調教你處男 No Hard Feelings

 Maddie 獨居在母親生前留下的房子，除此之外只有一架車做 Uber 司機，但欠下屋稅的她，連生財工具都被拖走，她和好友在餐廳工作，上網找工作時見到一則請人廣告，是一對夫婦，希望幫19歲的宅男兒子 Percy，上大學前能夠有個短期女友，讓兒子有識女仔經驗，代價是一部車，而 Maddie 有很多拍拖經驗，她便決定試試……！

雖然劇情好多唔合理地方，不過笑片都係志在輕鬆一下，估唔到 Jennifer Lawrence 會全祼演出，卻不是床戲，加添左笑點🤣🤣🤣🤣🤣

2023 澳門一日遊

足足四年冇去過澳門，約咗好朋友去澳門，佢哋想玩水上樂園，我就冇乜興趣，所以佢哋早我一日過去水上樂園玩，然後住一晚酒店，今朝再同我會合，考慮咗幾個去澳門嘅方法，包括傳統嘅搭船、港珠澳搭金巴、同埋去太子站搭直通巴士，因為預計會夜晚同好友一齊搭金巴返香港，所以就試一試在太子站搭直通巴士，之前細妹搭過，佢話預大概兩個小時，所以我就搭最早一班巴士8:00，去到太子嘅維景酒店對面，三角公園個位置，對面有個售票處，去攞咗車飛先，因為前兩日上網訂咗飛，所以淨係去售票站攞飛，張飛分開三截，應該要上落三次，攞完飛就行過對面三個公園等車，人唔多，大約只有十幾人，旅遊巴應該坐到40人以上，巴士早10分鐘先至埋站，上車前搣第一截車飛後準時8:00 開車！

只需要26分鐘，就去到港珠澳關口，非常之快，跟住落車入去大樓過海關，過關亦都非常簡單，因為只係香港身份證自助過關，而且冇乜人，入去個海關由另一邊出口出去搭返同一架巴士，不過巴士要等返頭先入咗去嘅人，因為有D人順便去吓廁所買下嘢食，所以呢度等咗20分鐘！上返架車嘅時候就搣第二截車飛，跟住架車就直接使去港珠澳大橋嘅珠澳口岸人工島，用左35分鐘，同香港嘅港珠澳一樣，要落車入去大樓過關，呢度過關就慢少少，要排隊，不過好彩唔多人，過完關之後行返去旅遊巴，上車前搣埋第三截車飛！呢度又等咗20分鐘，上返車之後，巴士駛咗20分鐘就去到威尼斯人！足足用咗1小時57分鐘，如果唔係海關嗰度一共等咗40分鐘，真係只需要1小時20分鐘！

去到威尼斯人，好友亦都到咗！我哋先去食啲嘢，喺威尼斯人嘅商場入面有個food court，原本想食點心，但係有七八個人排隊，但係收錢嗰度好慢，所以放棄咗改咗食麵，我就食咗碗牛肉米粉，買咗支樽仔咖啡，不過佢係茶餐廳嗰種咖啡，所以我覺得好甜，飲咗幾啖就冇飲！

食完嘢我哋就去TeamLab，好友之前一日先至上網買飛，其實我去過咁多次日本，從來都冇睇過TeamLab，只係去過鰂魚涌果個好小型嘅偽TeamLab 😅 呢個TeamLab在威尼斯人酒店嘅宴會廳附近，呢度好多大型嘅水晶吊燈，估計佢個場地一啲都唔細，入場嘅時候，因為好友着拖鞋，所以要求佢姐佢哋提供嘅鞋，亦都唔俾攞自拍棍，所以我哋都放晒啲嘢落locker唔使煩！呢度冇指定嘅路線，純粹要你自己去發掘，一入到去個位置就好似鰂魚涌嗰個咁樣，係一間暗黑嘅房，投影好多花花草草嘅圖案，跟住有一個房係一D燈光效果，我哋喺度影咗啲搞笑相，都幾好笑🤣🤣，有一個房係全部LED直條燈，D燈會轉顏色，另外一間房係巨型波波，有間房好似小朋友房咁，有D道具可以同啲投影嘅公仔做一啲效果，有一個Area 個地下係凹凹凸凸，投影係一D海龜同鯨鯊，有一個位係瀡滑梯咁，我哋都有玩到，只係嫌佢太短😂 玩玩吓發覺點解冇泡泡嗰個場景，先發覺原來要另外俾錢，同埋要買飛嗰陣時買埋，冇得而家就咁加錢，所以有三個位置我哋係玩唔到 🤦🏻‍♀️

玩咗差唔多兩個鐘頭出返嚟，就過去倫敦人嗰邊睇吓，因為未去過，行咗一陣出返嚟，搭的士去十月初五街，去食譚家魚翅，我哋一人叫咗一個魚翅，另外叫咗馬介休球、菜、鮑汁豬手、魚標鵝掌，魚翅唔係我想像中咁好食， 其他餸亦都唔係好特別！

食完嘢再行去大三巴附近，去手信街嗰度買嘢食，我哋喺其中一間手信店，我唔記得叫咩名，見到佢有咖啡賣，所以我叫咗杯生椰拿鐵，見佢即磨咖啡豆即冲，好有誠意！味道都唔錯👍🏻 飲飲吓咖啡突然間落雨☔️ 唯有再坐一會😅其實呢度冇不坐低飲，不過咁啱有張凳喺度，所以我哋先至喺度坐😂

等到細雨D我哋就走，最後一站去官也街食晚飯，其實已經六點幾！官也街入面好多人，而家多咗啲牛雜店，有幾間都排晒隊，仲有一間長洲糯米糍，都好多人排隊，我哋買咗少少手信，就行返出去出面街嗰間波爾圖葡國菜度食飯，都係等咗一陣就有枱呢，遲啲都冇位😅

我哋叫咗葡式乳豬飯、檸檬白酒煮蜆、馬介休球、羊架、炒菜、牛尾煲，食物都OK，呢度勝在價錢合理，食完飯我哋再搭的士去港珠澳大橋嘅珠澳口岸，買飛搭金巴，金巴嘅價錢平好多，今朝喺太子搭巴士要$160 ，而家金巴只係$65，返到香港嘅港珠澳，我哋一齊搭的士返屋企，因為大家都係住附近，所以方便好多👍🏻

 

凱薈

端午節同屋企人食飯，去左呢間新開冇耐酒樓，今晚呢今晚有宴會，所以得幾枱客，我地叫左個10-12人餐，頭盤又江南五小碟、拔絲鮮菠蘿咕嚕肉、清蒸老虎斑、雞絲燴花膠、豉油王海虎蝦、北京填鴨兩食、羽衣甘藍、炒米粉和甜品蛋白杏仁茶，食物嘅質素唔錯，服務都非常好，環境又好新淨，下次可以再嚟呢度食！

飯後，攞埋媽媽做嘅糭返屋企，正！

 

Yakintori Kuru

以前九龍城有一間餅店，好似叫做豪華餅店，有好多年歷史，不過早幾個月執咗，之後開咗呢一間賣日式串燒外賣嘅小店，今日行過就買來試吓，叫咗雞翼、牛舌、雞軟骨、金菇牛肉卷、雞肉大蔥，因為佢係即叫即燒，所以等得比較耐，再攞埋返屋企都凍晒！味道都可以，不過佢嗰度冇得堂食，就一定要外賣，冇辦法即刻食！除非即刻企喺街邊食😅

 

新容記小菜王

影完鴨之後，再提高廣場兩下冷氣，因為夜晚訂咗枱食飯又未夠鐘，大家都想休息一下，所以最好就係去商場坐下，坐到咁上下就搭車去深水埗，好耐冇食呢間新容記，店入面嘅格局冇乜改變，我哋七個人食，一早留咗碟燒腩仔，另外仲叫咗炒蜆、蒜蓉開邊蝦、焗魚腸等等，可能今日曬咗幾個鐘，我哋係咁狂飲嘢😆

食完飯再去附近食埋甜品先至走 😄