都係早兩星期先至撲到兩張飛，好開心呀！個位都唔算遠，比影相出黎近好多，今日都係遲左開場，一開場有一大班七八十年代經典人物做型的 dancer 跳舞，有老夫子、大蕃薯、林亞珍、徐小鳳、李小龍、梅艷芳等等，然後草蜢同軟硬佢地輪流從台下升起，連續唱左幾首快歌，氣氛高漲，嗌到聲都沙埋！跟住停落黎傾下計，有林海峰講野，當然係好好笑，跟住佢地就講佢地會大戰五個回合，以觀眾的歡呼聲同掌聲既分貝計分，好明顯軟硬成晚既掌聲都多少少，不過最終仍輸2分！不過都係遊戲一場啫！Encore 時段，佢地要唱新歌＂山頂既朋友＂，所以要搵左個山頂既朋友出來，用 spot light 指左一個女觀眾出來，個女仔個名叫 Maggie ，自己一個人來睇，佢可以在台上近距離同佢地影相拍片，佢地仲圍住佢唱歌，之後佢地仲送左張十一月一號既飛比佢再黎睇，仲要係坐笫一行呀！真係羨慕死人喇！
沒有留言:
發佈留言