飯，佢都係比左個細既！不過我有水果，可以返去食！個鰻魚飯都ok，食完返酒店食埋水果要休息了！
沒有留言:
發佈留言