Soho West

平時去南昌站，都冇行過去 Soho West 呢邊，個商場冇乜舖頭，亦都冇乜人，只有幾間食店同埋屈臣氏，不過呢度環境幾好，對住個海都幾舒服，最重要係冇乜人，餐廳嘅選擇唔多，就去咗食 Terreace in Seaside ，後來走嗰陣先發現原來有間Arabica ，早知去飲杯咖啡啦😅

 

星十五

食完飯行落加連威老道食甜品，好友話上次食過呢間嘅紅豆沙好食，去到要等位，見佢有一款用遠年紅陳皮做嘅紅豆沙，要買成七十幾八十幾元一碗，我哋就冇試到，食咗平啲嘅新會陳皮紅豆沙，大家都係叫咗雙拼嘅糖水，有新會陳皮紅豆沙配合桃露、芝麻糊配新會陳皮紅豆沙，芝麻糊配合桃露，老實講個賣相真係唔係幾靚😅味道就OK，唔會太甜，有機會再試吓佢果碗遠年陳皮紅豆沙😄

 

Enchanté

上次去完深圳，今日又係原班人馬食飯，點知好友的男友話太攰唔出嚟，唯有三個女人一起食！臨近聖誕嘅尖沙咀超多人，去左食西餐，之前經過見呢間餐廳都幾靚，今次就試吓佢！

餐廳係半開放式，可以食水煙，有個打咭位，係條樓梯，不過行唔到，只係比人影相！睇吓餐牌，招牌菜係烤三黃雞同牛扒🥩亦都有生蠔，因為好友唔食生蠔，所以冇叫，我地叫左三黃雞先，因為話要整一個鐘，side dish 叫左焗薯同菜，牛扒就一般，隻雞先比原隻我地影相，然後再攞入去斬件，味道唔錯，好食👍🏻，見附近兩枱都有叫😆我地叫左cocktail 同啤酒飲，傾吓計，開心 😄😄😄

 

Jen cafe

今日出去太子大南街行吓，都有一排冇去大南街飲咖啡，一路行見到之前有啲咖啡店都冇咗，當然有啲仍係屹立不倒，今次去呢間Cafe，佢嘅前身係The Soulroom 一草一木，上次已經係差不多三年前嚟，店舖嘅裝修同以前冇乜分別，一樣有個月球造型嘅燈，高高掛喺一入門口個天花，水吧嘅位置不變，甚至有部份嘅座椅都係冇變，我叫咗一個意粉同埋一杯咖啡，個拉花拉得幾靚，意粉嘅味道都唔錯，而且都坐得幾舒服，下次可以再嚟👍🏻

萬象天地、Journée、Blue bottle、海岸城、鮮潭

又約好友北上，我地去左萬象天地，先去食個晏，行過商場露天地方一條食街，見到有間法國餐廳叫做 Journée ，話佢哋個和牛威靈頓攞咗米芝蓮，所以就試一試，老實講價錢就唔平，單叫一個和牛威靈頓都要$1,288，而一個二人餐都係咁嘅價錢，我哋因為三個女人，所以照叫一個二人餐share食，前菜有嫩雞沙律，個雞幾好食，個沙律菜就一般，菜上面嘅煙肉條就好乾又硬，忌廉蘑菇湯，加咗唔同嘅菇菌，都好味，仲有一個炸蟹餅，呢個就一般，主菜和牛威靈頓，未上主菜之前，店員俾我哋揀刀，佢亦都冇詳細介紹個分別，略為講一講個物料唔同，我哋都求其揀一把，個牛柳俾我哋影完相之後，攞返入去廚房度切，佢幫我哋切咗三件，另外仲有兩個用帶子同三文魚子造成嘅小食，同埋仲有一份菜，個威靈頓入面有肥肝(我諗係鴨肝），店員再刨咗一D有松露嘅牛油，所以個和牛威靈頓都好滯，食物嘅份量雖然唔係好多，但我哋三個都食到好飽，主要係覺得好”漏”！跟住仲有個甜品疏乎厘，因為個餐唔包飲品，所以我哋冇叫嘢飲，因為覺得佢嘅售價太貴唔值，情願出去飲咖啡！😆

食完嘢行過去斜對面間 Blue bottle 飲咖啡，順便等埋好友嘅男友過嚟，飲完咖啡，出去行吓，因為好飽，見到有間舖頭賣中藥版本嘅Jellycat公仔，有陳皮、藥煲、杞子等等好搞笑🤣 等到國內公司好友嘅男友差唔多到，我哋就去會合佢，然後一齊打的去海岸城！

喺海岸城行咗陣街，見到一間麵包舖，之前喺小紅書見過有人介紹，但係真係食唔落，所以我哋冇買到嚟試，跟住去咗海邊一帶行吓，諗住搵間嘢食飯，但係仍然好飽，所以我哋去咗飲檸檬茶，消一消滯！跟住見到DJI 嘅旗艦店，有幾層樓咁高，我當然想去睇吓，不過好有冇興趣，所以最終都冇去到😅

我哋再行多一陣，搵咗一間叫做鮮潭嘅食店，佢主要係食蒸氣鍋，因為佢會有一條魚去做湯底，而果條魚都好大條，好友之前想試，因為得兩個人食唔晒，條魚有成兩斤重，不過今日大家冇乜食力，四個人都食唔晒啲嘢，因為除咗條魚仲有其他配菜，不過呢餐只係二百幾！真係超飽！我哋食到成11點先返香港，又係覺得好攰攰嘅一日🥹

 

2025-1 廸土尼

都有一排冇去廸士尼，今年第一次，因為佢做會員日，有個減價區，會員比$20入場，購物時可以扣返，呢幾年都係咁嘅形式做，我都冇參加過，今年就試吓，比$20仲要分時段，有D人早一個鐘就排隊，我就夠鐘先過去😅

地點近灰熊山谷，入到去，同我預期差不多，都係一D比較冷門產品，去唔到嘅貨，亦有少量幾抵嘅貨，多數幾十元，我就只係買左一張被，佢本身做緊$50換購，依家賣$30，叫做比多$10 好過比左$20 入場😅

樂園已經𨍭左新年裝飾，算係有D氣氛，見胡廸已經翻新完，Frozen 果邊仍然好多人，今日天上D雲好得意，一舊舊，所以都影左幾張相😆