Salted Pig (沙田)

今晚約咗台灣返嚟嘅好友，同另一個好友食飯，佢帶埋個女嚟，我哋去沙田食西餐，因為冇得訂枱所以嚟到先至等位，都等咗大半個鐘先有位，之前去過尖沙咀嗰間，沙田呢間就第一次嚟！我哋叫咗個拼盤，再加豬髀、豬鞍同埋肉丸意粉！好肉肉呀！😅 三個大人一個細路，都可以食得晒所有嘢！真係好有食力！全靠兩位男士食得比較多！好友個女好可愛，仲好黐爸爸，爸爸就成晚講唔停，阿女就成晚食唔停，真係好搞笑！🤣

 

叁茶陸飯

今日去愉景新城嗰邊睇醫生，順便嗰度食晏，見到呢間餐廳，係食台式食品，午餐嘅選擇唔多，試咗佢嘅蔥油雞米線，同埋糖醋魚柳，飲品因為跟餐，選擇唔多，整體食物味道不過不失，分量都算OK！

 

泰 Thaiology

睇完戲去買蛋糕，今晚同好友食生日飯，上網search左呢間泰國菜，就試下佢，先攞咗個蛋糕上去先，然後再行一陣街，順便買咗個枕頭！

去到餐廳比佢哋遲咗少少，睇吓個餐牌，揀咗我哋想食嘅嘢，跟住見到有D套餐，不過套餐嘅食物全部都唔係我哋揀果，所以都唔食套餐！我哋叫咗山下刺身、沙嗲串、炒菜、咖喱雞、炒粉絲、豬頸肉，食物嘅味道一般般，泰國菜都係要去九龍城好D😅😅

 

秘境探險 Uncharted

 

Nathan 係一個bartender，亦都係一個小偷，一日一個叫做Victor嘅人搵到佢，想同佢合作去尋寶，而佢果張尋寶圖，正正係 Nathan 細個嘅時候同哥哥 Sam 一齊睇過嘅尋寶圖，兩人先在拍賣行偷走一個十字架，其實係一條鎖匙，然後前往西班牙尋找線索，亦搵咗Victor嘅拍檔 Sophia，她擁有另一個十字架，因為要兩條鎖匙一齊先至可以開到寶座入口，佢哋三個互不信任，只係迫於無奈一齊去搵寶藏，途中亦都發生唔意外….！

套戲都幾好睇，不過唔算好緊張，男主角都擺脫到蜘蛛俠嘅形象，睇個結局應該仲有下一集！

光年正傳 Lightyear

 故事發生的1995年，小時候的Andy因看了一部關於巴斯光年的電影，電影講述巴斯光年同 Alicia 等人受到外星生物威脅，巴斯光年決定叫大家撤回飛船，但飛船被巴斯不小心撞壞，必須要修復才能返回地球，整隊人唯有留在這個星球上進行修復工程，但一年後，眾人已建了一個太空的殖民地，並建了一個修復飛船的設施。巴斯為了承擔自己的責任，自願測試飛船修復，但係巴斯飛咗一日，其實對其他人來講就已經四年，回來後 Alicia 送了一隻貓型機器人 Sox，還與巴斯一起繼續測試…….！

套戲麻麻哋好睇，見到現場嘅小朋友都睇到唔係幾耐煩，開始喺度傾偈！如果話Andy細個嘅時候，睇咗呢套戲而鍾意巴斯光年的話，真係冇乜說服力😅

奇妙之最。閃亮夜空

終於都等到迪士尼有煙花睇，上星期六第一日開始做，原本想遲D去，因為今日係第一個星期五做煙花匯演，一定好多人，但係又驚之後會收緊防疫措施，到時樂園又唔開，加上下星期我放星期二、五，星期二迪士尼唔開，星期五係7月1號假期又唔能夠入嚟，所以唯有都係今日去！

煙花匯演8:30先至做，所以今日唔使咁早入去，今日都唔算好熱，因為天氣陰陰，好彩冇落雨，仲有D風添🌬！入到去都差唔多四點，真係好多人，呢個鐘數都咁多人，應該大部份人同我一樣，諗住咁夜先睇煙花唔使咁早入嚟，先去玩下機動遊戲，所有遊戲都排晒隊， Iron Man更加係排到出室外🥹 想坐低食D嘢都冇位 🤦🏻‍♀️

煙花要8:30先開始，諗住早一個鐘頭去等，但係其他人更加早，我諗佢哋六點幾已經坐喺度等，我我去到已經差不多排到去小鎮大街，足足企咗個多小時才開始！

煙花匯演嘅內容主要有6大章節：1. 誕生之時 2. 無憂之時 3.蛻變之時 4.永恆之時 5.考驗之時 6.懷緬之時 ，城堡舞台上重現近40個迪士尼、彼思嘅經典故事，約150位迪士尼朋友伴你穿梭6個人生重要章節，城堡呢個投影技術，雖然比以前改良咗好多，影像亦都清晰鮮明好多，不過之前在日本已經睇過，所以對我來講唔係有太大驚喜，相反我覺得以前煙花匯演嘅音樂同煙花都好睇D 😅

散場嘅時候，超級多人走，好耐未見過迪士尼有咁多人！都係遲啲等冇咁多人先再嚟，因為又多人又熱，行出車站都要迫10分鐘！🥵

 

十里洋場

上次想食呢間上海菜，點知冇位，今次訂咗位，加上今晚都唔爆，我哋坐咗喺卡位，都幾舒服，店員嘅服務好好，餐牌嘅選擇都幾多，不過見到有個二人餐幾抵食，所以都係叫二人餐，我哋想食小籠包，所以另外叫咗一客小籠包，頭盤有准揚四小品，跟住嚟個鮑魚佛跳牆，主菜有酒釀乾燒大虎蝦🦐、百花釀銀鱈魚、海參紅燒肉，仲有楊州炒飯同埋杏汁燉燕窩，食物嘅質素都幾好，唔怪得會冇位，呢排疫情嚴峻左，所以晚市都唔係太多人，呢度食物質素好，服務態度好，環境舒適，讚👍🏻

長阪燒

都有一段時間冇同好友F食飯，今晚約咗佢，同好友J一齊食，搵到呢間樓上店，係食爐端燒，店嘅面積唔算好大，接待處旁邊擺咗好多支自家浸嘅梅酒，我哋坐咗响卡位，唔近海鮮位，我哋坐低之後都可以行出去睇吓，我哋揀咗條魚做刺身，條魚叫做目仁奈，好友 F未到，我同 J 叫左四隻生蠔食住先，人齊之後，就叫咗杯佢哋嘅自家浸梅酒試一試，另外仲叫咗赤貝同牡丹蝦剌身，仲有叫咗D串燒，同埋燒魚鮫，食物嘅質素都唔錯，價錢貴左少少，不過都坐得舒服，而且好好服務，下次都可以再嚟食串燒！