圍方 Cafe Deco Pizzeria

今晚約左好友出嚟食飯傾吓十一月旅行嘅行程，約左去大圍新商場圍方！個商場上個星期先至開張，所以好多人過嚟睇，一出地鐵閘口就已經係人龍排隊搭扶手電梯上商場，其實可以唔排隊，就要行扶手電梯嘅左邊，因為條扶手電梯都幾長，所以多數人都係選擇排隊，當然亦都有唔少人借D意插隊🤦🏻‍♀️

一上到去覺得個商場都幾大幾靚，跟住入去睇吓有咩嘢食，雖然同好友已經睇定左食乜嘢，不過都即管望吓其他，呢度有五層，店舖就唔係好大間，店舖嘅種類都幾多，除咗基本嘅超市 Market Place 仲有好多食肆，亦都有 Benz 嘅專門店，另一邊亦都有診所、牙醫、修甲、兒童畫室，當然唔少得有戲院，商店 mix 都幾廣泛！

見到好多食肆都好吸引，而且好多人等位，我行到去我哋諗住食嘅呢間Pizza店，又唔算多人，一攞完飛已經即刻叫我個no. 😅因為好友未到，所以我去行吓先！

等好友差唔多到我先攞位，我地叫左龍蝦湯🦞蝦沙律🦐🥗pizza 🍕 牛扒🥩意粉🍝，仲叫左兩杯 mocktail 🍹 ，雖然餐牌上有酒精飲品，但係餐廳未有酒牌，所以冇得叫！食物都唔錯👍🏻我地都傾得好開心，不過行程都傾唔到結論😅 不過仲有四個月，慢慢再 plan 😆

原本諗住食完飯去Nintendo影吓相，點知佢閂咗門，門口個公仔都收起咗冇得影，跟住去咗超級市場行咗一陣，其他舖頭都關左門，所以都係返屋企😄

 

亀井鮨

去完旅行又係派手信時間🤣🤣 

今日去銅鑼灣食 lunch ，去到世貿，見呢間做緊85折，又試吓！

店內只有兩枱客，除左門口有D卡位同bar 枱位，入面仲有幾張四人枱，而且有view 可以放到海，我地就坐窗邊，我地叫左個極上海鮮丼同壽司set ，另外叫左兩杯特飲🍸🍹，食物質素都唔錯，而且服務都好好！有折就抵食D👍🏻👍🏻

 

2023年7月八人同行自駕大阪之旅 - Day 7 關西空港

尋晚兩個好友在飯廳傾通宵🥱

今朝八點幾清埋D野食，飲晒D飲品，9:30 check out ，清潔姐姐已經到左，交低鎖匙就走喇！

直接去機場，今日兩點幾機，仲要去還車，交車前要去油站入返滿油先還車！11:15 去到機場，還車都好快，11:30 去寄行李，我件行李竟然超重，要分少少野去好友個篋，同 hand carry 少少，12:10搞掂晒，去過海關！過程都好快，入到去先去搵啲嘢食，我上次嚟記得係冇嘢食嘅，當時因為啱啱通關，只有一個麵包嘅自助售賣機，乜嘢都冇得食，今次好啲，我哋個閘口附近已經有間小店，不過已經坐滿人，所以我哋買咗就去旁邊嘅座位坐低食，佢有牛肉飯同烏冬，仲有三文治，食飽等上機，爭D瞓著！

香港打緊八號風球泰利，我地冇 delay 😴 在飛機上大家都瞓左陣，返到香港已經改左三號風球，亦唔大風，6:35 pm 到香港，等行李等左成個鐘！我地去翡翠拉麵小籠包食晚飯，要八點先攞晒行李出到嚟 🤦🏻‍♀️🤦🏻‍♀️

食完飯我和兩個好友一齊 call Gogo Van 返去！行出去有小小雨，不過返到屋企就大雨D，返到去成10點 🥱🥱

 

2023年7月八人同行自駕大阪之旅 - Day 6 伏見稻河大社、京都花見小路、二寧坂 Starbucks、河原町、心齋橋

話咁快嚟到第六日，今日早小小八點出門口，第一站伏見稻荷大社，今日天氣好好陽光普照，之前日日都天陰陰，今日先出太陽，不過相對更熱😅

揸車個多小時，去一去便利店，見到有簡單的煙花賣，買左一pack 大嘅，睇吓有冇地方放！去到伏見稻荷大社已經十點了，今日星期日超多人😅 大家在門口影左一陣相就開始行去千鳥居⛩️，千鳥居的入口處塞人，因為好多人一去到呢個位就停低影相，所以塞住左個入口，其實入面好多影相位，唔使急於呢個位置影，除非你一定要影個入口分兩條路個位，因為出返嚟果陣唔會再經過，但你要預等好耐先影到！😅 我地行入去第一個轉接位，有御守同埋繪馬售賣，呢度影陣相就繼續行，行左一陣，團友已經話行到下一個轉接位就走😅

好快去到第二個轉接位係廁所！所以我地再行多一段路，有幾個時段冇乜人，行過，我地好快手影少少背後冇人的相，就行返轉頭，今日太好天，曬到暈，所以我地行返去，行左個幾鐘就走！

上返車涼冷氣，揸車去四条果邊，我地去花見小路搵間鰻魚店，但係鰻魚店full booking ，唯有搵第二間，好多食店等位，有一間有位，入左去先！因為我地8個人，條街又熱又多人，所以有位就去，入到去上一層，呢度係食D日式set ，主要係雞肉sukiyaki ，同豆腐鍋，份量較少，店內有張梳化，一坐低真係爭D瞓著😴😴

食完飯行去二寧坂，搵最有特色嘅 Starbucks ，足足行左半個鐘先去到，店內超多人！冷氣亦唔多夠，不過好過冇🫠 等左一陣都好快有位，我地叫左今期 promotion 的蜜桃🍑思樂冰🧊，休息左一陣繼續行程！我地兵分兩路，有幾個去攞車，去搵一澤信三郎麻布袋，我就同好友去清水寺出面條街，但係太熱，行左一陣出返去八坂神社會合好友，今日撞正祇園祭，又係星期日，仲有法輪功遊行！成條街都係人🤦🏻‍♀️

我地揸車去河原町高島屋，然後分開行街，我就去大丸買 Fancl ，本來好友揸車來接我，但周圍都封路，佢地搵唔到我，唯有我去搵佢地，但佢哋離我幾遠，要行15分鐘！在又熱又多人的街上行好辛苦！不過沿路見到好多野食，幾條街都係野食檔，好想停低食，差唔多行到架車附近，見到新開的新風館，去睇吓龍蝦天婦羅，店內已 full 相信要食每日限量十隻的龍蝦應該冇機會，加上我地八個，可能要等好耐先有位！

足足行左半個鐘先去到架車度🥵 已經6:15 ，即刻揸車返心齋橋食飯！7:30 先去到心齋橋！泊左架車在 DONKI 後面，本來見到有間拉麵店，諗住求其食碗拉麵，但係見間嘢冇乜人，餐牌麻麻哋，所以冇食到，行返出去蟹道樂嗰邊，好友見到一間叫做つきじ喜代村すしざんまい的壽司店，呢間壽司店在築地場外市場有兩間分店，但係我哋從來未食過，好友話佢喺北海道食過，覺得好食，所以就入去食，又要分兩枱，可能大家太肚餓，我哋瘋狂嗌咗好多壽司，仲係叫親都係最貴果 🫣🫣，不過佢D壽司都 ok 嘅，係貴左D(主要做遊客生意)，結果埋單要九萬幾円😮😮之前在壽司郎食左二萬円，今餐比多三倍有多！令亞公一鋪清袋😅😅

食飽再去心齋橋買藥妝，最後衝刺🤣🤣買完再揸車去平野果間 Aeon 買聽日早餐，見 Aeon 有煙花賣，我地買多包去放，跟住諗緊去邊度放，見到AEON對面有個公園！北平野公園，於是去呢個公園放煙花，其實係D好簡單嘅煙花，唔會好爆，不過香港冇得玩，大家就玩吓，成班大細路，玩得好開心🥰🥰

返到民宿成點鐘，大家要執行李了🧳🥹