醉胡爐

相約另一個群組嘅朋友食晚飯，呢個群組已經超過一年冇見，對上一次應該係去年七月約咗食飯，突然間疫情關係而取消咗，直至到而家先至再約到出嚟，但係都唔齊人，有兩個冇嚟到，今次嚟呢間，因為好友個老婆識人，但係佢老婆又冇黎到🤦🏻‍♀️，咁就變咗唔識人😅

我哋叫咗個佛跳牆雞湯，個湯好好味，我哋幾乎飲晒成個湯，然後先至再湯，但係再加就係清湯，個味淡好多，唯有當叫左清湯去打邊爐😅 我哋叫咗牛肉、脆肉骨腩、黃金魚皮、萵筍、響鈴、黑松露餃、墨魚丸、蝦滑等等，都幾多菜😆 其實都係志在見吓面傾吓計，因為真係好耐冇見面，近排大家都好忙，不過今日冇黎嗰兩個，話11月要再出嚟，希望到時冇人甩底啦！

 

日山 Hiyama

今日再約好友去食日山，午餐先去咗旺角 Tuned ，然後去咗尖沙咀影微笑太空館，跟住去咗K11 Musea 行吓影吓相，跟住又去飲咗杯咖啡，然後過返去海運大廈！

今次俾咗間房我哋🤨，間房都幾大，大概可以坐八至十日，我哋得三個人唔係幾好意思😝，今次叫咗兩個最貴嘅套餐，套餐除咗前菜之外，仲有牛肉他他、刺身、燒牛肉、生蠔，我哋另外加咗個海膽帆立貝，主菜牛肉仍然好好食！甜品嘅綠豆卷就麻麻哋！

 

別忘了

荃灣開咗呢間小店，今日就去試吓，雖然招牌用紅紙包住，不過都睇到店名，門口有一棵假嘅櫻花樹，下面擺咗一D台式手信零食，店入面都有幾棵假嘅櫻花樹，上面有D紙牌吊住，紙牌係店員提供，你可以寫一D心願，然後掛喺樹上面，我就冇寫到啦，我叫咗一碗黑麻油雞湯麵，同埋一杯咖啡，食物嘅味道都OK，下次再試吓其他嘢食 😆

 

媽媽的神奇小子 Zero to Hero

 

蘇樺偉出生時患上黃膽病，導致他成為一個弱聽和四肢痙攣，必須依靠別人去照顧，他的媽媽 - 蘇媽一直照顧着兒子，而為了將來有人照顧阿偉，所以生多一個小朋友，希望將來兩夫妻老死之後，還有人能夠照顧他！在優惠成長的過程中，他不但學會了走路，還被發掘出跑步的天賦！他加入了殘障人士田徑隊，之後更代表香港參加殘酷運動會……..！

套戲上咗一段時間，一路都未有時間去睇，呢日去探完小朋友，時間兩頭唔到岸，啱啱好友又未睇，所以一齊去咗睇，套戲都幾感人，食正奧運熱潮，所以上咗好耐都未落畫，不過呢套戲都講得好啱，殘障運動員，真係比社會忽略，其實佢哋比普通運動員付出更多先至能夠做到成績，係好值得人敬重！希望政府能夠俾多啲支援佢哋啦！

睇完戲同好友在The One食晚飯，去咗食越南野，傾開計，佢有親戚幫人哋睇風水同算命，所以佢問吓將會搬屋嘅好友，使唔使搵人幫佢睇吓，希望搬咗屋之後，佢個仔個病快啲好！🙏🏻🙏🏻🙏🏻🙏🏻

兒童深切治療室

 

早前好友嘅疑似確診癌症，係神經母細胞腫瘤，呢個五歲嘅小朋友，早前已經完成咗一年嘅治療，可惜嘅係，剛完成療程，便再復發😩😩，今次位置有所不同，現時每日要到醫院做電療☹️☹️，我哋實在好掛住佢，所以今日約咗佢媽媽食晏，然後再去醫院探佢，我哋先去東涌同媽媽同埋妹妹食飯，都係第一次同妹妹食飯，去咗東薈城食晏，食完飯再去醫院，見一見哥哥，去到兒童深切治療室等候，只係為咗見佢一面，因為已經一年多冇見，終於見到小朋友，見到瘦咗好多嘅佢，個心好痛好難過🥺🥺，希望佢可以早日康復 ❤️❤️❤️❤️

Velo Intalian bar & grill

今晚去咗K11 Musea 食 buffet，我都好耐冇食過步飛，因為食唔到咁多嘢，而且晚餐通常以清淡為主，除非約咗人食飯，呢間餐廳嘅buffet，食物選擇唔算多，海鮮就只有蟹腳、蝦、蜆同埋青口！有燒牛肉同燒雞，其餘都係沙律配菜之類，我哋自己帶咗支香檳嚟飲，仲要另外比開瓶費！食物質素普普通通，唔係好值呢個價錢，不過服務都算幾好 ！

 

嗇色園一百周年花燈廟會

今日行過黃大仙廟，見到佢好熱鬧，原來有花燈廟會，我又入去八卦下！呢度分咗兩條隊，一條隊係會玩遊戲，所以果條隊好長，另一條隊純粹睇花燈，咁我就排短D果條！😅😅

今晚好熱鬧，好多人，加上天氣好熱，又有微雨，所以人迫人嗰陣好大陣臭汗味！🤭🤭 往年唔覺有花燈廟會，定係我冇留意 👀，適逢嗇色園一百周年，廟入面周圍都係花燈，有唔同嘅主題，入口有兩條龍，唔同嘅位置有十二生肖，個個都好忙影相影相📷📸，我見到有D着漢服嘅女仔，佢哋都係講國語，因為國內都好流行着漢服，特別係中秋呢啲日子，不過睇到都覺得好熱，雖然佢哋係好薄嘅質料，但係始終30幾度着，見佢哋都手持風扇仔，應該都真係好熱！沿住水池行過入去，又有樓梯要上，上到最頂就係黃大仙像嘅花燈，點解大仙個手勢好似怪怪………….🤭🤭 

我睇咗一陣就走，因為開始有微雨，而且實在太熱了！🥵