Coast

去完旅行，攞D手信比人，去銅鑼灣食飯，去食街食，試吓呢間，呢度有 outdoor 位，我哋就坐 indoor ，因為坐得outdoor嘅都係食煙，我地叫左半打生蠔，店員話生蠔有韓國、西班牙同埋南非三款，聽到韓國、南非……我哋都好懷疑好唔好食？🤔結果三款都唔係咁好 😅 另外叫咗一個阿根廷牛肉同埋一個意粉，呢兩個就ok !

 

2023年2月九州自駕遊 - Day 6 並木街咖啡

話咁快又去到行程嘅最後一日！今日因為搭中午機，所以冇乜地方可以去，好友就因為國泰取消咗佢地今日班機，就改咗遲我兩日先返香港，佢先車我去機場附近飲杯咖啡，搵咗呢間咖啡店，今朝又落雨，我哋嚟到嗰陣都落緊雨，泊咗車行幾步就入到咖啡店，所以落雨都冇乜影響！

店入面嘅裝修都好新，地方都幾大，店內仲有D書同玩具比人客睇/玩，今朝只有幾個客，睇吓餐牌，早餐set有四款，我哋揀咗每人一款，我嗰款係蕃茄法包🥖，好友就叫咗雞肉沙律🥗，同埋煙肉蛋pancake 🥞，個pancake仲要係有麥粒嘅，我哋另外仲叫咗個疏乎厘pancake，等左好耐先有得食！味道就一般，咖啡☕️ 都幾好飲 👍🏻

跟住揸車十幾分鐘就去到機場！排隊寄行李🧳 排咗好耐，雖然已經有四五個counter做，但係非常之慢！攪左45分鐘先寄到件行李🧳！然後就過關，過關就非常之快，因為又係有部機比你自助過關嗰種，佢都有人手去做過關，但係得一個人做，仲有人去排隊，咁就梗係揀自助過關啦！唔使排隊！😅

過咗關之後，機場係好細嘅，買手信嘅店有一間好大間，好多人，見排隊俾錢都排咗幾十人，另外一間細間嘅在另一邊，少野賣D，但係冇咁多人，視乎你要買D乜嘢嘢，好似我朋友想買薯條三兄弟，兩邊都有，咁就梗係去細嗰間，唔使排咁耐！我自己就買咗一支梅酒！至於食店，呢度都有兩間，有一間我記得上次我同好友食過，但係兩間都爆曬好多人，我因為食咗個法包早餐好飽，所以都冇食到嘢就等上機！返香港已經唔需要做任何檢疫嘅程序，而且今次好快就有行李攞，跟住就搭的士返屋企，返到屋企時間尚早，仲可以去街市買嘢煲湯今晚飲😆

 

2023年2月九州自駕遊 - Day 5 鳥梄 Premium Outlet、天神地下街

今朝一早起身，行過對面 Sakura Machi 睇吓有冇早餐食，商場未開門，佢有幾間食肆都未開，唯一只有Starbucks開咗😅 唯有飲杯咖啡啦！原本想買啲嘢食，但係唔係好啱食，所以淨係飲杯咖啡，飲完咖啡喺呢度個公園行咗一陣，因為之前一晚住 Koko 酒店間房望落嚟望到呢個公園，所以都想過嚟睇吓，商場樓下而家做緊 Event ，應該係熊本城嘅馬拉松，行一陣就返酒店攞返行李，會合好友出車！

我哋去鳥梄 outlet ，呢個outlet上次我哋嚟九州都去過，由熊本揸車過去都要兩個鐘，中間又停咗尋日去過嘅広川休息站！我去到outlet竟然落雨！好彩我哋都有帶遮同雨褸，我哋行咗一陣都冇乜收穫！淨係食咗個lunch 😆

行咗兩個鐘就去返福岡市，先去酒店check-in先，放低行李之後我哋冇揸車，因為去天神地下街好近，酒店過D係箱崎九大前站，我地搭箱崎線，六個站到天神，去地下街行一陣！上次嚟到因為太夜好多舖頭冇開，今次就早D，所有舖頭都有開，我哋又去行藥妝店，跟住行百貨公司，喺天神地下街連接咗幾間日本百貨公司，有三越、大丸，我哋都有去佢哋嘅超市行吓！又買左水果！

行完一輪街就去食飯，我哋今晚訂咗枱食燒肉，今次去呢間叫做 One dining 燒肉 1 ダイニング ，係我地之前食開果間 国產牛燒肉放題，同一個集團，佢哋嘅質素唔錯，價錢合理，我哋都叫咗好多碟嘢食，食食吓我又流鼻血 🤦🏻‍♀️過左一陣就冇事，繼續食！當然唔少得佢嘅甜品，亦都叫咗酒飲，不過好友個老婆飲咗杯熱嘅 sake 之後突然間醉咗，冇曬反應 😳 我地落到樓下佢成個軟晒，好友孭住佢，我哋嗱嗱聲去搵的士，搭的士返酒店，好彩佢冇嘔，呢程車搭左￥2610 😅 返到酒店，就好好休息！

酒店住後感 ：
Hotel Japanesque 
呢間酒店有少少似 apartment ，好有住宅feel，酒店嘅走廊係露天嘅，唔會有對面嘅房間，房間的空間算幾大，一入門口已經係洗面盤，房入面有梳化，有露台，露台仲有張櫈添，望到樓下有個小泳池，仲有燒烤爐！唔知係咪可以燒烤 🤔，房間都幾新淨，牆紙係書架圖案，有返少少文青味道😂 酒店大堂有兩款入浴劑提供，都唔錯！

航拍 26 - 阿蘇国立公園/南阿蘇全景路線展望台

上去阿蘇火山之前，去左国立公園放飛機，呢個位冇乜人停車，旁邊係馬路，今日天色好得多，我地飛左一轉，再上山，去南阿蘇全景路線展望台，上到山都好大風，原本上到嚟係冇人，跟住多左兩三架車上嚟！可能因為而家嘅天氣仲係好凍，成個山啲草都係枯黃，所以個景唔係好靚，我哋都係飛咗一轉就走！