日本零食

網誌日期：2008-04-20 00:49

尋日睇飲食男女,話Taste做緊日本美食節,雖然佢地經常都做呢類promotion,不過見今次d野食都有d特別,就去睇吓,原先想買雜誌介紹既青蘋果片,不過呢類好似薯片咁既零食,我食得唔多,都係唔買,見到有款 Apple Choucake, 泡芙蛋糕,有盒 sample 响度,好似幾得意,而且泡芙應該唔太差吧!買盒試吓,另外有款Kobe crepe cheese cake, 好似都ok喎,而且cheese 都係"賣飛佛"......見到哈蜜瓜 Steam cake,都可以飽肚d掛?等我試完再同大家分享吓! 另外買左幾個碗麵試吓........我食左"東京"嗰個,味道好普通........原先想買出前一丁日本版,但係$45/5個,貴幾倍,唔會好味幾倍啩??所以無買,行行吓見到d好大隻既東菇,睇吓我隻手指公既比例就知有幾大!!唔知係咪基因改做????

今日無端端三號風球+黑雨,尋日又話唔會改掛三號,呢個"浣熊'真百厭,當堂凍左好多!

Wood Stone

網誌日期：2008-04-10 22:39

今日去左Mega box ,接駁巴士好多人坐,雖然唔使排隊,不過都上車既人都好密,每次去到Mega Box門口都好多人,但係入到商場就水靜河飛,d人唔知去晒邊,d商鋪九成都無人客,好靜!唔知點維持生意?去厠所都好驚,條巷又靜又無人,都幾陰森....!

去到2樓果間叫Wood Stone 既餐廳,都有幾枱客,不過得set lunch 食,我地叫左泰式肥牛湯烏冬同西冷扒,個湯白色既?响果幾片肥牛上落左d醬,好似老麥用黎點雞翼果d辣醬,都幾得意,不過好細碗,食唔飽,呢個應該叫下午茶餐,當lunch 食點夠呀?

搭車返去德福時,已經好肚餓,我去左Italian Tomato 食cake, 想食淨士多啤梨蛋糕,個店員話無, 唯有揀左士多啤梨芒果蛋糕,叫左杯 latte , 食完走果時見餅櫃新切左個淨士多啤梨蛋糕???又話無???跟住去左L'Occitane 買佢地果 Cherry Blossom 系列,味道好清香!!! 今次送果個袋都幾靚,送果支細既 body wash 諗住攞返公司用,事關公司個 toilet d 皂液溝左水,管理公司勁cheap, 每次按皂液,就會咇d 皂水出黎,好難頂!!!

天生冠軍相?

網誌日期：2008-04-10 01:37

今日見到慧姸雅集既義賣counter, 果度有幅海報貼滿港姐d童年照,上下有幾個港姐既近照,响果d童年照片加左紅色框既就係有近照個幾個港姐,比大家佔吓邊個小女孩係邊個港姐(嗰度冇寫答案)...我估紅包框嗰三個,左至右係陳法蓉,鄭文雅,楊寶玲 (佢個樣同表情都無變一睇就知係楊寶玲!) 而下面紅框嗰果係楊思琪, 隔離嗰個好似李嘉慧,其餘果d真係睇唔出係邊個??

Miss Pettigrew lives for a day

網誌日期：2008-04-04 00:31

個Blog幾日用唔到,不過都無乜特別野,今日去睇左呢套無宣傳既電影,女主角 Amy Adams 係電影 Enchanted 的那個公主,在這戲內的她好像仍停在之前的公主角色裏,套戲一般啦!睇完最記得d好重英國口音既英文!
今日响商場遇見阿傑,佢做物業管理,同佢傾左一陣,吐吓苦水,佢話份工好悶,好似日日等時間過,我諗都係打份工嘟,做乜都會有悶既時候,傾傾吓,都驚阻住佢,約左佢下個星期出黎食飯,睇吓約唔約得齊人啦!

晴晴

網誌日期：2008-04-01 01:13

前日Gary 同魚魚帶埋佢地個女晴晴黎探我,好開心!我地一齊去餐廳食野,睛晴好乖,又肯比我抱,佢七個月大啦!個樣似爸爸多d,個面尖尖,咀仔尖尖,對眼似魚魚多Ｄ,仲好多頭髮tim !我同佢影左幾張相,不過影得好差,唯有下次影過.

尋日成班人去左禾輋大排檔食飯,同Tommy fair well, 嗰度d餸好細碟,每個餸每人夾得一件,叫左13個餸,有三個賣晒,食完都唔飽,埋單先知原來好平,早知打孖叫餸啦!我地11個人食左10個餸連埋汽水啤酒都係三佰七,其實叫多三四個飯麵都夠飽,應該$500有找,不過夜啦,個個都想快d走,我地仲講笑話趕住返屋企煮麵食!!!