又去日本喇，每年都要去返次東京先至得！今次去五日，本來想去多兩日，不過D團體飛 package冇得 stay 多兩日，唯有去5日！
今次坐早機去，7：45要去集合地點取登機證，一早去撘巴士，剛走了一班車，要等半小時！其實車程半小時，等咁耐真係可以來回一轉，等車時見巴士站有條 link 可以check 巴士到站時間，下次 check 左先出門口！去到機場剛剛好7：45am，去E區搵EGL攞登機證資料，今次搭全日空 ANA，好耐冇坐過全日空，印象中佢地service 好好，依家都一樣，近年坐平價航空多，早已冇乜service 可言！我坐10：00機，已經可以將行李寄艙，辦理手續果位先生話我張團體票，旅行社幫我劃左位，在最後果幾行路口位，佢問使唔使幫我換前D，梗係好啦！改左坐第三行，近好多！
放低左行李去食早餐，去在翡翠食碗拉麵，坐到近九點就過關，閘口22號好近，見9:35先開始登機，仲有半個鐘，咪週圍影相，影左好似冇幾耐，原來已經9:45!即刻去登機，已經final call ，D人上晒機，我上機時前面仲有一個人，聽到空姐話仲欠一個，有人遲過我，不過好快到埋，因為我上機之後好快就起飛喇！
起飛一陣就派 nuts，派完好快派餐，今餐有燉牛肉飯或者忌亷意粉，揀左飯，味道一般，食完飯瞓左一陣，飛機上有小朋友扭計，最後果一小時都瞓唔到！
去到成田，落機要轉巴士去海關，今日出奇地少人，排十個人左右就到我，好快呢！行李一向都快，今次快左過關，行李一樣到晒！攞左行李就去搵巴士去 Shisui outlet，見巴士15：20開，仲有2分鐘，立即走去巴士站，原本想搵 locker 寄存行李都忘記左！去到30號巴士站已經15:19，見到冇車，唔通走左？原來剛剛返到！巴士可以放行李，太好了，得兩個乘客，準時15:20開車！開車十幾分鐘就到，中間冇站，落車睇定回程時間，預計坐17:00班車，如果買野遲左就下一班半小時後！今次想買個煲同埋手袋、鞋，有晒目標，就去揾，先去睇煲，呢間 outlet D款好"賣剩蔗"，即係最唔好賣既貨！見到個有坑紋煎 pan，可以電磁爐用，一萬円，但係太大了！又冇細D，想買燉盅，又太細個，想幫人買石頭，又冇！行左去 St.Cousier 呢間主要賣食物，之前姊姊常買這牌子餅乾伴芝士吃，之前在大阪 Rinku outlet 也有，呢度又好似冇大阪果間咁多野賣！不過我都買左小小野！然後去 Samantha Thavasa 睇袋，又睇唔啱，行埋 franc franc 、New balance都冇野啱！剛好仲有5分鐘就5點，閃人！巴士又準時到，回程先去 Terminal 2，然後先去 Terminal 1，都係頭先果個司機，我諗佢不斷來來回回！
返到機場五點幾，就用之前在旅行社買的巴士券換車票，最快下一班車要18：05，其實班次都密，應該十分鐘一班，不過多人撘，唯有坐坐等車，坐巴士好處係真達酒店門外，雖然車站在華盛頓酒店，只是在我住的 Sun member 旁邊，不用在街上拉行李行好遠，唯一係離火車站遠，每次出門和返回都要行一段路，上次住歌舞技町果邊，雖然離火車站不遠，但要上上落落車站，又要過馬路，始終在新宿，沒有在火車站上蓋的酒店！住邊間都要行！
巴士同火車的車程時間相約，在巴士上睡了一陣，去到酒店19:19，即係一小時十五分到達，先去 check in，住五樓的 double bed 雙人房，放低行李即刻出去，先去高島屋，去到差不多要關門了！還是後天再來吧！在附近行左一陣，在 Lumine 地庫買在士多啤梨同埋香蕉今晚食，跟住去食晚飯喇！第一日先去磯丸水產！
在南口出來，在甲州街道行落去，過左 First kitchen 個橙色大鐘，行多兩三個街口，在大大間電器店 Labi 旁邊入去，呢度幾條街都好多食店，淨係磯丸水產都有三間，今晚見三間都唔爆，去返第一次去果間，先整個甲羅燒，即係蟹蓋，仲有貝殼類 set、蝦、刺身盛合，蟹蓋仍然保持水準，其他就水準下降左，刺身有D乾，蝦細隻左，冇咁好食！食完返酒店食埋D生果先！
