La Postre

昨天才回到香港，今日攞蜜瓜比人，然後去食飯，去銅鑼灣食，揀呢間貪佢冇落場，可以慢慢坐！過左午膳時間，餐廳冇人！呢度地方唔大，有一排窗，都好開陽！呢間餐廳食西班牙菜，餐牌食物好吸引，我地叫左龍蝦西班牙炒飯，同蟹肉焗牛油果，炒飯嘅份量都幾多，上面隻龍蝦都有膏，不過乾左D，炒飯嘅味道都幾好，焗牛油果就不過不失，見到佢餐牌上面嘅甜品好吸引，所以食到好飽都好啦，都叫咗兩個甜品，一個係西班牙油條 Churros，另一個係無花果脆批，味道都唔錯，食飽飯都傾左成個幾鐘先至走！

2019 年9月 北海道自駕遊 Day 8 - 札幌、新千歲空港

話咁快八日嘅假期就去到最後一日，今朝check out 左之後，就揸架車過去札幌站果邊，因為我想去大丸買嘢，同埋果邊有個商場，呢幾日都冇乜點真正行過街，所以想抽少少時間去行吓，不過時間都唔係好足夠，因為我地都要揸成個鐘頭車去機場，仲要 1:00 前還左車先，去到大丸百貨嘅停車場，只係10點幾，大丸剛剛開門，停車場已經差唔多爆曬，因為過兩日開始加消費稅，由於8%加到10%，所以好多公司都用呢一樣野做減價，吸引人在1 號之前消費，所以呢幾日去邊度買嘢都好多人，同埋間間都做特價，我去大丸目標明確，就係想買煙燻瑤柱，只有北海道先有得賣，價錢都唔平，今次去見到比上一次貴左好多，所以本來諗住買來做手信都冇買到，只係買咗一 pack 俾自己食就算，買完野就去攞 free parking ，因為買 ¥1000 就可以有兩小時泊車，攪完車飛之後，行過去隔離個商場，因為想睇下有冇 Disney Store，果然有！拿拿淋入去買少少野，今期做緊 Rapunzel 嘅精品，所以買咗三樣就走啦，攞返車跟住就過返去札幌了！

去到札幌竟然落雨，我地還車嘅時候見到租車公司剛剛出車，因為佢地會在你還左車之後，係會車返你去機場嘅，佢見到我地返緊嚟就等埋我地，本來諗住落雨，就叫佢揸返我哋揸緊果架車去機場，咁就唔使搬行李，不過因為有其他人同行，所以就要做轉佢哋架車去機場，因為佢哋果架係小巴！

去到機場佢又停雨！我地原本想寄咗行李先，但係未夠鐘唔寄得住，所以我哋就去咗行街先，國際線呢邊好新淨，因為機場擴充左，雖然地方好大但係比較靜，我地要行返去國內線果邊，因為果邊好熱鬧，多好多商店，係推住行李麻煩D，好友又幫佢哥哥搵 sake ，不過冇佢哋想要嘅嘢，我地行咗一陣，我又在 Sanrio 度買 XO 仔野比我好友！

時間差唔多就行返過去國際線果邊，差少少未夠鐘寄行李，唯有再行多一陣，呢度有間驚安殿堂，雖然係免稅，但係D嘢貴過市區嘅驚安殿堂，同埋呢度嘅藥房D嘢都好貴，所以有嘢未買都唔使喺呢度買，只有手信係同出邊一樣，最多人買薯條三兄弟，見到周圍都係呢個價 ¥880左右，我地因為已經買晒手信，pack 晒入喼，所以唔使買！終於等到夠鐘寄行李，我地包30 kg 寄艙行李，我已經有29 kg，好友兩個加埋先至47 kg，而手提行李方面，每人應該有 7kg，我地果三個蜜瓜已經7 kg，不過佢冇計我地背囊，否則一定超重！

寄完行李可以過關，過咗關之後見到呢度都係好新，但係竟然冇行李車，我見到有人推住行李車，但係只係極少量，冇理由一個咁大嘅機場係冇乜行李車！呢度有一個類似 Food Court 咁嘅地方，大概有10多間食店，不過非常之靜，冷冷清清，我估計D人唔知過關後有嘢食，所以商店咁靜，我地揀咗一間拉麵店，唔記得影鋪頭名，淨係記得佢拉麵價錢由¥980 起，全場最多客已經係呢間拉麵店，可能價錢係原因之一，因為旁邊嘅拉麵店都冇客嘅，見佢嘅拉麵最平都 ¥1180，呢度亦都有壽司、和牛等等嘅嘢食，我哋一人食咗碗拉麵，跟住就出去行下，雖然已經買晒手信，不過我地去到一間手信店，見到佢做特價，有D拉麵同烏冬減到半價，只係¥500一盒，一盒有四、五個，所以我哋都買咗幾盒返嚟食或者做手信，差唔多夠鐘登機嘅時候我地就去排隊，差唔多排緊隊嘅時候，見到機師同埋機組人員都未上機，同我地一樣喺度等，已經知佢會 delay，跟住突然間話會 delay 到七點，大家都嘩然，因為要等兩個幾鐘，但係過咗幾分鐘之後，又話只係 delay 幾個字，不過我地見到機師同埋空姐都上機喇，即係飛機到咗啦！我諗最多都係 delay半個鐘，最後都係遲咗幾個字，今次呢班機都唔爆，所以擺行李都唔會太緊張，本來想睇返兩套戲，但係都冇乜戲好睇，所以只係睇咗一套蟻俠黃蜂女，飛機返到香港嘅時候，行李又出得幾快，等咗大概只係10分鐘左右，未試過咁快就攞到行李，返到香港覺得好熱，事實香港嘅天氣都超過30度，上星期應該涼返D，今個禮拜又熱返，我諗我哋D蜜瓜應該會快D熟！

整體來講今個旅程都算幾好，最開心係玩咗 Segway，食咗超甜蜜瓜同埋粟米，遇啱有個 Sapporo Autumn Fest ，唔開心當然係好友唔見左飛機啦！同埋成個行程有少少阻滯，主要都係第一日落大雨，好彩後面都冇再落雨，只係返香港果日先至落咗一陣雨，又食唔到靚嘅海膽！希望下次安排六月果D日子去，可以食到靚海膽啦！

2019 年9月 北海道自駕遊 Day 7 - 札幌場外巿場、大通公園 Sapporo Autumn Fest 2019

今朝食完早餐就出發返去札幌，要兩小時車程，揸左一個鐘，去到中途站休息一下，這個砂川 SA，有商店，旁邊亦有個小花園，我地在商店買左小小手信同零食，再繼續去札幌！

去到札幌，先去場外巿場，之前去過二条市場，今次去場外市場，呢度地方唔大，一段馬路對面兩邊，我諗每邊十間店左右，除左蟹之外，就係蜜瓜、瑤柱，我地已經買左蜜瓜，所以唔使買，見D蜜瓜唔太靚，有試食過，皮較厚，冇我地尋日買果D咁靚，當然呢度平小小，我地食飽左早餐，所以只係食小小野，先去食生蠔，叫左兩隻，不過覺得有一隻怪怪地，有D半透明啫喱狀，而且比較瘦，所以個老闆另外開多一隻俾我地，只係收我哋兩隻錢，我地一人一隻，食落口又冇乜野，都好新鮮，跟住想去食海膽，去左最大果間，之前睇電視有介紹過，呢度仲有個食堂，你可以在𥚃面order 海鮮，所以我地索性坐低食，因為好友想食烏賊，只係見到呢度有，所以就坐低食，我哋叫咗海膽、烏賊、北寄貝、牡丹蝦，海膽就真係麻麻地，牡丹蝦就幾好食，烏賊同北寄貝都 ok！食完嘢我哋行過去青果館果邊，話明係青果館，即係賣水果嘅地方，裏面唔係好熱鬧，都有十幾檔水果，賣嘅嘢大同小異，我哋一人買咗一包巨峰提子，另外每人買咗一個黃金桃，呢度嘅黃金桃好平，每個只係 ¥250 ！

買完水果我哋揸返車返去酒店，泊完車未夠鐘做 check in ，我地落去大通公園果度行一陣先，因為知道呢度做緊一個 Sapporo Autumn Fest ，類似香港嘅 Wine and Dine ，但係以食為主，酒類其次，我地先行一轉，再鎖定目標，晏D先過來，我地去返狸小路買手信先，買完再返酒店 check in ，Check-in 完好友需要休息一陣，我就出去行咗個圈，知道附近有間三越，所以過去行一行，不過呢間三越冇乜嘢睇，所以我就返番酒店同好友會合。

我哋行返去大通公園，今晚剛剛有Rugby World Cup 比賽直播，應該日本有份比賽，氣氛非常熱鬧，我地行返去之前睇到有一檔賣海膽牡蠣飯，就買一盒試吓，另外再買一個拉麵試吓，拉麵果邊係買一張¥700嘅拉麵 coupon ，就可以去幾檔拉麵店是旦一間到都用得，個牡蠣就麻麻哋，拉麵就幾好食，呢度好多人，亦都好多位俾人企喺度或者坐喺度食，坐嘅位就有帳篷，企位就露天，我哋都係企響度食，食完自行清理垃圾，佢都有垃圾回收處，係要將垃圾分類，亦都有個專人喺度幫手分類！

跟住我地去食海膽和牛飯，睇廣告張相好吸引，跟住見到都唔係好大碗，所以買咗碗試吓先，見到佢個牛肉片只係煎一煎，係半生熟，然後加少少海膽，個牛肉就麻麻哋，海膽都係，始終呢個唔係海膽嘅季節，所以D海膽真係麻麻哋！繼續行見到有一間賣牛肉炒麵，但係用甜筒果種 cone 裝住，又買來試吓，又買咗一個牛肉芝士飛碟三文治，兩個味道都唔錯，特別係飛碟三文治，跟住又去試咗豚肉法包，豚肉雖然幾肥，不過食落去都唔油膩，加上有麵包索油，所以個麵包都幾好味！食法包就咁岩有位可以坐低食，行咗成晚都想坐一陣，整體來講呢個活動好熱鬧，食物選擇好多，不過唔係樣樣都啱口味，即使多人排隊都未必係最好，行咗咁耐見到最多最多人嘅人龍，係一檔賣Pizza 嘅，佢有個窯爐，可能因為即焗，所以特別好味先至多人幫襯，而且店員全部都係外國人，今次真係咁岩撞正呢個event 最後兩日，前幾日在酒店食早餐已經望到，以為係短期屋台，當日因為落大雨所以冇乜人，今日就爭好遠喇！食完嘢我哋就返酒店，返酒店之前去咗七仔買嘢，買咗半熟蛋，返到酒店食埋半熟蛋同埋生果，跟住要執行李啦，因為聽日要返香港了，又係果句，歡樂嘅時間過得特別快！

酒店入住後評價

東急Stay 札幌飯店

Tokyu Stay Sapporo

酒店嘅位置在電視塔同二条市場之間，酒店都幾新，係2018年開業，所以D房都好新淨，床頭亦都有USB插頭，房入面更加係有二合一洗衣連乾衣機同埋燙衫板，房價方面因為星期六嘅關係，價錢要$1000左右，睇返佢如果淡季閒日的話，大概都係$400左右，都真係幾抵，好友揀呢間房嘅原因，就係貪佢有洗衣機，因為佢哋習慣返香港之前一晚洗晒D衫先，我就習慣返香港先洗，因為驚洗衣機唔知咩人用過，洗過D乜嘢，不過我見到我間房入面果部洗衣機係冇用過，可能咁啱之前嘅住客都冇用洗衣機吧！房嘅空間唔算大，睇個緊急逃生路線圖，見到應該單人房同雙人房都係一樣咁大，除咗頭尾有一兩間係特別大D，不過張床就幾大，都叫做有張枱仔同兩張櫈，不過如果兩個人放兩個喼就真係唔多夠位！佢個停車場都係上樓果種，我哋架車大得滯所以要拍出邊，不過就係正酒店大堂出面，所以好方便，大堂有個好大嘅空間俾人坐，有自助咖啡機，亦都有茶包同埋咖啡粉比住客攞上房飲，早餐嘅地方就喺大堂側邊，地方唔係好大，朝早仲要等位，未試過酒店食早餐要等位，好彩好快有位，食物方面選擇唔多，亦都冇特色嘅食物，以¥1500 收費來講就唔係咁值喇！情願俾多少少行過去二条市場食海鮮好過！