Fumi

早前好友送咗一張 voucher 俾我，可以免費食一個 brunch，不過自己一個去好似怪怪地，所以相約左好友 F 一齊去，咁我地一個免費一個要比錢，就當係兩個人半價食啦！

餐廳位於蘭桂坊，原本我地係訂咗5號果日去，但係5號當日因為全線地鐵都唔開，即使我哋可以搭巴士去，但係餐廳方面因為太多人取消，所以佢都要取消我地張枱，我哋張 voucher 原本13號到期，但係因為5號之後我地都唔得閒，所以餐廳特別俾我地在10月份之內用呢張 voucher，所以就改咗今日去！

餐廳嘅地方唔算好大，不過今日都幾滿座，呢間係日式餐廳，以brunch 來講，食物嘅選擇真係唔多，首先有一些頭盤，都係沙律、海蜇果類食物，跟住係魚生粒，點解係魚生粒呢？因為佢預你整魚生飯，佢有一碗碗白飯在旁邊，白飯都係幾細碗，當然你可以無限添飯，我都整咗一碗雜錦魚生飯，我見好多人都唔食飯淨係食魚生，唔好嘥位！仲有蟹腳！跟住仲有兩款天婦羅，同埋四款串燒，就只有咁多食物！不過佢仲有每人一隻生蠔，同埋一款主菜可以選擇，因為呢度咁多生冷野，所以我地叫咗一個鰻魚飯、同埋一個牛肉烏冬，雖然個選擇唔係好多，不過食物質素都算好，而且都幾飽肚，我地算食得多嘢，因為我飯都食咗兩個小碗，蟹腳我都食咗八隻，串燒雞翼我都食咗五、六隻，真係食得非常飽！跟住仲有甜品，有雪糕有水果，飽到不得了！