3D 怪獸與牠們的產地 Fantastic Beasts and where to find them

近日忙到不得了，放假都好多野做，都唔得閒睇戲，今晚終於抽到時間去睇戲！

故事講述英國魔法師 Newt 來到美國，他攜帶的皮箱，裝了一些怪獸，因其中一隻走了出來，他在追逐牠時，走進了銀行，認識了麻瓜 Jacob Kowalski   ，並誤闖銀行金庫，離開時被美國當地魔法師Goldstein 逮捕，此時，當地出現了奇異的事情，人們議論紛紛，魔法師們擔心他們的身份會被發現，他們亦懷疑是 Newt 帶來的怪獸所為.......！

因為 Harry Potter 系列，所以先至去睇，雖然都好唔同 Harry Potter 形式，不過都好有伏線，男主角總是會則則地面，好似演完霍金之後就係咁？Johnny Depp 正常樣出場，差D唔認得佢！

殿 極尚大喜屋

今日去完迪士尼，晚餐同上次一樣去大喜屋食放題，今次去殿 極尚大喜屋，好友去過，大讚係最好的日式放題，一於去試下！

一入門口，見到個裝修同間格都比一般放題店好好多，地方又光猛又寬敞，今天晚唔滿坐，我地坐卡位，幾舒服！呢度食物同其他大喜屋差不多，仲多左泰式生蝦，不過個泰式辣汁麻麻地，所以只係食左一碟，另外仲有即做海膽手卷，海膽唔會得少少，都有成條海膽，紫菜又脆，不過限時供應，唔係任剔，要自己出去攞，我地每人都食咗兩份！飲品方面，選擇多咗好多，最好係有sake，有凍有熱，係上次在大阪飲到的松竹梅！正呀！我哋當然飲架啦！呢度仲有紅白餐酒，不過當然係平價貨！仲有自選水果同甜品！呢度每位$318，真係好ok!

今晚見到有兩個女仔，叫左成枱食物，份量好多，壽司有十幾件，焗蟹蓋都四個，仲有好多其他食物，佢地係咁影相，我地以為佢地係大胃王，但係兩小時後，到 last order 埋單，佢地D食物都冇郁過，唔通佢地只係為左影相？？好浪費！

迪士尼雪亮聖誕 「聖誕心願．與你高飛」Make a wish with Santa Goofy

相約好友一同去迪士尼，先去食D嘢，去咗九龍城黃明記食麵，食完野去太子站坐地鐵去迪士尼！

入到去見聖誕裝飾同往年分別唔大，例如聖誕樹仍然係果一顆，燈柱嘅裝飾仍然係米奇頭，今年店內商品唔算好吸引，總覺得不及日本迪士尼靚！Duffy 聖誕衫都吸引唔到我！我地行左一陣，就睇巡遊，睇完去故事劇場，好友第一次睇，都覺得新不如舊，可能故事人物較冷門，D歌好多唔識，又冇左完结前大合唱，氣氛差少少，睇完劇，好友去玩飛越太空山，我等佢地，見 Ironman 商店已經開左，就入去睇睇，商品比較小朋友，唔多啱心水，間 shop 好細，都有個 area 比小朋友玩互動遊戲！

行一陣等好友出來，跟住去玩巴斯光年，發覺有D手掣壊左，可能日後擴建會拆，都費事維修吧！跟住去食野，食完雞翼餐，已經要準備去睇巡遊，我哋坐緊城堡嗰邊，因為睇完巡遊就準備睇煙花，咁可以坐得近D！睇巡遊果陣開始有少少落雨，有少少混亂，有D人開咗遮又企左起身，遮住咗巡遊隊伍，差D要嗌交！好彩只係落咗小小微雨，好快就停咗，睇煙花都要等成半個鐘，不過已經好多次都冇睇，所以今次一定要睇，城堡上嘅投影畫面改善咗，影像清晰咗好多，而且內容都改咗，有返新鮮感，而煙花同以往一樣咁靚，個個都睇到嘩嘩聲!

臨走去左新的高飛郵筒，可以免費寄 postcard ，我地各自寄張比自己！

馬鞍山開蠔 - 第二回

約咗一班好友去馬鞍山朋友屋企食飯，對上一次已經係年幾兩年前既事喇！今次因為好友的太太懷孕了，為免佢走來走去，所以我地成班去佢屋企食！

今日因為晏左少少，所以好友已經預備好晒所有食物啦，上次早D上去，仲係洗緊野，今次可以食得啦，一去到好友開咗支白酒，大家一齊飲，又幾好味喎，其中一個朋友又帶咗支紅酒來，陣間先至飲！

一埋位先食生蠔，朋友選左兩款法國生蠔，好好味，海水味唔會太重，亦唔太 creamy，好啱我地食，另外仲有即食熟鮑魚，食完生蠔、鮑魚，就食無水煮海鮮，有蝦、蟹、蜆，同埋娃娃菜、蘿蔔墊底，煮出來D菜都好鮮甜，有我最鍾意食嘅蟹，我當然唔客氣啦！食完D海鮮，加水打邊爐，佢哋買咗牛肉、黑豚肉、蟶子、墨魚滑、筒蠔、脆肉骨腩、金菇、皇帝菜、豆苗，都好豐富，個個都食到好飽，我地成晚雞啄唔斷，成晚無停過傾計，可以話絕無冷場，因為太耐無一齊食飯喇，近排見面都少咗好多，好多時淨係見到其中一兩個，咁齊人就好少機會，大家約好，以後每年最少都要聚一次呀！

滝

去完旅行，幫人買左野，出來食飯兼交收！

去左銅鑼灣食日本野，呢間壽司店要上樓，價錢都唔平，叫咗個午市 omakase ，師傅逐件壽司做，一件一件上，每款刺身/壽司都會話比你聽係乜野，一個師傅一講完轉頭就唔記得，總之好食就得，我哋叫咗sake 飲，始終食魚生，有D酒可以消消毒！呢度質素都好高，服務都好好，所以價錢都貴，有要人請都有D唔好意思呢！