2017年2-3月東京六天之旅 Day 3 - 東京廸士尼海洋

今朝都係瞓晏咗少少，但係天氣預報話明天落雨，所以今日要去廸士尼，再去絆魚壽司食！再回味下大拖羅！

食完匆匆忙忙入園，入到去已經十點幾，在入口影下相，唔記得攞 fast pass ! 想起已經太遅，今日好多人，每條隊閒閒地都排110分鐘！攞唔到 fast pass ，去買野食先！去左食骨付雞肉腸，呢期 hot wine 係梨味，上次士多啤梨味好似藥水咁，所以都冇試，飲杯橙汁算喇！坐在旁邊食，呢度有D白鴿搵野食，係咁飛埋我D食物度，但係我食緊雞肉腸，白鴿應該唔會食同類吧！可能有人會比爆谷佢地食吧！

食完剛好有表演睇，睇完先繼續行！睇下同 Duffy 影相條隊又係超長！去shopping 先，今期仲係情人節主題，不過大部份商品已經賣晒，好少完全買唔到野！連商店入口果對大 Duffy 同 Shellie May 都冇左！冇左呢個重點影相位，在店門外加了一組装飾比人影相，我都排隊影下先！有專人影完叫你買果種，多數人都唔買，我呢D遊客，當然會買返張傚紀念！

行到去森林果邊，之前買左個吊飾，當時 Halloween 有黑色版，但係D字金色所以冇買，今期出左金色閃亮版，有D閃石幾靚，仲有 Duffy 吊牌，整返個先！要兩小時之後才有得攞！

行過去 Mermaid 果邊，記得呢度有嬰兒衫賣，好友的女兒剛滿月，想買件衫比佢，D衫仵件都 made in China，想買件日本做，見個枕頭仔日本做，背後有個圈，如果抱住BB果陣，可以穿在手臂，等BB瞓得舒服D，就買呢果，禮物包裝袋要¥300，都唔貴，又好睇！

買完野，原來都行左半日，有D肚餓了，原本想去 Portfolio ，但係諗起之前上過隻船度，上面有餐廳的，過去望下，見到船旁邊有間餐廳食 buffet 的，食唔得多就唔揀 buffet，上船前見到餐牌，原來呢度有兩間餐廳，一間在 Deck C，我地上次見到果間，係 Bar and lounge，仲有上一層，Deck B的 S.S Columbia 餐廳，是比較高級一點的，set lunch ¥3390-¥5000，當然有 A la carte ，既然今日買唔到野，就食好小小！入到去見唔多人，呢度D裝修比較華麗，雖然有點舊，坐位都好舒適，餐牌已經在入口睇左，原來想叫 set lunch ，但係唔想食甜品，都係散叫，叫左洋蔥湯、龍蝦尾帶子意粉，飮杯西柚汁，先來麵包，有兩款，一款軟包和一款麥包，每款要一個，呢度招呼好好，起碼英語能力好一點！食物質素好好，只是份量較少，意粉都係得少少，如果好肚餓就要叫多幾樣野食！行左成日，享受返一餐，心情都好D，人都冇咁攰

繼續行，又影下相，好快已經天黑，跟住去咗shopping ，買咗小小手信，而Duffy產品就真係買唔到喇！去攞埋之前訂咗果個吊飾，晒埋相，就早D走，因為想返去新宿買野同埋食野，所以早少少走！雖然買咗唔係好多野，都有一大袋，可能因為手信個盒太大吧！

坐京葉線出返去東京，再轉中央線去新宿，先去 My lord 食烤肉！上次同朋友食過兩次，覺得好好味，所以再去多次，呢間叫做 Gyubei 的烤肉店，真係冇乜人！上次去已經唔多人，今次更少人！得一、兩枱客！我叫左一碟牛肉、一碟牛舌、同埋一碟菜，仲有一杯橙汁，去日本好多時飲橙汁，因為佢地容易聽得明英文叫法，通常佢地聽得明Orange juice、Coca-Cola、coffee 呢D，叫杯水佢地返而聽唔明，所以叫橙汁係最容易！牛肉我唔記得咗係叫咗乜嘢牛肉，佢係厚切的，好好味！牛舌有兩種，一種普通牛舌，另一種係厚切dry aged牛舌，睇個樣都好大分別，厚切果個真係好味好多！包住菜食好好味，D菜都好新鮮！走果陣見到隔離間食店係做放題，雖然食物係意粉、薄餅、甜品之類，但係價錢只需要¥1499！都真係好平，可能咁樣俾佢搶晒D生意！

食完野去買野！今次發覺新宿好多商店夜左關門，我去藥妝店見到收成11點！除咗大國藥妝店，其他真係好少收咁夜！今次去呢間 Aniz Tulpe 藥妝店，都好多野買，其實之前有來過，因為佢哋係面果層，租左比好多大牌子counter，我地以為賣D大路野，所以冇乜點睇就走左，今次發現原來有三層，逐層睇，原來都好多野賣，見到上次我同朋友買咗一款粉底，牌子叫做江原道，呢個地方名明明係韓國嘅，但係呢個化妝品係日本出產！質地都唔錯，上次買左 make up base 覺得好用，去 Tokyu hands 專櫃買唔到，今次可以在呢度補貨喇！買完差不多11點喇！返酒店之前，去咗便利店買薯片食！

2017年2-3月東京六天之旅 Day 2 - 新宿、人形町、銀座有樂町

尋晚瞓到成身汗，好熱！因為有暖氣，未住過一間酒店D暖氣咁勁！不過都好好瞓！所以瞓到成十點先起身！原本今日想去廸士尼，唯有改明天！

一出去，好凍呀！頭先在房內係夏天咁熱，出到來好似得幾度！近近地去哥斯拉對面的絆魚壽司，最鐘意佢地D大拖羅，當然要叫兩件，另外又叫左螺、赤貝、蟹柳、裙邊、牡丹蝦，正！食左七件，梗係要加，加左大拖羅、螺同埋海膽軍艦，好味道！

食完野先在新宿行一陣，睇下D藥妝店，我覺得大阪D藥妝店多野睇D，新宿呢度大部分係大國藥妝店，其他小店都好細間，同埋買D大路野，有D想買既野，唔係咁齊，同埋夜晚去，好多野賣晒未補貨，早上去又唔方便攞住，攞返酒店又好花時間！今朝買左小小野，夠¥5000可以退稅，又細件可以袋住！跟住去高島屋，見LC賣緊 TNS 26cm 煎 pan 送個夾，不過我已經在 outlet 買左隻30cm 鑊，仲平過佢！冇野睇啱就走！

下一站去人形町，可以搭 Metro 的日比谷線，或者都營的淺草綫，選擇了後者，因為去都營大江戶線果邊有電器舖同地下街，雖然唔多野睇，不過都去行下，果度有間 Cococa賣手機殼的，D款都幾靚，不過都係睇唔啱！睇完去搭車了！

坐都營大江戶線去到大門站轉淺草線，直接去到人形町站，因為未去過，又冇特別搵過資料，隨便一個出口，見地鐵站地圖，A5-6出來囗有D食店，就去呢度出，出到去見呢度係住宅區，有小小似田原町，比較靜一D，人亦比較少，見有條街馬路兩旁都有D旗，應該呢條街比較旺D，行入去見到有鯛魚燒店，旁邊有家賣生雞肉和雞串燒的，叫做鳥近，見到佢地入面有個爐，即燒即賣，見到有雞肝串，好想食，買左一串，佢地會燒返暖先入袋，個紙袋仲封晒口，另外比包汁你，我一路行一路食，好好味！要處理垃圾就麻煩D，日本唔係周圍都有垃圾筒，只有兩個地方有，廁所同便利店，行過一個街囗，見到有7-11，當然要放低垃圾！繼續行，見呢條街仲有幾間鯛魚燒同人形燒，又有炸物，類似炸魚餅、炸牛肉餅果類，其他食店都有D，而呢度有條橫街叫甘酒橫丁，呢條街有間賣酒的店，好多日本酒，亦有D飲酒的地方，仲有賣酒的自動販賣機，第一次見成支 sake 可以在自動販賣機買到，當然要 scan 日本身份證，條街唔係好熱鬧，可能要晚上先至熱鬧吧！

今次原本想去一間叫做玉ひで的店食親子丼，但係過左 lunch time ，落左場！咁就無緣啦！我諗呢間野在當地都算出名，地鐵同街上都有指示，去到門口都見有人影相！

食唔到親子丼，撘車去銀座，坐都營日比谷線，五個站就到，仲經過築地添！銀座呢個地方，好耐冇去過，只記得有幾間百貨公司，一出地鐵就見三越同伊勢丹，但竟然休業一星期，要明天才開！！唯有行下其他地方，呢度頗多名店，感覺比新宿還多，四圍行下，見有百貨公司同商場，又去行下，見到有座大廈頂部是圓形的，有D似旋轉餐廳，上去望下，其實得十幾樓，果然係餐廳，餐牌價錢都幾貴，所以冇去試！反而在地面那層的商店內，吃了個甜品！因為室內暖氣太熱了，要食杯雪糕先！其實見呢度有間北海道專門店，有軟雪糕賣，不過冇得坐，所以去左呢間叫做ふるさと茶屋的店，食完雪糕，去 Bic camera 幫朋友買直髮夾，在手機果層睇野，見呢度D true wireless 好多款，有D仲幾細粒添！跟住在特價車仔中，驚見有 walkman 同 discman ! ! ! D包裝好新淨，好似新出產品咁！可能好多人仲有卡式帶同 CD，其實CD仲有得賣，應該有需求。跟住行左去一個小商場，有間 Lindt 專門店，有好多種口味選擇，上次去法國都見到有，呢度係計重量，膠袋分兩種，一種普通透明，另一種有心心圖案，送禮用，要比錢的，我每款買一粒，可以試多幾種味！ 

跟住去左 Tokyu hands 幫朋友搵皮具清潔液，順便買埋我自己要買果支make up base，買完野，返新宿食D野，在車站行去歌舞技町條路上，有間叫做三國一的店，主要食蕎麥麵同烏冬，十點入去食，佢地收十一點，叫左個 sukiyaki 烏冬，幾好味，呢間店有三層，一路見好多人走，亦有唔少人入，去到十點半仍然有人想食，但店員告知要關門了，我地返酒店休息了！