二月東京遊 Day 4 - 東京迪士尼海洋

瞓醒覺，先去食！今朝再去築地！茶葉店又冇開！諗住去上次果間鮨國，點知又冇開！見好多店冇開，先想起今日星期三！好多店星期三係定休日！唯有隨便搵間巷仔店食，呢類巷仔店質素較一般，勝在價錢平，也算新鮮，較受遊客歡迎，食完野，去築地站撘 Metro，一個站去八丁崛轉車去迪士尼，好快就到！

今次主要去撘期間限定的 Duffy 列車！去到樂園門口，去一去Disney store 就入場喇！先買期間限定車票，車站內有巨型 Duffy 比人影相，上到月台，等到 Duffy 列車到站先影車外，入到車廂內又狂影一輪，為左影三個不同的車卡，要坐多一轉，D人去到樂園站落車，我就可以影到冇人，自己影完有人上車，我就讓開比人影！影完相要入場喇，一入場，先去取胡迪 fast pass，但係今日又遲左，十一點已經派完fast pass ，唯有晏D睇睇排幾耐啦！

依家樂園仲賣緊情人節的商品，同場特定影相位，我當然要去影，果D特定影相位佈置得好靚，有個位幾隱閉，有攝影師替人拍照，我也影了！影完相去旁邊坐貢多拉，出去吹吹風，回來再去 shopping ，今期情人節主題產品都好 sweet，例牌有D煮食用品，主要係做甜品的工具，正好買些餐具，睇定邊D啱，走先買！跟住去 Duffy 果邊，在鬼屋前見到有得排隊影 Shellie May 我又去排，在公園排隊可以坐石櫈，但係張櫈好冰凍，明明有人坐緊，都係好冰凍，今次同 Shellie May 影相好開心！呢部分的公園亦加了些長椅，還有cup cake 賣，我買左一個，因為鐘意隻心型碟！

食完 cup cake 去 Mermaid 果邊，呢邊D遊戲較適合小朋友，在裡面的鯨魚商店，就如置身鯨魚體內，今天才發現鯨魚的眼睛是會郁的！原本想玩地心探險，但好多人，所以冇玩，出返去入口果邊食野，去我最喜歡的 Portofino 餐廳食野，食完去 shopping 喇！有些東西最後還是沒有買，因為擔心大重了！買完野睇左夜間海上表演同埋煙花就走喇！

出返新宿，去左華盛頓酒店的居酒屋食野，食完返酒店休息，明天走喇！時間過得好快！

二月東京遊 Day 3 - 築地、麻布十番、六本木、豊島園

平時去東京，新宿都係住宿地方，附近都是一早一晚才會在附近行，在高島屋附近的JR新南口，上面的建築已完工，出口附近亦有預備開業的商店，先去高島屋頂屋食野，選了一家食鰻魚的店ふきぬき，食完野在高島屋行一陣，然後在新宿行街，今日冇乜收獲，轉去築地買茶葉！

去到築地原本想買茶葉的店也沒有開，今次來築地，發覺多了一些即食的小食，例如燒元貝、生蠔、串燒，可能當地人發覺此門生意有利可圖，的確，以我們這些遊客來說，都喜歡"掃街"，而且喜歡多選擇，見之前賣蟹的店，都加左即食蟹腳，仲有位坐添！

去完築地，轉去麻布十番，呢個地方偶然會聽到，印象有溫泉，應該話係浴場，想去睇睇有冇乜野特別，去到見到呢度係住宅區，冇商場或特別的店，亦唔見有溫泉，所以行左一陣就走！轉去六本木！

上次去六本木睇過聖誕燈飾，覺得地方好大，有好多藝術品，所以上次只去了Midtown ，今次去 Hills，仍然係好大地方，上次在商場內，覺得地方好新凈，今次行出街，覺得地方頗舊，有好多地鐵出口，覺得有D亂，最後都係行返去商場，唔知係咪我唔熟路，覺得冇乜野行，去地標影埋張相，就在商場搵食，見到有一家西餐廳 Hills Dal-Matto，見有山形牛，即管試試，叫了山形牛扒和飲品，牛扒跟左一個包同埋菜，個包好好味呀！！牛扒冇想像中咁好味，不過質素都係好！

食完野行多一陣就走，今日全日都冇睇啱野，今日都係不宜 shopping，天都黑喇，去豐島園浸溫泉吧！今日庭之湯都幾多人，因為又有優惠，平左小小，佢唔做特價果陣，每個池真係得兩、三個人，今日個個池都有六、七人，四個有水力按摩的位都 full 左！

浸完溫泉返酒店休息前，去左磯丸水產食野，叫左蟹蓋、魚生、貝類水產、雞翼，食完就返酒店瞓，明天去迪士尼！！

二月東京遊 Day 2 - 田原町、Skytree

今朝瞓醒已經九點幾，原本想在新宿地下街食早餐，不過冇乜啱食，都係出去食！


今日去田原町既かっぱ橋道具街（合羽橋道具街），呢條街係賣餐具的，之前未去過，位置在淺草的雷門附近，淺草站前一個站，在新宿有幾條線可以轉車搭Metro 銀座綫過去，揀左撘JR山手線去上野轉車，由上野站轉銀座線，搭兩三個站就係田原町站，一落車已經見到有廣告燈箱，但係冇講邊個出口出，見車頭係1、2、3號出口，而車尾係エレべーターロ升降機出口，揀左3號出口出去，上樓梯前有個地圖，地圖指示沿住郵便局直行，四個街口就到，一出站轉左U turn，前小小街口係郵便局，唔使過馬路，沿郵便局行，過左第一個街口，見到頭先車尾個升降機出口，原來車尾出近D！行到第四個街口，有間賣賣日本瓷器的店，叫和の器田窯，旁邊馬路果座大廈頂，有個巨型廚師頭，一定係呢度！呢條街都幾長，成條街係賣餐飮業用品，好似上海街咁，所有食店用品都有賣，刀叉碗筷、煲、餐牌、食物模型、制服，大型機器、甚至傢俬都有，兩邊馬路都有好多店，先行左一邊先！先行田窯呢邊，行前小小有間賣西餐用品的店，有代理法國 deBuyer呢個牌子，見到一個24cm冇蓋、巴黎鐵塔手柄的不銹鋼煎鍋，之前在上海街見到賣$1380，呢度二萬一千幾 yen 約港幣$1500多D，唯一係多左個巴黎鐵塔鎖鑰扣！又見到一D在香港都見到的牌子，多數平過香港，沿途每間 shop 都望望，部份貨品大同小異，亦有一D自家貨品，有一間賣餐具的店，D碗碟好有歐陸風味，都幾靚！行左兩個街口，先至見到橫街有一間食店，先去醫肚！

小店叫做菊丸甘味茶屋，見到主要食甜品，不過都有三款飯，入到去，冇客，只有我包場！叫左個漢堡扒飯，飯既份量頗多，味道一般，跟餐有甜品雪糕，食完繼續行！

行左幾間店，見有一間店的門面有點歐陸風格，店內頗多人，有兩層，主要賣碗碟，好靚，有D好大隻，我不能買太多易碎的東西了，真係好鐘意先慮，因為昨天在 outlet 已買了些，行李過重了！行完一圈才決定吧！行到一條橫街見到一家叫鍋之博覽館的店，見到一些好靚的不銹鋼煲和有圖案的煎pan，又有大大小小不同的鍋，真的很多選擇！在另一條橫街，見到一家賣刀的小店，店外擺放了一些陶瓷刀，大概是做遊客生意吧！店內有很多日本刀，好多切魚生的刀，回頭再決定買不買一把陶瓷刀吧！

行多幾個街口，差不多到街尾，過對面行返轉頭，呢邊商店較多賣商店用品，例如掛門口的燈籠、餐牌架、大型食物處理器等等，行行見到一間賣刀的，叫釜淺商店，店面較大，人客也多，有些家用的刀，分系列放在轉架上，見有幾個人都揀緊，店員會攞幾把同類的刀放在 counter讓人比較，我見到一把刀，刀身略厚重，感覺硬淨，刀上有 Misono Handmade 字，問店員是否一般切肉OK？店員轉介了說英文的女士幫我，她説先揀刀型，再介紹幾款給我，在我看來，刀型都是一樣的，所以揀了那把厚重的，她隨後揀了幾款給我選擇，她介紹了一款較輕薄的，說這刀硬度較佳，而且輕身，手不會容易累，我還是鐘情那把厚重的 Misono，店員又取多一把輕薄的刀，像之前睇的那把一樣，只是刀柄的木紋是帶紫色的，店員說很多人買這個送禮，我也很喜歡，所以選了這個和 Misono，店員說可以在刀上刻名，當然要刻返個啦！刻名好快，一分鐘唔使已經刻好兩把刀！買完刀繼續行，望返對面行過的店，還是不回去買考慮的碗碟了，行前D見到一家店，店門的貨品全是白色的，很吸引！見到我一路搵唔到既碟架，同埋有款刀架都唔錯，所以買了！再行前D見到有一家店有賣我之前在誠品買的 Martian 不銹鋼刀叉匙，但價錢平了一半！！買返幾件溝淡先！

買完出到街口，去返石窯，頭先冇入去睇，依家入去睇，多左好多人呢，見到有一系列櫻花產品，但不算很漂亮，感覺是賣浄這些了，因為睇啱一款櫻花碟，細size 有粉紅色和白色，但大size得返粉紅色，應該賣晒白色了！隻碟頗大，考慮了好一陣才決定買，全程買了兩把刀、一隻碟、一個刀架、一個碟架、幾件叉／匙，一張 room deco 貼紙！跟住去 Skytree 了，由田原町撘銀座線一個站去淺草，轉車一個站去 Skytree站！

去到 Skytree站出來，先去行商店街，買了甜蕃薯今晚食，另外在 Cheese garden 買了芝士蛋糕和油浸芝士粒，行到去一家賣面膜的商店，他們的面膜有很多不同造型，每款面膜的貨品上都一部筆電，畫面像鏡一樣，畫面有一片面膜，一detect 到人臉行埋去，就會 keep 左塊面膜在你面上，好有趣，款款都埋去玩，其實呢度有免費試用，可以試完先買，見D人試得好開心，我冇試，直接買了當手信！

行完一輪開始天黑，上去搵食先！上次食過31樓摩天樓，個鐵板燒好正，不過今次想試另一間 Top of tree，呢間係 lounge ，都有野食，個 view 對正 Skytree，D枱設計分成三層，好似戲院咁，全部向窗，好識做生意！最近窗當然個 view更好！呢度有三款set menu ，最貴果set Tenku dinner ￥10,000，平D個set Tree dinner ￥5,500，食物一樣，分別是貴D任飲香檳／白酒，同埋多兩款前菜，今晚無特別想飲香檳，所以選平D果set，首先來了麵包和沙律，然後來一個 Skytree 造型的架 Amuse tower，上面放了小碟的前菜，有三文魚、炸蝦仔、多士等等，全是細細件，一啖份量，主菜有一碟牛肉，一碟魚，份量也是較細的，甜品有士多啤梨拿破倫和雪糕，食完坐左陣先走，返酒店再食埋個甜蕃薯先！