度小月

今日去尖沙咀剪髪，去開果間 salon 搬左去原本大廈的斜對面，位置都好相近，剪完髪去左海港城行下，諗起台灣度小月來了香港開店，位置之前是麵屋武藏，上次想去食拉麵，見佢執左，圍板上印住度小月，已經知道會開，尋晚睇電視話佢開左，今日即管睇睇多唔多人！

4:10 pm 去到，㩒左飛先，1-2 位要等廿幾張，去附近行下先，行左十幾分鐘返去睇下，叫左十個號碼，都幾快，再行多十分鐘就留低等，見都叫得快，同埋見佢其實有枱，係唔夠侍應執枱，等到4:45pm 就入得，地方都算大，得4-5個侍應，有一D手忙腳亂，門口有玻璃隔住個小廚房，可以望到人整擔仔麵，我諗係模仿以前街上賣擔仔麵的情景，order 紙好簡單，有D似鼎泰豐，我見擔仔麵好細碗，見其他人要叫兩、三碗，我叫了一碗，再加個蚵仔湯、紹興酒香雞，再叫左杯香檳巨峰乳酸！店員攞左碟蚵仔酥比我，我話我冇叫，我叫果個係湯，佢就拎返走，等左一陣，見隔離枱遲過我叫擔仔麵都有得食，我就未有，我冇追佢地，因為想叫個人都難，等多一陣，蚵仔湯同擔仔麵一齊到！兩樣都係細細碗，個湯好簡單，得蚵仔同薑絲，清清地，好味！飲湯先，因為冷氣好凍！我未食過擔仔麵，第一次食都幾好味，不過份量真係好少，兩㗳食晒，食完晒個酒香雞仲未到，等多陣追追佢，好快到返，見個雞都好多肉，味道同鼎泰豐的醉雞好相似，可能大家都係台式做法吧！

整體食物質素同鼎泰豐好相似，只係店員都好新手，都係好多新開食店遇到的問題，但係店員都好友善，走的時候見等位的人之中，有兩夫婦在責怪門口的店員，因為店員按錯號碼，按了已經過左的號碼，可能兩夫婦等到差不多到佢地，見叫返之前的號碼，所以很不滿吧！見店員已經兩次致歉，但他們繼續責怪，更説這公司不知所謂，個人認為如此不滿，不如唔好再等，去第二度食好吧！

飯局主場 - 第九回

都有幾個月冇在家中宴客喇！今日人少少兩個食，好簡單煮三餸一湯，先去街市買條魚同埋蝦，再買條勝瓜同埋水果，就返去開工，先洗落米蒸飯，再煮冬陰公湯，洗洗切切煮埋都要成個鐘，煮得冬陰公湯就一定要用蝦，買得蝦就唔會買幾隻，買一斤又唔可以煮晒落個湯，剩返當然蒸埋佢啦！蒸飯蒸魚蒸蝦一個爐做晒，蒸到剩返幾分鐘，就炒埋D瓜！時間啱啱好，湯就熱住先，蒸爐一夠鐘，就可以一齊上菜，兩個人食都好飽，食完飯仲有位食埋西瓜，好耐都冇食過咁飽喇！

盜墓迷城 The Mummy

在古埃及，法老王的女兒亞瑪列公主，是唯一的承繼人，可惜法老王後來與第二位妻子生了一個兒子，令亞瑪列將來無法承繼皇位，她決定殺死了父親和弟弟，然後打算殺死他的愛人令他可以變成活神，但被阻止了，他的愛人被殺，而她就被活埋於木乃伊內，並埋葬於遠離埃及的地方........在伊拉克，Nick 與考古學家 Jenny有一夜情之後，偷走了他的地圖，尋找寶藏，卻意外地發現了亞瑪列的墓穴，Nick 更意外地打開了機關，釋放了亞瑪列，當他們將亞瑪列的木乃伊運走時，飛機遇到了大群烏鴉，飛機墜毁了，只有Jenny一個生還，而 Nick 卻突然在停屍間醒來，腦海中更不時出現亞瑪列，亞瑪列更說 Nick 是被選中的人，只要亞瑪列用當年的匕首殺死 Nick，他便會成為活神，但匕首上的紅寶石失去了，該寶石在公元1127年時，與一名十字軍的教士同葬，而這教士的墓，正在英國被發現......!

之前睇預告已經大約知道劇情，同之前果套盜墓迷城都好唔同，單睇個戲名以為主角去盜墓，其實係意外發現左墓穴，套戲情節都好緊湊，有 Tom Cruise 的電影總會有動作場面，可以話冇冷場，但唔算好精彩，Russell Crowe 個角色其實都係大配角，佢近年鮮有佳作，差D為意唔到佢！

鮮入圍煮

睇唔成木乃伊展覽，行咗一陣街，差唔多夠鐘食晚飯，因為已經訂咗枱，要出返旺角，呢間火鍋店之前有一次想去食，上到去無位所以放棄左，今次訂咗枱就一定有位啦！上到去只有幾枱客，因為時間尚早，呢度D座位，有D迫迫夾夾唔係咁好坐，呢度主打大排檔feel，所以都係摺檯摺櫈，同埋佢想盡量擺多幾枱，所以比較迫！我哋有小朋友所以都唔係太方便，不過店員都幫我地盡量拉過D張枱，等我哋冇咁迫！

呢度有個海鮮檔，見到D蜆同花甲都好大隻好靚，海鮮睇落都好新鮮同埋乾淨，除咗海鮮當然唔少得一般的火鍋配料啦，每張枱都有一疊疊點心紙，想食乜嘢就自己剔，不過我哋一坐低就剔野食，忘記咗有海鮮呢回事，淨係叫咗啲牛肉同一般嘅火鍋配料，我地叫咗安格斯牛肉片，切到非常之薄！兩塊先等於正常牛肉片一塊，要＄158碟，每人食得一、兩塊，唔係咁抵食！我地仲有叫其他配料，響鈴、雲吞、水餃、鯇魚腩、烏冬、菜等等，食到最後先諗起D海鮮，不過大家都好飽喇，因為午餐同晚餐只係相隔左幾個鐘，午餐已經食咗buffet 所以非常飽！呢度D侍應服務都好好，食物質素都OK ，只係個別食品比較貴咗DD！

柏景餐廳

早一個月前已經約咗今日，為咗遷就小朋友，我地先至約星期六，今日8大3小，先去食個lunch buffet，我今日唔知醒，因為食咗藥瞓到不省人事，醒的時候已經11點半，我地約咗12點，要趕快出門，最後要成一點先到，點知我原來唔係最遲果個！Anyway，都係食住等，今日嘅天氣明明好晴朗，忽然又落大雨，好在我哋在室內，不過我就遇着大雨，個身都濕咗少少！

去到中港城直接上去酒店入面的餐廳，一坐低先攞野食，呢度食物選擇都頗多，雖然係午餐，我諗同晚餐冇乜分別，冷盤方面有蟹腳、翡翠螺、蝦同埋青口，熱葷就有一D中式的餸菜，例如燒味、炒菜、生炒骨等等，又有粥有麵，有少少印度食物，又有日式燒烤、壽司刺身，甜品的選擇也很多，我就食得唔多，見佢有款十青沙律，十種綠色的蔬菜加上沙律汁，味道唔錯，我都食咗兩轉，其他食物只係落lab食咗D，甜品我只係食咗豆腐花，佢地就食得比較多，仲有食雪糕同雞蛋仔，我就冇食啦！

我地食到人地下午茶buffet開先走，跟住行去尖東，去睇木乃伊展覽，今日好熱我哋行到身水身汗，去到科學館，多人到爆！買飛條隊睇落都有二百人！諗住轉去對面另一個展覽館睇展覽，但係一樣咁多人，於是我地決定改去行商場，因為實在太熱了，我地就坐巴士去返海運！呢種天氣都係行商場好D！

香港迪士尼樂園 - 奇妙處處通仲夏晚會

迪士尼每年都會做會員之夜，多數係夏天，基本上大熱天時係唔會入去迪士尼，除咗會員之夜，不過舊年好似冇去到，因為D時間唔啱，今年剛剛好有一日時間啱，今次佢做三日，有兩日係星期六，一來我係銀卡會員，星期六唔可以入去，二來星期六一定超多人！

佢通常到咗某段時間就會封咗部份位置，要會員先可以入去，今次都唔例外，五點半之後，城堡後面有D地方只可以會員入，要憑手帶辨認，入場之前已經在售票處攞咗手帶同埋介紹單張，呢個禮拜雖然日日都落雨，不過今日就冇落雨喇，雖然天陰陰但係都好熱，所以都係晏小小先入去，今日都係好多人，入到去先去有冷氣地方涼下先啦！行咗一陣就做巡遊，睇咗一陣，行去前邊用縮時拍攝，拍晒成個巡遊過程，都幾得意！睇完巡遊走去睇4D，睇完4D，本來想去劇場睇特別節目，但係啱啱過咗鐘，唯有睇下一場，仲有成個鐘頭，就去玩 Iron man ，你咪排隊都用咗45分鐘，剛剛好趕得切睇劇，個劇叫做皇室公主音樂盛演，係一個音樂劇，主要係講幾個公主，同埋有歌手唱套戲入面的歌曲，演出嘅公主有Cinderella、Snow white、花木蘭、Jasmine 同埋近期大熱的 Belle，雖然唔係話好精彩，不過有歌手現場演唱，觀眾都睇得好開心！

睇完劇又去玩迷離莊園，嘗試玩熟時拍攝，不過見咁黑可能都影唔到，所以只係影咗少少，不過之後睇返都覺得OK！睇完劇出嚟，已經做緊夜間巡遊，雖然一半已經行左，又縮時拍攝玩埋下半場！見時間都夜，就食埋野先走，去左皇室宴會廳食，順便換埋個碗，之前買咗一對粉紅色同粉藍色，而家冇得賣，但係買甜品就跟埋，出咗綠色同紫色，我當然揀我鍾意嘅綠色啦！不過個甜品真係好難食，我只係食咗D芒果，個布甸都冇食到！食完野去商店買咗兩件T恤俾小朋友，有六折就真係抵好多！買完野都成九點，好多人都已經走咗，所以唔係太多人搭車，今晚要早D瞓，因為聽日約咗人食午餐，我都驚食咗藥會瞓到唔知醒！

Oak tree Ristorante

近日飯局頻頻，今晚食西餐，約咗好友在佐敦等，然後行過去西貢街，呢間意大利餐廳位於彩鴻酒店內，地方唔算好大，今晚見只有幾枱客，同埋有一間房有人，一來到見到有歌手唱歌，但係佢唔係一隊 band ,而係一個人彈結他自彈自唱，一入呢間餐廳，見到好多支紅白餐酒，見枱枱都有幾支飲，望到果間房入面，都擺咗好多支酒！ 我地未齊人，有兩個未到，我地三個飲住野先，佢地飲啤酒，我就飲 cocktail ，都人齊先叫嘢食，呢度有特價生蠔，係美國蠔，只係$10隻，好平！我哋另外叫咗三個晚餐，有羊架、豬手、牛扒，另外叫咗個 pizza，同埋正宗意大利卡邦尼意粉，點解話正宗呢？餐廳寫明用意大利煙肉同埋36個月醃制芝士做，就叫一個試試！

先來生蠔，五個人只有四個食，所以趁唔食果個未到，我地食咗先！要左一打，每人三隻，好新鮮好好味，即刻要encore叫多一打！每人食咗六隻都飽飽地，食完啱啱好人齊，先來了三個晚餐的沙律，是煙三文魚條配生菜，五個人share食，跟住有三碗湯，有兩個唔飲，所以啱啱好，我湯係蘑菇湯，好好味，絕對唔係罐頭湯！主菜一次過上晒，當然切開share食啦！我哋原先的飲品已經飲完，又見枱枱都飲紅酒，我地又叫一支試下先，因為好友有朋友做品酒師，所以send咗個 wine list 俾佢望下，佢幫我地揀咗一支，當然係佢覺得個list 𥚃面比較抵飲的一支，飲落都覺得OK ，一路飲酒一路食，一路傾計笑餐懵，最近其中一個辭咗工，話轉去做長者護理，另一個就啱啱返咗新工，有一個就諗緊唔做，呢幾年大家的變化都好多，有D人為咗養家都唔敢輕舉妄動，有D人就無奈離開，好多野都唔係大家想點就點，雖然工作上大家都有D不如意，不過出來食飯就唔好講咁多，又講返D開心野大家笑下就算！食到咁上下，先到個意粉，因為個意粉係堂做，侍應推架車仔出來，上面有一大個芝士，侍應用火槍燒芝士，令到佢有點溶化，然後將煮好的意粉，放在芝士上兜勻，隔離果枱都忍唔住過來影相，個味道確實比一般嘅好味，芝士好香濃不過好漏，我地五個人share一碟先至冇咁漏！最後仲有甜品，話明係意大利餐廳，甜品當然係 tiramisu 啦！整體食物的質素好好，價錢合理服務也很好，仲有人現場唱歌，都好物有所值！