八點起左身，梳洗完再整理下D行李，再慢慢 check out，過隔離華盛頓酒店 hea 一陣，去 Family mart 買鮮奶飲，上一陣網，出去巴士站等，好快有車到，巴士在新宿停左幾個站先去機場，比起由機場去新宿耐左，要成兩個鐘先到！在巴士上又瞓左，去到機場自己醒左，HK airline 在 Terminal 2 ，上次國泰都係 Terminal 2 ，我常常攪錯 Terminal 1、2，到左就記得 Terminal 1 多野買D！先去 check in ，我成日覺得機場應該有個磅比人磅行季，香港都有，日本見唔到有，望下機場指示，冇呢樣野，行過 locker見有人圍住一堆，原來有個磅！太好喇，等人知道行李會否過重！我今日個行李幾重，我估23kg左右，航空公司包20kg，上磅一睇27.68！足足多左7kg！我朋友教過我，將多左的行李存放 locker，寄完行李，先至去攞返，因為上機前，個個都會買好多手信，可以照上機！我抽返7kg行李出來，磅過得20.3kg，將多左果D放左 locker先，跟住去 check in，1:15pm先開始check in，等左一陣，寄行李時，見前面果家人，手提行李都磅，我就冇磅，佢地手提行李都比條 tag你，寫埋重量，佢冇磅我個背包，只寫3kg，check in 完，攞返locker行李，我用兩個背心袋裝，原本想行下商場，都係過關先！過左關之後，推架車仔去食壽司，睇地圖先發現我記錯左！原來Terminal 2係冇乜野食架，上次食果間壽司岩係 Terminal 1，冇得食壽司，仲要得兩三間食肆添！
冇乜選擇之下，㨂左間 Avion 食碗麵同餃子，食完野，去 Akihabara 買野，呢間叫秋葉原的店，好多人買手信，佢有另一間賣電器的在對面，就冇乜人喇！我買左薯粒三兄弟，其實時間唔太夠，好快已經3:05，行返去閘口等，好快就上得機，個個一袋二袋手信，又趕住登機，當然冇人 check手提行李啦！回程又坐窗口位！可以睇下香港夜景，返到香港七點幾，好少咁早，好多時返到去十一、二點，今晚早D休息，下星期一、二要預備開會喇！
沒有留言:
發佈留言