SAKImoto 嵜本

呢間麵包店都開咗成個月，之前見佢裝修緊，開咗之後諗住去又唔記得咗，今日趁出去剪髮之前，去試一試佢，店入面有堂食，座位唔算好多，堂食嘅人亦都唔多，睇吓個餐牌，其實佢只有一款食物就係佢哋嘅麵包🍞，只不過麵包有兩款選擇，麵包兩款係極美同極生，極美應該係冇牛油同牛奶，我揀咗極生，而果醬就有好多款選擇，我揀咗藍莓🫐、檸檬🍋、芝麻嘅果醬，加一款北海道牛油🧈，飲品都算幾多款，我就叫咗杯dirty，我就覺得佢唔夠 dirty 🤣

店入面有好多款果醬，亦都有佢哋嘅麵包，麵包係獨立一片裝，價錢都唔平，單係賣麵包同果醬應該都幾難維持，仲要係海港城呢啲咁貴租嘅商場，可能而家市道唔好平D租，但係之後應該都好難支持！

 

No boundary 無邊

好多時經過呢間餐廳都想試吓，但佢經常都好爆，今日都爆爆地，但係都有枱，就試吓佢！在門口睇咗餐牌，午餐都好似唔錯，入到去店員俾咗張紙我點餐，但係張點餐紙只有常餐，常餐只有兩款食物，一款係意粉另一款我唔記得咗係乜嘢，因為我揀咗意粉，其實意粉只係得一款就係卡邦尼意粉，可以揀嘅係配料，所有配料都係要另外加錢，我揀咗雜菇，跟餐有湯或飲品，我就揀咗湯，食物質素就普普通通，店入面嘅裝修，令店入面有好大回音，感覺好嘈吵！

Cozy coffee

平時行過呢間餐廳，見佢都幾爆，今日冇乜人就去試吓佢，其實餐廳入面都冇位，但係餐廳外邊的公家位置仲有D枱櫈，可以喺果度食嘢，所以就order野喺店出面食，餐牌嘅食物選擇都唔算少，揀咗個虎蝦蕃茄意粉，雖然呢間係咖啡店，不過今日就唔飲咖啡啦，叫咗杯Rose on the beach，食物同飲品都普普通通，店員D態度亦都麻麻地，我諗唔會再嚟 😔

 

一日之間 Between Haru

今日好友 S 又約我食晏，其實呢個好友成日掛係口唇邊話自己阿哥係高危一族，因為佢阿哥做地盤工同埋食煙，經常除低口罩，成班男人聚埋一齊，但係佢係同佢阿哥一齊住😅，所以佢話佢自己都好高危，但係佢係經常約朋友食飯🤦🏻‍♀️不過好友本身有潔癖，所以佢自我消毒得好乾淨，所以都唔會太擔心啩！🤭

今日我哋去南豐紗廠食嘢，之前見到呢間餐廳已經想試，今日見到佢咁啱仲有一張枱，就入去試吓！餐廳只有大概五、六張枱，而且都有一定距離，都好有空間感，店員亦都好小心，每張枱都會俾個紙袋放你用過嘅紙巾，非常之注意衛生，食客亦都會食得好放心，餐廳嘅食物走日韓風格，亦都好簡約，亦都有D麵包之類嘅食物，今次我哋試咗湯年糕同埋撈烏冬，兩款都跟咗一個紫薯嘅薯蓉，D嘢幾好食，飲品亦都唔錯，店入面亦都有一D貨品售賣，有D日本手造嘅餐具，同埋一D衣服飾物，店有部份嘅位置係落地玻璃，有陽光照入嚟，個感覺都好舒服，好友話呢間餐廳而家放緊售賣餐具嘅位置，以前係餐枱，但係因為太多人在呢塊落地玻璃前面影相打卡，而且有D係商場嘅天橋影落嚟，可能太過多人打卡，店家將呢個位置改咗做陳列枱，擺放果D日本餐具喺度售賣，對食客來講有D可惜，不過而家呢類比較文清嘅小店，都係唔想有太多客，作風有D似台灣日本嘅小店，覺得太多客會吃不消吧！

 

飯局作客 - 芝士龍蝦伊麵

今日相約好友去佢屋企食飯，下晝去買餸之前我哋去咗銅鑼灣食嘢，因為今日要去鵝頸橋買海鮮，又去我哋經常去果間鮨穴食日本嘢，每人叫咗個剌身套餐，另外叫咗個厚切燒牛舌，個牛舌係非常之厚，同埋個牛舌係炆過，有少少羶味，我地食到非常之飽！

食完野就去鵝頸橋買海鮮，其實好友已經訂咗龍蝦，果間東興海鮮今日做特價，龍蝦每隻$138 ，我哋四個人食，買咗三隻龍蝦🦞🦞🦞，因為仲有其他嘢食！買完龍蝦我哋就搭的士返去大成街街市，買咗條象拔蚌，上次見到已經想買，但係因為當時買咗好多餸所以冇買到，今次因為只係買咗龍蝦，所以買埋象拔蚌，店家幫我地起埋肉做刺身，我哋千叮萬囑要處理好，因為刺身生食唔係打邊爐，見到店員都將D刀同砧板用滾水淥過先至切象拔蚌，咁就放心啦！跟住再去買其他嘢，買咗蝴蝶蚌同埋買咗條魚，條魚原本係諗住鹽焗，但係唔記得叫海鮮檔唔好打鱗，店員好快手就起左鱗！唯有攞嚟蒸啦！另外再買埋豆苗同埋伊麵，然後再去超市買埋芝士同埋忌廉就搞掂！

好耐冇去好友屋企，今次上去見佢間屋執過嚟，好多傢俬都移咗位，因為俾咗好大空間佢隻狗，佢隻狗好熱情，第一次見已經係咁黐住你，好友一返嚟就喺廚房做嘢，我就同隻狗玩下等食！好友嘅女朋友收工返嚟，就好忙咁整野比隻狗食，廚房嗰兩個都好快手，整完晒所有嘢就開餐，唔好話我哋自己讚自己，個龍蝦🦞伊麵真係整得好好食😋，個龍蝦都好抵食，因為都幾大隻！呢餐都食得好開心，雖然第一次見好友嘅女朋友，大家都坐埋一齊傾偈傾得好開心，跟住仲叫咗foodpanda 送甜品，叫咗九龍城果間小方糖，食咗我好耐冇食嘅豆腐花，食完甜品我哋喺度傾偈， 而好友個女朋友就去廚房洗晒D嘢！真係好勤力😅

Phvlo Hatch

又又又又又又去大南街，今次有目標去呢間餐廳，因為之前行過兩次，但係好爆好多人等位，所以冇食到，可能上次係三、四點嘅時間，最多人飲下午茶，所以今次就早D去！

餐廳位於黃竹街，店入面嘅樓底都幾高，餐廳有兩層，不過今日又冇乜人喎！所以冇開樓上，門口有兩枱客，裏面亦都只有三枱客，呢度咖啡嘅選擇有好多，不過見到有衛特別嘅咖啡都係無糖無奶，個人來講唔係好識飲齋啡，我本身都唔鍾意落糖，但係冇奶就唔得！ 餐牌主要係意粉🍝同埋公仔麵？另外亦都有bagel 🥯、牛角包🥐、muffin、全日早餐、沙律🥗等，我叫咗個冬陰功蝦意粉，咖啡就叫咗個蜜糖薑汁泡沫咖啡，等緊嘅食物嘅時候就周圍影吓相，因為冇乜人，就可以影多幾張相，亦都可以慢慢坐，冬陰功汁嘅意粉都唔會點差，因為冬陰功都係好多人喜歡嘅食物，如果兩隻蝦唔使剝殼就更好！咖啡就正正常常，用咗薑汁都幾特別！

食完野在附近行咗陣，見到一間叫做 Mid Way 的小店，主要都係賣 D 日本嘅家品，都係餐具為主，售價偏高，可能因為全部都係日本做，而且係一D小店出品，原先店入面冇人，當有第一個人客（即係我）入咗去之後，其他路過嘅人見到店入邊有客人都入嚟睇吓，因為個店係要推門入去嘅，你見到入邊冇客嘅時候，都唔係幾好意思入去睇，有其他客嘅時候就冇咁尷尬，不過其實店員都冇理你，你可以自己慢慢睇！可能店員都知道佢哋啲產品係比較貴，好多人睇咗都唔識欣賞，所以都習慣咗唔使理！

行完呢邊再落去旺角，主要係想去上海街買少少野，順便睇吓果欄D車厘子🍒價錢，不過真係睇吓，因為好貴！🤦🏻‍♀️

蟹慶

今日得閒去一去銅鑼灣，原本都想去試吓壽司店有冇位，不過都係晏咗，唯有去搵第二D嘢食，行吓行吓見到呢間日式食店，見佢有D午市套餐都幾平，所以就去試吓！

店入面只有兩枱客，所以可以點錯坐都得，午餐有幾個選擇都唔錯，我揀咗壽喜燒套餐，幾十蚊嘅套餐都唔好有太大期望，當然牛肉係非常細塊，同埋質素麻麻地，份量亦都好少，個壽喜燒汁同埋菜都OK，我另外叫咗兩件壽司，質素就不過不失！

食完嘢去咗時代廣場搵好友，去咗12樓果間 Blooms 度飲咗杯咖啡，然後會合好友，我地去咗City Super 行咗一個圈，我原本想買伊麵，但係唔記得咗🤦🏻‍♀️ 我哋去咗食生蠔，每人都係一、兩隻，正呀！跟住同好友去咗 Tory Burch 睇鞋，因為佢要買對鞋比女友，見到佢做緊半價，D 鞋同袋都幾抵，不過我都係覺得貴，好友話去唔到旅行慳咗錢，佢哋前幾日先去 Chanel 買耳環！我哋約定下星期一齊食飯，原本話想喺屋企整羊腩煲，但係諗吓要煮幾個鐘，所以可能都係改變主意煮其他嘢食！到時等大廚決定啦！

 

Hakuba

今日原本想去試一間壽司店，但係因為滿座冇位，所以轉左去之前食過嘅果間雲壽司🍣，食完壽司都係想飲杯咖啡，行咗去斜對面嘅 Tower 535，呢度有兩間咖啡店，印象中好似冇幫襯過，淨係記得幫襯過樓上一間餐廳🐟，不過而家已經執咗喇！

呢間餐廳有兩個名，一個 The Alp ，一個 Hakuba ，唔知應該係點樣叫， 不過見佢杯墊寫住呢個名，就當係呢個名囉！雖然係有限聚令，不過餐廳都好爆，得返一張枱，而家限制每張枱只可兩個人，但係見到有D人根本係10個人分開5張枱咁😅，坐埋一堆，所以有冇限最令都冇乜分別！呢度餐牌嘅食物都幾吸引，不過我哋頭先食咗壽司，所以又唔係話好肚餓，所以叫咗一個 sando ，即係三文治🥪，一個柚子雞翼同埋一個丹麥酥，當然唔少得兩杯咖啡啦！☕️☕️ 餐廳嘅食物都唔錯，幾好食，咖啡都好飲，呢度環境都唔錯，有D自然嘅光線，都坐得幾舒服！😌

Gradini

好友 J 將要移民到英國，下星期就飛喇，原本想約佢出嚟食飯 farewell，但係限聚令六點後冇堂食，所以改咗食個下午茶代替，約咗去中環一間餐廳，但係好友嫌餐廳離佢公司太遠，臨時改咗去石板街果間酒店入面嘅餐廳，下午茶時間冇乜客，因為已經四點，六點後已經冇堂食，我同好友先坐低等另一位朋友，我哋坐嘅位置比較入，因為我哋三個人要分兩張枱，近門口果D位係安排唔到兩張相鄰嘅枱，所以坐入D，入面原本有一枱客都走咗，所以得返我哋三個，我哋叫咗個下午茶嘅 high tea set，加多杯飲品，因為大家都唔係咁肚餓，而我就因為上星期六腸胃炎，依家未好返晒，所以只係食好少，個下午茶個樣好靚，味道都好食，只係我冇乜胃口，我哋主要都係傾吓計，好友話過到去英國，乜嘢都未有，只係租咗間屋，話過到去先算，其實佢連簽證都未攞，因為要月尾先開始登記，佢真係心口有個勇字，學佢話齋睇你有幾堅決想離開！