得幾個鐘時間，先寄存行李在酒店，近近地去首爾站行吓，地鐵出嚟係一個商場，好多店未開，就去Food court 食野，我地揀左一間叫百年屋，我因為食咗個包，所以有啲飽，就叫咗個燒鯖魚餐，點知條青魚係好大條，我未見過咁大條鯖魚😅通常都係有長又有，但係呢條長得嚟比較闊身，當你唔肚餓嘅時候叫啲嘢都係大份啲🤣
食完野又去行吓街，呢度有間樂天超市，好大間，好友買士多啤梨返香港，然後我哋返去明洞，行多陣就返酒店攞返行李
今次又call 車去機場，去到機場食D野先上機，跟住落嚟又行吓，好奇怪呢度商店好多，但冇乜人購物＇見佢標價錢係兩位數，以為省略左三個0，因為之前在一D coffee shop 係咁標價，好友睇啱左太陽眼鏡，比錢果陣先知原來標價係美元，₩10k 等如$53，US$10 等於$78 ，咁就貴左32% 🥺 當然可以唔買，不過知道點解冇人買野，因為比出面貴好多😟
五日行程話咁快完左，今次玩得好開心，韓國亦都比我想像中好，消費亦較日本低！大家都期待原班人馬再嚟😆😆
今朝又去飲咖啡，今日有一個好友陪我，天氣預告今日有雨，果然係落雨，好在係微雨，我哋去左一間叫做 Rewire coffee ，尋日見佢full 晒，今日得兩個客，好友其實唔飲咖啡，不過陪我，所以佢飲熱朱古力又叫左件cake ，呢間店都有咖啡豆賣，另外仲有T恤同埋一啲紀念品，我哋本來想買T恤，佢想買嗰件冇佢size，我想買嗰件有冇size😅所以最終冇買到！
飲完咖啡再返酒店同其他好友會合，又去搭巴士， Google地圖喺韓國唔係好用得到，但係佢有陣時又會教你搭巴士，感情巴士大概要成個鐘頭先至去到目的地，啱啱上車嘅時候得我哋幾個，好似包咗車咁行咗🤣行左一半左右先開始有人上車，但係都係幾個人，落咗車之後都要行一小段路，呢邊都幾僻靜，沿路都冇乜人，去到麻浦呢個魚市場，當然係好多海鮮檔，佢都似街市咁，有啲賣業績食物，又有冷凍食物同埋生果，我哋一心諗住食長腳蟹，所以去搵咗蟹先，其實呢度得三檔係有長腳蟹賣，我哋行晒三間，睇過最平嗰間D蟹係細隻D，同埋唔同品種，冇咁靚，旁邊嗰檔貴少少，但係都唔係話好靚，最後行咗去另一邊嗰間，呢間我老闆都幾老實，價錢係貴少少，但係睇得出佢啲蟹係靚啲同埋大隻啲，所以最後決定幫襯呢檔，而且老闆娘又識講國語，佢都好均真喺我哋面前將隻蟹放落去蒸爐度蒸，同埋佢話想樓上食嘢嘅時候，隻蟹會按重量計加工費（蟹膏炒飯），所以佢寫輕啲，等我哋比少啲錢👍🏻喺佢幫我哋整緊蟹嘅時候，我哋就去買其他海鮮，諗緊邊檔之際，見到有幾個韓國人去咗一檔度買海鮮，我哋諗韓國人都揀應該穩陣😂😂最後我哋買咗條多寶魚做刺身，本來想食蝦，但係得雪藏蝦所以唔食，另外叫咗扇貝、八爪魚、赤背、海菠蘿、螺，好又想食海膽，但係冇新鮮嘅，得雪到結咗冰嗰D，整刺身嗰啲就即場喺魚檔整咗，要蒸煮嗰啲就攞上樓上，連埋隻蟹攞上去，上到去竟然都幾多人，明明頭先市場嗰度冇人，啲人唔知係邊度嚟，每一張枱都有一個火爐，有一鍋湯，用嚟煮麵，啲海鮮都好新鮮，隻蟹係非常之正，我哋食得好開心，所有嘢都食晒🤣食飽之後落樓下買吓啲醃製食物，佢哋買咗泡菜，我就冇買，本來想買啲生果，但係唔係咁靚，跟住又去搵巴士搭😂
搭巴士出去永登蒲，去行百貨公司，因為預咗今日落雨就會留喺室內，呢度有幾間百貨公司，但係唔係我哋想像中嗰種，而係價錢略為貴嘅一啲百貨公司，類似伊勢丹咁，所以唔啱我哋行，不過行過一間Cafe，叫做Doré Doré，見到啲蛋糕好吸引，又坐低飲杯嘢食件cake😂
就行咗去地下街睇吓嘢，好友都睇咗啲衫，但係覺得價錢唔算好平，最後冇買到嘢，上返地面，見到有間OLIVE YOUNG，大家又不自覺咁入咗去🤣🤣 入到去又見到一啲之前搵唔到嘅嘢，呢間竟然有貨，最好笑佢得一盒，好友開佢個櫃桶睇吓有冇貨，真係有三盒，俾我哋掃晒，另外之前買咗個罐裝洗面膏，呢度有支裝，買😂😂😂😂
跟住搭返車過明洞，有朋友介紹去一間炸雞店，同埋我哋想去明洞買VT眼霜，因為全個旅程都冇買到眼霜！行咗好多間都冇貨！先去12層高嘅Daiso 行吓先，雖然佢有12層，但係每層都唔大，因為見到佢有賣V T嘅微針，所以去睇吓，不過佢個貨架清晒，另外想買凡士林嘅面膜，佢都係得返幾塊，嗱嗱聲買埋佢，諗住班男士要等我哋，點知今次調返轉，啲男士可能好少行Daiso，所以佢哋睇啱嘢仲多過我哋！反而我哋要等佢哋😅
今朝一早自己出去飲咖啡，附近有好幾間coffee shop，揀咗一間叫做 Cashmere ，係細細嘅一間咖啡店，得幾個座位，我就order咗杯 latte，見到佢都有啲包點，不過我就唔係好啱，所以淨係飲咖啡，呢度啲咖啡都唔錯，見佢有咖啡豆，所以都買咗兩包返酒店，擺返入房再落大堂集合！
大家喺大堂集合嘅時候，其中一個好友失聯，敲佢房門冇人應，打電話俾佢又冇人聽，擾攘咗一輪之後，我哋諗住出發先，等佢聯絡我哋，我哋差唔多行到去巴士站嘅時候，佢就出現，話唔知醒，聽唔到電話響，原來佢自己尋晚出咗去飲酒，仲去咗賭場，佢話飲到斷晒片😅 我哋行返去酒店等埋佢，再一齊行去搭巴士，呢度啲巴士都幾密，我哋行去巴士站嘅時候走咗架車，等一陣又有車，車程短，快就去到講藏市場，入到去見到好多嘢食，不過好多檔都係相類近嘅嘢！
好友話想食生牛肉同埋新鮮八爪魚，去左一間叫做美玉肉膾，係有中文名的，叫左生牛肉拼八爪魚，另外叫左個冷麵，同綠豆煎餅，都幾好食，食食吓尋晚飲醉嘅好友，粒聲唔出行咗出去，我哋估計佢去廁所嘔😅😅，佢返到嚟清醒返少少，不過都係冇胃口食嘢，跟住我哋繼續喺市場度行吓，又買咗個紫菜卷食😋
跟住去咗買零食，佢哋買咗好多，我就冇興趣，佢哋仲買咗嗰啲人蔘飲料，見佢價錢都幾平，所以佢哋一人買咗一盒 （後來佢哋話支人蔘飲料好稀，真係平嘢冇好😂），買完嘢行咗去一間賣棉被嘅舖頭，之前喺網上見過人哋介紹，個店名叫做Park Hong Geun，唔知點讀先啱，所以個個都係話148號舖就最易記，店入面都有好幾個客，店員能夠講流利嘅廣東話，當然唔少得國語英文，我哋買咗一共四張被，因為佢個質料係非常之柔軟，感覺好舒服，而且好大張，單人被等於香港嘅雙人被size，所以我哋全部買單人被，只係厚薄嘅分別，店員會幫你抽真空，咁就容易攞好多！其實呢個市場有好幾間買呢一類被嘅舖頭，係得呢間咁多人，其餘全部客，可能店員唔識講中文嘅分別🤭
我哋決定返酒店放低張被先，我哋又搭巴士返酒店，雖然唔能夠直接去到酒店門口，但係都係行幾分鐘，反正無論搭地鐵定巴士都係要行，返到酒店放低野再出發，我哋去聖水洞，今次就搭地鐵！行去地鐵站途中，好有買咖啡飲，我就冇飲到，因為今朝已經飲咗☺️
去到聖水洞，先去Dior店打卡，呢度都好多人，我哋影咗幾張相就行，呢度好似日本嘅原宿，都係一啲潮流店，行行吓見到有間麵包舖，好多人排隊，佢只係買一款麵包，我哋又去排吓，見到佢只係show咗麵包同埋一盤鹽，應該係鹽味麵包，一包有三個，買完就即刻食，又幾好食喎，而且好鬆軟！
行行吓又見到間好大嘅coffee shop，店名叫做 Café Cité ，我叫咗佢嘅招牌飲品 Seongsu Brick latte，佢哋就揀咗啲凍茶，不過佢哋話唔好飲，我杯咖啡就正常嘢，入面有啲啫喱係咖啡做，我哋坐一陣就走啦！繼續喺附近行街，睇吓衫睇吓袋，行返出去大街，去搵一間薯仔排骨店，又去食嘢，好似每一餐都食得唔係好飽，所以係咁食，呢間店好熱鬧，座無虛席，因為佢都幾抵食，一大盤排骨，都係₩49,000 ，我哋加大咗個份量，因為啲排骨好大嚿，我覺得佢都係唔算好多肉，而且薯仔少得可憐😅仲諗住薯仔會多㗎D!
食完嘢繼續行，我哋去咗一間文具舖度睇嘢，睇睇下我又流鼻血，唯有塞住個鼻哥繼續行！跟住行咗去一間叫做 Matin Kim 嘅服裝店，呢個品牌好似喺香港見過，睇過佢啲衫都唔錯，本來睇啱一件外套，但係我唔鍾意佢個質地，最後只係買咗隻cap帽，好友就冇收穫😅
跟住我哋再搭巴士過去東大門，因為好想買衫，我對東大門已經冇印象，不過去到覺得唔係印象中嘅東大門，因為都幾新淨，可能翻新過，又去食嘢，去食陳玉華奶奶元祖一隻雞，店入面好多人，而且都幾熱，因為好似打邊爐咁有好多個火爐，每台必叫一隻雞，佢有跟一啲年糕，我哋淨係加咗啲面，食到身水身汗，因為佢冇冷氣，而且開晒窗，又唔夠涼，所以食完都嗱嗱聲走！
同好友行去一個專做批發嘅商場，佢就買咗幾件衫，我就冇買到嘢，班男士就喺度等，然後行過對面，佢係買一啲批發化妝品，去咗間叫做 The Mask Shop ，啲嘢都好平，比起我哋尋日喺OLIVE YOUNG買嗰啲平少少，大家即刻補飛溝淡🤣🤣買完又搭巴士返酒店，返到去都11點幾，大家都好攰😴
甚少會喺七至九月呢D日子去旅行，今次又破例，因為近排實在太忙，好想放空一下，好好休息返幾日，所以今次就去一個從來未去過嘅地方，事前亦都冇特別去蒐集有啲咩景點，粗略咁睇過一啲介紹，到時去到先再諗吓，因為志在Hea幾日！ 一早 9:00 機，其實每日只有一班機來，一班機回，所以基本上...
