2023年10-11月東京半獨遊 Day 3 - Tokyo Disneyland

今朝一早check out，再過去東京站去第二間酒店check-in，途經火車站，當然要去買手信，雖然NY cheese 在新宿開了分店，而且聽講機場都有得賣，不過都係順路喺東京站買咗先，因為可以擺低喺酒店先，今朝去到都有條人龍，但係少於10個人，所以好快就買到，另外再行過去買埋Tulip Rose，就去酒店，將所有手信塞咗落個篋度先，然後去酒店放低件行李，跟住就搭車去迪士尼！放低行李之後行咗去地下街，諗住去Starbucks試吓期間限定嗰杯Halloween特飲，但係佢話賣晒，所以轉左去星乃珈琲店度飲杯咖啡，食件多士先！

都有好幾年冇去過Disneyland，次次都係去Disney Sea，今次就去Disneyland嗰邊，趁佢40周年活動仲未完結，加上有新嘅園區，一定要去睇吓！去到舞濱站，見到Starbucks仲有期間限定嗰杯Halloween賣，所以入去買返杯試吓，買完之後坐低飲，因為今日係Halloween，見到好多人都裝扮迪士尼人物，有唔少係 Belle 造型，同埋烏蘇拉，喺Starbucks入面見到有一個扮魔導王入邊嘅Captain Hecter Barbossa ，仲有隻假嘅馬騮喺膊頭，造型相當認真，所以我都膽粗粗問吓佢可唔可以影相，跟住佢指一指門口佢個friend係扮咗 Jack Sparrow 🤣 佢話等埋佢先一齊影，仲叫我坐佢哋中間一齊影相，非常搞笑！

入園嘅時候，喺個app度撳入場券嘅時候，撳錯咗五月嗰張，所以過唔到，諗住撳返正確嗰張，點知個Network唔知做乜好慢，等我搞咗一輪先至入到園🥹

入園之後周圍影吓相，見差唔多要做巡遊，所以就搵個地方坐低等，今日都算幾多人，可能因為Halloween，個個都好細心打扮，不過佢哋唔會打扮得好恐怖，因為據講迪士尼係唔俾化太嚇人嘅妝，所以啲人反而係扮到靚靚咁樣，有D甚至比呢度啲演藝人員更靚！

個巡遊應該係for 40周年，因為記得上次個巡遊嗰啲車係唔同嘅，巡遊表演嘅時間都唔係好長，大約15分鐘左右，仲有完咗之後我就去搵Beauty and the beast嘅園區，排隊玩新果個遊戲，排咗一個鐘頭先至去到講故事嘅位置，不過都講得好快，跟住再入去玩，呢個遊戲嘅玩法係坐喺一個圓形嘅巨型杯，分左兩行坐，每行大概四至六個人，其實最好坐單數嘅行數，因為單數係坐前面嗰行，玩嘅時候要綁安全帶，呢個巨型嘅杯，係模擬戲入面果場食晚餐嘅戲！所以個杯係會搖嚟搖去，所以要攬安全帶！全程大概7分鐘，佈景整得都幾靚！

玩完遊戲出嚟，去買40周年嗰個裝飾品，今次呢個造型都好靚，而且唔使等佢幫你整，全部可以自己砌，咁就唔使驚整錯！買完嘢就去食啲嘢，求其入咗一間餐廳，呢間係賣Pizza為主，所以買咗一個calzone pizza，就到室外坐吓食野！食完嘢再繼續喺小鎮大街嗰度行吓，行到咁上下就準備晚餐！

小鎮大街嗰度有間餐廳，叫做 Eastside cafe，叫咗個意粉餐，豬菜有三樣嘢食，當然份量係非常之細，有一舊鰻魚、椰菜花、酥皮焗雞肉，主菜係蘑菇汁意粉，每樣嘢嘅份量都係少少，仲有個甜品，係栗子咖啡蛋糕配黑加侖子醬！

 

食飽再出去影吓夜景嘅迪士尼，然後再去等睇巡遊，夜間巡遊嘅時間就長啲，差唔多有半個鐘，D 花車好靚，之前幾次都冇睇巡遊，定係冇做巡遊？我都唔記得 😅 睇完巡遊就去商店買少少嘢，跟住就走喇！返到酒店都九點幾，今次住返上次住過嗰間酒店，原本想book三晚，但係佢冇房，所以只係book咗兩晚，第三晚就book對面嗰間酒店，呢間酒店有浴場，所以今晚上去浸一浸，上到去只有兩三個人，浸咗一陣就走，走嗰陣就有四五個人入咗嚟，呢間酒店有兩層係女士樓層，其中一層當然係浴場呢層啦，呢層除咗浴場之外仲有咖啡機，可以免費沖咖啡飲，其他樓層係冇咖啡機，不過咁夜就唔飲喇！早啲返房休息，聽日繼續行程！

酒店住後感：
Super Hotel Premier Tokyo Station Yaesu Chuo
東京八重洲中央頂級超級酒店
酒店位置很方便，就在東京站八松洲中央口一出嚟嗰條馬路嗰座Tokyo Midtown Yaesu 大廈後面，又或者行地下街，由 Tokyo Midtown Yaesu 地庫搭扶手電梯上路面，都一樣方便，以市區酒店嚟講房間嘅空間算大，起碼有張書枱唔係拍住牆，有返D空間！而且呢度啲職員都好有禮貌，唔怪得佢外牆掛住廣告話持續八年住客滿意度No.1 👍🏻

 

2023年10-11月東京半獨遊 Day 2 - 涉谷、橫濱 Gundam Factory

今朝過去join 好友，黐佢哋車坐，先去渋谷，我地買左飛上 Shibuya Sky，先在渋谷食咗早餐，我哋泊咗架車喺停車場之後，見到對面有間咖啡茶館 集，就去試吓！店子的裝修有D懷舊英國feel，我地坐樓上，只有兩枱客，我哋叫左三文治🥪、飛碟（都係三文治）🤣、一件 roll cake🍰 ，同咖啡！個飛碟好脆，好味，咖啡☕️都好飲，正！

食完早餐行去 Shibuya sky ，今日渋谷好多警察，因為明天 Halloween ，過往經驗，Halloween 會好多人聚集在渋谷，政府驚會發生好似韓國人踩人事件，所以一早已經唔比在渋谷攪 event ，加重警力，又封路，唔比人聚集，連八千公🐕像都封埋！我地見到有一間叫做 Mom’s touch 嘅漢堡包店，看似係新開冇幾耐，門外排晒長龍，仲要分開一條隊係訂咗枱，一條隊喺Walk in，望一望個餐牌啲漢堡包個個都好厚，價錢唔貴，唔知實物係咪真係咁厚呢？下次有機會試吓。

我地行去Shibuya Sky ，搭lift 直接上去！今日好好天氣，仲有D曬，放低晒D野入 locker ，一出去第一個角位已經要排隊影相，都排左45 分鐘先到我地，其實前面只有十組人左右，但每組每人影幾張，再組合影機張，所以影得有D 耐！我地就影左2-3分鐘，影完再搭扶手電梯上頂層，呢場先係真正打卡位，我之前嚟嗰陣就有在頂樓嘅角位打卡，因為頂樓個角位，先係最高，同埋塊玻璃冇咗頂嗰條鐵邊，夜晚個地下仲會有一條條光線，當然而家日頭就睇唔到啦！所以呢度條龍係特別長，我諗呢度起碼要等兩個鐘，因為人數比頭先個位多一倍有多！呢度有個直升機🚁嘅停機坪，我上次嚟因為係夜晚所以睇唔到，而家日頭就睇得好清楚，咁啱今日有人喺度影婚紗相，跟住一對新人企過嘅位置取景，一定冇錯🤣🤣

我哋行多一陣就走，都係上咗嚟個半鐘左右，落返去攞車，跟住就揸車去橫濱，由渋谷揸車去橫濱用咗大概50分鐘，我哋先去紅倉庫嗰邊行吓，我之前嚟過一次，我記得其實呢度冇乜嘢行，不過一場嚟到又睇吓有冇乜嘢唔同，加上我哋未食晏，所以喺度食啲嘢！佢呢度有個位置好似food court咁樣，有幾間唔同嘅食肆，我就揀咗蛋包飯，好有就揀咗韓式炸雞，佢老婆就同我一樣揀蛋包飯，食物嘅份量都幾多，食到我哋非常之飽，然後再行一陣商店，買咗少少手信就上返車，揸車過去睇高達！

因為紅磚屋同高達嘅位置都距離幾遠，所以要揸車過去，而高達嘅位置就冇泊車位，所以都係要泊喺附近再行過去，上次嚟到先發現冇開，今次好友一早上網買咗飛，我哋特登揀4:00左右嘅時間過嚟，一嚟可以影日頭嘅高達，5點零鐘又可以影夜晚嘅高達，因為日本都好早天黑！行到去門口啱啱好開始咗一場表演，所以我哋喺場外影咗陣相先，然後再入場影高達，睇過佢個節目表，佢係每小時嘅20分同埋45分就有表演，其餘時間高達係唔會郁，表演嘅時間最短4分35秒，最長11分45秒，主要係四個表演項目，分別係Awakening full version、Awakening half version、Standby experiment 、Standby mode，我哋冇買到飛上去近距離睇高達，因為好友話太貴，如果佢問我就一定會上去睇，因為佢出年就會拆，唔知幾時再有機會睇，所以我就會一定揀上去睇，而且我哋喺下面睇都已經覺得好壯觀，上到去咁近距離嘅話更加不得了，雖然我唔係好識高達呢類玩具，不過我都覺得好值得嚟睇！

除咗睇高達表演之外，當然唔少得買模型啦，不過好有就揀唔啱冇買到，除咗買嘢之外仲有個展覽廳，介紹呢個高達由佢構思點樣起出嚟，到完成之後嘅過程，都有影片記錄低！都好值得睇！我哋由四點幾睇到七點，都唔係好捨得走，不過要出返去食飯，唔想太夜！

我哋揸返車出渋谷，因為好友之前上網睇人介紹有一間食蠔嘅店，就係我哋今日食早餐嘅咖啡店對面，所以我哋泊好車之後先去嗰間食店度訂一訂位先，然後去行一陣間街，先至返去食，我哋行咗去渋谷橫町嗰個商場，不過都冇乜嘢啱睇，我上次去都覺得呢個商場冇嘢睇，不過好有未去過又即管行吓，睇吓有冇新嘢，結果都係冇嘢啱 😅

行咗一個鐘頭，就返翻去呢間叫做 牡蠣貝鮮かいり渋谷Kairi 嘅餐廳，呢度主打蠔同埋痛風鍋😅，顧名思義即係海鮮鍋，我哋叫咗一個痛風鍋，上面有生蠔、白子、魷魚、蝦、冬菇、仲有一大堆唔知乜嘢肝做嘅卷，呢對卷就真係麻麻哋，真係用嚟塞飽你🤣，白子同埋生蠔就好味，我哋另外仲叫咗幾隻生蠔食，跟住店員問我哋食唔食今日推介，因為佢係日文唔知係乜嘢，淨係知係魚，跟住佢用Google Translate，話係要用匙羹食嘅Megura，我哋即刻Get到佢嘅意思係鮪魚骨，但仲黐住D肉，要用匙羹刮出嚟食嗰種！之前睇電視，周奕偉都介紹過，我哋仲諗緊邊度有得食，竟然今晚就有得食，所以即刻叫咗一客！好開心可以食到呢個，不過佢嗰三支木匙羹睇落有D趕客🥹好似想發霉咁！我哋刮晒啲肉出嚟，大概都有一小碗左右，都好味好新鮮！個痛風鍋都ok ，我哋加左份白子，我自己就好鍾意食白子，好友都鍾意，另外再叫多三隻生蠔，所以基本上清晒所有食物，除咗嗰D肝卷！雖然呢間店收11點，不過10:00仲有客入嚟，我哋都係食咗一個鐘多D，就行返去攞車返酒店，好友原本想約我聽日食我 omakase，因為原本係book今日 lunch 但係full咗，所以佢改左聽日，但係聽日我又買咗迪士尼飛，所以冇得同佢哋一齊去食，所以今晚佢車咗我返酒店之後，明天就分道揚鑣，返香港先再見喇！