3D 4DX 哈比人 ： 五軍之戰 3D 4DX The Hobbit : The Battle of Five Armies

平安夜吃過聖誕大餐後，足足病了三天，持續嘔吐兩天十分辛苦！今天好了很多，之前約了好友看電影，今晚就去旺角的 Cinema city 睇戲！

這套戲剛上畫時，未有4DX版本，到佢20號開始有，又因為夾不到時間，延遲到今天才看，戲院開左唔係好耐，起初以為UA翻新，原來轉埋名，知道佢有4DX都好期待！

一早上網買左飛，見到佢D坐位設計，中間果排係四個位，於是好多人揀最中間兩個位，於是左右兩邊都係單丁位！入到去其實佢三排坐位之間幾近，而且攔住左，基本上只有左右出入，我地坐E行中間，唔算近，坐位前後都好闊，左右兩邊都冇人坐，正！

套戲一開場就去返村莊同火龍對抗東段，4DX即時起動！坐位左右上下搖動，有風在你坐位兩邊近耳朵位置吹出來，螢幕下有煙出，前面椅背有水珠噴出，有時由火龍的角度搖晃，開首的十五分鐘很刺激！其後去到中間有些打鬥場面，椅背會像按摩椅在背部凸左幾下，又會有條膠管在你小腿後拍打你的腳，背部果幾下都幾有力，腳果條管就好輕力！其實呢套戲，基本上成套都配合到4DX，所以都覺得有點過多，如果小朋友可能受不了，我諗起碼要青少年先可以睇，其他冇咁多動作的電影可能好D！

一個人的東京之旅 Day 4 - 秋葉原、Skytree

今日去秋葉原，去到秋葉原的火車站月台，見到有家賣牛奶的店，由於只賣牛奶，所以有很多選擇，選了一款，玻璃樽裝，即買即飲，正！

係人都知秋葉原係宅男專區，不過我今次唔係去買電玩、figure之類，而係去神田万世橋，呢度係由一座紅磚橋改建而成的商場，地方不算很大，橋的邊是河，橋頂是火車軌，知道這裡有家餐廳，就在兩條路軌的中間，一早到來，就是想來食早餐，樓下的商店未開門，但可看到玻璃門入面是甚麼商店，主要是一些食店，也有賣酒的，今日好凍，行入去室內，去揾今日目標餐廳 N3331 ，店子剛開門，全店只有我一個客，這裡的食物選擇不多，我叫了一客咖哩飯，店子是長方形的，因為在兩條路軌中間，兩邊都有JR 中央本線列車經過，火車不斷經過，覺得好有趣！老實說，這裡食物選擇不多，質素普通，最大賣㸃只是睇火車！

食完野在商場行下，這裡有一處是展覽室，介紹這座橋的前身和歷史，有一個樓梯位置，投影了一些雪花圖案，又播緊音樂，室內暖暖地，幾好氣氛，最重要係冇人，可以點影都得！影完相，睇完介紹，見到仲有商店，有D藝術小品、傢俬、服裝之類的店，在這𥚃消磨了些時間後，去返火車站附近行，睇下D Figure 公仔！

跟住去 Skytree ！好喜歡去 Skytree，商場夠大，有排行，先去食D野，去左食鰻魚飯，這𥚃有兩家鰻魚飯店，選了一間裝修看起來比較傳統的，店內的人不多，可能過左午餐時間吧！叫了一個 set，有埋湯同埋前菜，味道都唔錯！

食飽就去行街！呢度有間賣啤酒的店，叫做世界のビール博物館，門口有座啤酒山！跟住又去買左杯軟雪糕，個脆筒係黑色的，雪糕奶味濃，好滑！在商場行左幾個鐘，買左小小野就走喇！

一個人的東京之旅 Day 3 三井 outlet 木更津 、虎ノ門 丶六本木

 

今日行程先去 Outlet 買野，在東京都近郊有幾個 Outlet ，選了這個在千葉縣木更津的三井 Outlet ，見有高速巴士前往，早上8：55 和 10：20 有一班車在新宿小田急開出，車程62分鐘，8：55 太早了，所以選 10：20那班，去到小田急百貨，搵唔到巴士站，應該係搵唔到架車，因為呢度好多巴士站，甚至有個總站，但搵唔到任何去三井 Outlet 或木更津的巴士，記得車站就在小田急 HALC 門口的35號車站，最終 miss 左班車，後來才知道沒有去錯車站，只是該巴士不是想像中的專車只往 Outlet ，而是普通的公共巴士，而三井 Outlet 因為寫成日文，而令我睇漏了眼，明明可以搭到卻 miss 左，唯有改乘火車，火車的路程和去迪士尼相近，同樣要在東京駅轉京葉線往蘇我，經過舞浜站之後，再轉內房線，去到袖ケ蒲轉接駁巴士，全程要近兩小時，我由新宿乘火車往東京駅，11:11由東京駅開車往蘇我，要等火車，在12：22由蘇我往袖ケ浦，到達袖ケ蒲站，這個站很冷清，冇乜人，但很新淨，可能翻新過，車站有大大指示去三井 outlet 的接駁巴士，巴士也只有幾個人，而且中途會停幾個站，花了大約15分鐘，到達 outlet 時已經1：40了！一落車先搵回程巴士位置和時間，這個回程巴士清楚得多！最早回程是15：20，之後有16：20和17：50 ，車費¥1450，有交通方面的網頁可參考：
http://www.31op.com/kisarazu/access/index.html

入到去outlet 頗凍，但係都幾多日本人，呢度D地圖冇中英文，証明冇乜遊客來，主要是本地人，所以品牌上都唔係好國際化，好多日本品牌，呢度主要係女裝同運動服多，今次想買鞋同埋幫人買LC，可惜兩樣都買唔到！想去睇 Casio 手錶，成間舖得幾隻錶！！我諗應該係就快執笠掛！買唔到要既野，就去食個 lunch 先！呢度幾間食肆都唔錯，最終揀左食壽司！呢間叫做函太郎的迴轉壽司店，話北海道直送，不過我覺得在日本，任何一間壽司店也不會差，除非是平價迴轉壽司，否則只會是有幾好的分別！店子格局有點像香港的板長，同樣用 tablet 落單，見到圖片的海膽手卷包滿海膽，只是¥550，就叫一客試試，手卷送來的時候，只有兩條幼小的海膽，同圖片相差很遠呢！要是在香港已經觸犯了商品說明條例！雖然這海膽也很好味，但也實在太少了！只有這個貨不對版，其餘都OK，唯有叫一客海膽軍艦，這個對版了，雖然海膽有幾種顏色，但味道很好！還叫了呑拿魚（給絆壽司的大拖羅比下去了！）、蟹捧三昧、白子、帶子，味道很好，吃完結賬也是經 tablet 通知，再出去比錢，在收銀處放了些北海道零食在售賣，令我想起以前在旺角的雪洞洞餐廳，也是售賣這些零食，可惜已經結業！

食完野早小小去搭車，驚又 miss 左架車，去到車站，已經有幾個人排隊，先在站頭買車票，然後再排隊，還有廿分鐘才有車，但越來越多人了，巴士到站時見到架車都算大，應該可以坐四五十人，因為走廊位也可以拉櫈坐，上車後才看到長人龍！最終全車滿坐，有六七個人上唔到，要等一小時才有車了，上次在大阪 Rinku 也見到此情況，Rinku 在機場附近，好多人要去撘飛機，遲一班車可能上唔到飛機，所以要早點去車站等車，唔使等多一個鐘！坐巴士的好處是坐定定，唔使轉車冇位坐，仲可以瞓一覺添！
15：20巴士準時開車，16：25便到達新宿了！落車位置同樣是小田急 HALC門口，落車後才確定今早沒有去錯車站！

跟住坐火車去虎ノ門，由新宿坐丸之內線前往霞ケ關站，七個站就到，睇過地圖，由霞ケ關站行去，比起坐銀座線去虎ノ門站行過去遠小小，都係七個站，但係唔使轉車，去到霞ケ關站，由一號出口去 Toranomon Hills，出到去，抬頭看看有沒有特別高的大廈，還沒有見到，沿地鐵出口一直行，在一個燈位前，望到右邊有一座較高的大廈，應該係喇！行到過去，真係佢，大廈外很冷清，而且頗凍，在大廈的 floor guide ，見到清一色食肆，商店甚少！頗失望，其實只是一座新食廈，雖然食肆看來很不錯，但一個人也難 enjoy 吧！在大堂看看它的吉祥物，是出自畫叮噹的畫家作品，像一個白色的叮噹，多了耳朵、虎紋和尾巴，還有相關的紀念品售賣呢！在這裡逗留了一陣便走了，步行前往神谷町站，乘日比谷線可以直達六本木，只是一個站便到！

每年六本木都有聖誕燈飾，今次第一次去睇，六本木個地鐵站比較 modern，有點藝術 feel，其實六本木分開兩個大區，一邊係 Roppongi Hills ，另一邊係 Tokyo Midtown，Roppongi Hills 那邊有電視台、酒店、藝術館等，是比較藝術感的地方，而 Tokyo Midtown 是聖誕燈飾所在地，這邊也有酒店，和一個頗大的公園，通往公園的一個商場，地方不太，駕駛私家車的人客可以携狗狗由停車場通道往公園，今天就剛好見到有人帶了兩隻很漂亮的亞富汗獵犬（不肯定是不是，但樣子似是）來到這裡呢！出去看燈飾，有一部份是一片草地上有燈飾，它會隨音樂變動，以藍色為主，主題好像是宇宙之類，個人認為不算十分漂亮，返而公園𥚃的樹，掛滿燈飾也很漂亮！在室外影相有一小時了，氣溫很低，冷得很，趕快影完返回室內，原本想去埋 Roppongi Hills 但今天舟車勞動，也累了！回酒店前，去了西口的思憶橫丁，想吃串燒，大部份店都滿坐，而且總是有人客在吸煙，找到一家較大但沒有滿坐的店，通常有位就不會是好好味的那種，不過也沒甚麼時間了，串燒不會難食吧！反正見有幾個日本人在吃！店子叫かっペ亭，裝修較舊，店子應該經營很多年吧！餐牌有中文，店員也有講國語的！串燒價錢由¥105-¥190不等，但每枱都要收一碟¥420的小食費！唔好味而且很細碟，太貴了吧！叫了雞翼、雞肉棒、蒜頭、小辣椒、牛舌、雞肉等，味道不過不失，沒有驚喜！只有那個雞肉棒不錯，要 encore 追加！吃飽飽便返酒店休息了，明天繼續行程，剩餘一天半，時間過的真快呢！

一個人的東京之旅 Day 2 - 東京迪士尼海洋

一早起來仍然頭痛，出門前吃了昨晚在便利店買的yogurt，出門時忘了帶止痛藥！

乘 JR 中央線快速往東京駅約十五分鐘，在東京駅乘京葉線往舞浜，去到東京駅好頭痛，去藥房買了止痛藥，見呢隻 Bufferin Luna i 寫住速效，同埋空腹可以食，買盒試試，上火車時吃了，在車內休息一下，六個站便到舞浜，落車時已沒有頭痛，頗快見效！

一落車先去行一陣，去 Disney store行，買左小小野，再去樓上果間 Lazy Susan 買小小野，先去車站買車飛，呢度每逢聖誕節都有期間限定的一日車票，要唔同日子來先可以買齊一套，今年改左可以買齊一套六張，當然要買六張飛，每張一日票¥650，要邊張就去返有果張飛圖樣果部機買，我揀左 Rapunzel ，其他仲 Alice、Snow white、Thinker bell、Belle、諗住買完飛去 Bon Voyage 店睇野，買完飛顧住影相忘記了！坐 Disney resort line 去 Disney Sea，人唔算多，可能D人一早入左去，去到入口買飛，一日券¥6400，兩日券¥11000，約等於420及720港圓，仲平過去香港迪士尼！今次行程比較緊，原本想去晒兩邊，但係唔夠時間，只好去最愛的 Disney Sea!

入到去，因為都幾凍，先去D shop 度行一陣，暖一暖身先！去睇 Duffy product，同網上見的一樣，未見有新產品，今年聖誕節的產品不算特別漂亮，其中一款聖誕衫已經賣了三年，而新加入的公仔貓 Gelatoni 也未能吸引我購買，所以今次是購物最少的一次了，行左一陣，就去找一點吃的，在海灣旁邊的餐廳，外牆都在裝修，選了這家 Cafe Portofino ，叫了 set lunch，有海鮮長通粉，沙律和一個白色的包，包上的綠色汁是香草橄欖油，味道不錯，吃過午餐後便去坐 Gondola ，之前坐過一次，上次落雨，今次冇落雨，有D太陽，有D大風，在前往 Gondola 的位置，經過一條橋，旁邊的牆上有 Duffy 同 Gelatoni 既圖畫，還有一個讓人放 Duffy 公仔影相的架呢！影完相便去排隊坐船，大約排了半小時便可以上船，雖然聽不懂，但也能了解船員教我們講意大利文 Ciao ，應該係 say Hi 的意思吧！他叫我們向岸上的人揮手 say Ciao ，在海上走了一圈，船員也唱了幾句歌，返回岸上！

坐完 Gondola 去搵 Duffy 喇！原本想同 Duffy 影相，但人龍太長了，還是放棄了，在通往地心探險的機動遊戲的路上，見到超能先生同太太，同超能先生影左張相，就去玩地心探險，上次都要排半小時，今次唔使排！好快可以玩！玩完出來，今次決定要去玩胡迪個機動遊戲，呢個算係新既遊戲，上兩次因為人龍太誇張，要排近兩小時而放棄了，今次一定要試，見排隊時間是一小時，反正其他已玩過，就排啦！呢個遊戲玩法係每卡車坐四個人，兩個兩個背對背坐，前面每人有個發射器，發射器用拉繩操作，車卡行駛至一個射擊目標前停低，在有限時間射最多目標取分，呢個係3D遊戲，射擊目標當然是投射畫面，而完成一個射擊，車卡會駛去另一目標，再停低，如是者大約有十個不同的靶，你要不斷拉發射器的繩，其中一款靶是汽球，射中有水彈到你面上，視覺效果不錯，彈水的效果多些更好！下次要提早取 Fast pass 先得！

玩完呢個已近七點，預備夜間海上匯演了，我沒有看，已經看過幾次，去了 shopping ，今次 shopping 較少，因為沒有很吸引的貨物，又擔心行李會超重，而且沒有告訴朋友去旅行，所以不用買甚麼手信！外面挺凍的，所以多點留在室內，直至聖誕的海上匯演才出去看，聖誕匯演不太特別，沿用之前的米奇魔法帽，只是圖案改了，而且表演時間頗短，睇完要預備離開了，再行埋入口的商店便走了！

乘京葉缐返回東京駅，去買"東京ばな奈"的百週年花花版香蕉蛋糕，之前有貓紋、虎紋、豹紋，今次係花花圖案，唔知乜野味，個人不太喜歡此類食品，所以成日叫人唔好買手信比我！買完野，再坐火車返新宿，雖然買得唔算多，但也三大袋了！每次去完東京迪士尼，夜晚都去食磯丸水產，今次都唔例外！去近住歌舞技町果間，呢間同之前去果間唔同！呢度要自己燒的！之前就算兩個月前去大阪，都有人幫你燒！枱面有張野教你點燒，當然是日文！不過漢字加公仔，都明既！一個人食，就叫一人份的貝殼類、蟹蓋、蝦、韓式煎蛋餅、汽水！平時唔飲汽水，食佢就要飲汽水，也要補充一下糖份！燒烤過程算順利，整體感覺不及南囗果間好，下次都係去返果邊！食完野行返酒店，例牌去便利店買飲品才回去休息！