千味手工餃子

呢間小店只係做餃子一種食材，餃子嘅選擇都幾多，除咗餐牌上面嘅餃子，亦都會有會有推介嘅餃子，只會寫在黑板上，除咗餃子都仲有啲小食，餃子亦都可以配麵，呢度嘅餃子有煎餃或者湯餃，可以叫六個或者八個，亦都有外賣生餃子，試過個湯係粟米紅蘿蔔湯，都幾清甜，而且餃子都幾大隻，因為佢係多菜少肉，咬開個餃子就會見到好多菜，但係肉就真係好少，煎餃嘅感覺就唔係咁好，唔知點解個餃子皮有種膠質嘅感覺，可能係油既問題，總之就怪怪地，而且點餃子嘅醋，亦都係冇味，只有好少好少嘅酸味，做唔到提味嘅效果，所以都係湯餃搞好D！

一豐味車仔麵

這家小店地方不大，密密麻麻的座位，大約有廿多個位，雖然係車仔麵，但係主打花膠車仔麵，亦有一般車仔麵嘅食材，另一款主打湯底亦都有胡椒豬雜湯同埋麻辣湯，花膠嘅質素當然係最平價嗰種，其他食材就一般，胡椒湯就好夠辣，豬雜都過得去，麻辣湯我就冇試過，搵日再去試吓！

Uluru

出咗院返屋企梳洗完，出去食D嘢，去咗灣仔呢間餐廳，過咗午飯時間，只有兩枱客，我哋叫咗兩個午餐，再叫兩個甜品，午餐叫咗海鮮拼盤同埋牛扒，雖然牛扒個賣相唔係咁靚，不過味道都唔錯！海鮮我淨係食咗一隻蝦，我覺得佢比較乾，甜品方面我地叫咗一個 Brownie 同埋 Cheese cake，甜品賣相幾靚， Cheese cake 幾好食，雖然佢講明未雪得夠硬，不過味道唔錯，brownie 我就覺得太甜，其實我一向唔鍾意食 brownie，呢度嘅店員服務態度好好，好友善，好有心去做，可惜市道真係好差，佢呢度有做下午茶，有類似high tea 嘅甜品，但係都冇人來食 tea，我諗平時應該幾多人，因為呢度嘅佈置都幾特別，都係一個打卡勝地，而且呢間係黃店，應該好多人幫襯，只係近期疫情太嚴峻，第二波嘅爆發，比第一波強勁好多，確診嘅人屢創新高，今日單日已經有65單確診，係爆發新冠肺炎之後最高嘅一日，連英國首相今日都中招，之前佢仲話佛系抗疫！😑而家連自己都中，查理斯王子又中，個個睇緊幾時到侵侵！🙄 東京奧運都要改期，好多人話呢個病係有錢人病，我諗因為多咗名人中招令人有呢個感覺，其實咩人都會有機會，真係要好小心個人衛生先至得！明天起，政府規定唔可以多個四個人聚集、聚餐，戲院亦都要關門兩星期，希望呢啲措施真係有效啦！

照胃鏡、腸鏡

近排肚子不舒服，所以分別睇左婦科同腸胃科，婦科檢查少不了柏氏抹片檢查，這個每年都做，所以化驗經果正常，都是意料之內的事情，只係仲有小小毛病，食藥便好了！而腸胃科要預約，見完醫生再約去醫院照，中間用了兩星期，好心急想快D照，因為個肚好唔妥，而且照完仲要等化驗！

約好左去醫院做，入院請三天已經要開始低渣飲食，即係唔可以食D高纖維嘅食物，例如高纖蔬菜、有皮水果、穀物、肉腸、肉乾，同埋一D刺激嘅食物，例如咖喱、辣椒、中藥、煎炸食物，照之前一日只可以食流質冇渣嘅食物飲品，例如粥水同埋淨湯，我平時每日都食嘅水果🍇蔬菜🥬通通都唔食得！😔

先在早一日下午入院，都係第一次住私家醫院，淨係知道要自備睡衣、拖鞋、牙膏、牙刷，原來毛巾同沐浴露都冇供應，姑娘叫我唔好帶貴重嘢，我仲諗緊帶唔帶電話，最後帶咗，見到原來佢個床頭櫃有得鎖，我去檢查嘅時候，姑娘會幫我看管鎖匙添！我入住八人房，不過只有四個人住，大家都係做內窺鏡檢查，因為見姑娘派瀉水比每個人，即係話大家都係照腸，瀉水有2L ，姑娘話一每15分鐘飲一杯，可以慢慢飲，瀉水嘅味道就唔係難飲，不過飲落口嘅感覺好似有D杰，其實飲完兩杯有少少想嘔，感覺頂住個胃，飲完成樽之後開始發作，就不斷去瀉，瀉到第五次就已經係水，不過仲有另外2L 要飲😓，因為要瀉到好清，否則影響檢查結果，其實之後全部都係瀉D水出嚟，真係成日要黐住個廁所！

瀉咗成晚，覺得冇得再瀉喇，就瞓覺，因為今日一早就要做檢查，姑娘一早準備咗套衫比我着，仲要帶埋帽，轉頭再有姑娘種定個打藥針口，因為要注射鎮靜劑，準備好晒之後，就去檢查房出面等，瞓喺張床度等醫生到來，姑娘同麻醉師都準備好，醫生都準時到，佢一到就即刻推入檢查房，幾個人三扒兩撥好快手，先在喉嚨噴麻醉藥，在要咬住一舊膠，姑娘再用膠紙固定果舊膠，麻醉師就打藥，跟住就瞓着咗！成個過程係點樣就唔知道啦，不過去到最後嗰幾分鐘，我已經醒咗，見到有塊布蓋住我個臉，有人在按我個肚，之後有少少模糊，醒一醒已經去到自己個床位，可以落床行返去自己張床度瞓覺，我唔知道瞓咗幾耐，總之醫生走埋嚟同我講野，我就醒左，佢比張報告我睇，入面有頭先照出嚟嘅圖片，胃同腸各有八張，跟住話要再驗下有冇幽門螺旋菌，叫我兩星期後去複診，初步檢查冇乜特別，當堂安心左好多！

嫲嫲雲吞雞

上次去唔到新蒲崗食 pancake，今日再次去睇下，睇吓餐牌，見到除左 Pancake ，主食選擇唔多，所以冇試到，改左去食京川菜，呢間店有個好處，係可以叫半份餸，咁就多D選擇！

店名叫得雲吞雞，就要試吓佢個雲吞雞，另外叫左半份咕嚕肉、炒菜，再加一份醉雞同炒年糕，個雲吞雞有隻雞脾，都好澎湃！食物嘅味道唔錯，都幾抵食！下次可以再食！

得 鐵板燒

食完個蛋糕大家都飽咗一半，所以去食鐵板燒，我哋三個人只係叫一個餐！因為都驚食唔晒！店入面只有三枱客，有一枱剛剛要埋單走，另一枱都食得七七八八，不過佢地兩個人全程同朋友視像通話，所以好嘈吵！

我地叫果個餐有刺身拼盤、鵝肝、虎蝦、肉眼扒、炒菜、炒飯或甜品，食物嘅質素都唔差，以價錢計就貴左少少，炒飯就真係食唔晒，我哋全程都唔傾得太多計，因為隔離太嘈，加上自己心情都唔係咁好！

古珐蛋糕

相約好友到新蒲崗食晚飯，但係因為冇位，改咗去九龍城食，上次喺九龍城見到呢間蛋糕店，係近期熱賣嘅古早味蛋糕，店門口有個顯示屏，顯示嚟緊幾點鐘有乜嘢味道出爐，好友來到的時候也好有興趣食，所以我哋諗住買一盒，我哋去到嘅時候仲有10分鐘出爐，所以我哋就等，呢個鐘數啱啱出爐嘅係肉鬆蛋糕，雖然想食原味，不過肉鬆其實都係原味加咗肉鬆，一樣食到原味嘅味道，差唔多夠鐘嘅時候，因為啱啱有蛋糕出爐所以好香，會突然間多左好多人，所以佢一底都好快賣晒，我哋買咗一盒，然後一齊行咗去Starbucks食，每人再買一杯嘢飲，個蛋糕因為新鮮出爐，所以好香好好味！

Knockbox coffee company (Central)

食完立食壽司想坐下，行咗去附近嘅呢間coffee shop，幾年前佢在黑布街果邊開店嘅時候幫襯過，果陣時佢有一款檸檬蛋糕都幾好食，但係而家應該冇咗，店入面嘅座位唔多，自己埋去叫嘢食買嘢飲，佢就會送過嚟你個位度，我哋叫咗兩杯咖啡同埋一個 waffle ，因為頭先食咗嘢所以當係甜品咁食少少，咖啡嘅份量都幾細杯，聽講九龍果間嘅咖啡師傅係攞過獎嘅，香港呢家門口就冇寫明，可能只有九龍果個有攞過獎？佢嘅waffle 係一粒粒形狀，有別與平時果D，食起上嚟都幾方便，咖啡嘅味道都唔錯，不過因為趕住去睇醫生，所以匆匆忙忙食完就走！