南昌公園/荔枝角公園

最近天氣開始回暖，街上面好多樹都開左花🌺🌼🌹🌻🌷，有幾個公園都開咗好多花，其中一個係南昌公園，我又去趁下熱鬧，第一次去呢個公園，佢最出名係黃花風鈴木，其實呢種花，在我屋企附近都有幾棵，我諗住南昌公園應該大D同埋多D，所以去睇吓，呢個公園都唔算好大，都幾多人喺度影花，除咗黃花風鈴木仲有其他花，當然種類唔多，而最多人影嘅黃花風鈴木D花都係喺樹上高，都幾難影到，就算垂低嘅花都唔係好近，所以影出嚟嘅效果都唔算太理想，影相嘅時候我見到有D細棵嘅樹，有少少花喺樹上垂左落嚟，有D大媽好冇公德心，將D花拉低嚟影相，真係驚佢地拉斷樹枝🤦🏻‍♀️🤦🏻‍♀️

影咗一陣相，就走喇！去咗地鐵站上蓋嘅V Walk商場都行咗一圈，第一次去呢個商場，原來呢個商場都唔係好大！搭地鐵走嘅時候經過美孚站轉車，望到出邊有個公園，又去睇吓有冇得影吓花，呢個荔枝角公園好多時古裝電視劇都喺呢度拍，我就第一次嚟，呢度冇乜花好影，影咗少少相就走啦！

夜晚返到屋企睇電視，見到新聞報告話 K11 Musea 名潮食館有小型爆發，仲要係我同朋友去果日，嚇到我哋即刻互相聯絡，同埋相約明天去做檢測！😣

 

Mini Friday

 睇完戲去附近食飯，訂咗呢間餐廳，我哋未去過，想去試吓好唔好食，佢係一間西餐廳，食物都係D大路嘢，我地叫咗個水牛城雞翼、青口墨汁意粉，同埋芝士焗薯牛脷粒，食物都唔錯！

 

狂舞派 3 The way we keep dancing

 

Heyo 係獨立唱作人，他在龍城工廈區租左一個單位做工作室，其他 KIDA (Kowloon Industrial District Artists)同樣因為租金問題，都要在工廈區租地方。一班有份做跳舞電影狂舞派及狂舞派2 （戲中戲）的成員，在演藝圈嶄露頭角，他們都在工廈打拼，但工廈近年加租，及頻繁的巡查，背後是地產商作祟，要把工廈區打造成商貿區。他們接到一個 job 要為工廈區注入街舞元素，命名狂舞街，他們希望藉此機會，令更多人認識他們一直追求的……

好多年冇去過旺角果間百老匯戲院，今次覺得要上好多層樓好麻煩，而且戲院好舊，不過佢D戲飛係好平，而家做緊半價，所以先至去呢度睇，套戲有D失望，同上一集嘅內容都好唔同，跳舞果部份都唔算好精彩！

一草一木

今日約咗好友去睇戲，睇戲前先去食D嘢，約好又去深水埗大南街附近食嘢，之前見到呢間都想試，今日見冇乜人走去試吓，餐廳門口搬開放形式，裏面裝修都幾靚，有個好似月亮咁嘅燈，食物嘅選擇唔多，主要都係啲蛋糕之類嘅食物，我叫一個三文魚 bagel 🥯 ，另外一件佢地招牌嘅芝麻蛋糕，仲有一個伯爵茶scone，食物好明顯係家庭式製作，都幾好味，另外唔少得杯咖啡☕️ 見到店入面有D水晶陣在裡面，仲有D塔羅牌之類嘅嘢，同埋原石！

我同好友狂影相📱，淨係件蛋糕🍰都左影右影，擺過好多個位置影😆 

 

迪士尼樂園第三次重開

我迪士尼第三次關門之後上星期五已經開返，不過我哋今日先至得閒去，食完野入園，今日好似都幾多人，我哋先去商店行吓，跟住走去玩Iron Man，好友猛咁話眼瞓，我哋跟住去咗睇城堡故事展，睇完出嚟在門口的長凳坐一陣，好友極速瞓着咗，所以我由得佢瞓半個鐘，到佢自己醒，呢個朋友好搞笑，成日好似小朋友咁，會斷電🔌，要俾佢叉叉電先食先至得🤣

跟住我哋就去小鎮大街，因為有表演睇，係一D燈光投影效果，再加米奇出嚟唱咗一陣歌，完咗我哋再去行商店買野，我買咗一套碗，跟住就走啦，因為今日都幾晏入去，所以好快就天黑，跟住出返去青衣城，去咗樂天王朝食小籠包上海野，好味！

 

青悅越南料理

又約好友去迪士尼，上星期五先至啱啱開返，要今日先至得閒去，例牌要去青衣城食D嘢先，今次試吓呢間越南餐廳，餐牌都好簡單，我哋只係叫咗一個濕炒河粉，同一碗雞絲檬粉，食物質素就一般！

 

鬼滅の刄 無限列車篇

炭治郎、禰󠄀豆子、善逸、伊之助一同前往下一個滅鬼行動，今次發生在一輛無限列車之上，他們在車上見到炎柱杏壽郎，要跟他學習殺鬼，列車上，他們一衆人睡著了，他們受到下弦之一魘夢的影響，他們沉睡不醒，受下弦指使的幾個小孩，在各人手上綁繩子，藉此進入他們的夢中，目的是要摧毀他們的精神核心，他們便會長眠不醒，炭治郎在夢中與家人團聚，杏壽郎夢見了曾經是柱的父親和年幼弟弟......！

呢套戲11月已經上咗畫，但係當我準備想去睇嘅時候，疫情又爆發，令到所有戲院要關門，所以冇得去睇！今日約埋好友食完飯就一齊去睇戲，套戲都幾好睇，夢境入面嘅世界好令人感動，好多人睇到眼濕濕，期待佢第二輯嘅電視盡快推出！

後記：3月8日 UA 宣布結業，85 年開業的 UA 戲院，不過疫情終於要結業！😔估唔到呢套戲係響UA戲院最後睇嘅一套戲🥺

名潮食館

限聚令一放寬，個個朋友都約食飯，好似疫情已經過咗咁！今日約咗好友去K11 Musea 睇戲，睇戲之前我哋去食飯，去咗呢間食潮州嘢嘅飯店，見呢度地方唔係好大得幾張枱，應該仲有一層喺樓下，我哋好早就去到，所以冇乜人，我哋叫咗滷水鵝片、煎蠔餅、蠔仔肉碎粥，同埋沙嗲牛肉芥蘭，食物嘅質素都唔錯，幾好食，店員嘅招呼都好好，我哋只係食咗一個鐘左右就走，因為要去睇戲！

後記：一星期後呢間餐廳出現小型爆發，24號開始有幾個人確診，我地25號一早去做檢測，26號先至有結果，等待左廿幾個鐘頭真係好煎熬，好彩出嚟個結果係陰性，不過連續幾日都有人確診，為安全起見我哋都要做多次檢測，我26-27 號返咗工，但係因為爆得太勁，公司叫我唔好返工要WFH，兩個好友1號和2號再去做檢測，我就3號去，第二次都係陰性，不過要做三次先准返公司！不過做咗兩次檢測之後，我放假都有出街，只係冇約人，做完三次檢測就可以返工，不過呢間餐廳就比商場結束租約，因為通風系統唔合格，所以第一次亦都係最後一次去呢間餐廳！最後確診嘅人超過50人，聽講話八枱客有七枱都中招，全部都坐樓下，好彩我哋坐樓上😅

 

塚田農場

近日疫情有所緩和，限聚令亦都今日開始放寬，重新有返晚市，好友想話攞兩支酒俾我🍶，橫掂佢哋由香港過嚟不如一齊食飯！去咗海運大廈，今日第一日有晚市都唔算好多人，我哋揀咗呢間餐廳，大家都未食過，餐廳嘅地方唔算好大，大概只有一半位有人客，餐牌都係類似居酒屋果D咁樣，我哋叫咗個鍋，上面有D牛肉同豬肉，係切到非常之薄，下低就鋪滿左菜，圍住喺個鍋嘅邊邊度，另外加咗一個麵，仲有炒飯同埋米紙卷，食物質素都OK，買單嗰陣時大家都爭黎爭去，最後話AA制，食完野好友仲車我返屋企添，返到屋企睇吓好友俾我嗰兩支酒，原來佢又俾返錢我，變咗佢哋請食飯🤦🏻‍♀️今次又食又拎，不過話好友話佢哋買股票贏咗錢，所以想請我食飯，咁就下次我請啦！

 

Bench

這間在轉角的咖啡店，開咗唔係好耐，啱啱開嘅時候已經想去，但係冇位，因為店入面嘅面積都比較細，大概只有10個座位左右，不過佢有一個位置係窗，果度有四個高櫈位，可以望出街都幾舒服，窗下面即係店外面，亦都有兩張木凳，可以坐喺果度飲咖啡，今日行過見到竟然有位，就嗱嗱聲入去坐低，我揀咗窗口旁邊嘅高櫈位坐，今日天氣好好，雖然有太陽曬住，亦都唔係太熱！餐牌寫咗在門後面嘅黑板上，我叫咗一個三文魚千層麵，同埋一杯咖啡，千層麵嘅份量唔係好大，四四方方好似一件西多！味道都唔錯，食完又好想試吓佢哋個西多士，所以加咗個蘋果法式西多士，不過原來佢唔係我心目中果種西多士，佢係法包，不過都 ok !

 

Joli 水晶

尋日去葵芳，見到呢間水晶店，就入去望吓，見到有條粉紅玉髓都幾靚，所以就買咗，另外見到條方形嘅螢石，但係唔係太靚所以冇買到，今日去同一間水晶店嘅另一間分店，見到尋日果條方形嘅螢石同一個款，不過D石就靚D，所以就喺呢度買咗，另外見到有條黃色方解都幾靚，見佢哋做緊半價，所以都買埋！呢間水晶店都幾多分店，以前覺得最靚嘅水晶都係晶之緣，不過呢間D貨色都唔錯，不過依家D水晶普遍都唔貴，因為最貴價果D水晶依家市面上好似少見左！

 

飯局作客 - 初二開年飯

年初二，早上去一去探姊姊，因為他剛開始化療，不便外出，團年飯都冇黎食，不過見佢狀況都OK，可能因為啱啱先開始，所以都冇乜唔舒服嘅情況，不過佢都話打完針之後成個人謝晒！希望佢可以快D好返！😘

探完姊姊之後返咗屋企，因為夜晚約咗朋友食飯仲有好多時間，所以返屋企眠一眠，跟住就去好友屋企食飯，今次人少少5個，好友已經一早預備左斧頭扒同埋醃好隻燒雞，另外仲一早整咗法包又煲左羅宋湯同焗左蒜頭，我地人齊就整Caesar salad，一路飲湯一路食沙律，兩個爐一齊焗燒雞同斧頭扒，個斧頭扒好抵食，只係四百幾蚊，燒雞醃得好入味個皮亦都好脆，好好食！