2023年10-11月東京半獨遊 Day 5 - 昭和記念公園、吉祥寺、新宿

今朝 check out 完，行過對面另一間酒店Presso Inn 放低行李，就出發去玩Segway !

上次去昭和国營紀念公園玩 Segway，已經係2019年，今次其實都考慮玩唔玩，不過冇乜地方要去，所以都係照book咗，今次預時間爭咗少少，預約時間係10:00我遲咗2分鐘先到，今日有其他學員一齊玩，另外有兩pair 四個日本人，今日嘅導師係一位女仕，佢話會用Google Translate，今次嚟日本，多咗好多日本人用Google Translate，方便好多！

我哋先入去辦公室睇基本教學同埋講解安全須知，然後就戴頭盔出去練習，五個人當中有三個都玩過，所以掌握得都算快，練習完之後大家就出發，今次嘅行程同我上次玩有少少分別，當然去公園中央果棵樹就一定有，今次喺大樹附近加咗條好短嘅火車軌俾人影相，因為係呢個公園開園40周年紀念，所以整咗啲裝飾喺度俾人影相，今日天氣好好好多人都帶寵物嚟影相，今次亦都有同上次一樣，去一間茶屋嗰度食和菓子同埋飲抹茶，呢度旁邊有個草地，擺咗好多油紙傘做裝飾俾人影相，我都影到過晒鐘😅 導師幫我哋影咗好多相，佢亦都好照顧我，整體嚟講玩得好開心，唯一可惜係呢個場冇自由活動時間，一定要跟着導師行😅 今次去到好出名嗰條銀杏樹通，D銀杏葉未轉晒黃色，地下有少量黃色樹葉，上次嚟就遲咗，今次就嚟早咗，聽講佢地而家夜晚仲有D亮燈活動，不過仲未開始，可能遲多兩三個禮拜先係最佳時候！

我地玩左成兩個半鐘！返去佢哋個辦公室度總結，跟住再同老師影張合照就走，搭返JR青梅線直接出去吉祥紙，因為之前睇咗有間食魚生飯幾點，所以特登去試吓，去到搵到間店舖見佢冇開，以為佢淨係開夜晚，但係睇落好似執咗笠，唯有搵其他嘢食，撈過呢度好出名嗰間 Satou ，好多人排隊買佢哋個炸牛肉球，我就冇乜興趣食炸嘅嘢，我記得佢樓上有餐廳，所以改咗去呢度食牛扒，上樓上嗰條樓梯好直，上到去餐廳就唔係好大，有一張鐵板燒嘅枱，大概坐到六個人，另外有幾張兩人枱，我諗成間店最多容納十幾個人客！店入面只有三個客，我就坐咗鐵板燒張枱度，叫咗個當店人氣No.1 嘅 Omakase steak lunch set ，話係稀少部位使用，即係唔知咩部位，佢比乜你就食乜 🤣 跟餐牛扒只有120g ，可以每10g  ￥330 加大份量，我加左30g ，先嚟前菜沙律，睇住佢煎牛扒，牛扒連埋白飯同埋湯一齊上，雖然我話要五成熟，但係我覺得佢都係生左D ! 味道都唔錯，係份量少左D😅 食完之後，在吉祥吉行左一陣，又去返新宿，因為尋晚泰國趕急，幫朋友買完飄零燕啲嘢，自己都冇時間行，所以今日去補返飛🤣

去新宿行到黃昏，又搵嘢食，我記得之前喺網上見過，大阪有間漢堡包店話係日本No.1，見歌舞伎町嗰邊有分店，又走去試吓，呢間叫做 Shogun burger 的漢堡包店，店嘅面積唔係好大，先在門口買飛，然後坐低等，佢會送餐俾你，店入面多數係吧枱位，有幾張二至四人枱，都已經坐滿客，由於間店好細又係open kitchen，所以都有陣油煙味，我叫咗個芝士burger 同埋一杯檸檬梳打，然後就坐低等，見到佢牆上面掛咗個獎牌寫住 World Burger Champion 2022  都真係攞個獎，佢呢度嘅漢堡係即叫即做，牛肉都係落咗單先至煎，所以要等得耐少少，漢堡包個麵包都好鬆軟，牛肉亦都好Juice，好食！ 一路食都見佢啲人客不斷流轉，一路都有客入嚟，食完果D又好快就走，所以都好快有位！

再去高島屋行吓，在地庫買左零食做手信，見頂樓做緊大北海直展，好多野食賣，我只係行吓冇幫襯，行到人地差唔多收工就走！返去東京站，今次未食鰻魚飯，知道對酒店後面有間鰻魚飯店，就過去試吓，雖然佢仲有35分鐘就關門，不過都可以照落單，叫咗個鰻魚飯三食，佢呢度嘅鰻魚係名古屋風，即係魚皮係香脆果種，好味！我都係比較鍾意基本食法加少少 wasabi 😋😋食飽返酒店執行李，明天走了！

酒店住後感：
Keio Presso Inn Tokyo Station Yaesu
八重洲東京站京王布萊索旅館
之前對 Presso Inn 酒店冇乜印象，感覺類似Apa 果D細細間，今次揀呢間，都係貪佢就在尋晚間酒店對面，方便我搬酒店，而且喺東京站，都有D擔心酒店可能會有D舊，不過出乎我意料之外，接待嘅職員都好有禮貌，酒店內部應該翻新過，房間都好新淨，而且比想像中大，起碼有張書枱，唔係坐床邊嗰種，係獨立有張凳可以拉出嚟坐，感覺良好！

 

2023年10-11月東京半獨遊 Day 4 - Harry Potter 、池袋、新宿

前幾日臨時決定去 Harry Potter ，因為買唔到飛諗住放棄，等12月先去，好友話見到有飛賣，上網睇真係仲有飛，不過2:30 ，今朝可以hea 吓！🤣

先去酒店後面 Tokyo Midtown 地庫，食個早餐先！去左根室花まろ，呢間立食壽司，在東京丸の内果邊分店係勁多人，呢間係冇人！可能夜晚先至多人吧！剛剛開門，得我一個，揀左幾款壽司，呢度壽司唔係特別好食，唔知點解咁多人，可能食材種類都係來自北海道，同東京食材有D分別，價錢亦唔貴！雖然有英文餐牌，但係當日嘅精選，或者特別寫喺黑板上嘅期間限定壽司就冇英文，有啲漢字都可以估估下，叫一兩試吓，不過有啲伏伏地😅

食完壽司，就出去新宿行吓，去新宿三丁目幫朋友買嘢，買完嘢行過對面嗰間 Beams，佢有四層高，平時都係在地下嗰層睇吓啲小物，今次想去樓上望吓，睇啱咗件外套，就買咗一件，跟住再去Disneyshop，已經出咗好多聖誕主題嘅產品，不過真係睇唔啱，再行過去 Lumine 嗰邊，又買咗條毛毛波波手繩🤣 跟住有啲攰，就買咗杯水果茶飲，可以坐一陣，就出發去豐島園！

在新宿可以搭都營大江戶線，直接去到豐島園站，之前嚟過幾次豐島園庭の湯浸溫泉，當時呢度係一個好大好舊嘅遊樂場，而家改建咗做 Harry Potter，以前遊樂場個入口，而家變咗公園，要行一小段路先去到Harry Potter，其實呢度正式叫做 Warner Bros studio tour Tokyo ,  The Making of Harry Potter ，其實係介紹Harry Potter套戲入面嘅製作，由戲服到場景每一個細節都仔細講解，行去入口嘅位置，沿路兩邊都中咗樹，都好有學院feel，一入到去，頭頂已經有一條巨龍，不過好多人入去嘅時候都睇唔到，左邊係商店，右邊係餐廳，我只係影咗幾張相，留返出嚟之後先去餐廳同埋商店，一入去就已經要排隊等，因為佢會分段俾人入場，喺等候區排咗一陣，入去第一個位置就係好多幅畫像同埋有幾個係屏幕， show返Harry Potter入嗰啲角色，屏幕上面嘅畫像就會郁，呢度介紹咗一陣之後，就入去學院嘅大廳，還原咗戲入面嘅報警，仲有一D公仔着住喺入面嘅戲服，當然個個喺度影相，呢度只可以逗留10分鐘，就要趕我哋走，因為到下一轉人客入嚟，跟住嘅area就係介紹戲入面嘅建築，跟住就係學院入面嘅移動樓梯，呢度有個互動區，要掃QR code，登記你嘅email Address，然後喺個六幕前面拍幾秒嘅短片，就可以上返佢個網站度download返自己條片，不過佢喺移動樓梯下面有啲相框，入面有得預覽你條片，好多人都就咁影低或者拍低，我影低就算，因為覺得個效果唔係太好😅

再行入去係學生居所嘅布景，跟住係魁地奇區，展示左各款比賽服裝及掃把，仲有一個影相位，比一班人一齊扮睇緊比賽嘅觀眾，大家一齊大聲歡呼，然後影低佢，你可以買返張相，不過我見同咁多唔識嘅人一齊影，所以冇玩到！😅

跟住係校長鄧不利多間房，呢度有個儲思盆，不過冇乜野睇，呢度D佈置做得好仔細，好靚，如果認真睇，可以睇好耐！

然後係服裝同道具，魔杖，有個魔法課室、圖書館，亦都開始出現佛地魔，佢身後就係森林，有海格，撞爛咗嘅藍色私家車，入到森林𥚃面有巨型蜘蛛同催狂魔 ！

再行出去就係室外地方，有餐廳，有小食店，小食店主要係買爆谷同埋 Butter beer，我就冇買來試，因為我知道杯 Butter beer 係好甜同埋唔好飲，我哋形容佢係雲呢拿味嘅糖水😅  呢個室內位置仲有架雙層巴士，同埋有間屋，應該係 Harry 細個住嘅地方，仲有條 Hogwarts bridge ，兩個景點都可以入去影相，不過今日好多人，留返下次同朋友嚟先一齊排隊！

沿路行，就去左9-3/4  月台，有火車同行李車可以影相！旁邊仲有間小商店，我就買左個環保袋！

繼續沿路行，就係後期製作介紹，包括建築物表面嘅裝飾，角色人物模型、音響效果，仲有個海格嘅頭show咗喺度做示範😂  creature shop 介紹戲入面嘅動物製作，其他視覺效果，呢個位就係俾你再綠幕前面玩騎掃把拍片嘅地方，當然條片要俾錢，我就冇玩到！又係等下次先一齊玩！

再行就係斜角巷，不過D商店、金庫只有外牆，只係比人影吓相，裏面唔係真係一間商店，過左斜角行，呢個位係好多巨型海報，以魔法界嘅報紙同海報做主題，仲有D糖果盒佈置！

離開呢個範圍就係成個魔法學院嘅模型，都整得好靚！行落去，就去返入口嗰間商店，呢間商店係大好多，貨品亦都係最齊全，呢度嘅魔法杖選擇都好多，不過我覺得佢價錢略為貴咗啲！仲有好多紀念品同埋手信，收銀處排咗條長龍，我都買咗少少嘢，收銀處旁邊就係賣魔法袍嘅地方，呢度D袍都好貴，所以見好多人都係着嚟影相冇買到😅😅

有商店行返出嚟，行過對面餐廳食啲嘢，全程只係用咗三個鐘，出到嚟都係六點，呢個鐘數餐廳入邊又唔係好多人，我買咗個 spare rib ，仲可以自己一個坐成張長枱，不過後來都係有人搭枱，因為其實張枱可以坐8 個人😂 食物味道都唔錯，係份量細左D ! 

食完野就走，行返出去先見到原來入口有條巨龍喺天花，而家先睇到，可能因為入場嗰陣個個顧住check飛，冇抬高頭望，出到嚟已經天黑，又影返少少夜景相！

走嗰陣特登搭西武豐島線，就係想睇吓個月台，同埋睇吓影唔影到Henry Potter果架火車，之前好友話等咗半個鐘先至撳到，去到月台嗰陣有架普通車喺度等緊客，所以我決定等多一班車，個月台都佈置得好靚，所以先喺度影吓相先，跟住見到有車嚟緊，果然係Harry Potter車，我就嗱嗱聲影幾張相上返架普通車，因為Potter 㗎火車裏面係同普通車冇分別，冇特別嘅裝飾，所以唔想再等多一班車，所以影完即刻上車，因為仲有2分鐘就開車！

呢架車可以直接出去池袋，平時比較少去池袋呢個location，今次特登去搵拉麵店銀座篝！知道呢間店唔使排隊，因為個位置都唔係咁容易搵，我就一早上網search咗資料，見到落車嘅位置同拉麵店都有啲距離，都係站頭行到去站尾咁樣啦，入到去地下街行到差唔多嘅時候都未見，諗住望吓地鐵下街張指示圖，原來就喺指示圖對面，擰轉身就見到🤣

果然冇人排隊，大把位！反而旁邊美登利就排晒隊！呢間銀座篝相對比較舊少少，最緊要食物保持到水準👍🏻👍🏻 我叫左黑松露雞白湯拉麵，正！好味，撞嗰陣仲買咗支松露油返去🤣

食完拉麵，過返去新宿，幫好友去高島屋嗰間Hands買野，呢間 Hands 前身係 Tokyu Hands ，唔知佢係改咗名定係易手左？不過成間店嘅格局同以前冇乜分別，我諗係改咗名！要幫好友買飄零燕嘅產物，因為今年係佢50周年，好友話佢家姐好鍾意，所以幫佢買，不過佢想買嘅嘢都唔齊，好多都冇，因為佢係Pop up Store 嘅形式做短期，所以我諗好多嘢買完就冇！

買完嘢都九點了，要返酒店了！今晚要稍為執一執啲行李，因為聽日又要轉酒店，原本想book呢間酒店三晚，但係佢得兩晚，所以住埋今晚，聽日又要去第二間酒店！