2023年11-12月東京自駕遊 Day 4 - Warners Bros Studio Tokyo The making of Harry Potter 、新宿

今朝七點幾就要check out，因為我哋book 咗Harry Potter九點，所以要快快脆脆出返市區，我哋差唔多10點先去到Harry Potter嘅停車場，先發覺佢個停車場唔可以就咁泊車入去，係要提前上網買咗泊車飛先，呢個安排真係好奇怪，所以我哋停咗喺停車場個入口度上網俾錢，佢要登記左member 先可以比錢，搞完一輪攞到個QR code 先至可以入到去停車場，泊低架車之後，喺入口影咗一陣間相先至入去，雖然我哋遲咗一個鐘，但係其實D職員都冇check時間，scan QR code 就入得，一入到去，先去食早餐，因為大家都肚餓喇！

呢度得一間餐廳，好似就係喺餐廳度食，我哋叫咗兩個pork rib 同兩個All day Breakfast，另外叫咗一個沙律菜同埋薯條，另外喺隔離買咗一個 Slytherin cupcake，食飽之後，好友先去買左兩件學院袍，跟住就入場！

啱啱入場嗰一下，前面冇人，可以影到幾張冇人嘅相，跟住等候區排隊入去，睇完介紹嘅短片，就進入魔法學院，我哋四個人當中有三個都鍾意Harry Potter，之後一個唔係特別喜歡，就覺得有啲悶，我哋三個就影相影得好開心，冇興趣嘅朋友就恰晒眼瞓！🤣🤣 要坐低唞一陣😅因為兩個好友買咗學院袍又要去玩綠幕拍片影相，我哋要等等佢哋，所以就坐埋一邊休息吓！今次有入去Harry Potter 住果間屋，睇吓佢住嘅樓梯底😅 又有排隊影火車同月台，上次因為一個人冇影到！

行到去商店，我都係買咗少少嘢，然後喺大堂等佢哋，因為就嚟聖誕，呢度就多咗棵聖誕樹，除此之外，冇乜特別聖誕嘅裝飾，或者聖誕主題嘅產品，我哋玩到三點左右就走，揸返車出去新宿！

去到新宿，先去歌舞伎町Kabukicho Tower，呢座算係新嘅商場，之前已經嚟過一次，其實我就唔大興趣，不過好有想去見識吓，所以就帶佢哋嚟睇吓，一上去就係歌舞伎町橫丁，係好幾間食肆組合而成，今次冇上次咁熱鬧，好多食肆都有位！我哋隨意揀咗一間關東食祭，叫咗烏冬、壽司、餃子，個烏冬都OK，其餘就麻麻哋，我諗佢初初開嘅時候咁熱鬧係因為佢個設計同氣氛都好吸引遊客，不過食落就麻麻哋，都幾難會有返頭客🥹 

食完嘢上去樓上扭蛋，佢哋嫌呢度扭蛋嘅款式太少，所以行咗一陣就走，落到樓下覺得好凍，大家都好想飲咖啡，就去咗隔離APA 酒店嗰間coffee shop，呢間APA 酒店我住過好幾次，從來未幫襯過佢呢間coffee shop，雖然佢好似普通嘅coffee shop咁，不過見佢咖啡嘅Menu同埋介紹，睇落都好專業，我哋一人叫咗杯咖啡，味道都真係唔錯👍🏻

飲完咖啡繼續行街，沿着歌舞伎町，行過去新宿三丁目，睇吓鞋，又睇吓眼鏡，行到去Disney Store，當然要入去睇吓啦，不過都係冇嘢啱，在Disney store 旁邊見到之前想book，但係book唔到嘅木曾路壽喜燒個招牌，心諗不如上去問吓有冇Walk in位，上到去問，叫我哋等一陣，真係有位俾我哋，我哋好開心！一坐低就揀咗松阪牛套餐，等緊嘅時候聽到隔離張枱都係講廣東話，應該都係香港人，呢度有專人幫我哋煮牛肉同埋配菜，牛肉每人有三片，第一片我哋覺得好好食，只係略嫌熟咗D，所以第二塊開始就要五成熟左右，更加好食，食得好開心，佢嘅配菜係非常之多，加上我哋頭先食咗嘢冇幾耐，所以好飽，食唔晒啲配菜，臨尾佢仲要整左碟烏冬俾我哋，所以飽到不得了，不過幾飽都好，都要食埋佢個甜品，有雪糕或者蕨餅，食埋甜品真係完美，出去埋單嘅時候見到佢有賣壽喜燒汁，不過得返一包，我就買咗返去下次試吓整，等埋單嘅時候，見到有其他客Walk in入嚟問有冇位，我以為我哋四個走咗會有枱，點知佢都係話冇位fully book，跟住又有第二組客入嚟問，都係話冇位，所以我哋真係好好彩，因為早嚟，先至咁啱有位俾到我哋，仲要咁好食，食到好開心！

食完飯行左一陣藥妝店，在Bic camera 見到有免費海報，呢張海報係2024年嘅年曆，印咗喺日本地圖上，喺2018年嘅時候攞過一張，舊年都見唔到佢有，今次竟然又俾我遇到，攞返張返屋企貼先！

我哋揸車去淺草橋果邊，今晚又轉酒店，跟住幾晚都住呢間，跟地圖去到，見酒店唔同樣，原來我哋去咗本館，佢應該有另一間分館（六区）喺對面馬路，但係我哋住嗰間係冇停車場，架車要泊喺本館呢邊地庫，仲要¥2000，我哋決定泊咗一晚先，再睇吓附近有冇平D又近D嘅停車場，所以我哋推行李過對面馬路，好友就泊車，然後一齊去返酒店會合，然後就check-in， 呢兩日都早起身，大家都攰喇，所以就早D休息！其實都十點幾！😅

酒店住後感：
淺草豪景酒店 旅館分館 (六区）
Asakusa View Hotel annex rokku 
酒店門外有D木條裝飾，感覺好似日本設計師隈硏吾嘅style，酒店近住淺草寺一帶，行去仲見世通大約7-8分鐘，夜晚附近横街都幾熱鬧，有間 DONKI ，食店也多，反而大街比較靜！
酒店大堂要上一層，話埋比佢聽泊車一晚，check out 時先至找數，牙刷等用品在大堂取，我地今次住同層，不過唔係孖住，我哋間房望到少少Skytree ，佢地住對面果邊就睇唔到！
房間空間都充足，有張梳化，有個行李位，不過只放到一隻喼，冇衣櫃只有衣架在行李位上面！酒店都好新淨，我地之後泊車在對面街，只需¥1000-1300，只是露天位，但近D，方便走果日推行李唔使行咁遠👍🏻

 

2023年11-12月東京自駕遊 Day 3 - 富士山河口湖町役場前Lawson 、吉田市、富士山展望デッキ、大石公園、忍野八海、御殿場 outlet

今朝一早6:30 就要出發，因為要過去富士山果邊，同埋要避開繁忙時間驚塞車，我哋喺酒店check out，就推行李過對面馬路停車場上車，車程預計要個幾鐘，我哋去到中途有個休息站叫做石川嘅地方，已經7:40了，大家去個廁所，買杯咖啡，我就見到有個扭蛋機，全部係海洋生物鎖匙扣，想扭個海鰻比好友，但係扭咗兩個都唔中，所以放棄咗，跟住上返車繼續去富士山🗻

越嚟越近富士山嘅時候，離遠望到佢已經覺得好靚，我哋第一站先去河口湖町役場前Lawson ，其實想影富士山前面嘅 Lawson，一共有兩間，一間係近住河口湖站，果間係最多人，因為搭火車就只能去車站果間，否則都要行一段路，如果唔想咁多人，就好似我哋咁去河口湖町役場前呢間，就少人好多，睇人地D相，覺得影出嚟個角度都係差唔多，我地去到 Lawson 泊低架車，見到只有兩三個人，呢個位影相要小心D，因為要企馬路邊先影到多D個富士山，可能河口湖站果間空間大D都唔定，冇乜人就可以慢慢影相拍片 🗻今日呢間 Lawson 冇營業，但有人出入做維修保養，如果Lawson 今日有營業，佢買個招牌燈就好D ！

影完Lawson 跟住揸車去吉田市，10幾分鐘就去到，我哋泊低架車，就行去日川時計店，離遠已經見到好多人企喺馬路兩邊，等過馬路影相，呢度亦都有交通督導員，阻止D人停喺馬路中間影相，所以個個都係一個離遠揸機，一個慢慢行過馬路，咁樣影，不過影出嚟都係好多人😅 我就冇影，好友就影咗幾張，下面都係好多人 🤦🏻‍♀️ 其實呢條街，除咗有人嚟打卡影相之外，平時應該唔會有人嚟，因為見到呢度一帶嘅商店都冇開門，定係太早未開門？我哋想搵D嘢食吓都冇😅 所以影完相就走！

再揸咗10幾分鐘車，去下一個景點，就係富士山站嘅富士山展望台，呢度係一個好小型嘅商場，在富士山站上，我地入到去先搵野食，地面係賣手信、水果等，地庫只有一間食店，係賣烏冬的，我地好肚餓，所以一人叫左碗烏冬，不過呢間嘢D烏冬，真係唔好食 🤦🏻‍♀️ 雖然大家都好肚餓，所以只係食咗少少頂一頂肚餓就放棄咗，跟住上去頂樓展望台，睇吓個富士山，呢度個view 都唔錯！上到嚟都有五六個人喺度影緊相，我地都影左一輪，又坐低 hea 吓，如果有杯咖啡，真係可以hea 幾個鐘😌😌 入返去商場入面有間 Daiso ，買到個電話夾，可以夾住個電話喺架車度導航喇！落返地面睇吓D手信，大部份都富士山造型嘅手信，我地買左小小，另外買左幾杯 gelato 上車食！好味 😋

跟住揸車去大石公園，經過河口湖一帶，見到有個地方幾靚，所以停低架車落去睇吓，呢度有得租船，但係今日好似冇開，跟住又見到我哋原本想book嗰間酒店秀峰閣，酒店喺河口湖邊，個景好靚，酒店後面就係紅葉迴廊，呢個地方我哋之前冇plan要來，意外地去咗呢個地方睇紅葉，跟住好友因為肚餓，所以喺旁邊嗰間餐廳食烏冬，我就同另一好友喺紅葉迴廊影咗一輪相，就行返出去湖邊度散步，見到有間西餐廳，我哋就買咗兩杯咖啡坐喺湖邊chill 吓！☕️😌😌對住個富士山，真係可以坐成日，不過天氣都係比較凍！所以坐咗一陣我哋就會合好友，揸車繼續去大石公園！

去到大石公園，見到嗰啲紅色波波草，而家係枯黃晒，所以係一堆枯燥咁，而且唔係睇相咁多數量，只有一個細area 😅 不過呢度仲有一個好大嘅蘆葦草原，又有餐廳同埋商店，餐廳就坐滿晒人，因為餐廳嘅座位係向住過戶，所以好多人坐喺度飲杯嘢睇吓風景，好友就喺商店度買咗富士山袋，我因為冇去到商店行，所以冇買到嘢！呢個公園有少少失望，因為都唔係話真係好靚！可能唔啱季節 😅

然後再忍野八海，我未去過呢個地方，原來佢都算係一個旅行團必去嘅景點，因為好多旅遊巴，同埋好多一團團嘅遊客，呢度應該係有好幾個池，地方都幾大，我哋見到有幾間買嘢食嘅小店，有一間係買燒心型米餅、有一間就係賣燒 mochi，即係一串有三粒，好似雪米糍咁樣形狀，一串串圍住個火嚟燒，仲有幾種口味選擇，我哋揀咗原味，即係有少少醬油，味道都係淡淡地，煙煙韌韌嗰種，隔離有一檔賣牛肉串，就買一串試吓，又出乎意料之外地好食，最後仲有一檔係買栗子，我哋就買咗包留返上車食，因為日本啲栗子係好大粒嘅，所以大家都有興趣食，食完嘢，又影完一輪相，就行去搵淺間神社！

行到去淺間神社，發覺唔係我哋想去嗰間，其實我哋想去嗰間應該喺山上面，應該叫做河口淺間神社遥拝所！既然去唔到，就留返個藉口下次再去！因為已經三點幾，我哋係時候要去酒店，因為仲要去outlet同埋浸溫泉！

去到酒店，已經四點，我哋先去check-in，好友就揸架車去停車場泊，一上到房，我哋好開心，因為我哋訂嘅房係富士山景，大大個富士山就喺眼前，真係好正！原本幫好友一pair 情侶訂咗雙人床房，但係酒店俾咗雙床房佢，所以佢哋要換房，本來我哋兩間房係一齊同一層樓，結果佢哋搬咗去樓上，其實佢哋間房都係雙床房，只不過兩張床拍埋一齊，就當係雙人床房！😂佢哋間房係趴喺張床度睇富士山，我哋就富士山喺旁邊🤣

放低行李就行落去御殿場outlet，好近，只係搭𨋢落去行幾步就入去outlet，我哋先去搵嘢食，雖然outlet呢度有好幾間餐廳，但係都有個food court，我哋入去food court見到有間食牛扒嘅，好似幾正，因為睇到佢係用炭火燒，所以就試咗呢間冇去其他食店，不過牛扒就唔係想像中咁正，好一般，可能始終都係food court嘅食物，所以唔好太大期望！

食完嘢就去shopping，我哋分頭行事，我同好友行完food court 呢邊，行條長天橋去另一邊，嗰邊係比較貴價嘅品牌，我哋喺Burberry睇啱咗少少嘢，講國語嘅店員好好招呼，好友買咗個袋仔同埋卡片套，我就買咗個銀包，行到咁上下就返去酒店，因為好友👩🏻‍🤝‍👨🏼訂咗個私人風呂，雖然我哋兩個👭🏻冇訂，不過我哋都想去大池度浸，不過最後好友都係話唔去，所以我自己一個去浸溫泉，返上房之後就大覺瞓，因為第二朝又要一早起身！ 😂

酒店住後感：
Hotel Clad 克拉德酒店御殿場
我哋計劃行程嘅時候，睇咗好多間酒店，見到呢一間個價錢好實惠，雖然房間唔係好大，但係勝在有溫泉又近outlet，所以就訂咗呢間，最重要係貪佢有個富士山景！
酒店嘅外型遠睇好似普普通通，近睇就好新淨，裏面當然都係好新，酒店嘅設計，有一邊嘅房間係面向住富士山，另一邊係背住富士山，其實住得呢度一定揀向富士山嗰邊，唔知佢背向富士山嗰邊D房會唔會租唔出？房入面嘅面積唔係好大，一入門口就係洗手盆，對面就係浴室同埋廁所，係分開嘅，睡房嘅部份有兩張單人床，仲有一張梳化，酒店會提供一袋毛巾同埋衫，方便你去浸溫泉，溫泉要落返地下再行過一條長嘅巷，入去溫泉範圍就先要除鞋，呢個溫泉都歡迎一D唔係酒店嘅住客過嚟浸日歸溫泉，所以有D鞋嘅locker，入到去有個類似接待處嘅位置，我就冇行入去，直接行樓梯上去樓上溫泉區，溫泉區呢度都有另一個接待處，除此之外，佢有一個Area 係擺咗好多書俾人可以坐喺度睇書，因為D 書都係日文，所以我哋唔會睇，去到女湯果邊，佢有一D locker仔俾你擺貴重嘢，另外有D大嘅locker就係俾你擺衫，跟住會經過化妝間，然後就入去溫泉區沖涼，佢有一個冷水池，一個室內溫泉，而出去有兩個室外嘅溫泉，正常呢度係可以望到富士山，但係因為夜晚黑，所以睇唔到個富士山！不過呢個溫泉都幾舒服，不過唔算好大，浸完溫泉例牌飲返支鮮奶，佢呢度只需要拍房咭記帳， check out嘅時候先至俾錢！整體嚟講呢間酒店好正，性價比好高，我都會介紹俾其他朋友！👍🏻