名峻會

今晚原本去睇戲，因為$30 戲飛令我地買唔到飛🤦🏻‍♀️唯有改飯局，好友在網上搵到呢間，貪佢有房又冇最低消費，上到嚟一開 lift 就見到有人打緊桌球，原來係類似雀會咁，唔怪之得有房，我地7個，坐房又可以靜靜地傾吓計，呢度主要食小菜，見樓下有好多食肆，我地估可能同公司或者同人合作，落單就整比我地，不過上菜都稍為耐左少少，不過D餸都唔錯，都值得再嚟，我地叫左蔥油雞、咸魚煎肉餅、豆腐火腩、冰鎮咕嚕肉、炒飯、豉油皇炒麵等！好友即刻話要book 母親節一家人嚟食！因為佢有D大D房可以打麻將同唱K 👍🏻🤣

 

超級瑪利歐兄弟大電影 The Super Mario Bros movie

 

Mario 同 Luigi 兩兄弟係通渠佬，有一日市內連場大雨，導致水管淤塞，政府搶修之際，佢兩兄弟就有第二個諗法，於是嘗試去搵源頭，意外地由水管去咗另一個世界，兩兄弟分開咗， Mario就去咗蘑菇王國， Luigi 就去咗暗黑王國，暗黑王國由Koopa 統治，而蘑菇王國最有Peach 公主統治，而 Koopa 打算入侵蘑菇王國，Peach 公主就想去其他王國借兵，同時她訓練Mario 過關技能…..！

其實我冇乜玩過呢個遊戲🎮，所以唔係好熟悉，而家先知佢兩兄弟原來係通渠佬🤣🤣 套戲都幾得意幾搞笑，原本想同朋友今個星期六去睇，點知突然間整個星期六全港戲飛$30 ，搞到我哋星期四買唔到飛睇唔到！🤦🏻‍♀️唯有今日自己去睇！

沙田一

 

睇完展覽過咗去石門嗰邊，原本想去買野，但係間店冇開🤦🏻‍♀️ 咁就喺附近搵啲嘢食，見到呢間食燒鵝嘅店，又試吓佢，叫咗個燒鵝叉燒瀨，既然叫得招牌食品，當然會有所期望！不過燒鵝就不過不失！唔算好特別！不過呢度都幾多人食嘢，見佢都不停有客入嚟！

 

虛擬凡爾賽宮之旅

又去沙田睇展覽，呢個展覽場地都嚟過幾次，原本想喺佢樓下嗰間牧羊少年餐廳到食D嘢，不過去full晒，所以去咗睇展覽先！

呢個虛擬凡爾賽宮之旅，話明係虛擬，唔少得好多投影效果，亦都有少少圖片介紹，之前去過凡爾賽宮兩次，覺得佢好靚，特別係鏡廳，所以過嚟睇吓靚唔靚，一入場就有四個畫面，模擬喺個窗度睇出去凡爾賽宮個花園咁，都好靚，跟住會經過一個拱門，就可以聽吓路易十四把聲講歡迎詞，當然佢講法文唔知佢講乜，不過都有文字講解，跟住有D介紹凡爾賽宮歷史嘅資料，跟住去到一個房嘅地方，佢係不停咁投影凡爾賽宮內部嘅圖片喺牆上面，呢個位都幾靚！

跟住就到虛擬花園踩單車，呢度本來有兩架單車，因為一架壞咗，所以得返一架，所以要排隊玩，我就唔大興趣，因為都係對住個屏幕踩單車，模擬在凡爾賽宮嘅花園道踩單車咁！行去另一邊係互動區，呢度有個立體投影嘅雕像，旁邊有D電視俾參觀人士玩影相，可以化身古裝圖樣，好搞笑，當然我都玩吓啦！跟住仲有個大屏幕，可以坐喺度睇佢播片，我睇咗一陣就參觀完喇！

原本都想去其他展館睇吓嘢，不過都肚餓喇！去返牧羊少年餐廳，仍然要等位！所以都係去第二度食！

 

蘇記清湯腩

今日無無聊聊，去左新蒲崗行吓！去左呢間食麵，聽講佢係唔知邊度嘅老舖結左業，喺呢度再重新開返，我之前未食過，所以過嚟試吓，其實佢都幾多嘢食，店入邊嘅格局就一般麵店咁啦，店員都好好招呼，叫咗碗崩沙腩麵，味道都唔錯，食完麵去附近行吓，好耐都冇去新蒲崗，行咗兩個圈就去大成街街市買餸，今晚打邊爐！

 

北京樓

今晚又有飯局，好友生日，佢好鍾意食片皮鴨，一年只有幾次機會食，所以佢生日一定要食片皮鴨，同埋佢唔鍾意食蛋糕，一定要食壽包，所以提前訂咗壽包，好耐冇去呢間北京樓，今次嚟到見佢裝修咗，新淨咗，不過唔知係咪唔夠店員，真係招呼唔到🤦🏻‍♀️，同埋個片皮鴨要等好耐，因為只有一個店員去片皮，而片皮鴨係每枱都叫嘅，可想而知要等好耐！好友食得好開心好滿足，佢開心我哋都開心！

好友啱啱買咗白居易，下星期可以收樓，到時又要搞裝修、搬屋，好在佢仲有間屋可以收租，雖然嚟緊仲要供樓還債俾佢爸爸，但係供完樓之後就會有兩層樓喇！👍🏻👍🏻😄

食完飯我哋又要傾七月嘅旅遊行程，我哋開咗個iPhone備忘錄，一齊share D資料，我哋好多地方想去，好多餐廳想試，講吓講吓真係七日唔多夠時間，我地 plan去環球影城，仲要諗埋Fast pass，大家都好想快D去！😆😆

 

Fire bird

好友從英國返港，約好咗一齊出嚟食飯，今晚去銅鑼灣食日本串燒，可能佢喺英國成日都食中餐同西餐，比較少好食嘅日本菜，加上返到嚟香港，好多飯局都係中餐，所以想食得清淡翻少少，其實好友話尋日已經胃痛，可能呢幾日食得太飽！好彩今日佢個胃好返啲，依家我哋都係第一次嚟，我哋叫咗一D串燒、炸物、sukiyaki 牛、燒雞扒、烏冬等，飲品都好大杯，可以飲足一晚！

好友帶埋女兒一齊過嚟，女女今年13歲，生得好高又靚，成個ABC咁，好友話同佢去買嘢，人哋都同佢講英文 🤣 佢地未移民之前，見過女女幾次，冇見兩年幾，真係高大咗好多，喺外國長大真係有ABC嗰種味道！😆 好友主要係返嚟搞番D證件，因為佢哋移民要等5+1年之後先至攞到英國證件，所以暫時都係要用住特區護照先！過幾日佢哋就返去，好又話而家都搵咗份兼職做，因為呢首呢返學之後佢就好得閒，所以都想有少少收入，而家做酒店執房，志在有D嘢做吓，唔使咁悶 😆