沙田安景街公園櫻花

近呢兩年香港多咗地方種櫻花，去到二月就開始櫻花盛開嘅季節，今日去咗沙田睇櫻花，由石門站行過去安景街公園，我以為櫻花喺河邊，沿住河邊行，只有寥寥幾棵疏落嘅櫻花，諗住行返去石門站嘅時候，先見到原來在路德會梁鉅鏐小學，同翠湖花園B座之間，有一條小徑，呢度種咗十幾棵櫻花，開滿晒花好靚，而且好多人影相，我當然都唔執輸，影咗一輪，可惜呢個地方比較細，如果大啲就可以容納多啲人賞花🌸🤭

 

八不

呢間壽喜燒喺大南街，行過幾次，今日終於去試咗，晚市時間冇乜客，成晚只有六個人客，我哋叫咗個二人套餐，有三款牛肉，佢嘅牛肉係切得比較細塊，同日本食嘅壽喜燒唔同，日本嘅壽喜燒都係一大片好薄，佢呢度就細細片略為厚少少，勝在有三款肉俾你食，如果一大塊可能只有一款俾你揀！三款牛肉分別有近江牛、松阪牛、同埋飛驒牛，質素都唔錯，壽喜燒汁嘅味道略為清淡，少咗甜味，蔬菜嘅份量亦都唔多，我哋另外加咗烏冬，佢有送一支細枝嘅酒，我哋揀咗梅酒，整體食物同服務都唔錯👍🏻

 

Dayvi Gelateria / 町田商店

好友下星期會去睇BLACKPINK演唱會，今日先去睇應援物，同埋搵打卡位影相，約咗佢喺宋王臺站，因為呢度有BLACKPINK嘅宣傳相，影完相就行過去啟德，因為好友未去過主場館，所以順便行一行睇吓到時點樣行法，順便去唔同嘅打卡位影相，商店就大排長龍，我哋喺入口睇咗啲產品，好友唔太啱心水，加上人龍咁長佢唔想排，我哋就去睇吓應援食品！見到有一間賣Gelato，一黑一粉紅嘅雪糕球，買返兩杯食吓先，順便打吓卡，因為餐廳都裝飾咗好多BLACKPINK嘅嘢，而且佢買雪糕都有少少禮物送，呢度附近嘅氣氛都幾好，因為大家都係好期待，有啲係今晚入場，有啲係純粹嚟朝聖，我哋行晒幾個打卡位影相，然後就過返去Airside 搵嘢食！

今日星期六周圍都要等位，去咗拉麵店，見到唔使等位，我地去就食拉麵，因為好友已經好肚餓，而且好眼瞓，因為佢今朝好早起身，而家斷晒電，要嗱嗱聲食啲嘢然後返去瞓，拉麵就正正常常，我之前都食過一次！

 

古埃及文明大展 / 紅伶飯店

終於約到好友去睇古埃及文明展，啱啱開始做嘅時候超級多人，加上我又去咗旅行，之後好友又去咗旅行，終於夾到今日可以去！

我哋約咗四點喺故宮門口等，因為呢個鐘數應該少人，但係好友記錯咗佢收八點，原來佢收六點，我哋一去到故宮先去間shop度睇吓嘢，然後直接上9號館由上面行落嚟，原來9號館已經係古埃及文明大展最集中嘅場地，因為佢個指示寫住有兩層樓有其他展品，原來只係一兩件，重點嘅展品喺晒9號館，所以我哋一開始就行9號館就啱！展品唔算好多，但係就行得舒舒服服，可以慢慢欣賞，唔似得去大英博物館咁，啲木乃伊擺到密麻麻，好似唔夠位咁！呢度大概只有十個木乃伊棺木，亦都有動物木乃伊嘅介紹，有個位係展示圖坦卡門嘅展品，亦都有影片介紹佢嘅墓室，我哋睇咗大概一個鐘，然後落去逐層睇其他展館

睇到咁上下聽到佢廣播，話仲有半個鐘頭關門，我哋先至知佢收六點，所以匆匆忙忙睇埋其他展館，最後都仲有少少時間去睇故宮個展館，啱啱好六點就離開！因為商店一入嚟嘅時候已經睇咗，所以走嘅時候冇再睇！

行到去小巴站啱啱好有車，我哋就落去油麻地食飯，去咗呢間比較舊嘅飯店，因為時間早所以有位，呢度主要係食小菜，我哋兩條友嗌咗三個餸，我就覺得唔係特別好食，正正常常水準，街坊價錢，去到咁上下佢都爆晒場，仲會提你last order，呢度坐滿客嘅時候都幾嘈，基本上都好難坐得耐！😅

 

嘉麗園 / Accro coffee / 飯局作客 -天水圍

今日相約好友入元朗，先去市中心食啲嘢，去咗嘉麗園食麵，傾開偈先諗起早兩年呢間麵店個老闆買兇殺人，個原因係噪音問題，因為麵店晨早就要起身打牛丸，對附近街坊造成噪音，而令到其中一個投訴人被殺害，現時呢間麵店已經易手，店入面亦都冇以前咁旺，不過裝修同埋餐牌都冇變，佢個湯係非常的熱，牛丸都唔錯！

食完麵我哋去飲咖啡，行返過去元朗廣場嗰邊，上次同好友搭車經過見到有間coffee shop，今日特登去試，不過好友住元朗，所以佢已經試過，餐廳入面都唔細，大概有廿幾個位，我哋三個去到啱啱好有張四人枱，佢個餐牌係有好多咖啡選擇，但係大部份都冇剔到available ，即係好多都冇供應，最後我哋揀咗兩款唔同產地嘅藝技咖啡，全部都揀虹吸式冲泡方法，兩杯嘅味道都唔錯，不過就唔係好大驚喜！

飲完咖啡我哋搭返車去天水圍好友屋企，先放低啲嘢，跟住搭輕鐵，去天秀站買餸，呢度有個新開冇幾耐嘅天幕街市，地方唔係好大，但係都好齊全，而且價錢都好合理，我哋買咗嘢食今晚打邊爐，牛肉、海鮮都唔貴，買完餸就搭返車去好友屋企，先係洗嘢，跟住開餐打邊爐，一路睇YouTube片，啲嘢都係食唔晒😅不過都食咗九成！食完就繼續睇片，今次就唔帶隻狗落街散步，因為時間都比較夜，所以食完飯睇咗陣片就搭車走！