昨晚都睡得不好，整晚想着有甚麼欠漏，又怕唔知醒，今次預計停留三星期左右，行李有點重，其實最重要買不到的東西不要漏，其餘都可以在日本買😅 早上搭巴士去機場，今日巴士很準時 6:01 到達我屋企附近，因為司機開得很快！大概35分鐘去到機場，我比登機時間早咗三個鐘到機場，所以整理吓個行李先，然後先至去寄行李，今次搭大灣區航空，第一次搭，去到自助機嗰度，搵唔到有大灣區航空，所以去返counter，守喺counter入口嘅小姐又叫我去自助機，我話俾佢聽自助機冇大灣區航空，原來佢話得最前嗰幾部機先有，所以我要行返去前邊處理，整完之後諗住自助寄艙，點知原來自助寄艙係唔處理大灣區航空嘅行李，唯有去返counter，所以其實唔需要喺部機度自助辦理登機，因為始終都要去counter，所以應該索性去counter做，我寄完行李之後諗住話俾我朋友知喺邊度等，點知就見到佢哋啱啱到步，所以提佢哋直接去counter寄行李，反正沒什麼有人排隊，搞掂晒之後就過關去食早餐了！
好友佢哋之前有去lounge食早餐，但係佢哋話而家質素大幅下降，但係比佢哋搵到另一張信用卡可以去一間酒吧度食早餐套餐，同埋佢話份量都唔少，可以試吓四個人食三個餐夠唔夠，唔夠先至加嘢，間酒吧就係位於新起嗰條橋度，經過好幾次都成日諗住去試吓，今日終於去試喇！間酒吧叫做Intervals 佢除咗飲酒仲有嘢食，我哋叫咗三個早餐，另外加湯同沙律，早餐主要係煙三文魚配牛角包，或者pancake，我見份量唔多，所以最後都係叫咗個早餐！我就叫咗水波蛋牛油果配牛角包，呢個都幾好食，食完晒嘢我哋就行過去閘口，先去搭無人駕駛，去到閘口影吓相，竟然撞見舊同事，大家寒暄幾句，原來仲要坐埋同一班機！😅
飛機準時出發，我同好友分開坐，因為好有三個人，啱啱好坐一邊，我旁邊就坐咗一對夫婦，但我前面嗰幾行都冇人坐，因為前面嗰幾行要加錢，所以冇人坐都唔可以調位過去坐，飛機喺跑道行咗成20分鐘先至起飛，飛咗接近四個鐘就到，比我預計快！過海關都幾多人，應該係兩班機同時到埗！搞掂晒所有嘢，就去搵租車公司攞車，今次搵Times 租車，搞掂完啲手續出車都已經4:30 ! 即刻出發去酒店，先放低行李，搞完check-in，就出去食飯！
今晚訂咗食燒肉，由酒店行過去都要十幾分鐘，行行吓仲落微雨，我哋都有帶遮，日本嘅天文台都非常之準！預計咗呢段時間係會有微雨，果然真係落微雨！今晚訂咗嗰間燒肉店叫做橫綱，佢係放題形式，我地早咗半個鐘頭去到，佢都可以俾到枱我哋，因為佢係計時間，佢嘅套餐主要係有幾多款肉俾你揀嘅套餐，另外係包唔包飲品任飲嘅套餐，我哋揀咗唔包飲品，但係肉類款式最多嘅套餐，因為任飲套餐好多時我哋飲得一兩杯，同散叫差唔多，所以我哋多數都唔會叫任飲，加上我哋飲酒唔多，所以都唔需要任飲！我哋嘅套餐先上咗一盤牛舌，有非常厚切嘅牛舌，另外要食嘅燒肉可以喺個tab度點餐！我哋又叫咗幾個部位嘅牛肉，個牛肝出乎意料之外地好食，所以我哋又encore! 不過我唔記得記影相😅最後仲有包一份甜品，其實只係得雪糕，有兩款味揀，一款係芒果，另一款係枝豆，我就揀咗芒果，其實佢係有兩舊芒果肉在軟雪糕上，枝豆就係有一嚿枝豆蓉，我就冇試，我哋叫咗幾轉燒肉之後，就開始俾啲好肥嘅肉我哋，我諗個目的都係想我哋唔好再嗌，因為如果怕肥嘅話，都唔會再嗌，因為驚再嗌都係咁肥，唔怕肥嘅食完都好滯，加上我哋都飽喇！所以都冇再叫野！不過呢間燒肉店嘅店員態度麻麻地，同我哋講嘢啲語氣都唔係幾好，其實佢係成間店啲店員都係黑口黑面🥹肉類質素一般！
食完飯諗住行吓街，但係好多舖頭都關咗門，所以只係行便利店，同埋藥妝店，因為藥妝店收得比較夜，買完嘢返到酒店已經9:45 ，剛好趕得切10點前去到lobby嘅餐廳食宵夜，因為每人有一碗免費蕎麥麵，當然佢唔會好大碗，所以我哋食埋先至上房，除咗蕎麥麵，佢仲有冇酒精飲品任飲，雪糕、nuts、朱古力金幣，都係任食，都唔錯👍🏻
酒店住後感：
Richmond Hotel Premier 里士滿酒店高級 仙台駅前
呢間酒店會連續住兩晚，酒店嘅大堂喺5樓，酒店會提供一杯welcome drink 可在接待處旁邊的餐廳領取，另外亦會提供每位人客每日一碗醬油湯鴨肉蕎麥麵，在同一個餐廳領取，餐廳內亦有任飲無酒精飲品，可以自助斟嚟飲，有咖啡、汽水、軟雪糕、果仁、朱古力金幣等，都可以自由飲用，另外酒店有提供護膚品、洗漱用品、面膜、護髮油等等，亦都係自由領取，早上會放喺接待處，下午會放在電梯口旁邊，面膜講明每人攞一份。酒店嘅房間唔算好新，亦都會好舊，可能有部份翻新過，房間唔算好大，但係都叫做有書枱仲另外有枱凳，可以成個篋打開，不過房入面冇USB插位，全部仍然係用緊兩腳插，會提供充電線，職員的服務都很好，地點亦都唔錯，有啲房仲望到仙台站，對面又有間好大嘅Donki，旁邊亦都有一條商店街，位置都算唔錯！我哋有買早餐，費用係¥2,100！食物選擇都算多，質素不過不失！整體很滿意👍🏻
