瑪寶鮮

好友話佢有朋友介紹去呢度食嘢，貪佢唔使開瓶費，仲供應埋酒杯俾你，其實呢度主要係食中菜，好友帶咗兩支紅酒嚟！我地叫咗幾個小菜，一路食下野、飲下酒、傾下計，好耐都冇試過咁齊人，加上好友第一次帶女朋友出來，女朋友斯文大方，又同我地傾得埋，真係幾開心，好友難得離婚後咁快搵到咁好條件嘅女朋友，證明香港真係好多剩女！

呢度裝修格局同一般中菜館差不多，食物質素都OK，分量就同一般例牌差不多啦，我地都坐左幾耐，因為好友要11點幾先至到機場，所以有大把時間，可以慢慢食慢慢傾！

The Old Monk bar & grill

尋晚先至落機，今晚就到好友飛！

因為之前一直話想食開年飯，遲遲都約唔到，最後決定今晚食，因為訂咗枱未夠鐘，所以在附近酒吧飲杯野，好友同佢女朋友去咗九龍站check in行李先，然後會合我地，佢地今晚凌晨機去大阪，酒吧只有一、兩個客，原本想叫杯 High ball ，但係佢地冇，所以我地求其飲咗杯野，先至去食飯，飲完野剛剛好大家都到齊，就一齊行去食飯啦！

2019年2月 東京散心之旅 Day 7 - 東京駅、成田空港 Terminal 1

話咁快就行程完結了！今日搭 15:30 航班，所以冇乜時間，只係預留多少少時間去東京站買手信，朝早九點幾 check out 離開酒店，避開返工繁忙時間，搭 JR 一個站去秋葉原，轉車落去東京站，原本諗住去大丸買朱古力餅，但係唔記得咗大丸在站外面，因為我已經入咗閘，所以唔可以再出去，咁唯有買一款手信啦！今次因為行李嘅關係，所以只係買少少，同埋因為好友指定要呢隻手信，所以先至買！就係我自己都好鍾意食嘅呢隻 New York perfect cheese 芝士小食！

買完手信仲有時間，去咗壽司清食野，佢有幾款 set 選擇，不過我冇叫到 set ，只係散叫左六件壽司，因為一個set份量太多，而且有D 唔係咁啱食，所以揀自己想食嘅，六件就夠啦！壽司質素一般，今次行程裡可以話食唔到一餐滿意嘅壽司！

食完野行多一陣就去月台等車，東京站進行緊大裝修，不過呢個月台好似唔會裝修咁，定係未裝修到呢度啦，所以好舊，日本火車一向準時，我搭果班車，當然係準時到達準時開出，去到機場唔使一個鐘，回程都係在 Terminal 1 上機，好少去Terminal 1 ，近幾次去東京都係在 Terminal 2 離開，今次去到覺得佢有D位置好似裝修過，定係我太耐冇去 Terminal 1 所以唔記得左？總之就有D唔同，不過呢邊始終多嘢睇D！

先去將行李寄艙，寄艙之前去磅重，只係16.8kg，於是我擺埋件羽絨褸入個喼度，都係17.2kg，完全控制在20 kg以內！過關前去食嘢！去咗一間叫做日本の中華そば富田，食咗碗湯麵，然後就過關

過咗關之後，覺得呢邊個商場係翻新左，亦都比起Terminal 2 多好多舖，之前有一間叫做 Akihabara (秋葉原)，屬於 FaSoLa 集團，見到另一間叫做 Asakusa (浅草)，都係同一個集團，只不過店入面嘅裝飾跟返店名，例如 Asakusa 就有個雷門嘅燈籠！我諗緊想買支梅酒俾朋友，因為佢在大阪買咗支梅酒俾我，所以我想回返一支俾佢，不過見到冇乜選擇，又冇得試，唔知好唔好飲，正當我喺度睇睇下嘅時候，有個 promoter ，係一個識講少少國語同廣東話嘅日本人，佢推介一支清酒俾我，佢話釀製方法同十四代係一樣，而且攞左17回金賞，問我有冇興趣試下，咁我又覺得一試無妨，試過味道又真係唔錯，都幾好醇，價錢亦唔貴，似係一D小家庭式經營嘅酒廠生產，因為個包裝好簡單，所以我買咗兩支自己飲，另外佢亦都介紹左有一支梅酒，入面係有浸左幾粒梅，有D似 Choya 果隻，佢話有得試咁我又試下囉，因為真係想買，佢講解同 Choya 嘅分別，佢話 Choya 係用燒酎浸，而呢支係用清酒浸，味道的確係幾好，所以就買左3支，一次過買咗五支酒都真係好重，之前果幾日唔買都係因為驚行李過重，所以留返在機場買，卻無意中搵到唔錯嘅酒！

總結今次行程，都唔係好散到心，始終成日諗住工事，都幾影響心情，都想快D返工處理公務，唔使比佢煩繞住！而且今次都好多唔係咁順利嘅事，不過好在平安大吉，都係果句啦，最緊要人冇事啫！

2019年2月 東京散心之旅 Day 6 - 橫濱、秋葉原

想去D近近地，又未去過既地方，去橫濱，幾年前去過一次，當時有間 Build a bear 的店，專賣 bear bear 熊衫，果次朝早過去等佢開門，買完即刻走返新宿攞行李飛，所以冇認真行過，印象中佢有隻船停在那裡，我記得上次在櫻木町店附近的，今次去橫濱站，由秋葉原撘JR京濱東北線直到橫濱站，呢度比印象中舊，東站有 Lumine、高島屋同埋 Sogo，日本好少有 Sogo ，不像香港，只有 Sogo ！這 Sogo 有點舊！沒甚麼好行的，Lumine 和高島屋也跟新宿的差不多！

午餐在一家叫三和的店吃親子丼，味道一般！跟住搭港未來線，去元町中華街，呢度成條街都係中菜，招牌都係大紅大金，主要都係點心較多，個人認為，如果佢可以分開上海菜、潮洲菜、北京菜等等，會鮮明D，有特色D，依家睇落好似間間一樣！呢度亦有得睇掌，中國人眼中覺得呢度好唔中國！

行左一陣，過去紅倉庫果邊，行左十幾分鐘先到，呢度係碼頭，天氣好好，天上有兩架直升機在空中，可能因為泊左架 Japan coast guard 在碼頭吧！紅倉庫是個商場，行到攰坐下，但係又好凍！要去最近的火車站櫻木町，最少行15分鐘！見到有觀光巴士去櫻木町，唔使諗，即刻上，收費¥220，後來發覺佢有兩條路線，由櫻木町開出，都係去附近多個景點，仲有周遊券，可以全日去唔同景點上落車，可惜發現得遲左！因為已經去左兩個景點，剩返 World porters未去，諗左陣都係唔去，應該都係商場！

在櫻木町旁有個商場，見到有間貴和製作所，專係賣飾物配件，可以自由配搭做各式各樣嘅飾物，例如耳環、頸鏈等等，有好多選擇，亦都有D sample 做咗出嚟俾人睇，近兩次在日本都見到有好多呢類鋪頭，而且價錢唔貴，不過好易買多幾包就唔平！

由櫻木町出返嚟，去咗秋葉原，今個旅程冇食過燒海鮮，今晚好想食，所以去咗磯丸水產，好耐冇去喇！叫咗兩隻扇貝、一個蟹蓋、一個刺身拼盤同埋一杯柚子蜜 High ball ！個蟹蓋咸左D，扇貝都OK，刺身就麻麻地喇！其實食物嘅質素比起以前係真係差左，不過環境氣氛仍然係好嘅，如果食物質素可以改善D就好喇！

明天要返港，今晚再食半熟蛋，然後執行李，今次冇乜點買野，因為行李只包20公斤，所以好多野稍為重D都唔買，執完個行李仲係好多空位，預留明天去東京站買手信！

2019年2月 東京散心之旅 Day 5 - 田原町、 晴空塔 Skytree

話咁快第五日，今日星期日，去田原町睇下！平時由上野過去，今次由淺草過去，行過去都營淺草線的淺草橋站，由近住酒店的 JR 淺草橋站西口，行去東口，車頭行到車尾的距離，原來呢段路，好多手工製作物料莫賣，唔少係水晶，仲有紫晶洞同原石賣，不過都係D大路貨色！亦有賣皮革，首飾配件，如果想買呢類野，去淺草橋就啱喇！行到東口呢邊熱鬧D，亦都望見都營淺草線的入口，由淺草橋去淺草站，只係兩個站再轉 Metro 銀座線去田原町只係一個站！

田原町站已經完成了翻新工程，成個站靚晒！平時在對面月台的 Elevator 出口出，呢邊月台都有個 Elevator 出口，又試下呢個出口出，出到地面，原來兩個 Elevator 出口只在對面，平時 二イミ的巨型廚師頭在出口右邊，今次在左邊對面！

入到去道具街，好多店冇開，不過一D主力的商店都有開，好似街口間田䆶，都好多人，呢期櫻花碗碟唔太靚，仲有我之前買的四方碟，不過得返黃色！行左平時主力睇果幾間，睇唔啱野，又冇野食，過去 Skytree 搵食！

搭返轉頭去淺草站，搭返都營淺草線直達去押上站，上去 Skytree 食鳗魚鈑，呢度有有兩間鰻魚店，兩間都食過，一間傳統D，一間就加左好多其他食物，可能做遊客生意，獨沽一味係難做D，始終一班人總有人唔鐘意食！我去左多D選擇果間，要等位，其實日本的餐廳經常要你等，要安排好晒先比你入座，所以好多時見到好多位都要你坐出面等一等，不過今日新聞真係多人，不過過都好快有位，始終 Skytree 開左幾年，人流冇之前咁多！遊客亦未必次次都來！呢度鰻魚飯 set 有好多選擇，分別係多D鰻魚定少D，一食定三食，我揀左一條鰻魚三食 set，第一食就咁鰻魚同飯，第二食加蔥同 wasabi ，第三食加葱、wasabi 、湯，三種食法，加湯就難夾迫起D飯！每次我都加個燒肝！今日破例飲左杯可樂！覺得糖份唔夠！

食飽飯在商場行街，今日慢慢行，呢度有間 Loft ，幾鐘意行 Loft ，有家品亦有妝物，行完諗起要做預辦登機，登機前48小時可以預辦登機，最重要係㨂位！雖然遲左幾個鐘，不過D位仲有好多！㨂左右手邊窗口位，東京飛香港要㨂右邊，因為有機會望到富士山！行到去商場有個位做緊韓劇宣傳，整左男主角紙板人比人影相，不過只是背面！

行完街又去搵食，想食壽司，呢度得一間壽司店，叫做壽司常，大把位！叫左個 set，八款壽司一共13件，有四件拖羅，有海膽、蝦、油甘魚、三文魚籽等等，質素一般！

食完飯，行超市，在 Richmond hotel 旁的起市，收得比較夜，上次同好友在此買狗糧，仲有 LC 贈的茶，今次冇 LC 贈品茶，但仍有狗糧，之前牛奶仔食果隻零食，一包10條，有增量裝加左10%，即係11條，買三包仲有折，攞左3包，發現掛在後面果D係增量20%！即係12條，原來只有表面兩包係增量10%，其餘係20%，後來見到36條裝，增量15%，即係42條，同三包價錢多¥18，咁42條比三包共36條更抵！

行完超市返酒店，今晚買左脆皮雪條返去食，正！