2024年11月東京三人行 Day 3 - 秋葉原、原宿、銀座

今朝瞓醒留在秋葉原，因為要幫好友個仔搵Figure，先在火車站食早餐，原本想去コメダ珈琲，但係冇位，所以去咗旁邊的Tully’s ，食完早餐喺附近四圍行，都有搵到佢想要嘅Figure，不過分得好散，冇一間好集中有齊所有嘢，所以我哋決定晏D去渋谷嗰間Capcom度睇！

行到咁上下諗住去食晏，大家都想食壽司，所以喺Google search到附近有間壽司店評分都幾高，就喺酒店附近，就行過去試吓，呢間店叫做すし土風炉，呢度係完全個室，所以私隱度比較高，我哋叫咗一啲壽司同埋料理，又叫咗隻蟹，同埋一啲串燒，食物嘅質素就不過不失，唔算特別出色，價錢亦都唔貴！

食完飯已經四點，嗱嗱臨搭車過去原宿睇鞋，不過都係睇唔啱，但係我見到有間Angelina，所以入去買朱古力，但係佢未有得賣，只有佢哋signature嘅栗子蛋糕同埋栗子雪糕，不過我都買咗一盒蛋糕仔手信比屋企人，我哋三個就食雪糕！

跟住落返銀座買餸，我哋去咗三越百貨地庫買牛肉，買咗神戶牛同埋国產牛牛舌，仲有啲菜，返去整Sukiyaki，又買咗少少刺身，今晚嘅晚餐好豐富，牛肉同牛舌都好好味，可惜設備只能夠煎牛舌，如果係燒烤就正喇！

 

2024年11月東京三人行 Day 2 - 築地、銀座、新宿花園神社、池袋

今朝瞓到自然醒，第一站去築地食早餐，先去食玉子燒，再去買大拖羅，攞埋Pack 大拖羅過隔離間舖食燒蟹腳，正呀！跟住去買吓手信，唔少得買乾瑤柱比亞媽，另外又幫好友買咗三文魚飯素，又買咗一包濕扇貝肉俾自己食🤣，買完手信過斜對面食花竹蝦刺身，見到佢今日有伊勢海老，唔算好大隻，就整返隻刺身，食到飽飽地，去米本飲咖啡，飲完咖啡經過一間牡蠣店，又入去食生牡蠣🦪同扇貝😂 好似食咗好多嘢，其實都唔係一啲唔好飽肚嘅嘢，最後要食埋eFfe 個cheese cake ☺️

跟住行過去銀座，因為好友想買個LV銀包俾佢老公，所以就入去LV行吓，一個就揀銀包俾老公，另一個又睇中咗卡片套，佢話原本有一個係佢老友送嘅，但係而家絕咗交，所以唔想見到個卡片套，要另外自己買一個😅 喺LV嘅專門店買嘢，可以印個Initial 落個銀包度，如果百貨公司入邊果D專門店買就冇呢個服務，買完再整埋個名都搞咗個幾鐘🥹

跟住搭地鐵去東京站轉車去新宿，轉車嘅時候租咗個locker， 因為我哋帶咗個細喼，又買咗啲手信，所以寄存咗喺locker先，夜啲返嚟攞，咁就可以兩手揈揈去新宿，今晚去新宿主要係去花園神社，呢兩日有個神社酉之市，一年只做三次，今日已經係今年第三次嘅最後一日，所以今日一定要去，沿住歌舞技町條大馬路行，神社附近已經有勁多攤檔賣嘢食，不過好多檔都係相類近嘅嘢，例如牛肉串、年糕串、朱古力香蕉、大阪燒、番薯等等，我哋都買咗少少嘢食，成條街都勁多人，好似行花市咁，神社在大街嘅入口只可以出唔可以入，要行過咗神社，去到側邊條街嘅入口度入，一去到入口有好多燈籠，行到中間大殿仲有成 900個燈籠，非常之靚，而呢個祭典主要係祈求招財，有好幾十檔賣花熊手嘅擺設，好多都好靚，但係好大個，好難拎到返香港，好友都想買一個細細地嘅，但係睇唔啱，同埋如果你買大個嘅話，店員會即場幫你祈福，講好多祝福說話，而細嗰啲就唔會有，最後我哋都揀唔啱，所以冇買到，淨係入嚟食嘢影吓相，有好多人排隊入去大殿參拜，我哋就冇排到，因為好多人，而且言語不通🤣

好唔容易又迫返出嚟，行去地鐵站嘅時候見到有架快餐車賣 Kebab ，店主應該剛剛開檔，所以啲肉仲未熟，不過佢用個煎pan煎熟啲肉俾我哋，我哋等緊嘅時候，開始有其他人過嚟買，變咗多咗人喺度等，我哋叫佢幫我哋一開三，方便我哋分嚟食，熱辣辣好好食！

跟住我哋搭車過去池袋，因為好友要食銀座篝拉麵，又唔想喺銀座本店排隊，因為池袋嗰間多數唔使排隊，今次去到都要稍為等一等，前面有兩枱客等緊，不過都有位，只係未執好枱，所以好快又入得去食，見到佢門口擺咗篝嘅即食碗麵，點知都係冇得賣，都係叫我哋去便利店搵，其實便利店根本買唔到，上次都係買咗篝嘅杯飯，始終都係麵好食D。我哋叫咗三碗黑松露雞白湯麵，好好味，作為一餐宵夜，真係非常滿足！

跟住我哋搭地鐵去返東京站攞行李，跟住搭的士返酒店，返到去都幾乎12點，跟住又要洗衫又要執嘢，都要搞到點幾鐘先瞓😆

 

2024年11月東京三人行 Day 1 - 秋葉原

今次同兩個朋友一齊去，一個未去過日本，一個同我去過兩次東京，又係好友生日旅行!

我地搭9:00機，所以約左七點前到機場集合，過完關先去食早餐，去返上次食過果間Beef Liberty ，每人叫左個 all day breakfast ，飲左杯咖啡，就去行吓，今次撘UO ，要去200號閘果邊，都好快手上機同起飛!

飛四個幾鐘就到，過關又攪成個鐘，出到去就買NEX 去東京站，再轉車去秋葉原，今次book 左上次果間酒店同集團的秋葉原分店，位置有少少僻，地鐵站行七分鐘，不過都係一條直路，去check in 放低行李，就出去銀座食飯，原本壽星女想食蟹道樂，但係冇位，想book 定過兩日都冇🤦🏻‍♀️ 唯有轉去上次在三越前駅果間燒肉店 肉切，我地坐的士去，都係千幾円，去到又有位，坐返我上次個位隔離果張枱，叫返上次個set 5300 一位，又叫左梅酒，呢餐同壽星女賀壽，可惜冇蛋糕!

食完飯搭返的士返酒店，見酒店斜對面有Family mart 又去買甜品，我地買左兩盒雪條，有11支可以慢慢食，返到酒店，大家又吹水hea 吓，然後輪流冲凉瞓覺!舟車勞頓左一日好攰!

酒店住後感:
Monday Apartment hotel Akihanara
自從有一次好友住上野呢間apartment，我去揾佢地煮飯食，就爱上呢間Apartments ，佢勝左有廚房，廚具亦齊備，又有洗衣機，而且有餐枱，價錢合理，唯一係地點通常比較隔涉，係上次新日本橋果間附近雖然静，但勝在近地鐵站，呢間就要行約七分鐘，不過佢斜對面除左有便利店，仲有間Life 超市👍🏻 酒店好新淨，全部用密碼，唔使匙咭，有提供洗衣液，而洗頭水沐浴露都係用Pola👍🏻
今次住間房感覺冇上次咁大，上次廚房同睡床有道門分隔，今次呢間就冇，覺得有門好D，而呢間就有自動感應燈在廁所門口，我地就覺得唔需要，廢事半夜去廁所太光璨醒其他人😅
 

破地獄 The Last Dance

 

道生之前係做婚禮策劃，後來因新冠肺炎，在疫情下無法舉辦婚禮，他被迫改行，經人介唔後轉做喪禮經紀人。起初，道生因理念不合與合作伙伴喃嘸師傅文哥，產生磨擦。後來，道生着手籌備五場特別的喪事，眼見文哥對殯儀工作的態度一絲不苟，並見到文哥與長子志斌及幼女文玥相處的生活點滴，兩人更合唱一曲客途秋恨，慢慢改變了道生和文哥對殯儀業及生命的想法。。。。

呢套戲口碑好好，所以都有期望，可能都睇過類似嘅電影，未有太大嘅驚喜，而兩人嘅戲份比想像中少，成套戲較着重喺文哥嘅女兒身上，結局很感人！

龍子海濱宴會

約咗一班好幾年冇見嘅老友，去左觀塘呢間宴會廳食中菜，我地16個人，book 左間房，可以唱K，我地訂左個餐，因為人多所以全部餸要加大，另外特別幫我地訂左隻長腳蟹🦀，好大隻，一攞出嚟個個爭住影相🤣 成晚D餸好豐富，加大左份量食到好飽，最後要打包😅

席間舊同事透露自己胰臟有事，仲交帶左日後喪禮安排😨我覺得依家好多人都唔介意諗定後事，始終交帶左自己意願都好嘅！年紀越大越睇得生死唔太擔心，人始終會死，只希望不要太痛苦🙂