2024年4月九州鹿兒島自駕遊 Day 6 - 神話の里公園、十三塚史跡公園

今朝一早，陽光從天窗照入房，所以早早起床，就去附近行吓放工吓飛機仔，酒店旁邊有個小公園，看起來有點舊。不過冇人，我就飛返兩轉，先去會合好友，去佢地個champ度食早餐！然後出發！

今日下午機，時間不能多於，去左神話の里公園。呢度有䌫車可以坐但今日冇開，可能因為呢個兩日都落雨，冇得上山，就諗住博一博在停車場放飛機，不過攞部飛機出嚟已經被職員阻止了😅

冇得飛，唯有到此一遊，影幾張相，跟住上網睇吓機場附近有冇地方去，搵到一個叫做十三塚史跡公園，去到原來係好細嘅小小草地，又係到此一遊🤦🏻‍♀️，冇地方去就早小小去機場了，先去還車，然後租車公司車我地去機場，去到機場櫃枱，地方好細，唔多人，所以好快！過完海關去食晏，呢度都有幾間食店，我地揀左一間叫做山形屋食堂，見佢食物選擇都多，主要係日式食物，我地叫左三個拉麵，一份魚生，一份餃子，拉麵味道都幾濃！食完晏又行吓手信店，買多少少手信，然後去到登機閘口果邊又有手信店，又有唔同手信，好友最後衝刺，再買多D先上機，6日旅程話咁快完結了！依家好友轉左工，少左假期，下次可能冇咁快可以再去旅行了！

 

2024年4月九州鹿兒島自駕遊 Day 5 - 高千穗牧場、丸尾滝、霧島神宮、美肌の湯こしかの湯

今日第一站去尋日食唔到果間 Ocean Jewelry，在google search 不到英文名，要search 日文名オーシャンジュエリー，去到問左有冇海膽先，佢話有先泊車！我地叫左兩個海膽丼，及一個炸豬扒飯，海膽睇落較細條同淡色，味道亦係較淡，始終¥1290 唔會比到好靚嘅海膽，不過都好新鮮！我地見一板海膽賣¥1790，所以就叫左一板，係同海膽丼同一款海膽，所以質素一樣😅

食飽就揸車去高千穗牧場，大概40分鐘車程，唔知係咪因為今日係閒日，所以個牧場冇乜人，同埋個牧場都冇咩睇，佢有D動物嘅屋，望到裏面有牛、馬、羊，但係冇放出嚟，行行吓見到到個小山丘，上面竟然有個多啦A夢嘅隨意門！😂我地上去影相，我放架細飛機，不過開始落雨，所以匆匆忙忙影左一陣就走！跟住入去三點度買嘢，好有想食佢哋個yogurt ，見到有啲仲有幾日到期嘅做緊減價，所以買咗幾杯，另外買左個cheese cake 留返今晚在酒店食！

我地上車食左個yogurt先，好奶👍🏻跟住揸左十幾分鐘車去一個叫丸尾滝嘅地方，呢度只有一個小瀑布，影左幾張相就走，跟住再揸車去霧島神宮，十幾分鐘就到！ 霧島神宮除左外面個巨型鳥居⛩️之外，𥚃面冇乜特別，只有棵好耐歷史嘅御神木！我地只係逗留咗半個鐘就走！

跟住去附近搵吓有冇超市，因為想買嘢今晚在酒店煮野食！搵到附近有家超巿，雖然唔大，都有我地要嘅野，又買左海膽，今次呢板唔同，貴D，要4千幾円，不過係北海道產，大條D，另外買左和牛、魚生，今晚間酒店有提供食物，不過只有二人份，所以要加野食！

酒店住後感：
小鹿野温泉美肌の湯こしかの湯
Bihadanoyu Koshukanoonsen
好友Book 左Camping 房，有埋廚房同燒烤爐，我就book 左一間單人房，所以會去好友間房一齊燒嘢食！佢哋係住一間house 咁，間房係個圓拱型camp咁，可以瞓在床上睇星星！房外有私人風呂，另外有個大廚房，設備齊全，廚房有兩個雪櫃，一個大嘅放左二人份量晚餐同翌日早餐，一個細雪櫃擺滿飲品任飲👍🏻當然佢有溫提飲品唔可以拎走啦！酒店預備嘅晚餐有一盤5款肉類，各有幾件、兩隻蝦和扇貝、沙律、凍蝦和八爪魚、西班牙海鮮炒飯，足夠兩人食，我地買左牛扒、牛肉、海膽、扇貝、魚生、大葱，呢度設傋好齊全，除咗餐具亦有多士爐、攪拌機比你整早餐！我地用燒烤爐BBQ，好豐富，海膽好食過今日午餐果D好多！👍🏻👍🏻😍😍 食完野可以在酒店指定位置放吓煙火，佢呢度有得賣，比埋水筒火機你，三個大朋友玩得好開心！😂😂😂，食飽玩完煙火，我返自己間單人房，傳統非camping嘅房喺晒主樓，我問房要上一層，房間面積不大，但係房內有私人風呂👍🏻👍🏻，房間頂仲有個天窗，不過對於住張床，天開始光就好光，唔啱我呢D小小光都醒嘅人😅 我地浸一浸風呂先瞓，整體嚟講呢間酒店好正，好有間camping 房都要 $2000 ⬆️，略為貴咗D，如果加多一個人要加多$800 ，反而我私人風呂間房，只係三百幾，相對抵好多👍🏻不過呢個地點真係要揸車先至嚟到，附近周圍都冇任何商店。

 

2024年4月九州鹿兒島自駕遊 Day 4 - 櫻島、鹿兒島市

今朝又去コメダ珈琲食早餐，然後先返酒店check out，上咗車之後就直接去碼頭搭船，連人帶車一齊搭果種汽車渡輪，半個鐘車程就去到碼頭，我都未試過搭車坐渡輪，其實樱島火山可以揸車過去，不過要兜一個大圈，所以搭船係最方便，而且想體驗一下搭呢個渡輪，欣賞吓海景，上船嘅時候唔使俾錢住，我哋泊好車之後就上樓上睇吓，呢架船有頂樓可以在露天位置度睇海景，沿路見到對面返嚟嘅船，有D係冇頂樓，即係冇露天位可以俾你睇風景，咁啱坐着呢架真係好彩，渡輪上仲有得買烏冬食，亦都有自助販賣機賣飲品同麵包，今日天色都唔算太好，不過都冇落雨，係有少少天陰，而且好大風，全程大概搭咗半個鐘，落船嘅時候一上陸地就要俾錢，佢係以車長計數，再加乘客人數去計收費，上船揸4分鐘車就去到第一個景點，霧島錦江灣國立公園，呢個公園可以有足湯俾你浸腳，又有樱島火山之前爆發熔岩損毁嘅遺跡，好友去咗浸腳，我就冇興趣，所以我喺佢個大草地嗰度玩 Hover！

跟住去另一個景點叫做”叫びの肖像”，睇佢嘅介紹應該係一個Rock and Roll嘅歌手，之前喺呢度開演唱會，因為呢度只有6千個居民，但係演唱會就吸引咗七萬人，所以就整咗呢個肖像紀念呢件事！我哋喺附近行嘅時候都見到好多貓，呢個島應該都幾多流浪貓😂

跟住我哋揸車去另一個地點，叫做湯之平展望所，呢個位可以望到之前火山爆發，山上面有個位置被夷平左，可以望到果個位，我哋觀察完一輪之後，就決定喺下面嘅停車場度放飛機，好彩冇俾人趕😅

大概逗留咗兩個半鐘我哋就走啦，搭返船去返對面岸，搵地方食晏，去返尋晚酒店附近嘅天文館，嗰度有一間食鰻魚飯嘅，叫做 うなぎ末，因為我哋幾個都鍾意食，所以就去食啦，見佢都幾多人不過等位一陣就有枱好快，我地三個都係食半條鰻魚飯，呢度係蒲燒鰻魚，好味👍🏻👍🏻👍🏻👍🏻

食完鰻魚飯，我哋揸車去AEON 行吓，日本好多大大間嘅AEON，不過呢個商場就冇乜嘢睇，地方係好大，但係啲shop唔係好啱睇，我就淨係買咗咖啡豆做手信，好友都冇乜斬獲，跟住我哋就出返去酒店附近，原本想喺附近嘅地方搵吓有咩食，但係睇咗幾間都唔係好啱，又行咗一間好細嘅超市，然後就去返尋晚間酒店樓下嘅拉麵店食拉麵，店名叫Snooup ，意思係 Soup+Noodle+Up ，呢間係主打蕃茄湯拉麵，佢係蕃茄湯加咗芝士🧀，又有少少辣味，我個人覺得三樣嘢加埋一齊都唔係特別夾，蕃茄加芝士都仲可以配搭到，不過加埋湯麵就有D怪，不過味道唔差嘅，因為我哋太晏，所以食飽就算，跟住又去Donki 買甜品返酒店食！😋😋

 

酒店住後感：
Remm Kagoshima
今晚住呢間酒店位置都好方便，近天文舘，在我們昨晚的酒店斜對面，酒店大堂在樓上，酒店有自己車位，我地上去比左泊車費用，但樓下泊車處職員收唔到指示，加上言語不通，我地又上返大堂，攪左一輪，職員再與泊車處職員溝通，再落返去先比我地泊車，我地先至搬左行李上房，大堂職員都講sorry 講左幾次！🤦🏻‍♀️
酒店有點舊，似係曾在十年八載前翻新過，D電制位黃晒！房間空間不大，有張小圓枱，張櫈有按摩背墊，浴室設計係玻璃牆，望到床，廁所就上半玻璃，下半牆，兩個玻璃牆都有幅簾，可以拉低就睇唔到！整體都ok ，不過一定係尋晚果間 Daiwa Roynet 好得多，如果要住天文館附近，Daiwa 係首選！