2025年4月東京獨遊 Day 7 - 東京站

今朝起身精神返晒！好在尋晚早瞓🤭今日得返幾個鐘，就留在東京站買手信，入到秋葉原站，先去6號月台果間酪（大沢牛乳)飲牛奶，今次飲大山牛乳，上次見佢有期間限定牛奶諗住今日試，點知今日已經冇喇，大山係呢間店總選舉第三名，奶味濃，好味👍🏻

撘到去東京站，去搵NY cheese ，竟然冇左😨唔知係車站翻新工程影響而暫停營業，定係裝修，跟住見到另一間 Paris butter chocolat 都係人龍店，佢嘅產品都類似NY cheese ，不過好似左芝士，多左粒nuts，又買D試吓，跟住見到以前買過嘅餅，又買少少試吓＇然後租個 locker 放低行李，原本想放暫存店，但要¥2,000，locker ¥900，個locker 夠大放到我個喼👍🏻

放低行李就諗住去東京駅一番街，要出閘。出閘前見到有間拉麵店叫做Nippon Ramen Rin 凜，好似唔錯，就去試吓，叫左醬油麵，有一塊日本叉燒，個湯幾好，麵就略為淋身，可能影相影耐左！

食完拉麵就去東京駅一番街，呢度有齊大部份日本character 商店，仲有卡樂B專門店，見到原本想買的藍色盒，仲有期間限定粟米🌽味，買返幾盒先，又見到東京Banana 聯乘Chiikawa ，好可愛！不過冇乜朋友好鐘意佢，所以冇買，行多陣就入返去站內！

在站內繼續行吓，過左就多人左，D食店都多人等位，行過一間食黑咖喱的餐廳，見有盒裝咖喱又買盒返去試吓！行返去locker 攞返個喼，見D locker full 晒，頭先我租果陣得兩個租左😅我頭先用西瓜卡比錢，所以拍返西瓜卡就得，唔使入密碼，好方便！

跟住去月台等車，搭13:33 班車，要早D排隊，因為架火車由新宿開過嚟，已上左一半客，行李架D位會少，尤其大件行李，好難舉上頂層，除非好似我一個人，隔離又冇人坐，就可以放在身旁，否則冇位的話，就咁放埋一邊，隻喼會逃走，碌左去第二度，好似今日有個人冇將個喼平放地下，個喼碌左去自動門，度門打開左，爭D碌左去下一卡車，跟住火車輕剎掣，個喼又向前碌，爭D由車尾碌去車頭，好左有人及時截住個喼😆

去到機場，去磅吓行李23kg，跟住去寄艙，攪掂晒都未夠15:00，班機17:05飛，仲有個幾鐘，再睇下手信！又有卡樂B，買多三盒，加盒NY cheese 竟然有貨，買完去食野，T2 個food hall 有拉麵篝同菊川四代目，二選一揀燒鰻魚，篝食左好多次，而且今朝食左拉麵，所以都係食鰻魚，雖然香港有分店，但價錢偏貴，始終鰻魚喺日本食係最正！

食完有少少想食士多啤梨巴菲，好似太多，所以放棄左！今次個閘口都係最遠果個，所以早少少行過去，早40分鐘去到已經登機中，好快上機，外藉機長廣播時講左幾句廣東話，好攪笑，講完有D人都拍手😆 等飛等得耐，我都瞓着左，剛起飛冇幾耐就有氣流，架飛機搖晃左好耐，我諗維持左半小時，我都醒左，到佢穩定左，seat belt 燈一熄，好多人去廁所排晒隊！最後當然安全降落噝😅

 

2025年4月東京獨遊 Day 6 - 新宿、秋𦳑原

今朝起身有D唔舒服，可能尋日冷親，有點攰，今日要轉酒店，所以去酒店放低件行李先，去到秋葉原，在華盛頓酒店旁邊有條橋過河對面，條橋雖然係樓梯，但中間係斜路比單車用，當然行李箱都可以！放低行李後，去JR 車站食個早餐，去咗コメダ珈琲，今日要等位，等咗接近半個鐘，照舊食咗件多士，飲咗杯咖啡，跟住行咗去JR商店，買咗少少嘢，跟住就過去新宿！

去到月台梗要飲番支牛奶，今日買到4.2%特濃牛乳，好好味！跟住搭車過去新宿，因為聽日就要走，所以今日就要去買未買嘅嘢！最主要去三丁目嗰邊，行咗幾間藥妝店，最後去咗BicCamera買FANCL嘅supplement，因為其他藥妝店都係公價冇優惠，但係BicCamera雖然都係公價，但係可以有5% discount，仲要咁啱買嗰包supplement係增量裝，送多三日份量，所以好抵！行咗一陣覺得好攰，可能真係尋晚冷親，所以都係返去秋葉原！

返到去秋葉原時間尚早，酒店未有得check-in，所以四圍行多陣，原本有少少意思想買個公仔，不過冇一個係好鍾意嘅，所以最後都冇買，行到3:00 ，就去酒店check-in，先至發覺原來我訂嘅房係夜晚11點先可以check-in😱睇返confirm email先見到，都冇留意到check-in時間係咁夜，因為一般酒店都係3:00 ，咁啱今日又唔係好舒服，所以問吓職員可唔可以補錢轉3:00 check-in，但係職員堅持唔可以，佢話如果要轉嘅話，就要取消原本嘅訂房，收取100%訂金，再重新訂過一間房，即係比雙倍價錢😨其實我嘅訂房係仲未俾錢，當時訂房係選擇到酒店付款，其實我可以直接離開去第二間酒店，因為我亦都冇比低信用卡資料，不過既然訂咗就唔想咁樣，講國語嘅店員都好堅持唔俾我轉，就算補差價都唔得，寧願間房空咗，都唔肯俾我補錢提早check-in，咁唯有等到今晚先check-in，佢話我可以喺旁邊間餐廳度飲咖啡，餐廳嗰度冇人，亦都有張大梳化，咁我唯有喺梳化坐吓，休息一陣，先再出去搵嘢食，坐咗大約半個鐘左右，職員又走埋嚟同我講，可以俾我提早check in 🥹

上到房放低行李，瞓喺床度休息咗大概半個鐘，其實因為唔舒服個人覺得好攰，想唞一陣，休息咗半個鐘就精神咗好多，跟住就出去搵嘢食，見到有間麵店叫做つじ田，食左碗沾麵，冇乜胃口，所以都冇食晒😅行多陣就返酒店休息！

酒店住後感：
Hotel Resol Stay Akihabara
酒店位於秋葉原站對面華盛頓酒店嘅後面，由華盛頓酒店側邊條巷，有天橋跨過條河就見到，天橋樓梯中間係斜路，for 人推單車上橋，所以推行李都👌🏻過左條河之後，呢條街好靜，有幾間酒店，睇落都頗新淨，我住呢閒對面有座好似廟嘅建築物，門口啱啱泊咗一架橙色嘅車，係好舊款嘅，個畫面好懷舊🤣所以影低咗！酒店嘅大堂要上5樓，接待的員工很有禮，雖然check in 時有小小阻滯。但仍然保持禮貌，房間雖然少但頗新淨，有張單人梳化和小圓枱。洗手間相對大少少，牙刷等物資在reception 取，有提供護髪油珠珠👍🏻

 

2025年4月東京獨遊 Day 5 - 神楽坂、日技神社、根津神社

今朝起身有少少落雨，搭JR去飯田橋站，我記得上次去飯田橋站，係因為搭JR嘅時候經過呢個站，見到有間餐廳喺條河中間，所以特意去嗰度食嘢，今日去到飯田橋站見到成個站翻新咗，站上面仲有個小小嘅商場，旁邊嗰間意大利餐廳Canal cafe 仍然喺度，我都去門口影返張相懷念一下！

上次喺呢間餐廳食完嘢，都行咗去神樂坂嗰邊，當其時行咗一小段路就走咗，今日特意行遠少少，佢一條好長嘅斜路，馬路兩邊都係一啲商店同餐廳，其實同日本一般街道冇乜分別，亦都冇咩特別嘢，由路口行上去見到有間椿屋珈琲，入去食返個早餐，飲返杯咖啡，又買兩包咖啡豆

食完繼續行上去，見到有一間赤城神社，又入去睇吓，見到門口有個牌宣傳可以喺呢間神社舉行婚禮，呢個神社都幾特別，旁邊有一座建築物好似住宅咁，唔知係真係住宅定係神社嘅一部份，睇吓佢啲御手，見到佢有一款御手係行李牌，都好特別，有兩個色，我就買晒兩個😄

行完街，落返去JR飯田橋站，上去佢個小商場度，有一間叫做果実園リーべル，見佢有水果buffet，我就食唔到咁多嘢，淨係叫咗個士多啤梨芭菲，個士多啤梨🍓唔算好甜，不過起碼唔酸，好味！

落去返去地鐵站，喺JR站下面有個Metro嘅站，相對殘舊好多，我搭有樂町線去永田町，然後行去日技神社，呢個神社有幾個入口，我去嗰個有一個好大嘅白色鳥居，過咗個鳥居之後就係扶手電梯，入到去神社，正值紫藤花開花嘅時候，不過呢度嘅紫藤花數量比較少，而且有啲疏落，比起亀戶神社爭好遠，不過今日撞啱有人喺度舉行婚禮，所以可以喺旁邊參觀吓，但係唔准影相，呢個神社嘅御手有好多款，真係乜嘢都有得求，不過我就揀唔啱，神社嘅另一邊出口，有一排紅色鳥居，又係打卡位，影完相就行過去赤坂見附！

之前在赤坂見附住過一次，今次純粹行去車站搭車，去根津神社，聽講而家開滿杜鵑花，所以過去睇吓，去到門口都覺得好熱鬧，雖然天色唔係太好，而且接近黃昏，但係都好多人，沿路都有啲小食檔，而要入去杜鵑花園係需要排隊，一路排隊嘅時候都可以影住相先，雖然條龍好長，但係啲人係不斷行緊，都兜咗好大個圈先去到入口，呢度要俾錢先至可以入去，收費係500円，真係嚟到入口先知要俾錢，買完飛就可以唔使再排隊，不過有啲人唔知道仲喺度繼續排，因為大家都好習慣一入去嗰個位就影相，沿住條路可以行上啲影相，呢度真係好多杜鵑花，而且唔同顏色，好靚，一路影相嘅時候見到下面有一排鳥居，個位置係近住入口嗰邊，嗰邊就唔需要俾錢，所以喺付費區呢度影返夠本先，然後先行落去影了車，不過鳥居嘅位置太多人行，所以好難影到冇人嘅相，影到咁上下開始落雨，而且已經係黃昏，所以我都走啦，一路行去地鐵站嘅時候好大雨，就算有遮都濕咗一半身🤦🏻‍♀️

返翻去錦糸町，喺酒店附近行吓商場，喺商場入邊見到間築地壽司玉，諗住去食，但係要等位，所以改咗去食鰻魚飯，店名叫做 かわ祥，叫咗一個淨鰻魚飯，有跟咗一個湯，好味！

食完飯喺商場繼續行街，地庫有間超市，見到佢賣嘅肉類係非常之大份，而且價錢好平，不過唔知好唔好食，下次如果住有廚房嘅酒店可以買返去試吓！

行咗兩個鐘，經過一個food court，見到有間野口鮮魚店二代目，唔知同嗰日食嗰間嘢口鮮魚店係咪同一家人？不過餐牌啲嘢都幾似，又叫咗個海鮮飯試吓，質素同嗰間差唔多，咁喺呢度食又唔使排隊，價錢應該貴300円左右，再行多陣就返酒店休息，呢間酒店住埋今晚，聽朝要換酒店，今日落雨有少少冷親，所以冇落去浸溫泉，喺房休息吓，執埋行李聽日check out😅