家傳滬曉

生日當天到尖沙咀行街,原先想去 La Mer 買那個迷你set 送比人,點知賣晒!!一下子唔知買乜野代替,在附近行了一圈,想起Jill Stuart 也出了限量gift set, 點知要11月1號先開始賣!!!!!sales 姐姐建議買另一款gift set,我見有一瓶浴鹽,我諗不太合用,但係sales 姐姐話包裝盒內有些小小的袋,可將浴鹽放入小袋當香包用!也好吧!

行了幾圈便坐車去美孚,美孚旁邊曼克頓山的商場,有間食滬菜的家傳滬曉,中秋節時去過吃飯,價錢相宜,我們book了食大閘蟹,蟹身約五両重,唔算大隻,不過都夠食,我地仲叫左醉鴿,上次食過醉雞,今次食吓鴿,另外仲叫左魚,菜,炒飯呢d小菜,吃飯時大家講起去旅行,大家都好鐘意去日本,弟弟更是獨自一個人去了大阪和京都,雖然較孤獨,不過唔使就朋友,始終每個人既生活習慣都唔同!

樸克王/Monster Sushi

生日前夕,好友送來好好味既藍莓cheese cake,芝士唔會"漏",藍莓仲唔酸,好好味,佢仲帶埋其他人送既禮物比我,好開心呀!我地跟住去左朗豪坊食飯,今次去L12果間Monster Sushi,我之前食過,都覺幾好,今次我地坐bar枱,我地都叫左好幾款Sushi,自從上次去峰壽司食過巨型帶子之後,每次都會叫帶子壽司食,當然無咁巨型啦!有個三文魚天使麵卷,入面卷住好幼既天使麵,幾得意幾好味, 我地食吓傾吓,講到去旅行,我建議去大阪短線自由行,唔知攞唔攞到假呢?我地食完飯就去睇戲,去到戲院啱啱好開場,我地睇樸克王,套戲比預期長,睇完都無去食甜品就各自回家了!

多謝各方好友的禮物和祝福, thanks !!!!

廸士尼黑色世界之筋疲力盡

好疲累的一天,去咁多次最最疲累係今次!!

我地响青衣食完野就入去,去到就响d shop度行左一陣,已經要預備睇巡遊,今次我地坐近樂園入口,果度比較少人,我地將入場派既Jack頭形紙扇放在椅上拍照,這個紙扇係夜光架,Flora 放入佢個白色袋度仲會透到d光出來!

今年d Halloween 既精品好靚,尤其多了些史廸仔同Scrump公仔,我見到個紅魔鬼Scrump好得意,我拎住佢影左張相,好鐘意張相,因為我笑得好開心 !!! 哈哈! 原本想買個細既紅魔鬼Scrump 布公仔頭夾,個夾太細,個公仔太重,好易甩,加上Scrump 係低既,都睇唔清楚,所以無買,另外有頂細既Halloween 圓帽有史廸仔對耳仔,同樣太重又買唔成,最後揾到一頂三角形尖帽加米奇耳仔既帽,好fit , 但係成間shop得返一個,我唯有叫Flora 自已買,之後行到巴斯光年果邊既車仔檔見到有大把,於是一人一頂,沿路好多人望住我地頂帽仔,仲有人走來問我地在哪裡買?因為好多檔都無呢款!

睇完巡遊,見近住餐廳個樓梯有人排隊,見隊頭有兩個小孩,男的一身巴斯光年打扮,女的一身莎莉既打扮,一身patchwork裙和一頭紅假衫,正在想廸士尼是否揾小孩同人影相,呢個時候Jack 同莎莉出現,即時引起一陣哄動,原來小孩是等影相的,女孩母親一身女巫打扮,十分投入,還叫Jack簽名呢!
跟住就開始排隊去猛鬼酒店,宇宙深寒同埋森魔詭域,全程排隊同行行行,其實三個地方大同小異,都係有d鬼忽然走出來嚇你,同埋有d位黑到乜都睇唔到反而仲驚!人都唔算太多,都係排約半小時,玩完出來都接近六點,我地去睇4D,順便坐吓!坐低左都唔想起身,睇完又疲倦又肚餓諗住去餐廳食野,點知排長龍,因為一小時後夜間巡遊,我地唯有去食中菜!得果度大把位!

食完飯去睇巡遊,今年同舊年一樣,無セ大改變,夜晚個個都攞住發光紙扇,我地坐低等,睇完又去 shopping, 我淨係買左個匙扣,佢就買左旅行袋同外套, 買完野再睇埋最後果場巡遊先走,搭地鐵果陣對脚好累呀!返到屋企成個散晒!年紀大無咁好精力!

風聲 Message

甚少睇國內電影,今次睇呢套風聲,cast好强勁,聽講在內地票房很好,已經開拍下一集叫雨聲.

套戲係講日軍佔領中國期間,有地下組織計劃暗殺日本將軍,由黄曉明演的日軍,得知有五個可疑的人,五人同一個軍隊部門,五人被帶到一個日軍佔領的類似城堡的地方,黄曉明告訴他們當中有一人是地下組織的要員,並要求那人自首,各人被困在同一屋內,每人都話自己不是那個人,在幾天時間內,各人都在打心理戰........!

其實套戲既氣氛好緊張,唔知會唔會比人捉去用刑迫供果種恐懼,然後一個一個被帶走,到自己被帶走時的驚惶,各演員都演時很好,那些close up的面部表情很出色,還是第一次看李冰冰,而周迅就睇過幾次,兩人不愧是影后,這電影改變了我對國內電影的睇法.

登別伊達時代村

之前一晚睇天氣,見颱風會越來越近,都擔心會橫風橫雨,呢日去完登別地獄谷都無落雨,只係天陰陰!
呢個登別伊達時代村係一個忍者表演場地,地方都幾大,有商店,小食店,手信店,有些遊戲地方,主要是類似鬼屋的地方,有幾個唔同主題既屋,一個以貓妖做主題,有一個以鬼怪故事做主題,仲有一個係怪屋,入面有兩間房個地係斜既,你在門口望入去會好暈,行過去都幾吃力,我地仲可以玩扮MJ既45度角既post,我就猛咁笑,仲拍埋短片,睇返都好好笑!其餘兩間都唔太驚嚇,只係突然彈d野出來嚇吓你咁.

我地又玩擲忍者飛鏢,仲講吓價,由500yen玩一次講到500yen三次,其實好難中,比你玩多兩次都唔會中,不過志在嘻嘻哈哈玩吓,反正得我地玩,其他團友都無玩!

最後睇個忍者表演,全日語對白,只有幾句簡單英語介紹,入場時比左張白紙我地,用途係如果你覺得好睇,完場時用白紙包住coins掟上台,雖然唔知對白講乜,不過佢地都好落力,散場時仲可以走去台邊同佢地合照,佢地都好樂意,仲扮鬼扮馬擺post影tim!

登別地獄谷

網誌日期：2009-10-15 01:06

休息左一晚第二朝一早起身,食完和式早餐就去好近既地獄谷睇泉眼,呢到地方好大,開始有d紅葉睇,天氣都有點暗,天文台話會打風,我地都驚會落雨,好彩一路無落雨,不過好凍好乾燥,沿住木欄干行呀行,向住有煙出既泉眼行,有斜路有樓梯,去到泉眼睇吓就行返轉頭,時間都好趕,吹左一輪風就緊係入去展覽室暖吓,見有牛奶自動販賣機,好多選擇,我揀左第一行既純牛奶,好味道呀!

ホテルゆもと登別

網誌日期：2009-10-13 01:13

行程第一日坐左五個鐘飛機,再坐車去到登別,去到都成六點,天氣好凍呀!我地帶唔夠衫,凍到震!!呢間酒店得日文名,有小小舊,房間係日式榻榻米,領隊比左兩間大房我地,有兩個洗手間,一人用一個,正!

放低行李之後就响酒店食飯,呢餐係和式餐,同樣坐榻榻米,雖然份量唔多,都夠飽,始終多肉無菜!比起以前跟團食中式料理好得多,唯一不變係d飯,一樣咁好味既珍珠米!食完飯例必出去行吓,附近無乜商店,得幾間賣d野近乎一模一樣既手信店,同埋便利店,我地買左d零食同飲品,我見到d鮮奶好想飲,所以就買左一包,同埋買左焦糖鮮奶布甸,好好味!

天氣太凍了,買完野都怱怱返酒店休息,瞓榻榻米好舒服,又可以响地下碌來碌去,好好玩!hehe.......!

我返來喇

網誌日期：2009-10-12 00:58



我返來喇! 話咁快假期就完左喇!回家真好!呢個假期真係幾乎感受左北海道既四季,一時陽光普照,一時下大雨,又打風,又秋凉,又落冰雹,但係無論乜野天氣,都離唔開凍同埋乾燥!!氣温由最低8度至最高13-14度!我幾乎凍死!好彩朋友帶多左衫,如果唔係實凍死!

好眼瞓,明天再upload!

北海道之旅

網誌日期：2009-10-07 01:24



終於等到呢日喇,好耐無join團去旅行喇!今次思前想後都係決定跟團,以免自由行既車程太遠會好辛苦,都係跟團,之前有幾個同事去過相近既團,所以d行程都熟口熟面.依家d Yen 個rate 好高,上星期兌8,6,今日已經8.7, 舊年去果時兌7.1咋.......唯有慳d使!今次同上次去台灣一樣四人行,聽朝早機去,玩五日,星期日晚夜機返!

北海道~~~我嚟喇!!!!!!!!!

上水雙魚河 Club house

好耐好耐好耐無响中秋節晚揾節目,通常都係同屋企人食飯做節,今年一早做左節,難得有節目,去到好遠既上水雙魚河馬會ClubHouse食Buffet, 我地坐响室外,呢環境清幽,加上天氣清凉,都幾舒服,最令我意外係食物質素好又多選擇,Service 又好好,仲要唔可以比貼士!

雖然d生蠔好細隻,但係好新鮮同埋充滿海水味,幾咸,不過都好想食, 熱盤方面有即場炭燒既羊扒同雞翼好好味, 我食得唔多,都係食左四轉, 有兩轉係羊扒同雞翼呢!其實仲有好多dessert,即做pancake,大大個楊桃同梨等,但係我好飽食唔得多,而且食完飯仲可以去玩攤位遊戲,好熱閙,攤位遊戲有猜燈迷,巨型保齡球,擲銀仔.......每個攤位都有好多小禮物,基本上點都有禮物,志在大家開心吧!
今年中秋都算過得特別!

Yahoo 唔知做乜,upload唔到,今日一睇,呢篇網誌save左响草稿匣,但係變左135份???