Loop Kulture

上次同好友去同一條街嘅 Womanboss ，見到呢間新開無耐嘅coffee shop已經想去，不過佢啱啱開所以都幾爆，今日再睇吓有冇人，又出奇地少人！

上次見佢開咗玻璃門坐晒出門口，今日就關咗玻璃門，要推門入去，超過一半位冇人坐，我仲可以影到有D位冇人添，應該話其實只有三、四枱客，呢度除咗飲咖啡之外，仲有售賣一D果仁同埋一D食物，例如果汁、麵食、食油之類嘅嘢，都係一D比較健康嘅食物，另外行去後門果邊，條巷仔仲有賣洗頭水護膚品之類嘅嘢，睇吓個餐牌，食物主要都係輕食 bagel 🥯 同埋多士 ，我叫咗一個煙三文魚水煮蛋多士，另外叫咗杯 Dirty ，食物同咖啡都唔錯，呢度可以再 encore ✌🏻

 

文記火鍋

同事移民去加拿大，過去同老婆仔女一家團聚，我哋就同佢食返餐Farewell，去咗大圍食火鍋，呢度附近好多食肆，呢間有樓上，我地坐樓上，由於有限聚令，我地要分枱坐！

呢度都係同一般火鍋店冇乜大分別，食材都係咁上下嘅嘢，牛肉都唔錯，其他食物都係一般大路嘢，我哋志在聚下，因為都差不多年半冇咁多個人聚埋一齊食飯喇！我哋夾份買咗隻智能手錶送俾佢，佢收到都好開心，我哋都好唔捨得佢，始終都一齊做嘢都咁多年，希望佢過到去生活愉快，身體健康，開開心心！

 

港嘢食堂

好耐冇去九展，今日過去做嘢，佢呢度都有好幾間餐廳，試吓食呢間，類似茶餐廳咁樣，試咗個焗豬扒飯，焗白汁雞扒飯同埋口水雞，食物不過不失，個雞扒都幾好食😋，口水雞嗰醬就咸D 😅

 

Balcony

食完泰國菜，原本食飯嗰陣想坐下傾吓計，但係餐廳趕住做多轉，所以我哋都好快走咗，諗住去附近搵間酒吧飲嘢，但係諗起酒吧未開返，但係見到呢間酒吧有開，因為佢係餐廳牌照，唔係酒吧牌照，所以店員都鼓勵我哋要叫食物，咁飲杯嘢食D小食都要嘅，我哋叫咗碟芝士，每人叫咗杯Cocktail，佢仲有買一送一優惠 👍🏻 個芝士切得好細粒，不過都幾好食，仲有一小碗橄欖，兩個好友都唔鍾意食橄欖，所以我一個食晒，唔記得咗影飲品，只係影咗芝士 😅 

我哋一路傾偈，懷念下之前去歐洲嘅日子，諗起都開心，希望疫情後，大家可以一齊去一轉歐洲！因為好友下個月生日，我哋已經約定下次食飯，我哋唔係坐咗好耐，其實酒吧入面只有兩枱客可以慢慢坐，不過另外果枱係咁食煙，所以我哋都好快走喇，買一送一優惠有總共有六杯飲品，我哋只係飲咗五杯，店員都好好，俾返張飛我哋，話下次可以補番果杯飲品！

 

小曼谷

一排冇見嘅朋友今晚又約埋一齊食飯，近近地去九龍城食泰國菜🇹🇭，以前我哋都嚟過呢間餐廳幾次，冇食一排，原來已經搬咗過對面，今晚都幾爆腸，不過我哋早咗嚟所以有位，我哋叫咗生蝦刺身、咖喱蝦🦐、生菜包、柚子沙律、炒椰菜苗同埋蒜蓉包，食過幾次，今次覺得差咗，咖喱蝦雖然大隻，但係D肉係霉嘅，而且店員好想你快D走，可能想做多轉，店員話限時個半鐘，我哋食咗一個鐘，佢已經想我哋走，好快收晒野，同埋係咁係你身邊行嚟行去，都明白食肆有返夜市都要追番之前嘅損失，所以我哋都好快走，不過個感覺唔係咁好，最重要食物差咗，應該下次唔會再嚟😔 依家九龍城好似搵唔到一間好食嘅泰國菜😕

 

素年 （荃灣）

之前在深水埗食過 The Year （素年），原來荃灣都有分店，今日就去試吓佢，今日唔係好多人，可能荃灣區，D人唔會食咁貴嘅午餐，其實佢唔係好貴，但係一人均消費一定超過$100 ，唔係好啱呢度D街坊，所以店入面多數係後生仔女😏，食物嘅選擇都幾多嘅，我揀咗個漢堡包，記得上次去深水埗嗰間都係食漢堡包，但係上次嗰個係竹炭野菌漢堡，今次係不可能漢堡，即係人造素肉，同樣都係跟咗蕃薯條，另外叫咗杯咖啡，亦試左沙律碗，份量都多，有羽衣甘藍、藜麥、蕃茄、菠蘿、南瓜、蜜瓜等等，素食來講呢間都算好食，而且份量都唔細，食到好飽，下次帶我老細過嚟食先得，因為佢最近用咗類似生酮飲食法去減肥，佢係完全介澱粉質，咁佢可以食沙律碗，下次同佢去試吓先！

 

花果飄零

以前成日去朗豪坊嗰間一芳買嘢飲，冇過嚟一排，佢已經轉咗做第二間茶店，店入面嘅裝修光猛左，亦都係冇位坐，主要都係做拎走外賣，茶嘅選擇都有幾多，仲見到有兩個滴漏咖啡壺，當然裏面係茶葉，我叫咗杯奶蓋烏龍茶，最近好鍾意飲奶蓋，個茶都幾淡，不過就啱我飲，奶蓋就唔夠芝士味 😆 下次再試吓其他茶！

 

爸爸可否不要老 The Father

 

Anthony 和女兒 Ann 一同居住在倫敦，女兒告訴他要搬去巴黎生活，要留低父親自己一個在英國，亦會考慮安排她到老人院， Anthony對此感到不高興，雖然女兒多次安排看護照顧他，但係每個看護都俾佢趕走，有一日， Anthony發現家中來了個陌生男子，對方自稱是他女兒的丈夫 Paul ，但卡記憶中女兒已經離婚，但 Paul 告訴他兩人並沒有離婚，只是一個陌生女子來到他的家，對方竟然自稱是他的女兒 Ann ！其實Anthony是患有失智症 ......！

電影用Anthony 嘅角度去睇身邊嘅事，一個患有失智症嘅人，有時唔會認得自己屋企人，所以喺佢眼中女兒和女婿都是陌生人，讓觀眾感受到他的不安和憂慮，由於佢自己唔記得，好多事情經常都會同佢嘅記憶有分別，睇完呢套戲會令人更加理解失智症嘅人，喺佢嘅眼中周圍發生緊咩事，亦都令人覺得痛心，真係好驚有一日自己會變咗咁樣，每個人都會老，最怕係老咗之後會唔記得好多嘢，連自己嘅親人都唔認得真係好慘！

同好友一齊去睇呢套戲，佢就覺得唔好睇，我就覺得都OK，可能佢唔係太投入，我就好深深感受到失智症嘅苦況！

Womanboss

相約好友又去深水埗食嘢，去咗呢間餐廳，餐廳樓高兩層，有一半地方係買衫同飾物，另一半係餐廳，有個位置擺咗D威士忌，應該係售賣的，我早過朋友到步，所以才先坐低等佢，等緊嘅時候見到隔離枱有人帶咗隻貓嚟好得意所以同佢影咗張相，影緊相嘅時候朋友就到啦，我哋叫咗兩款意粉，一個蒜蓉粟米芯鮮雜菌扁意大利麵，同埋香辣蕃茄阿根廷紅蝦扁意大利麵，我就叫咗一個湯飲，另外一人一杯咖啡！食物嘅質素都唔錯，份量比較細，咖啡都好飲！

我哋走嘅時候經過旁邊有間餐廳，應該都係新開嘅，不過就好爆場，下次再嚟睇吓有冇位！