飯局作為客 - 團年聚餐

又去好友屋企食飯，今日好友整左燒雞、煎牛扒、煎雞扒、豬手、蝦、蘑菇湯、蒟蒻蔬菜湯，好好味！😋😋😋😋成晚同好友女兒玩，都冇乜認真傾過計！😅飯後仲有自家製芝士蛋糕！👍🏻👍🏻👍🏻

 

二號廚房

今日約咗好友食返餐遲來的開年飯，去咗佐敦呢間食店，之前同另外幾個好友想嚟試吓，但係當時冇開，今日就試一試！

呢間店舖要上一層樓，地方唔算好大，眼見大概有兩、三張大枱，同五、六張細枱，另外應該仲有一D房，呢度主要係食水煮魚、毛血旺之類嘅麻辣食物，我哋叫咗水煮牛肉、炸蠔仔、牛肉炒菜心、薯仔牛柳粒等等，食物嘅質素都唔錯，我地都食得好飽！食完飯，再去佳佳食甜品先走！

 

2024年2月大阪獨遊 Day 6 - 心齋橋

今晚搭黃昏機，朝早check out完之後放低件行李，行去心齋橋食早餐，去咗黑門市場對面嗰間上島珈琲店，上次去黑門市場嘅時候都喺呢度飲過咖啡☕️  呢度嘅早餐只有多士，配咗隻雞蛋，食少少嘢就出去行吓，去黑門市場行咗一個圈，買咗咖啡豆俾同事，然後就行過去一個叫做瓦屋町嘅地方，由黑門市場行過去大概都要20分鐘，中途經過一間玉出超市，賣D嘢都好平，不過我就冇買嘢，因為都係食物同飲品為主，如果下次住有廚房嘅apartment 就可以考慮去呢度買餸！行咁遠，就係為咗搵一間叫做 Dekasan 的店，招牌寫住Pupu’s Kitchen，但在google map search 唔到，用Dekasan 先搵到，因為想食佢個肉肉三文治！之前在東京miss 左類似嘅三文治！

去到嘅時候門口有三個人等緊位，佢呢度又係先到先入座嘅安排，見到店入面其實只有兩張枱，一張得一個位，一張得兩個位，同埋有三個吧枱位，等咗一陣一個人嗰張枱果個人走咗，但係佢都唔會比我入，因為前面果三個未入座🥺，今日落雨，又好凍，好彩唔使等好耐果三個吧枱位走咗，我先至可以入座！叫左招牌肉肉三文治，有300g 或400g 牛肉的選擇！叫左300g 另外加杯咖啡！老實說，牛肉唔係特別好食，而且頗多煮肉的汁，不是牛肉本身的肉汁😅 牛味唔重，有D失望！可以唔使特登去試😅如果都想試吓又唔想等位，佢都有外賣提供！

食完野，行返出大街，去玉出超市睇吓，D野都幾平，不過都係大大pack 大大份，唔啱我一個人的份量！所以冇買任何野！

行返去黑門市場！再出返去心齋橋，見到蟹道個蟹肉包就快出籠，有條隊排到落河邊，見佢仲有10分鐘出籠，呢𨍭係今日最後一轉，我又去排吓！佢哋冇截龍，應該大量供應，$500一個包，每人限買一個，個包熱辣辣，塊皮冇叉燒包咁粗糙，幼細D蟹肉雖然都唔少，不過唔夠新鮮，而且好碎，相信係蟹腳就咁賣，蟹身起肉做包，以價錢嚟講都算抵食！

跟住返酒店攞返行李去機場！買左17:35 車飛，之前聽講關西機場超多人，所以早少少過去，去到機場，寄完行李，排隊X 光check 行李，呢個位超多人，條龍勁長！可能因為機場裝修緊，有D Area cut 細左！不過其實好快！人龍keep 住行！由排隊到過海關都係十分鐘多D，過完海關出到黎，呢個位之前因為裝修所以好細冇野睇，依家裝修完唔同晒！好大好新，仲好多名店添！不過買手信個位有D亂，個別手信要攞飛，轉頭等叫 no. 🤔🤔 有部分又自助付款！我就冇野買，去食碗拉麵先！呢間叫麵庄的拉麵店，主打和牛拉麵，全部係吧枱！叫左個特製雞白湯拉麵，味道唔錯！食完就搭冇人駕駛去閘口等上機，落機後又要搭巴士，今次好快出行李，去完廁所出嚟已經見到自己件行李了！返到屋企差唔多一點😴😴😴

 

2024年2月大阪獨遊 Day 5 - 百舌鳥大仙公園

今朝一早醒咗，因為琴晚都幾早瞓，加上唔記得拉埋窗簾，所以因為天光而醒咗😅

今日諗住去一個叫做百舌鳥地方，屬於堺市，喺地圖見到佢係一個天皇陵古墳，同一個好大嘅公園，在難波搭南海高野線去三國丘，轉JR 阪和線，搭一個站就係百舌鳥站！呢個站都幾舊，而且好細，我諗平時都唔係太多人去呢度，由火車站行過去都好近，我先去公園嗰度唯一一間餐廳 IROHA ，呢間餐廳空間都幾大，佢雖然有十幾張枱，但係張張都係四人以上嘅大枱，店入面嘅裝飾好田園feel，用左原樹木枱凳，有D花花草草裝飾，入面亦都有一D小物售賣，又有麵包賣，好吸引！

我叫咗一下雞扒沙律🥗、咖啡☕️、士多啤梨🍓巴菲，雞扒沙律跟住一片麵包，好好食，令到我有少少想買一包麵包，但係佢個麵包都幾大嚿，我諗都好難一兩日食晒😅 雞扒嘅味道都唔錯，咖啡不過不失，士多啤梨🍓巴菲都幾甜味道唔錯！原本入嚟嘅時候得兩三枱客，跟住就差唔多坐滿晒！

食完嘢行入去公園，見公園入面冇乜人，就攞架飛機出嚟放咗一轉，因為聽到佢喺度廣播，但係唔知佢講乜，又唔知係咪話唔俾放飛機，所以我就唔放住，見到有一個堺街市博物館，所以入去睇吓！入到去博物館又係包場 🤣🤣 博物館唔係好大，基本上得四個展廳，我就可以自由影相，因為只有我一個人！行完博物館出嚟，再行去公園其他嘅地方，喺其中一個草地見到有四棵河津櫻🌸，有兩棵開得好茂盛，我係咁影相影咗好耐，好開心！因為影出嚟好似好多，其實只有四棵🤣🤣🤣

跟住見到有一個叫做日本庭園嘅位置，入去呢度就要俾錢，又入去睇吓！見到有一對新人喺度影緊和服分照，我就四圍影吓相，見到有個魚翅，有得餵魚，有個扭蛋機裝住魚糧蛋，我就買嚟餵魚🐟，魚池仲有D鴨🦆，佢哋係咁同D魚爭食😅我餵完一個扭蛋，又再扭一個，都扭左幾個，餵得好開心😆😆跟住行到一個地方有個空地，我又放咗兩轉飛機，好開心！

玩左半日落返去梅田，搭返阪和線去天王寺轉車，搭谷町線去梅田，特登去返梅田食銀座篝拉麵！唔使等位，呢度有蛤牡蠣湯拉麵，唔知試唔試新嘢好，最後都係食返個雞白湯拉麵😅  食完喺附近行吓街，最主要係想去貴和製作所買嘢整耳環！順便喺商場嗰度行咗幾個圈，臨走之前去多次銀座篝，都係要試吓佢個蛤牡蠣🦪湯拉麵！😆今次就要等位，前面大概有10個人，不過都好快，等十幾分鐘已經有位，老實講，佢都係專注做返雞白湯算啦🤣🤣 佢個牡蠣🦪湯，比較香港嘅牡蠣不如㷌，都爭得遠😅 食完就返酒店執行李，聽日就要走喇！😔