ARES bar & Restaurant

相約好友去天后食飯，去咗呢間酒吧餐廳，餐廳嘅佈置，有好多復仇者聯盟角色 figure ，又有Star war figure，都係一盒盒放在樓底上，亦都有得掟鏢，滿愛都有幾個位，可以坐出面食煙！不過對住馬路，都要食塵！

黃昏時間，冇乜人，只有一兩枱客，我地叫左D小食，有薯條、一口和牛粒、魷魚拼盤，薯條係用芝士焗，和牛粒就係鐵板上，魷魚拼盤係三種唔同嘅魷魚，有魷魚伴泰式醬汁，有螢光魷魚仔，同埋炸魷魚，除咗魷魚之外，其他食物味道都幾好，另外仲叫咗一個豬手，餐牌話要等45分鐘，我哋足足等左65分鐘先有得食，豬皮都幾硬，而且等左咁耐，豬手只係微微暖，一D都唔熱，唔知點解要整咁耐！夜晚見呢度都係得兩枱客，走咗一枱又入返一枱，都係保持住得兩枱客！呢度附近有好多食肆店，下次可以去呢度附近食下野！

彩福

相約家人開家庭會議，去咗佐敦食飯，第一次在沒有媽媽在場的情況下食飯，因為大家都要傾佢老人家嘅事，晚飯時間呢度唔係好多人，依家做緊龍蝦優惠，話每斤$88 ，每隻大約一斤多D，我地叫左兩隻龍蝦，又叫咗一個煲仔蠔、干煸四季豆同埋燒雞，食物嘅份量都頗大，我地都食得好飽，而且龍蝦有伊麵底，所以就更加飽！

總有位置比甜品，叫左兩款甜品，味道都唔錯！

3D 4DX 職業特攻隊 ： 叛逆之謎 Mission Impossible: Fallout

Ethan 接受任務前往尋找三個核武器，幕後主腦 John Lark 和一個叫做門徒的組織，計劃引爆三枚核彈，Ethan 要冒認 Lark 與綽號白色寡婦的人交易，同時亦要面對被懷疑，過程中險阻重重......!

已經唔知係去到第幾集嘅 MI ，男主角仍然係 Tom Cruise，聽講佢已經56歲，仍然有唔少動作氣份，套戲都幾好睇，今次揀咗4DX，有幾場戲都張凳都震動得好利害，有D坐唔穩！

秋月居

上星期身體不適，病了好幾天，有點感冒又肚瀉，非常疲累，捱左幾日先至好返D！

今晚又約咗好友食飯，去咗牛頭角食，我地七個人，呢間食店地方細細，大概只有十多張枱，呢度主要係食日式燒烤同埋日式食品，我地食住等，一路叫幾個串燒，一路傾計一路等，到人齊先至叫刺身拼盤，再叫埋羊架、雞翼、墨魚咀等等，雖然串燒嘅份量都唔係好多，不過慢慢食，食下食下就好快覺得飽！呢度食物都唔錯，價錢亦都算合理，我哋傾計傾開好友去完越南玩，消費好抵，聽落都幾吸引，即刻諗下同好又去返一個weekend 都好，因為好友好慳家，去旅行都要好慳住使，佢呢D低消費國家就啱佢喇！

東大門

睇完戲夜晚一齊去食飯，去咗旺角食韓式放題，呢間主要係食烤肉，同埋一D韓式食物，類似以前嘅漢陽苑，不過稍為好少少，呢兩日唔係幾舒服，所以只係食咗少少野，而且呢度有限時，所以唔係食咗好耐就走喇！

超人特工隊 2 Incredibles 2

由於超人未能合法化，所以超人家族只能暗中捉壞人，可惜他們常常被誤會只有破壞，但捉不到壞人，而他們亦面臨迫遷，幸好此時，得到 Deavor 的幫助，他希望能繼承父親的意願，幫助超人能夠合法，他的妹妹 Evelyn 亦是發明家，設計不少科技產品，他們為了協助超人合法化，選擇了超人太太，並為她包裝新形象，又上電視接受訪問，有直播他捉壞人的情況，超人先生就留在家中照顧小孩，漸漸超人太太覺得事情不大對勁.......!

相隔十多年才出第二集，已經忘記第一集係講乜嘢，今次睇中文版，戲入面嘅BB好可愛，好多大人小朋友都睇到好鍾意，覺得佢好搞笑！

Cafe Med

很久沒有去過鑽石山，今天約了好友看電影，先去吃個午餐，去了這家餐廳，位置頗為隱蔽，因為在商場的外面，獨立一家餐廳入口，沒有來過一定找不到，這餐廳在朗豪坊有分店，之前食過一次，都係一般餐廳咁樣啦！

正值午餐時間，比想像多人，我們四大一世，所以叫了四個午餐，主要都係意粉焗飯，味道一般，好多芝士醬之類的sauce ，所以都好飽，食完仲有好多時間，所以我地坐低傾下計，因為都有幾個月冇出來食飯喇，跟住又去左商場行一陣街先至入場睇戲！

鮮番茄意粉

今朝瞓醒有D唔舒服，周身骨痛作感冒！即刻冲杯感冒茶飲先！

約左師傅剪頭髮，出去尖沙咀食D野，又去山頭火食拉麵，食左幾啖冇胃口，唔想食，去到 salon 可以坐下休息，今日突然覺得個師傅老左好多 ！眼紋出晒來，面頰看來鬆弛了不少！佢今日好有興致傾計，一路坐係我身邊同我講嘢，不過我今日狀態唔係幾好，要撐住同佢傾計個人都好攰！不過佢講嘅話題我都有興趣聽，就係佢最近試咗皮秒去斑呢個療程，我知佢一向都有去打斑，佢都係話第一次去試呢個皮秒去斑，我之前睇過一D 介紹，都好有興趣，佢猛話個效果好，以佢打斑多年嘅經驗，佢都話好好，最重要佢係搵D試做價平，又唔 Hard sell 的美容院，佢都 send 左資料比我，我再睇下去唔去試！

剪完髮，回家之前去買材料整意粉，乘車回家時睡著了，感覺很疲累，回到家𥚃，先午睡休息一下，瞓左兩小時，當堂精神咗好多！而且覺得肚餓，就去煮意粉！呢個意粉食譜，係睇”意大利衣食住行- KK life in Italy ”個Facebook學嘅，煮緊意粉嘅時候，就用個鑊煎香左D蕃茄，然後先至加意粉同埋羅勒葉去炒，唔睇佢介紹都唔知，原來羅勒葉係唔可以用刀切嘅，因為佢遇到金屬會變黑，所以用手撕D葉出嚟！食譜要用巴馬臣芝士 parmigiano reggiano cheese ，但我唔記得買！所以爭左少少，而且意粉煮得乾身左D！味道係 ok 既！下次可以掌握得好D！

St. Barts

上次和同事食飯時，同事介紹了西環的一間餐廳，今日就去試下，店子在西環高街，由斜路行上去只係四個街口，不過呢四個街口都係在斜路上高，好彩今日唔係太熱，所以唔會行到身水身汗！

午餐時間，只有幾台客，餐牌除咗有午餐亦都有正常嘅餐牌，我地叫左一個午餐魚，同埋一個牛扒試左，牛扒叫左12安士 Prime USDA 西冷，午餐有跟沙律，主菜魚同牛扒都睇落唔錯，隻碟好大，伴菜都係薯蓉同埋菜，牛扒切開D肉幾淺色，有D似豬肉的顏色，味道都唔錯！這𥚃環境和食物不錯，下次可再來！