闊別三年- 2022年10-11月東京快閃五天遊 Day 3 東京廸士尼海洋

原本尋日去廸士尼，見天氣預告話40%機會落雨，所以改今日去，結果呢兩日都冇落雨！仲幾熱添！今日一早入園，因為上網睇人介紹，話依家廸士尼已經冇 fast pass ，取而代之有 stand by pass 同 premier pass ，話如果想買 Lina Bell 產品，要攞 stand by pass 才可以入店，而stand by pass 在 App內取，App GPS 要 detect 到你入園才可以取 stand by pass 🥹，所以要去到先有得攞！所以要一早入園！

由東京站轉京葉線去舞濱，去到東京站搵一搵間 NewYork Perfect cheese 睇吓仲喺唔喺度，仍然在近住丸の內南口個5號月台入口旁邊！ 佢只此一家別無分店，淨係做本地人都夠做！知道佢仍在就過兩日嚟買！落去撘車，咁啱班車係快速，停少幾個站！

今日好多人！諗住 Halloween完左，聖誕 promotion 又未開始，應該唔會好多人！原來明天是日本公衆假期，唔知係咪因為 long weekend 前席，所以咁多人呢？ 定係本身佢有冇假期都咁多人呢？我見好多係4人以上，一大班人咁，95% 係日本人，遊客見外國人及疑似菲印泰亞洲人多，冇乜聽到廣東話及國語！去到售票處超多人排隊，睇清楚係排隊入場唔係排隊買飛，售票處係冇開！搵職員問吓，原來日本廸士尼已經冇實體飛賷！😱😱😱之前上網睇見人地話上網買飛一定入到埸，同埋 premier pass 一定要在 App 買，以為門票可以入園買，因為梗有D老人家唔識上網，點知係冇㗎！好彩職員協助我去客服度，比我買一張飛！唔使白行！不過佢講明只此一次，樂園真係好！買左最後一次實體飛就可以入埸喇😅😅

入到去睇吓攞唔攞到stand by pass 係攞唔到，但話 not available ! 冇計！唯有等下次先買Lina Bell ，在門口地球影完相，行去最近果間商店，見到有大量 Lina Bell 賣！原來已經唔使攞 pass ！可能之前睇D資訊已經 outdate 左，而且2022年11月最 update 係唔使攞 standby pass ，可以直接去 shop 買 Lina Bell ! 之前都覺得要攞 pass 買野呢個安排好差，好多人遠道而來，即使本土人士都可能第二個都過嚟，而且零售係樂園主要收入，冇理由限制自己收入㗎！唔知係咪比人投訴定咩原因取消限制，咁先到喏！

去睇吓 gondola 多唔多人，都好多！見旁邊間餐廳就快開門，唔多人排隊，又去排吓！呢間未食過，在 Gondola 旁邊，當然係食意大利菜！有 pizza🍕有意粉 🍝，我叫左個 set 有前菜、意粉、甜品，頭盤有蝦同帶子，意粉揀左海鮮墨汁意粉，甜品造型好有聖誕氣氛，好靚，飲品叫左杯檸檬特飲，有少少酒精，兩片檸檬砌成個心型，好有心思！食完野買埋套叉同匙羹🥄！

食完野四圍行吓影吓相！行到隻船度，去買條骨付雞肉腸食！🍖好味道！毎次必食呢個腸！其他小食亭都超多人！間間都大排長龍！行去 Aunt Peg’s 小屋度，有 Duffy 同 Lina Bell 公仔比人影相，又去排吓，每次都幫襯影相！

影完就去玩 Soaring ，條隊比上次長，排隊果陣有個日本職員用英文問我係咪香港嚟？佢點知呢？🤔 佢話佢去香港做過野，有香港 passport 添 👍🏻 今日好曬，全程曬住排隊，好彩我有遮☂️😂，唔使曬到標晒汗！排左個半鐘先入到！玩就得幾分鐘😅 已經第二次玩，雖然望到旁邊同上面D人，上層D人對腳仲遮住營幕上面添，但係祼視3D 現場感好強勁，對畏高人仕嚟講都係驚！😅😅

玩完 Soaring 行去買隻熱狗食！一年得一日會食香腸，就係今日！😆 佢個茄汁同芥末醬包個設計係最出名，我唔知其他地方有冇，因為好少食熱狗！🌭😛

行返去鬼屋果邊，又有Duffy 擺設可以影相，今次係車仔上擺晒 Duffy and friends 公仔，又去影相＇又係今日個攝影師哥哥，佢都認得我😄

跟住想去玩 Toy Story ，又係超多人，要排90分鐘 🤦🏻‍♀️ 都係唔排喇！有D攰，想去隻船度食晚餐，但係 full booking ，要有人 cancel 先有位！食唔到個米奇麵包呀！

依家廸士尼海洋冇左夜間海上滙演，2020年已經冇左，要出年先有新野 😔得返煙花，所以都唔留咁夜，早小小走，出返去東京站，原本想去附近搵食，之前在 IG 睇過在東京站附近的大廈內，有間叫万作，想去試吓，去到已經 full左，見到有之前在北海道食過果間根室花まる壽司店，但係連飛都派晒🤦🏻‍♀️🤦🏻‍♀️，唯有行返去東京站入面睇吓有冇野食，呢度有個 Area 唔知係新開定係翻新左，以前冇見過，要上一層，有幾間食店，見有間壽司店 あクそ鮨し，又去試吓，開頭店員話冇英文得日文，坐低後又比張英日對照 menu 我😅，原本佢落單係要自己手寫食乜嘢，咁就易啦！照抄咪得囉🤣🤣叫左10件壽司，賣相麻麻，蝦有蝦腳未清😅係大拖羅好食D，其餘一般！

食完野返酒店，在火車站內有人擺檔賣緊生雞蛋，同相關米、醬油等，見佢D蛋室溫保存可以擺到20號😍但係要買6隻，同埋生雞蛋要配白飯先好食！唔知生雞蛋可唔可以帶入境呢？🤔

闊別三年 - 2022年10-11月東京快閃五天遊 Day 2 深谷花園 Premium Outlet，新宿

今朝遲咗少少起身，尋晚好好瞓！

今朝先去飲奶！🤣🤣在秋葉JR 車站的6號月台有間牛奶店叫做”酪”，有好多牛奶選擇，即買即飲，今次揀咗北海道4.0牛奶，好味！

飲完就去搭車，要搭上野東京ライン，我搭咗車落東京轉車，其實蠢咗，因為架車會經過上野，我應該搭相反方向，搭兩個站去上野轉車先啱！依家前後搭左6個站😅，去到東京站，在8號月台搭 9:14  高崎線方向班車，排隊條線係橙色，寫住高崎線嗰條，搭左一個鐘多D，應該要在熊谷站轉車，但我 miss 左落車，唯有搭多一個站去籠原站搭番返轉頭😅 去到熊谷出閘轉秩父線，呢條線班次唔密，最快幾分鐘，最耐半個鐘，視乎你幾點搭，車站有時刻表，東京搭去熊谷車程要65分鐘左右，可以預一預時間。在秩父線熊谷站月台已經有架車等緊客，架火車好靚，仲有幾分鐘先開車，影吓車身先，呢架車冇乜人搭，附近都好郊區 feel ，要搭8個站去深谷花園，用左22分鐘，沿路D車站係好舊嘅，可能因為呢度住宅區，所以人又少，車站又舊，一去到深谷花園站，唔同晒，因為翻新左，成個站又新又靚，仲有好多花束裝飾，離遠已經見到個outlet，我諗好多日本人都係會揸車去，見停車場泊咗好多車，但係火車就得幾條友落車行過去

一入去見到有野食，有間函太郞食壽司的，我之前去過一個 outlet 都食過，麻麻地，隔離有間食鰻魚嘅，去日本一定要食鰻魚，只有日本鰻魚先係最好食，在櫥窗睇咗好多個套餐都想食，最後揀咗白燒．蒲燒鰻魚定食，可以試到兩款鰻魚，份量唔會太多，因為想留返肚陣間飲咖啡！未到 lunch time 大把位，入面全部都係四人枱，當然超過4人可以再拍埋啲枱啦！我就一個人坐咗側邊梳化嘅四人枱，真係唔係幾好意思，不過我都會好快食完走，唔阻住人做生意！呢度係用平板落單，佢圖文並茂，雖然冇英文，但係都可以看圖落單，除咗叫咗定食之外，我再加多一個串燒鰻魚肝，例牌叫杯橙汁！個鰻魚好好味，好感動呀！好耐未食過咁好食嘅鰻魚喇！喺香港食嘅鰻魚，一定係腥嘅，同埋個味係唔同嘅，可能唔係新鮮整嘅關係！頭先落單果陣叫左少飯，依家唔夠食🤣 唔係因為好肚餓，係因為鰻魚送飯係好好食，所以變咗啲飯唔夠食！🤣

食飽就出去行吓，睇過outlet嘅 guide ，商店都唔算好吸引，除非有個人喜好的牌子，可以睇吓官網資料先，否則要考慮是否去，因為都好山長水遠過去！

https://www.premiumoutlets.co.jp/fukayahanazono/

個人認為成田空港附近的酒々井 outlet 都夠做，又近又有啱自己的品牌！我見呢度最高級有 Valentino、Bally ，其他有日本牌子同各大運動品牌， Nike 、Addidas、NB等等，我見大牌子商店係冇客嘅！最多人係食店同賣食物嘅店，例如久世福、Lindt，個 outlet 入面都算多人，D食店好多要排隊，呢度有個小小兒童樂園，有兩款機動遊戲，一個係迷你跳樓機，一個係迷你龜速火車 😅，就在 Starbucks 旁邊，我梗係去 Starbucks 買咖啡飲，一路飲一路睇人玩迷你跳樓機！跟住去久世福買左D食物就走！

搭返秩父線去熊谷站，因為去要去新宿，唔係返東京站，所以在熊谷站轉湘南新宿ライン，啱啱有班特別快速，63分鐘直達新宿，比普通車快7分鐘！長程車又可以眠一眠😴

到左新宿，先去東口睇3D貓貓🐱，現場睇又唔算好3D，有D角度仲覺得佢扁左🤣🤣 行去歌舞技町，以前個百菓園冇左！多左間屋台苑，其實日本人同遊客都好鐘意去屋台，貪佢好氣氛！呢個屋台都好細，見佢都有D客，再行去哥斯拉果邊，人流都幾旺，雖然冇以前咁多人，都有以前七八成人流！

去藥妝店買少少野，然後去南口果邊，去高島屋搵食！尋日食唔到人形町今半，今晚睇吓高島屋分店有冇位，少左遊客嘅高島屋靜左好多！雖然佢翻新左，始終本地人消費都冇遊客咁多，頂樓食肆呢層比較靜，可能未到繁忙時間！去到人形町今半，有大把位！在門口揀定個壽喜燒set，一入坐就叫左個 set 再加支（一合）天覧山嘅純米吟釀，原來一合係一小支，大概都有200ml，一個人飲好似多左D😅，個set 有湯、醃菜、牛肉只有三片！同D配菜，穿著和服的店員幫你燒第一塊，然後就自便🥹，佢另外有一小樽醬油，同一小樽水，比你加落個鍋度，太咸就加水！塊牛肉好好味呀！好滑冇渣！入口即溶！同日山比較的話，呢度好味D，可能人在日本覺得好味D !🤣同埋蛋同飯都唔同嘛！食得好開心！

食飽落去行吓！行過 LC 見又推出 Berry 聖誕系列，自從疫情後 LC 嘅產品已經係全球同步，當然依家滙率低，應該平過香港，不過都冇乜特別新野推出，吸引力大減！行過一個賣健康產品 counter 見有麥蘆卡蜂蜜同一D健康茶，見有支生薑飲，天氣凍買支返去飲吓先，店員送左兩包薰衣草入浴粉比我，啱晒！今晚一於浸吓對腳！🦶🏻🦶🏻頭先見到已經想買，依家有得送就更好！😆跟住店員仲帶我去退稅，我買嘅係食物，竟然可以退稅，退稅 counter 都係得幾個人，好快攪掂，職員話 consumable 產品封左袋唔可以拆就得 👍🏻👍🏻

行行吓聽到廣播話收7:30 （以前好似收8:00）即刻衝去B1超市買生果！今期係提子當造，買左束巨峰，雖然價錢同香港差唔多，但係一定好食D😄 買完野出返去行多陣就走，好攰！太耐冇去旅行，今次好似以前第一次去自由行咁，對腳超攰！要早D休息！