嚐囍煲仔小菜

今晚又去 wine and dine ，連續去第三晚，未去之前同好友食生日飯！食完飯先至知佢地呢餐係同我食生日飯，真係好多謝呢幾個朋友記得我生日！

去咗西環北街食，以前我試過呢度搭小巴去旺角，冇為意呢度有間小菜館，只係記得有間超級市場，超市旁邊就係呢間小菜館，見門口貼住米之蓮推介，六點幾去攞位都已經好多人等緊，等左成個鐘頭先至有位，呢度主要係食煲仔飯同埋小菜，店裏面嘅裝修好舊，座位好迫，好有舊式茶餐廳嘅感覺，好友話佢地成日都嚟，所以推介我地嚟試，而且價錢比較大眾化，所以等耐D都要試下佢，我哋叫咗一個白鱔排骨煲仔飯，同埋一個鍋蛋牛肉餅飯，小菜方面就叫咗油浸筍殼魚、蒜蓉粉絲蒸勝瓜，仲叫咗個椰子雞湯，本來想叫白肺湯，但係佢話賣晒，得返一款湯可以揀，所以就叫咗雞湯！呢度亦都有點心食，我哋叫咗臘腸卷同埋炸雲吞，今晚四個人之中有兩個係好細食嘅，所以唔敢叫咁多野，最食得果位男士就好明顯唔夠飽，女士們就個個都飽喇，其實餸菜嘅份量都唔算細，個湯每人可以飲兩、三碗，食物嘅質素係唔錯，同好多舊式小菜館一樣，都係名不經傳，但係食物就做得唔錯嘅！

食完飯，就過去 wine and dine ，星期六晚係超級多人，免費小食都係大排長龍，或者已經派晒，因為我地太夜入去啦，超迫、超多人，真係舉步維艱！我地試咗啤酒、 highball、白酒、cocktail ，小食方面免費小食只係攞到芝士同埋我ham，在尊尚品酒區試咗香檳同埋白酒，都好好飲，不過價錢太貴我地冇買，好友們帶左生日蛋糕來同我一齊食，原本想去舞台前面草地度食，但係爆場爆得好緊要，完全行唔到去草地，因為今晚又係 rubber band ，所以去左專尚品酒區入面果個假嘅草地，打開個蛋糕睇，個蛋糕散晒，好搞笑，加上冇火機，所以冇點到蠟燭，只係唱咗生日歌，我地笑得好開心，有時好多好簡單嘅嘢，只要係有心，有誠意就好滿足！

航拍 12 - 大潭篤水塘

前兩晚去左 wine and dine 飲飲食食，今日做返d 郊外活動，相約好友去放飛機，第一次在港島區放，之前次次都係新界，其實好友住香港區，所以都想就一就佢！

今次去左大潭篤水塘果條水壩下面放，呢條水壩上面果條馬路，都好出名，因為條路好窄，來回行車線都係僅僅夠一架車過，不過佢近期加左燈位，令到呢條水壩上面果段路，同一時間只能夠一邊方向行駛，所以冇左之前驚險嘅情況出現，今日星期六，下午去到水壩下面冇乜人，水壩冇水流落嚟，因為水塘嘅水都唔滿，我地坐低放飛機嘅時候只有我地兩個人，不過中途多左D人由山上面行落嚟，仲有D姐姐聚集，又有人影婚紗相，陸續有其他人來放飛機，忽然間變得熱鬧起來，好彩我地放完先至多左其他人來放飛機，如果唔係都幾混亂！

飛上去影到大潭篤水塘都幾靚，不過今日天色唔係太好，應該話近幾次飛嘅時候，天色都唔係太好，冇陽光天色仲有D灰暗，今日都幾大風， 接收信號都唔係太好，最後一轉仲冇左圖傳，要自動返航先搵得返佢！今日所見，連埋我地有五個人放飛機，有三個係用上個月出嘅新款 Mavic 2 Pro，有兩個包括我自己係用舊年款 Mavic Pro，證明今年出嘅新款係多咗人買，事實上鏡頭真係靚D ，不過都打動唔到我，除非有靚價回收，如果唔係都唔使諗！

10th HK Wine & Dine festival 香港美酒佳餚節 2018

美酒佳餚節已經做到第10屆，我都連續去咗七年，以往只係做三日，今年就做左四日，舊年已經約咗好友今年第一日去，今日晚上七點半先至開始，因為有朋友在𥚃面工作，所以一齊早D入咗去，入到去最令我注意到當然係 Disneyland Mickey’s kitchen ，不過𥚃面冇乜食物，主要係糕點，或者話好少選擇，有一邊係賣餐具的，係迪士尼嘅塑膠餐具，我冇留低睇，因為要匆匆入去會合朋友，會合左朋友之後，我先去四圍影吓下相，然後又同朋友飲下酒，我哋在門口果個Johnnie Walker個 booth ，換咗杯highball ，仲可以加兩個token 換個玻璃杯，杯 highball 幾好飲個杯又幾靚，所以我地一人換左兩隻！

今日有開幕嘉賓致詞，七點鐘有航拍表演， 100部航拍機在維港升起，拼出酒杯同蛋糕圖案，仲有 W&D 嘅字句，表演大概只有六分鐘，睇完航拍表演再會合另一好友，一齊去搵嘢食，食咗漢堡包同熱狗，仲有上年食過好好味嘅卡邦尼意粉，又試左冰酒！比我見到一直想搵嗰支冰酒，仲比市價平左一半，聽日先至買！因為聽日仲要再來！

來佬餐廳

今日午餐去左呢間食，之前想試，一直沒有試，今日終於可以試下，店子要上一層的卡拉 ok 旁，地方頗大，星期六的下午，只有三、四枱客，餐牌上食物選擇不少，有點似太平館，有中式點心，又有牛扒，真係梗有一款啱你，我地叫左威靈頓牛扒和來佬汁雞翼，雞翼就像太平館的瑞士汁雞翼，肉質肥美，裡面不會乾，好味，威靈頓牛扒上次在 Bread street 食過，雖然沒有上次那個好食，但這個也不錯！吃的好飽呀！

Three on Canton

又有生日飯局，其中一個好友甩底王，又再甩底，今次話係爸爸死忌，要返屋企食飯！都慣左佢每次有不同理由甩底！

原本去西環食火鍋，但係要就甩底王先改去九龍，既然訂晒位就照去！一早去到攞位先，呢度食物選擇都幾多，之前食過一次質素都唔錯，今晚見質素好似冇之前咁好，不過都唔差嘅，冷盤有即開生蠔、龍蝦、蟹腳、刺身等等，熱葷亦都有好多選擇，有片皮鴨、煎鵝肝、牛扒，羊架等等，以 buffet 來講算多嘢食，甜品嘅選擇亦都好多，不過我唔係特別喜好大量甜品，主要都係食水果同埋麵包布甸，我地都食到好飽！原本好友買咗蛋糕，但係我地食得好飽，同埋切餅費要$200，所以淨係攞個蛋糕出嚟影相吹蠟燭，冇切到餅食！要好友將個蛋糕攞返屋企同屋企人食！