2024年10月東京七天生日之旅 Day 5 - 築地、渋谷 Shibuya Sky

今朝一早醒左，早D出門，行去小伝馬町站，撘Metro 日比谷線直接去築地，由本願寺嗰邊行過去場外市場，行咗一個圈，想去虎杖食海膽飯，發現佢開咗一間分店，但係呢間分店係完全冇客，因為佢個格局同其餘嘅唔同，呢度冇壽司吧枱，即係話睇唔到師傅嘅製作過程，我哋覺得冇乜所謂，唔使排隊等位食同樣嘅嘢都OK，因為呢間舖係長方形，只係擺到一張枱嘅闊度，所以做唔到壽司吧枱，我哋叫咗一碗海膽飯，另外叫咗刺身拼盤，裏面有帶子、大拖羅、牡丹蝦、蟹鉗、三文魚，我哋唔想叫兩碗飯，因為驚食得太飽，食唔到其他嘢，呢度只有一個店員，我哋坐低一陣之後開始有其他客入嚟，聽到佢哋同店員傾偈，原來個店員係台灣人，所以識得講國語同英文，海膽飯仍然係五款來北海道嘅海膽，店員都有展示俾我哋睇海膽嚟自邊度，唔同嘅海膽真係有唔同嘅味道，我覺得五款都好食，我哋走嘅時候都係仍然得我哋兩枱客，其他嘅分店都要排隊😅

食完海膽飯，我哋繼續行，先去飲杯咖啡，去咗上次飲過嘅米本咖啡，見到佢喺賣玉子燒嗰邊開咗間分店，不過好細間，只係做外賣，我哋去返有得坐嗰間，呢間嘅佈置全部都係Beatles，我哋影吓相嘆吓咖啡，飲完咖啡亦都買咗少少咖啡豆，然後繼續搵食，去咗一檔專賣燒海鮮嘅檔口，買咗蟹腳、燒蠔、燒扇貝，呢一間亦都係有位坐，而且仲有樓上，蟹腳啖啖肉好食！燒蠔同扇貝都好新鮮，好食！跟住買咗少少水果串，係蜜瓜、青提子同士多啤梨串，不過不失，唔算話好甜！

跟住再去食cheese cake，呢度又係可以坐低食，今日喺築地都冇乜點行過，大部份時間都係坐低食嘢🤣，行過鮨國嘅時候，見到竟然有位，冇人排隊，店員仲要喺門口招客，真係估佢唔到，可能競爭太大，呢度確實開多咗好多間海鮮丼，淨係虎杖都有五間，加埋其他都有十幾間，比起以前早期我哋嚟食嘅時候，係得佢有海膽飯！已經唔同晒！

食飽之後，行去銀座，因為想去搭銀座線過去渋谷，我哋買咗Shibuya Sky嘅門票，去到渋谷又落雨，先去樓下手信店行一陣，睇啱咗少少嘢，諗住行完街走嗰陣先至買，到咁上下時間就上去入口附近坐低等夠鐘，入去嘅時候職員話俾我哋知因為落雨，露天嘅地方唔開😱只可以喺室內行，既然都嚟到，都入去睇吓，因為佢呢度最靚應該係露天嘅地方，我哋仲特意買三點幾嘅飛，諗住可以影到日與夜，可惜而家乜都影唔到，好多人同我哋一樣照入去影室內位，所以都幾多人，行咗兩個圈影吓相，就落返去買手信，我買咗熊貓蛋糕仔，跟住我哋行去附近另一個商場，因為想去食壽司，不過去到話full book冇位，所以search咗附近另一間壽司店，係要上樓嘅，去到先發現個電梯唔能夠直接去到嗰層，除非有人帶你上去，所以唯有放棄！

最後我哋決定返酒店附近嘅商場搵嘢食，去咗Coredo 室町其中一個商場，見到地下有一間係食北海道生蠔嘅，叫做牡蠣場北海道厚岸，就入去試吓，餐牌只有日文，我哋先叫咗兩隻生蠔試吓，又叫咗兩杯梅酒，店員又俾咗一碗海帶湯我哋，佢應該係每枱客都會比一碗，生蠔好新鮮，而且都幾大隻，我哋再叫咗帶子同魚刺身，又叫咗一隻焗蠔同一隻燒蠔，一個烤洋蔥，一份顯拌麵包，焗薯仔，再叫多四隻生蠔，食飽飽再行返酒店😌😌

 

2024年10月東京七天生日之旅 Day 4 - Tokyo Disney Sea

今日要早少少起身，因為要去迪士尼，近期東京迪士尼係超多人去，而且要買到 premier access 就要早d入去，因為佢要個Apps detect 到你在樂園裏面，先至可以買到 premier access ，我哋搭JR 去東京站，再轉京葉線，去到舞濱站再轉迪士尼綫去Sea 嗰邊，我哋都買咗紀念車飛，我哋喺車上面經過 Disneyland 果邊，望到超多人排緊隊入完，而我哋去到 Sea 嗰邊相對冇咁多人，但係都係好長龍，我哋排咗大概40分鐘先至入到去，入到去又顧住影相唔記得咗買 Premier access🤦🏻‍♀️ 都諗起要買嘅時候，已經買唔到Soaring 嘅 Premier access 🤦🏻‍♀️🤦🏻‍♀️  唯有睇吓有冇啲時間會少人啲先去排隊！

今朝趕住入嚟，所以冇食早餐，入到去先去食啲嘢，又去我最鍾意嗰間 Cafe Portofino ，買咗兩個燒雞餐，再加一個沙律，好味！食完嘢四圍行吓，見到基本上個個機動遊戲都要排兩個鐘🙄🙄所以去坐吓貢多拉！😅 然後繼續行吓睇吓嘢，今日見到是史高治，又同佢影吓相！

行到五點幾，就上去隻船度睇吓有冇位，早D食dinner，主要係想食個生日dinner，我哋叫咗兩個set dinner🦞🥩，又加咗兩杯氣泡酒🥂，慶祝一下😄

最後我哋7:00左右就走，因為玩唔到機動遊戲，又冇乜嘢啱買，我哋搭到去八丁堀轉車，因為想避開東京站嗰幾條好長嘅路，直接返去小伝馬町，我哋由地鐵站出嚟嘅時候，見到原來酒店附近都有一間鳥貴族，不過今日食飽咗，所以冇再去食，跟住就去便利店買甜品返酒店食！

 

2024年10月東京七天生日之旅 Day 3 - 中目黑 Starbucks、銀座篝拉麵、Le café V、鳥貴族

今日早返少少起身，出去中目黑朝聖 Starbucks Reserve Roastery ，我地行去小伝馬町站搭Metro 日比谷線，坐到總站就係中目黑！由東口1出口出嚟，過馬路去對面間冬甩店後面，沿住條河(其實應該係渠🤣)一路行到去南部橋，中間行咗大概八個路口，每個路口都有一條橋，沿路都有少少餐廳，一路都見到好多人踩單車，可能因為今日係星期日，Starbucks 門口有一個交通管制人員，可能驚D人影相影到行咗出馬路，我哋入去睇吓嘢影吓相，見到今期嘅精品都幾靚，先去行吓每一層，最後行咗去第三層，有酒吧嗰一層，都仲有一、兩張枱，買嘢食就要排隊，不過都係排幾個人，我哋買咗兩款麵包同埋兩款咖啡，然後坐咗出去outdoor嘅位，今日天氣太熱，所以坐室外都幾舒服😌我哋都坐咗個半鐘先至走，走之前當然要shopping，買咗咖啡豆，又買咗隻杯送俾我同事，走嗰陣見到已經要人流管制，要攞飛等候入場 😱好彩我哋早嚟，上次都係一早嚟先至會少人D，唔知點解好多人鍾意晏晝先嚟🤔

沿着頭先嗰條河行返轉頭去火車站，今次行對面嗰邊條路，行過一間朱古力店叫做 Green Bean to bar Chocolate ，呢度有啲堂食位，因為佢有朱古力蛋糕，我哋就買左少少朱古力🍫，行出嚟嘅時候開始落雨，行返去地鐵站搭 Metro 日比谷線，出返去銀座！

先去食篝拉麵，去到只有六個人等緊位，所以等咗大約廿分鐘就入得，叫咗兩個雞白湯拉麵加味玉，水準依舊好食，出返嚟嘅時候，門口竟然有廿幾人喺度等緊位，好彩食得早！

食完就行返出去大街中央通り，今日係星期日，所以銀座嘅中央通り係改咗做行人路，只有星期日先至可以企喺呢條馬路中間影相😄 又去 Uniqlo 朝聖，今次一心去訂製自訂繡花圖案嘅袋同埋T恤，之前想訂但佢話要等幾日，今次去問佢話要等三個星期😅，不過冇問題，下個月都會再嚟，到時先再攞，原本諗住喺落訂單嘅時候先至揀要乜嘢產品，點知原來佢嘅程序係先買咗產品，再攞件產品去Service counter，話俾佢聽你要乜嘢圖案，跟住釘喺邊個位置等等，所以我哋去問完又再落返去買嘢，買完嘢又再上返去，上到去嘅時候又有第二個客落緊訂單，但係佢只有一個人做嘢，呢度就等咗好耐，到我哋整嘅時候一樣係好耐，因為佢要反覆確認你釘邊個位，又要用膠紙固定晒啲位置，再喺電腦入好多資料，如是者喺UNIQLO嗰度折騰咗兩個鐘😭

原先諗住去LV食個tea，因為喺UNIQLO搞咗好耐，所以最後我哋決定兵分兩路，一個去攞位一個喺度繼續落單，喺LV攞完飛之後，又出返去中央通嗰度坐低等吓，等咗差唔多半個鐘先至有位，因為距離午餐唔係好耐，所以我哋只係食咗兩款甜品，同埋叫咗兩杯嘢飲，坐咗一個鐘左右就走！

跟住去行街，去左三越百貨嘅 FANCL度買supplement，行多一陣間就開始落雨，於是我哋去搵嘢食，去咗附近嗰間鳥貴族，之前一路都想試，但係一路都冇試過，今次就決定去試吓，去咗有樂町嘅分店，上到去要等位，等咗差不多一個鐘先有位，我哋坐嘅位都比較熱，因為對正個爐頭，又近住個廁所，今日食拉麵同埋去LV都係坐近廁所位，今餐都唔例外😅呢度用平板電腦落單，我哋揀咗幾款雞嘅串燒，有雞腿肉、雞翼、西京燒汁雞、雞肉丸等等，總之全部都係雞🤣🤣 只係唔同嘅醬汁，最重要係佢多數係每碟都有兩串，而價錢只係¥370 一串，性價比都好高！食完嘢都比較夜，所以今晚我哋搭的士返酒店，因為酒店喺新日本橋，由有樂町返去唔算好遠，都係搭咗¥1,600！今晚冇去便利店，因為搭的士直接返咗酒店休息😂