2016年4月開心東灜遊 - Day 3 東京迪士尼樂園、秋葉原

今日早餐決定去樂園嗰邊食，尋日買左兩日門票，今日再去迪士尼樂園果邊，一早行出酒店，見到對面街有少少櫻花，當然要過去影吓相啦！雖然櫻花唔算濃密，不過都叫做係有櫻花睇啦！

照舊搭火車去舞濱站，到咗站，好多食肆都未開，我地先去影 Duffy 火車，買咗復活節期間限定車飛之後，去搭火車！火車同上次搭一樣，車廂分開三個主題，Duffy、Shellie May 同 Gelatoni ，同上次策略一樣，就係坐一round車，我地買咗一日票，全日可以無限次任搭，我也要等到人地落咗車，先至可以冇乜人的車廂，每個站影一卡，搭完一轉火車去返舞站的商場.

到左火車站先去搵嘢食，呢個商場本身都幾多食店，但係好多都未開！我哋搵到一間叫做烤肉 トラジ的烤肉店，都係剛剛開門，入到去見到係放題形式，覺得有D中伏，不過，唔想搵喇，就試下佢！食物OK啦！唔算差又唔算好，一般一般！

食完野入園喇！今日係星期六好多人啊！多得好誇張呢！可能我哋平時係閒日來，今日假期，所以覺得好多人！平時我自己好少來呢邊，多數去Sea 果邊，一入園，見到王子公主同人影相，我地在旁邊影下就算，呢邊D裝飾仲係好濃厚復活節氣氛，賣的東西也是復活節主題，例如兔仔、蛋，我地在商店行咗一陣覺得好迫人，轉去玩機動遊戲先，因為精品冇Duffy，其他冇乜興趣！出到去剛剛有巡遊，不過又多人又曬，我地都堅持睇到尾，睇完先去搵機動遊戲玩，去到D機動遊戲，每一個遊戲區都要排1小時以上！！可能太多人喇！搞到我地無晒mood！變咗唔係太想玩機動遊戲，走咗去城堡嗰邊影吓相先，影完相行咗一陣都覺得冇乜好玩，玩到三點幾，決定離開！改咗去秋葉原！

去到秋葉原已經四點幾，一出地鐵見到有芝士撻賣，係大阪好出名嗰隻 Pablo ，我地買一個試試，好似冇大阪本店咁好食！跟住去行商店，兩位好友對日本動漫 figure 好有興趣，我自己就冇乜興趣，不過都同佢地一齊去睇下啦！行咗好多間佢地都睇唔啱！

跟住去搵食，在秋葉原睇左幾間都唔啱，去返新宿搵食，去到新宿 MyLord 見到有烤肉店，就即管上去試下，店名烤肉Gyubei，我地叫咗三個套餐再加幾款唔同的牛肉，另外又叫咗梅酒飲，呢間D肉味道good！可以考慮 encore！食完例牌去便利店行，見到有八年梅酒賣細細支咁，頭先飲開梅酒又想繼續飲，所以就買支返去試下！返到酒店，又去好友房間傾計飲酒，今日全日食食食飲飲飲！^_^

2016年4月開心東灜遊 - Day 2 一蘭拉麵、東京迪士尼海洋、歌舞伎町

一早七點幾起身，先去食嘢，我哋去咗一蘭食拉麵，去到都幾多人，不過剛剛好有幾個位，我哋一人叫咗一碗拉麵，坐坐下越來越多人，食完都要快走喇！

食完野去迪士尼喇！搭中央線去東京站，再轉乘京葉線去舞浜，我哋打算去兩日，今日先去海洋呢邊！上次同好友來，已經係三年前，迪士尼樂園30周年的時候，今年已經33周年，而迪士尼海洋就15周年喇！

一入園我哋在入口狂影相，因為多咗15周年嗰隻船，好靚呀！不過我哋想起要去攞fastpass，立即走去胡迪個口，fastpass 最快都要晚上七點幾! 差D攞唔到！摸完fastpass先去返入口商店行街影相，然後行去Duffy 嗰邊，去到隻船美國海濱嗰邊，原本佢哋想玩鬼屋，但係又驚，所以冇玩，我哋坐低食小食，呢間小食主要賣雞骨腸，條腸有支骨頭，又有啤酒賣，平時呢間好多人幫襯，我都係第一次食，又幾好味喎！

食完行去特別專門店，有影左一輪相，跟住去發現港嗰邊搵機動遊戲玩，原本想玩 Aquatopia 但係條人龍太長，轉左去玩風暴騎士 StormRider，都係第一次玩呢個game，裡面模仿坐潛艇，有啲驚濤駭浪效果，都幾好玩！跟住去失落河三角洲，我哋玩咗 Indiana Jones 冒險旅程水晶骷髏頭魔宮，我又係第一次玩，雖然來過好多次，有啲機動遊戲都冇玩過，呢個都幾好玩有少少驚，跟住好友去咗玩360度過山車，我在出面等。

玩完一輪就去美人魚礁湖食啲嘢，一路行下買下野，跟住過去神秘島，原本想玩海底兩萬哩，不過好多人，又放棄左，今日玩嘅機動遊戲都唔係太多，主要都係唔使點排隊嗰D，然後我哋都係去shopping，行到七點幾去玩胡迪個口，玩埋就最後衝刺shopping，然後出返去，明天再玩過！

2016年4月開心東灜遊 - Day 1 新宿

今次一行三人，去東京玩五日，因為正值櫻花季節，酒店較緊張，我地攪左幾轉先定到酒店，因為三個人，有D酒店冇三人房，一間雙人一間單人又冇單人房，最後選了價錢較平，又有兩間房的華盛頓酒店，雖然有機場巴士去到酒店門口，但係朋友搭唔到巴士，要撘火車，要行十分鐘！

我地搭國泰航空零晨機，我上網揀位時，冇三個相連坐位，到 confirm 時，忽然變了三個相連位！仲係最前果行，前面可以申腳！去到機場印登機證，才肯定是那三個位！因為朋友比較高，佢地會坐得舒服D！

我地坐1:00am 機，11:00約好在機場等，我早左到，又肚餓，所以去左翡翠食左碗麵先，會合左佢地之後，寄左行李就過關，因為成12:00，已經冇野行，我地去28號閘，好近，吹吹水，影下相，好快可以登機喇！

四小時機程，派左份凍冰冰麵包，冇食到就瞓，瞓左兩、三個鐘左右，到埗後，去買火車票，尚有半小時，在機場 hea一陣，再買飲品就上火車，開車冇耐就瞓左，一小時車程就到新宿，到埗後落雨！我地行地下街，去到酒店附近上返路面，行多一段路就到！ check in 左之後就出去！先去便利店買左兩把雨傘，就去築地喇！

去到築地，見到好多嘢食，先食咗燒玉子，見到有燒扇貝同埋生蠔，不過冇買來食，因為諗住去食壽司丼，去我上次去嗰間鮨國，去到要等位，不過好快就有位，我哋坐吧枱，叫咗三碗丼，一般係海膽，一碗係拖羅，一碗係海膽＋拖羅＋三文魚籽，另外叫咗酒煮花甲，好好味呢！食完仲喺附近行咗一陣街，然後搭車返新宿。

返到新宿我哋去行街，去咗高島屋，逐層樓行下，好友在男裝部買咗一件褸，我哋去 Tokyu Hand 行左好耐，行到天黑，去高島屋地庫買嘢食，買咗刺身、水果攞返酒店食，返酒店途中去便利店行，經過一間賣酒的店，買咗支冰酒！

返到酒店，各自先返房放低野，然後我去朋友房間搵佢哋，但係呢間酒店嘅設計，電梯係用房咭拍卡去邊層，換句話講只能夠去到你住果層，去唔到其他樓層，因為朋友要食煙，吸煙房同非吸煙房係唔同層數，所以我哋住唔同嘅層數，我要去搵佢哋，就要在大堂等佢哋來接我，然後一齊上佢哋嗰層！

去到佢哋房，我哋攞支冰酒出來飲，又攞今日在高島屋買的水果出來吃，酒店每層樓都有自助冰機，我哋因為唔肯定，所以都買咗一杯冰，見到有冰機，下次可以唔使買冰！我哋食嘢飲酒傾吓計，傾左一陣就返房休息，始終尋晚凌晨機，大家都攰啦！明天繼續！