Corefy

今日同好友食lunch ，去左呢間樓上café ，呢度有D露營佈置，又有D波希米亞風格的裝飾，不過要除鞋上去坐，我地都係坐返普通位！

餐牌食物都係好多咖啡店咁，有意粉、漢堡包等，我地叫左三文魚扒、漢堡包🍔，同埋兩款茶，食物同飲品都唔錯！今期做緊綠茶🍵食品 promotion，有綠茶 waffle 、甜品和飲品，我地左叫到，不過見隔離枱食左一半就唔食，唔知係唔好食定係太飽呢？😅

同好友傾左，下次放假約佢去放狗，因為好耐冇見佢隻狗🐕喇！
 

毒舌大狀 A Guilty Conscience

 

林涼水本來係法官，後來轉左做律師，佢同拍檔方家軍處理曾潔兒的謀殺女兒案件，因為他的大意，令曾潔兒被判入獄！令他非常後悔！他𨍭當平民律師，一直未有放棄為曾潔兒翻案……！

睇呢套戲，基本上係睇黃子華，睇預告嘅時候已經知道幾場法庭戲，佢嘅對白應該係非常之精彩！有時都唔係好明，黃子華一向都係好好口才，唔知點解之前拍親D戲都係票房毒藥！可能運氣嘅嘢話嚟就嚟，好似周潤發咁，初初都係票房毒藥！後來都能夠大紅大紫！

今日同好友兩公婆同佢地個仔一齊食晏，第一次見佢個仔，食完飯去買戲飛嘅時候，竟然送DVD，隻碟係B J單身日記生得喇baby ！😅

小香港大節日微型藝術展

今日相約好友食飯，去咗荃灣段純貞，食完飯見到商場有個展覽，都係D微型展品，全部都係香港嘅微縮影，好多都整得好靚好得意，都好值得去睇！😍

 

海港開年飯

年初一，相約好友一齊食飯，往年我哋都有一齊食飯，但係舊年因為好友屋企接連有白事，所以冇食到，今年終於可以聚一聚！

好友訂左近愉景新城呢間海港，主要係想食長腳蟹，同埋飲佢哋個花膠燉湯！呢間海港D食物水準都唔錯，係服務差D ! 我哋另外仲叫咗一D小菜，最重要係叫咗個齋煲比另一好友，因為佢逢初一、十五都要食齋😅

蘿蔔糕2023

又整蘿蔔糕，今年唔整咁多，同好友計好咗，每人大概要三底左右，所以買材料都可以少好多！早幾日先在家練習一次，自己整咗兩底，都好滿意！

到約左好友呢日，未去買材料之前，先去九龍城食個早餐，食完早餐去買定牛扒今晚做晚餐，買咗兩塊牛扒🥩🥩同埋一舊牛舌，跟住再過隔離店買少少海鮮，見到有好大隻北寄貝，所以買咗三隻做刺身，另外買咗三隻日本風雅生蠔🦪，跟住去大成街街市買蘿蔔糕材料，但係買唔到方形膠兜！可能因為仲有兩日就過年，好多間都賣晒，最後我哋買咗兩個大錫紙兜代替，因為都係自己食，另外買幾個圓形兜，就返去就開工！

先食咗生蠔🦪同埋北寄貝，個北寄貝好好味好爽， 生蠔🦪就一般， 食完野就開始洗洗切切 😅

蘿蔔糕9底份量：
蘿蔔(去皮後)- 12斤
粘米粉-960克
澄面-240克
馬蹄粉-58克
總水量(蘿蔔出水量＋ 開粉漿用水量)-1886毫升
片糖一塊
蠔油-10湯匙
胡椒粉-2茶匙
雞粉-1茶匙
臘腸潤腸共6條
臘肉3條
瑤柱2両
冬菇3兩

今次好快手攪掂，分開兩次蒸，蒸爐每次可以蒸三層，蒸緊蘿蔔糕嘅時候就煎牛扒、煎牛舌、用焗爐焗左條一夜干魚，仲炒咗碟豆苗！好正！🤤🤤

今次蘿蔔糕整得好滿意，攞咗一底俾好友嘅媽媽，佢都話好好食，過完年再整多一次先得！😆

 

Afternoon Tea Room

之前經過呢間餐廳好多次，今次第一次嚟食，在日本這間店唔知有沒有餐廳，通常見到都係售賣餐具的店，今日間餐廳都唔多人，睇佢個餐牌都係好多日本餐廳嘅類型食物，叫咗個雞肉蘑菇意粉，今期主題係士多啤梨，所以叫咗杯士多啤梨🍓茶，食物唔錯，茶就一般！

仲有幾日過年，在尖沙咀四圍行吓！周圍都有新年氣氛嘅裝飾！夜晚又去重慶大廈食飯，跟住再落佐敦佳佳食甜品！😋

 

米炊 Kometaki

訂完蛋糕，上去商場睇吓有咩食，呢間餐廳經常見到要等位，今日竟然有位，又試吓佢！

睇店名都知以米為主食，佢主要做日式蛋包飯配咖喱汁，飯有白飯或者十六穀米飯，M4草飼澳洲和牛肉眼扒飯、北海道帶子醬油虎蝦奶油大啡菇蛋包飯，蛋包飯話係用蘭王雞蛋做，份量都好大，牛扒同海鮮嘅味道都唔錯！價錢亦都唔貴，唔怪得平日排晒隊！

 

Cafe life

過幾日姊姊生日，去尖沙咀訂個蛋糕，呢間由日本廚師主理，之前買過疏乎厘芝士蛋糕🎂，又買過兩件蛋糕🍰🍰，巴斯克芝士蛋糕同無花果拿破崙，今次買士多啤梨拿破崙蛋糕🎂，好食！😋😋

 

窄路微麈 Narrow Road

 

亞窄獨自經營清潔公司，自給自足緊緊夠糊口，開工架車壞壞哋，都唔夠錢換車，遇上疫情，幸好有一些消毒嘅工作要做，要聘請人幫手嘅時候遇上有經濟困難的單親媽媽Candy，雖然她的工作能力能夠勝任，但係手腳有少少唔乾淨！亞窄比機會佢，兩人漸漸做到成績，可惜Candy 一個錯誤決定，令呢兩個微塵一樣的人，陷入困境⋯⋯！

近期好多港產片都好受歡迎，呢套都唔例外，我個人應該套戲都幾好睇，今次張繼聰搣甩咗搞笑作風，做返個認真角色都幾好👍🏻

Five Guys

呢間Five Guys ✋🏻餐廳已進註香港幾年，而且已開左幾間分店，我就從來未去過！今日趕住睇戲，見冇乜人就試吓！

揀左芝士漢堡🍔，原來配料係另外揀，都係洋蔥蕃茄醬料咁啦，我就冇食薯條🍟，飲品方面主要都係汽水🥤，可以添飲，我就要咗支水，漢堡包🍔牛肉係即叫即煎，所以都要等一等，味道都幾大，而且份量都幾大，呢度好似有花生食，但係我唔係好覺眼有！可能我大鄉里唔識😅

 

2023-1 廸士尼

新年前去返次廸士尼，防疫放寬咗，迪士尼仍然係逢星期二四唔開，我以為佢會開足七日，不過都好多人，都唔難發覺多咗講國語嘅人！

新年前當然有好多新年禮品售賣，選擇都好多，見到有D賀年禮盒咁都幾得意，我就好似往年咁，必買一包迪士尼利是封🧧！今年利是封都幾靚！園內仍有些聖誕裝飾！今年係兔年，Stella Lou 🐰無處不在！🤣🤣