南港島線

南港島綫前日通車，原本想前日去撘，但係病左，在家嘔了一天，昨天稍為清醒去左睇戲，今日好D，先去一轉香港仔先！

坐巴士入香港仔，食個晏先，仍然冇乜胃口，去左一間叫做 "Soup plus 湯加"的店，顧名思義就係有湯飲，有湯飯食，見有下午茶餐，啱晒啦，叫咗個兩餸湯飯，魚柳同埋豬軟骨，飯就叫左藜麥飯，細細訓夠食喇！食完飯坐巴士入海怡半島，經過 Prada outlet ，見到大排長龍，應該地鐵幫到佢地容易搵左！我由海怡半島站搭去金鐘，原本想去車頭睇下，但係好多人迫晒去車頭，唯有去其他卡，車行得好快，只需要15分鐘左右就去到金鐘，金鐘而家變咗超級轉車站，南港島線就係L6，上返地面就可以L1，將來仲有沙中線會經過呢度呢！比起以前坐巴士真係快好多，起碼唔使在香港仔隧道塞車，不過如果要去中環，非繁忙時間，我都會搭巴士，因為一直坐到尾唔使轉車，遇上繁忙時間，就點都會搭地鐵喇！

3D 4DX 長城 Great Wall

William 和 Pero 和幾個人遠赴中國尋找火藥，中途被契丹人搶掠，又遇到怪獸襲擊，兩人走到長城下，被中國軍隊帶走，他們目睹軍隊作戰，而攻擊他們的並不是敵軍，而是一種叫做饕餮的怪獸，在危急關頭， William 和 Pero 出手相助，經過一輪戰鬥，饕餮撤退，軍隊亦死傷無數，他們亦要部署下一輪戰略，同時他們發現 William 有能力協助他們，但 Pero 一心想帶火藥偷走，William 卻希望幫助中國人打饕餮，但饕餮變得聰明，還會攻其不備.....!

睇呢套戲，因為張藝謀，因為麥廸文，因為劉德華，長城在CG下要幾宏偉得幾宏偉，大量臨時演員之下，千軍萬馬的場面，要幾氣勢磅礡得幾氣勢磅礡，令人想起當年北京奧運開幕的演出，女主角戲份很重，戲中只有她和劉德華會講英文，所以戲份也是他們較重，差點睇漏眼的彭于晏，也不及鹿晗搶鏡，雖然在長城打怪獸有點匪夷所思的題材，不過套戲應該迎合到外國人口味吧！

麺楽 Menraku

在北角艇街，這條短短的橫街，有一家拉麵店，每次經過都想試下，今日就去試下！

店子看來很日本，餐牌在門外已經 show 晒出來，主要都係拉麵，同一D小食，店裡面坐位也不多，假期也沒有滿坐，叫了旭川醬油拉麵，和一客餃子，先來餃子，應該是一早煎定，因為不熱，裡面不算 juicy，有小小汁，味道不過不是失，拉麵的味道有點北海道的味道，還算ok，令我想起上次在札幌吃的拉麵，真想去北海道呢！

Passion by Gerard Dubois

一早去太古城做野，很久沒有來了，一早食個早餐先，之前的 food court 裝修了，有兩間 Passion by Gerard Dubois，裝修很漂亮，有假火爐，麵包、蛋糕都很漂亮呢！叫了一個蘋果酥盒，和一杯薑蜜，坐在一旁，見有店主的著作做裝飾，很吸引，這個蘋果酥盒好好味，下次有機會試下其他！

飯局主場 - 第八回

約了好友平安夜食飯，原本想去食自助餐，不過諗落呢啲日子價錢又貴，好友都係建議去我屋企開餐！

中午先去街市買牛肉，買開果檔肉檔排晒隊，個個都買牛肉打邊爐，我買咗牛頸脊，貪佢肉質夠淋，又係手切牛肉，老闆又好好人，本來叫佢揀瘦D，切左幾片又覺得太瘦，改要肥少少，佢都OK，切過第二舊！買完牛肉，買蕃茄、薯仔、粟米做湯底，不過買唔到薯仔，淨係買咗蕃茄同粟米，等今晚買海鮮先至買薯仔啦！

同好友睇完刺客教條，去旺角街市買餸，今晚打邊爐，但係人太少，得兩個人，買唔到咁多野，行咗幾多海鮮檔，買咗蝦、蜆、象仔蚌，買咗少少丸類、墨魚滑、蝦滑、買埋豆苗同烏冬就番去喇！

返到屋企先煲落湯底，最終冇買到薯仔，淨係番茄同粟米做湯底，都已經好甜，洗完一輪野之後，就開餐啦！開咗支八年梅酒飲，睇情況應該食唔晒D野，所以先食晒D唔留得既海鮮同牛肉，在家打邊爐，買新鮮嘅食材，係零舍好味D！食淨左丸類同埋蝦滑、墨魚滑，仲有D菜，烏冬冇郁過，因為太飽了！生果都食唔落，坐陣睇下電視傾下計，好友帶左幾條水晶手鍊來，要放紫晶洞淨化，又放白晶床充充電！坐左陣冇咁飽，就食水果雪條當甜品！今晚大滿足！好開心！

刺客教條 Assassin's Greed

1492 年西班牙，刺客聯盟為了保護伊甸蘋果，甘願犧牲任何人的性命......1986 年，年幼的 Callum，目睹母親被父親所殺，逃離家園........2016 年，在遊戲獄中的  Callum，被送到刑場，他因殺人罪被處死刑.......Callum 醒來，身處一個基地，Callum 得知自己是刺客聯盟的後裔，利用他的基因，使他重返500年前的西班牙，尋找伊甸蘋果的下落........!

套戲改編自一個遊戲 game ，成套戲打鬥場面好似打緊 game咁，冇乜劇情可言，浪費了男女主角的演技！睇到我地兩個幾乎瞓著！

Kokoro sushi 鮨、心

聖誕前呢兩日出街好多人，相約好友食晚飯，之前在電視睇到介紹一間居酒屋，在旺角的金鑽璽，雖然在彌敦道，但係近旺角道呢邊比較靜，而且大廈地面沒有任何招牌，入到電梯才有店名，上去2/F 的樂居酒屋，店內空冇一人，店員説他們只做 omakase ，主要是一些佐酒食品，沒有魚生、刺身，我接了好友再上去，再上到去，連店員也沒有了，我們坐低等了一陣，再問店員今日的 omakase 有甚麼，因為不感興趣，店員推介落一層的鮨、心，是同一公司，分開食不同食物，落去睇下，見全店滿座，幾乎沒有位，同樓上差天共地！我們坐在近門口的 bar 枱，店員拿餐牌介紹，這裡有三款omakase ，亦有散叫壽司刺身等，又介紹壽司師傅給我們認識，我們叫了一份omakase，加一碟銀鱈魚西京燒，和一支梅酒，梅酒係超市幾十元貨色，不過個凍酒器皿幾靚，酒杯有十二款比我地揀，我地揀左兩款綠色的，飲住酒等食！

先來前菜，有成五款咁多，店員有介紹食物，不過講完我哋又即刻唔記得咗係啲乜嘢嚟，總之就好精緻，好味道，刺身有螺片、鮑魚、白子等，仲有兩款熱食，有海膽三文魚子蒸飯，同天婦羅，跟住係壽司，有綢魚、剝皮魚、海膽，然後有個湯同埋甜品，食物質素都好好，而且都係比較少見既魚，服務又好好，雖然價錢略高，但都值得一試！

IVY

幫人買左個電話，又約出來食飯交收，原本想去中環碼頭食，但係 full 左，臨近聖誕，周圍都好多人，加上 lunch time，冇位都唔出奇，轉左去 IFC睇睇有冇位，呢個鐘數，較為平價嘅食肆都 full晒，去貴D呢間 IVY，果然有位，呢間餐廳，前身係 St Betty ，來過兩次，今天再來，已經轉左名！

睇睇午餐餐牌，頭盤有六款，主菜有七款選擇，頭盤我們選了黑松露有機溫泉蛋，同忌廉磨菇湯，每枱都有一袋麵包，無錯係一袋，因為用紙袋裝住，入面有三個麵包，好好味呢！主菜選了羊腿，和白松露意大利寛條麵，餐牌註明有3g 白松露，店員拿了一舊白松露和一個細小的磅，先磅手上的白松露，然後刨了好幾片出來，再磅一磅，剛剛好少了3g，還是第一次吃即刨的白松露，好香的味道，入口味道不錯，一口松露香，維持了好一陣時間呢！甜品要了 creme brûlée 和砵酒焗梨，甜品失色了一點，可能已被白松露搶了風頭！今餐又係癡餐的呢！ (^_^*)