Haunted Halloween

今個月第二次來，上次冇時間玩鬼屋，今次就冇時間玩其它野！今次都係三點幾入到去，先去玩黑色聯盟私會，之前在 App 儲左五萬分，可以玩拍片喇！玩左一次再去儲分玩過，跟住去 D shop 睇下野，比上次多左野賣，仲發現原來 Duffy 專櫃搬左去第二個位，仲寫住最多只可以買5件 Duffy 產品！

我地影左一陣相就出去睇巡遊，好少企在後排，今次企正米奇飛船停既位，都好好氣氛，睇完就去灰熊山谷，在灰熊谷玩左陣，先至去森林果邊玩鬼屋，排左半個鐘左右，入面完全同舊年既無頭谷一樣，好快行完，跟住再去排詭墳學院，呢個係新既，唔同舊年間酒店，所以勁多人，仲要排好耐！條龍有時唔郁，足足排左成個鐘！但係入到去只係行幾分鐘！都唔知點解要排咁耐 ! 玩完出來已經夜間巡遊，睇完已經好攰好餓！先諗起入園後幾乎全日冇坐低過！所以連煙花都冇睇就走，趕快出去食飯！