未來戰士：黑暗命運 Terminator : Dark Fate

在墨西哥， Dani 和父親及弟弟一同生活，兩姊弟在同一間工廠工作，一天，父親到工廠找他的時候，被一個叫 Grace 的女人槍殺，才發現那個不是父親，而是殲滅者，她跟着 Grace 逃走，開始了亡命天涯，途中遇到協助她的人 Sara Connor，Sara 因兒子被殲滅者所殺，因此一直追捕殲滅者......!

故事一開始，好似去返第一集咁，講返 Sara Connor 年輕時，和兒子 John 一起時，被當時的 T-800 成功殺死了 John ，因而改寫歷史！令成個故事方面轉變了，不再是追殺 Sara ，老實說成套戲都好多打鬥場面，但沒有太大驚喜，兩個第一代的主角真係老了，如果冇佢地兩個，可能少D人睇！

今日去到東涌，冇乜野睇，食完野只係去戲院睇左場戲，商場都好靜，可能因為近期冇晒大陸客吧！

Outback - Tung Chung

去完迪士尼，入咗去東涌，好耐冇去過東涌，知道東薈城擴充左，所以入去行下，在地鐵站上去東薈城，一路都係同以前冇分別，要行到去另外一面，先見到擴充嘅地方，擴充嘅地方都幾大，而且仲有好多層，其實我都唔肯定佢究竟係擴充左，定係以前一向都有呢一邊我唔肯定，總之就覺得比以前大左好多，呢邊多咗好多一、二線嘅名牌，不過人流就好冷清，可能真係冇咗大陸客嘅原因吧，在樓上有一層係賣童裝類別，有一層係戲院，仲有唔少食肆，最頂果層係 food court ，我去左 Outback 食野，叫左個午餐，係澳洲芝士漢堡，等緊嘅時候行咗去餐廳出面影相，呢間餐廳有一個 outdoor 嘅位置，仲有一個透明帳篷，入面擺咗D枱櫈同埋旅行餐具，其實係影相位，人客唔可以坐在裡面食嘢，不過夜晚如果開咗燈應該好靚，我當然都去影吓相啦，因為之前約咗朋友嚟呢度食，但係當日因為冇車搭所以冇去到，今日既然入到黎就即管嚟影吓相啦！影完相入返去食嘢，漢堡包嘅牛肉醃得喊咗，而且煎得過咗火，有少少燶，所以唔係咁好食！

迪士尼 Halloween Time

成個10月份都想去迪士尼，終於在最後一日可以入去，不過可能撞啱萬聖節正日，加上海洋公園哈佬喂今日冇開，今日呢度都幾多人，不過我都係諗住入去行一陣，睇吓有冇乜嘢新產品，四圍影吓相咁，今期做緊萬聖節 promotion ，不過相關嘅活動我都冇玩到，原本想去睇個show，但係Miss左個時間，所以都係冇睇到，行咗一陣就走，見到城堡已經起得七七八八 ，如無意外出年一月就會開返，到時再要睇吓煙花先得！

粵越棧

又係生日飯局，今晚去九龍城食，呢度主要係食小菜，你亦都可以來料加工，佢地會每磅食材收返$78 ，收費都唔平，不過我地只係買咗大閘蟹過嚟蒸，其餘都係跟餐牌叫，呢間食店都舊舊地，地方唔大，不過樓上仲有一層，座位有啲迫夾，除咗大閘蟹我哋亦都買咗兩支紅酒，同埋一支花雕，小菜方面我哋叫咗炸魚片頭、泰式鳳爪、德國鹹豬手、炸乳鴿、霸王鮮魷、沙茶牛肉河粉、炒豆苗、白灼蝦、螄蚶，最特別係生螄蚶，好耐冇食過生螄蚶，因為好多地方唔敢賣，有都唔敢食，不過今日見佢D螄蚶好新鮮，所以都叫咗，我地有幾個係好鍾意食，所以要encore叫多一碟，佢跟咗一D生蒜俾我哋，用嚟殺菌，而且D蒜頭都好辣，應該可以殺菌！今次買果D，大閘蟹都幾抵食，雖然唔係好爆膏，但係$100 三隻都算係咁！我都食咗兩隻，每餐都食得好飽，食完飯唔少得切蛋糕，好友們今次買咗個靚蛋糕俾我食，係Tony Wong 嘅芒果拿破崙，好正呀！好開心呢！

酒鍋

又有生日飯局，今晚去尖沙咀食火鍋，呢間火鍋店應該係新開無耐，因為座大廈都係好新，店入面嘅裝修好中式，坐位唔算好多，不過見佢有幾間房，我地一行七人，所以冇訂到房，只係坐出面，不過呢度冇圓枱，全部都係長方形嘅枱，傾計唔係咁方便，同埋我地咁多人一定要叫兩個湯底！

湯底我地揀咗一個胡椒豬肚湯，另一個黑松露雜菌湯，個胡椒豬肚湯底幾好味，我飲左幾碗，而且胡椒湯底通常都係越食越辣，煲耐左胡椒出晒味，呢度火鍋料價錢唔算好貴，但係份量真係比較細，好似我地叫咗碟本地手切肥牛咁，三百幾蚊但係好細碟，而且牛肉切得好細片，真係好唔抵食，食火鍋最緊要係牛肉，唔抵食就扣分，呢度D丸同埋餃都係自家手工制，味道都唔錯，呢度都有D特色食物同埋飲品，我地叫咗六色小籠包，因為我地有七個人，唔夠分，所以我冇食到，我地叫咗一個清酒菠蘿冰，甜甜地冇乜酒味都幾得意，其他食物嘅質素都唔錯，我覺得比較適合三、四個人嚟食，因為佢每碟食物嘅份量都唔大，叫一碟剛剛好！整體食物質素 ok ，係牛肉太細碟！