Hong Kong Wine & Dine Festival 2014

又係一年一度的美酒佳餚巡禮，今年改了地點，去年在中環，今年可能因佔中影響，改了去啟德舊機場跑道，我們在尖沙咀洲際 high tea，然後行一陣街，卻忘了在碼頭買品酒券，唯有入去買，行完街過去中間道坐接駁巴士，人龍很長，説要個多小時！改去喜來登坐的士，去到入口勁多人呀！先去排隊買品酒券，入得場都成九點！在入口有CCB的counter ，like 佢地 Facebook 或 We chat，就可以送閃燈水杯或者開瓶器一個，我地兩樣做齊，有晒兩款禮品！

入場後見到有個 booth 近住舞台的，裝飾得很漂亮！去試佢地D酒，可以坐佢地梳化影相，影完相飲完酒，去買左羊扒同鵝肝，一邊食，一邊飲，在舞台前聽歌，今年多了些枱，讓人站著吃喝，很方便！我地攞剛才的閃燈水杯出來影相，即刻有人問邊度買，我地教人去攞，然後繼續食其他野，又飲唔同既酒，行到去波爾多區，見到有講座，冇乜人，門口個小姐叫我地，要每人一張酒券，可以飲兩杯酒，但係我地得返一張酒券，話買左酒券先返來 join，可能個講座要開始，又冇乜人，佢話一張都OK，到時比少D酒我地，今個 section 的講師叫做 Jennie Mack，佢講野半唐番，幾得意，佢介紹左白酒同 Rosé ，聽佢講解，又學到D野，佢講D酒既產地時，地區名係法文，所以要好留心，但係見其他人好似冇心機聽，好似等佢派酒比我地試！佢介紹果支 Rosé 叫 J'M，剛好是她名字的縮寫，所以好易記，講左大約十五分鐘就完，佢走埋黎同我 say hi ! 話多謝我留心聽又對住佢笑，令佢信心大增，我覺得應該要專重講者，而且佢真係講得好好，大家客氣地傾左兩句，佢比左咭片我！

我地就聽完講座去買品酒券，又去換支免費的水，繼續去試其他酒，見到去年買的鴨腿，再買一罐給姊姊，然後去買左兩支酒，玩到人地要關門才走，去坐 free shuttle 去九龍塘轉的士返屋企，因為已經十二點幾！今晚玩得好開心！約好左出年要來兩次呀！

Les Saveurs private kitchen

睇完戲已經7：10，今晚 book 左7：30，不過好近，行過去鵝頸橋，過去近海旁那邊，這餐廳是法國私房菜，要上樓的，店裡地方不太，只有三間可改間隔的房，如果放一張大長枱，也可以坐十人至十二人，今晚我地間房只有兩張四人枱拍住窗邊，旁邊尚有空間可放多兩張二人或四人枱，而今晚我地＂包房＂，只我我地一枱客，另一張枱冇人坐，另一間沒有人，而再另一間就好多人，他們大約有10人，很熱鬧呢！每間房都望到維港，雖然不是對正中，較近ICC那邊，都望到大部份尖沙咀景！

看看餐牌，因為是私房菜，只有廚師定左食乜，不過主菜都有三款選擇，牛、豬腩、鴨胸，餐牌上沒有鴨胸，由店員介紹的，我們都選擇了牛扒！先來個餐前小食，是一條小小的脆卷，𥚃面包著小小鵝肝，外面很脆，這個也是餐牌上沒有的，店員説是送的！

頭盤是 Alaska king crab，將蟹肉卷成圓條，表面加了牛油果片和蟹籽，伴以青蘋果啫哩，啖啖肉，好清新，好好味！店員說每次只會訂一隻大的蟹空運來港，再拆肉做這個頭盤！

食完蟹，到 Fresh smoked salmon，是這裡的招牌菜，用42度橄欖油低溫慢煮三文魚，配以 caviar ，上枱前用煙燻著，等約半分鐘才打開玻璃蓋，雖然用油浸過，因為是橄欖油，所以不會肥膩，好好味！

吃完頭盤到飲湯，今晚是粟米湯，湯料有 foie gras 和 smoked eel ，配搭頗特別，湯好甜，湯料好味只係唔夠熱！

今晚既 pasta 係，Squid ink oszo pasta，黑麻麻的 pasta ，樣子不像一般的pasta，這個是很細條，像米一樣的形狀，size 大約是一粒飯的三、四倍，口感像飯與 pasta之間，pasta 上有虎蝦和黑松露，黑松露和creamy 的 squid ink sauce 很香濃 ，蓋過了虎蝦的味道，良久不散！

主菜的 Prime USDA rib eye，由廚師定生熟，今晚這個大約有七成，味道有點失望，無論在法國吃的牛扒，還是法國菜的牛扒，總是令我失望，不知道是否都是美國牛肉呢？可能吃過 wet aged 、dry aged和佐賀牛之後，不容易吃到有滿意的牛扒吧！

到甜品了，名叫 Must rouge 是 strawberry bouillion with mix berry ，味道一般，而且雜莓有點䤇！我們加錢要了 France cheese platter，有八款 cheese 和梳打餅，店員每款cheese 介紹，然後由淡味的一款開始食，最後是最濃味的 blue cheese，每款的份量很少，不會吃得太滯！

甜品後，是好友給我預備钩的蛋糕，這個蛋糕是一個很細小的蛋糕，是店子向餅店訂的，是一個像金沙的朱古力蛋糕，其實是甜品size ，很細的，感謝好友的心意！食完晒，再飮埋杯茶，整整三小時的晚飯便完結了！每道菜的份量較少，所以不是很飽，不過食物的質素和服務很好，想靜靜地坐幾個鐘食飯談心，這裡是個不錯的選擇呢！

五天大阪自由行 - Day 2 天王寺

坐完零晨機再行左成日，累極了！瞓醒已經10：00，錯過了酒店的免費早餐，不過呢類早餐 buffet ，唔太啱我食，不吃也可以。睇天氣話打風，不過主要在和歌山那邊。經過昨天勞累的行程，今天來點輕鬆的！因為在機場換的 JR一天券定了今天用，所以選擇 JR可到的地方，主要去天王寺，看看有沒有時間再去梅田！

第一次去天王寺，知道有新落成的高樓，叫做阿倍野，這是一座百貨公司加寫字樓，樓高300米，頂樓58-60樓，是觀光層，可以360度觀看大阪市，地下至十六樓是百貨公司和藝術館，在十六樓有一個空中花園，地方不算大，有幾張櫈比人坐，抬頭可看見上面的樓層外觀，這裡少不免有大廈的模型，攪笑地用了哥斯拉模型做對比，在1/F買左入場卷便可乘電梯到十六樓入閘，再轉另一部專用電梯，這電梯會顯示上升到幾多米，而電梯的頂部是透明的，看到電梯糟的燈光效果，當然由16樓上去60樓是很快的，只需35秒便到達，上到去60樓，人不算多，所以很多空間，因大廈是長方形，所以這𥚃用東南西北來定位置，每邊都有兩塊玻璃貼左方向指示，仲寫埋呢個方向有甚麼建築物或地標，在這個長方形中間，是中空設計，可以望到58樓的木地板，兩旁有坐位供人用餐，裡面近電梯有一間餐廳，只有一間，因為地方不大，而且用了大部份空間予人休憇，如果不用餐，兩旁還有些木樓梯級，可以在那裡坐，面對玻璃看看風景，頗 relax！從玻璃望到附近的通天閣和天王寺動物園，看來不太遠，遠處也望見心齋橋地標之一，戎橋旁邊的 Donki！在這裡休息一會，便繼續下個行程，就是通天閣！

印象中沒有去過通天閣，之前睇半沢直樹見到，而且多了人提起，才去看看，很多人說這電視劇常常以附近做場景，令多了人去這裡，其實在劇中出現過一個地方，是好像河／海邊的一排食店，很漂亮，可惜不知道是甚麼地方。由阿倍野步行往通天閣，要經過天王寺動物園，這條路很長，而且好靜！可能本地人不會這樣步行過去，因為火車站同樣遠，好不容易才去到通天閣前面的大街，這條街有大量食肆，幾乎清一色賣名物，炸串物，每間店外都有相片，全是炸的食物，有些也有賣壽司和拉麵，選擇很少，這裡也有一條橫丁，都是一些舊式的食店細細間那種，不少是立食，冇位坐，見到有一檔章魚丸，就食這個吧！小小的檔口，也要買食券！食完都冇乜野好行，就去浸溫泉！

這間叫 Spa world 的溫泉很大，有幾層高，男女分開樓層，還有一層岩盤浴，入場前，在門口買入場券 ¥1200，憑券入場會比一條手帶你，之後任何消費，由手帶記錄你的消費，先在入口除鞋，可穿著襪在場館內行走，因為全部舖了地毯，先將鞋放入 locker ，例牌要入 ¥100，之後取鞋會退返出來，放低鞋就上去樓上，這兩有兩大浴場，一個亞洲區，一個歐洲區，馮雙數月份女士用亞洲區，男士用歐洲區，單數月份相反，所以去亞洲區果層，上到去見到有做 Gym既地方，男女都入得，浴場入口有寫住女湯的布簾，不會攪錯，入到去頗多人，選擇了 locker 放好衣服，便去浴場，平時D溫泉，先經過浴室，洗澡後才往浴場，這裡卻沒有，原來浴室在每個浴場的旁邊都有！這裡有幾個主題浴場，有日本、韓國、峇里、泰國、印度，還有幾個用化學名稱的浴池，只有韓國那個是露天風呂，每個浴場和浴池的人不少，見好多人都是每個池浸兩三分鐘就走，去試其他，中間亦可沖沖身降溫，有些女士帶了小朋友來，不過有些男孩都有七、八歲了，也應該去男士那邊吧！

浸左咁多個池，都玩左一小時有多，出了一身汗，洗澡後便離開，去到樓下，有自動結算機，我以為將手帶 scan ，卻原來將手帶掉入一個入口，就可以結算，然後出張有 QR code 既飛比你出閘 scan，好先進！

浸完溫泉，天開始黑，行返去火車站，條路好靜又遠！行左三四個字才到！坐返 JR返難波，先去食野！又去磯丸水產，又食蟹蓋！今晚唔食貝殼類，食蝦食刺身等等！道頓堀呢度真係好熱鬧！嘆完晚餐就返酒店休息，食埋尋晚買既水果先瞓！

五天大阪自由行 - Day 1 奈良

上次五月去完歐洲，今個月又去旅行，只是相隔五個幾月，去年一月已經去過大阪了，今次為了哈利波特，一定要去一次！

今次同上次一樣，乘坐樂桃航空的零晨機，近期好多朋友都乘樂桃，貪佢平，而旅行社的 package 也是它最平，而且晚機去，晚機返，玩足5日！先去 T2 的P區登記，香港機場的 T1 和 T2 是可以步行前往，好近，關西的 T1 和 T2相隔較遠，要乘車前往！在 EGL 訂的自由行 package ，很多時都是團體機票，所以要搵 EGL 的職員，他們會在P區等，會在行李上掛一個黃色牌，方便人見到，見個職員手持的人名單人數不多，大約十個左右，攞換領信時見來回程都已經畫了位，坐窗口位太好了，可以挨住窗瞓。check in 左行李，例必搵D野食，不過咁夜，選擇自然少，今次在21號閘，好近，就去味千啦！順便買支750 ml 水上飛機飲！

好快又夠鐘上機，0：35飛，記得上次好快手，今次一樣，飛機細，人少D樣樣都好快！在飛機上見到有南海電鐵 Rapit 快線的優惠，原價¥1430，現在¥1030，所以在飛機上買，記得上也見這優惠，不過上次住梅田，所以冇買，今次住心齋橋的 Comfort Hotel ，諗住由難波行過去，上次住日航都係咁行，所以今次都係咁，去到機場，T2有巴士出去梅田，係冇車去難波！坐 shuttle bus 去 T1 ，去到車站售票處，見到 Rapit 快線做緊特價 ¥1130 比原價平¥300，比飛機上買的貴¥100 ！還有連奈良的車票的 package，價錢是 ¥比原價 ¥要平多¥，因為今天打算去奈良，早知有優惠就到埗先買！去難波最快果班車要7：30！週日早上班次少，選擇坐佢要預時間，仲有成個鐘！車程37分鐘，等要成個鐘！唯有四圍行，當然冇野行，全部未開，得便利店係24小時！好彩機場有 free wifi 可以上網消磨時間！先去 JR 換張 One day pass ，在 EGL 買了 USJ package ，跟了張 JR One day pass，這 one day pass 售價是 ¥2060 ，不過大阪並不像東京，JR 不是最適合去旅遊點，除非去和歌山，或在環狀線去多個地點才較抵用，而且在換領時要決定那一天用，所以要 plan 好行程才可用盡優惠！

架火車好少人，大部份係港人！基本上同一班機來，每卡車大給6-8個人，好疏落，可以拉低張椅眠一眠，不過太快到站，冇乜點瞓到。去到難波，要去車頭果邊搵 Swiss hotel 因為它旁邊有升降機直接去地面1/F，一出就係高島屋，對面就係心齋橋筋商店街入口！沿住商店街，行到去過左 Disney store之後果個口，再轉右行多兩個街口先到，酒店的接待處在三樓，電梯很狹窄，大約只可以企六個人，先放低行李，再出去。

第一天的行程是奈良，很多年之前跟團去過，已經沒有印象了，今次自由行去，睇下有冇印象！在難波站乘火車前往奈良，到達奈良站由2號出口出，一出車站見到人扮的奈良代表人物，有鹿角的佛像，其實覺得個造型好怪，不過也要有人喜歡的，沿地圖指示，前往猿沢池，因為這裡有出租和服，即管看看有沒有和服可租，這一帶很舊，人亦不多，好容易搵到果間叫做雅的和服店，店內很多人，可能是星期日加上十一假期，很多中、日人客，店員說沒有出租了，可能booking 太 full 吧！沒有就算了，反正今日天色不太好，要落雨咁，穿便服可能較好！

由猿沢池前往東大寺，是一條很長的路，沿途有些鹿出沒，牠們很溫純，不怕人，一路亦有些賣鹿煎餅的小檔，賣¥150大約有6-8塊，只要手持鹿煎餅，一定會被鹿群圍繞，直至吃光手上的餅，在東大寺附近是最多鹿的地點，當然鹿便便也遍佈路上！這時候落起雨來！找地方避雨，過一陣就停了，便購買入場券，每人¥500 ，入去影相和拜神，見到有一條木柱，下面有個大洞，只夠一個較瘦的人才能穿過，有個外藉男仔過唔到，其實佢好瘦，只係肩膀太橫，他花了些時間才過到，大家一起拍手，好開心！

在東大寺出來，行到去街口又落雨，而且頗大雨，在巴士站避雨時，見到有巴士去火車站，就坐巴士過去，只係兩個站就到，坐返阪神電鐵返去難波，返到去已經四點幾，先去0101 食小小野，地下有間叫 nana 的 cafe ，主要食甜品一有小小餐款，份量看來很細，所以就吃了小小，留肚晏D再食，先去高島屋睇睇有冇要買既野，依家去日本，好多百貨公都有5% discount比遊客，又有退稅，即使日本加稅至8%，但十月一日起多左物品有退稅，尤其係化妝品，¥5000以上已經可以退稅，在街上見到好多人手持已做了退稅的化妝品，用透明袋入住，用封條封好，方便過關！高島屋呢度仲提供三十分鐘 free wifi ，務求你銷費， 在道頓堀搵食，選擇有很多，但必食我的至愛磯丸水產！！！成條街好多遊客，不過磯丸唔多人，呢間有三四層高！地下只有六張枱，有兩張在一個房仔內，可能方便人包房，選了地下的位，看看餐牌，大致和東京的一樣，多了些壽司，見門口寫住今日有鮑魚和海膽，但店員說海膽是連飯，沒有單點海膽，所以沒有叫，選了鮑魚，店員說鮑魚是刺身，未食過鮑魚刺身，所以吃了一隻，但店員說沽清.......最後只叫了四款貝殼類和蟹蓋，因為吃了飯不久，吃得不多，呢度既蟹蓋真係好好味！食飽後去大丸買水果，巨峰提子和桃都係¥1080一份，好抵！返酒店食埋水果已飽到不行了！

失蹤 罪 Gone Girl

Nick 一早外出到妹妹Margo的酒吧聊天，傾訴與太太Amy的關系欠佳，兩人結婚五年，每年結婚週年，太太都會玩 treasure hunt遊戲，給他線索尋找週年禮物，Nick 回家後發現太太失蹤，立即報警，警員Boney負責調查，發現屋內有血漬，便深入調查，在 Amy 失蹤後，傳媒廣泛報道，Nick 與 Amy 的父母一起上電視呼籲，亦有不少志願人士協助找尋，警方調查期間，找到 Amy 留低的線索，漸漸發現 Nick 有所隱瞞，Amy 的父母開始懷疑 Nick，鄰居開始指責他，越來越令人懷疑他殺了Amy，警方亦找到有力証據，落案起訴他，就在此時，出現了驚人的變數.......!

成套戲頗長，後段相當緊湊，拍得頗懸疑，有些觀眾更驚叫了一聲，成個故事像一層層拆開謎團，女主角很可怕，結局男主角好無奈！