慢遊東京 Day 5 - 原宿 , 新宿

 歡樂時間過得特別，又係時候講拜拜！又去到最後一天，原本想去浸溫泉，都係轉戰原宿，好耐冇去呢個地方，近近地走一轉，可惜太早了，店未開門！白行了！最後都係留守新宿！雖然每次都住新宿，但係好多地方冇行過，今日就去行！

去左附近幾家百貨公司，小田急、Lumine、My lord等等，又行地下街！去到地下街，見到好靚的和服店！又去食D野先，又食鰻魚！這家叫双葉的小店，經過幾次，店面頗舊，店剛剛開門，又叫個 set，呢度D鰻魚同尋日果間唔同，尋日果間炭燒，肉質脆D，呢間應該係蒲燒，肉質稔D，各有不同，個人較喜歡炭燒！

食完野，去行街，買左耳環、髪夾、聖誕燈仔，然後返酒店取行李，等巴士去機場！

去到機場，又有大把野行！仲買左個 Samantha 手袋添！上機前食D野，去左すし遊洛，店內冇人，以為關左門，叫左個 set，質素一般，唔怪得冇人！食完築地，仲點返轉頭呢！

慢遊東京 Day 4 - Skytree

今日瞓晏左小小，出發去 Skytree，我很喜歡這個地方，多野食，多野睇！自從第一次來已經很喜歡，只上過去"樹頂"觀望一次，因為人龍太長了，太花時間，而且高的地方，不適合我呢D畏高人仕！

去到先食野！今日食鰻魚！呢度有兩間鰻魚店，之前食過另一間，呢間在門外可以見到個炭爐，明火燒鰻魚，試試佢先！未到 lunch time，都有唔少客，叫左個 set，另外叫一個燒鰻魚肝！鰻魚咁幼，個肝自然好細！所以一碟仔，得幾粒，脆脆地，唔算好好食，叫做試過就算！鰻魚燒到外皮脆脆地，味道同另外一間差不多，都好食！

食完野行街，買手信！呢度有個 outdoor 位置，做緊聖誕market，好多間小屋賣野食同飲品，幾好氣氛，Skytree 外牆有投影表演，好靚！好好氣氛！睇得好開心！唔覺唔覺又天黑，晚餐在 Skytree食埋，上左去31食肆數層，呢層有大玻璃，望出去都睇到附近景色！當上在樹頂！上次食過蟻月的牛腸鍋，今次試鐵板燒！在蟻月旁邊的摩天樓！

今晚都頗滿坐，但仍然有圍繞鐵板燒坐的位置！呢度有幾款套餐，叫左¥10800的 set ，有海膽、鵝肝、鮑魚、全隻龍蝦、黑毛和牛，呢餐真係三高！我諗好多人食呢個餐，見師傅一次過整好多份，龍蝦好新鮮！睇住一落鐵板時仍彈跳，師傅要用蓋，蓋住一陣！食物質素高，物有所值！

返到酒店，曬冷先！ show 晒戰利品！明明冇乜買野，點解影出來咁多野！^_^"

慢遊東京 Day 3 - 新宿、涉谷、二子玉川

今日新行程，朋友介紹去二子玉川，先在新宿行街街，在JR新宿站新南口的 Starbucks 旁邊，有家意式餐廳，叫左個意粉，唔錯，我覺得日本的意粉，好多間都整得好食！食完野，去高島屋行左一陣，然後去涉谷！

去到涉谷，例必去忠犬八千像度影相，新快聖誕節，附近都有聖誕裝飾，影完相，在附近行左陣，都係一D商場、百貨公司，都冇乜野睇啱！

在涉谷搭東急田園都市線去二子玉川，只係六個站，一出站，見到呢度頗新淨，好似翻新左咁，地方很大，空間很多，主要有幾座高的建築物，有商場、百貨公司、和類似展覽場地的地方，先在最近商場行，今次主要想買家品，所以主攻呢類商店，由新宿到涉谷，再到二子玉川，都沒有甚麼特別喜歡的，應該係沒有合價錢和心意的東西，因為喜歡的又太貴！未到這裡之前，上網見呢度有家叫蔦屋的家品店，這家店很大，因為售賣傢俬為主，所以對遊客而言，沒有甚麼能買回去！在這家蔦屋斜對面，有間好大間的DIY用品店，都是較重型的！這個地方很空曠，食店也多，適合喜歡優閒地 hea 半天，再去 shopping的人！

因為地方大，行到好累！返去新宿食晚飯，去左一間叫ねぎし的店，是專吃牛舌的店，這裡有中文菜單，餐牌有埋相，叫了客上等雪花牛舌套餐，有4片厚片牛舌，切開成八片，跟湯、小小菜、麥片飯和山葯糊，呢個糊味道有點怪怪的，其他都好好味！下次可以再食！

慢遊東京 Day 2 - 築地、迪士尼海洋

今日去迪士尼，例牌去一轉築地，好友介紹了一家叫鮨國的壽司、刺身店，今次要去試，去到築地場外巿場，先行一陣，見到大大個吞拿魚魚頭，影張相先，跟住去搵鮨國，要等位，我前面有兩個，後面有兩個，店內有五、六張四人枱，6、7個壽司 bar 枱，等左廿分鐘左右， bar 枱有人走，前面兩個坐左，下一張到我，跟住有張四人枱走，但係唔入人住，我諗我一個人，因為冇撘枱、冇掉位，所以唔比大枱我，而我未入坐，後面果兩個都唔可以入，等左5分鐘先有人走，剛好是 bar 枱，我可以入坐了，我坐低之後，後面果兩個先可以入坐！好友介紹了海膽飯，我另外叫了兩隻牡丹蝦，個飯鋪滿海膽，雖然唔係好厚的一層，不過都好吸引，太多可以會 over 左，兩隻唔算好大隻，不過都有隻筷子咁長！我唔客氣喇！好好味！好正！果然冇介紹錯！

食飽就去迪士尼喇！今次遊一下火車河，搭去迪士尼酒店影相，酒店外型好靚，入去睇睇，影左小小相先去海洋，聖誕節主題已經推出，好靚呀！ 出左一款 Duffy X Steiff 的 Duffy and Shellie May ，買返一對先！今年 Duffy 聖誕服飾唔太吸引，所以都唔買，想買家品又冇乜啱，只係買左 Winnie the Pooh 矽膠蓋同米奇飯勺，見到有猴年造型的公仔，迎合返中國人每年生肖，今次在樂園冇乜收鑊，早小小走，出返去新宿食野，去左華盛頓酒店食燒烤，貪佢近近地，返酒店方便D！