D.A頂級安格斯肉眼扒

上星期見到新假期的副刋講"牛の特集"即刻買本睇睇,裏面介紹了近期有港商引入的D.A (Dry aged)處理技術,不太記得詳細資料,大概是一個類似雪櫃的肉櫃,調校到指定的温度濕度和風速,存放大概十多天,它的外表看來乾乾地,黑黑地,但係能保持豐富肉汁和味道,大概是某些化學作用吧!這種D.A牛扒在Landmark 的Three Sixty 有得賣,此外,在灣仔三里屯Mr. Steak 有得食!!!!我同Ronald睇完都好想試,我地想約左昨晚去試,我打電話去訂枱,個waiter問我係咪訂灣仔嗰間,我話有第二間咩?佢話响銅鑼灣有一間不過主要係食buffet,唯有去灣仔,反正我未去過三里屯,雖然唔係咁就腳.

我地坐地鐵去,都行好遠先到,去到見三里屯嗰度雖然係星期日都唔係咁旺,去到Mr.Steak裏面都坐左九成客,個waitress滿頭大汗,滿面通紅,好似好忙,我地响門口睇過Menu,見到一個XX三重奏牛扒(唔記得名!)有齊三種佢地特式牛扒,有D.A西冷扒,M10和牛扒,同埋唔記得乜野千層扒(大概係幾種唔同既牛扒切片叠成),我定决定叫一客D.A頂級安格斯肉眼扒($398)同三重奏($449)share!同餐廳細細地,掛左好相,有d五六十年代荷李活feel,落order時Ronald話想食生d,我地叫medium,我好少食咁生!都即管試吓,上菜好慢等左好耐,我地一人飲左一支啤酒先有得食,個waiter將牛扒放响枱之後,就介紹一下,(我見塊扒面頭有d血水,驚驚地!)佢話D.A扒下面有一小塊同等級數但係未經D.A處理既牛扒,佢話等我地可以比較到個分別,都好細心喎!我急不及待,先試D.A扒,一入口.................................好juicy ! 肉味好濃,夾集着外層的燒焦味....................係我食過最好味既牛扒!!!!!再食那一小塊牛扒.......................嘩嘩嘩!!!!...............相差好遠呢,那一小塊雖然是同等級數,同我之前食過已經覺得好好味既靚牛扒差不多,但這個D.A真係好味得多,至於那三重奏,只有D.A西泠有得fight,但係無肉眼咁淋,如果喜歡吃牛扒,就一定要試!食左半塊唔夠喉呀!!!!!!!!!!

D.A肉眼扒,下面有一小塊!

三重奏!!!給比下去了!!!

甜甜壽宴

晚上去了姨甥女的5歲壽宴,其實只是一家人吃餐晚飯,去了美孚的桃源,訂了一間房,只有十個人,媽媽見我染了髮,摸摸我的頭話我咁有型tim!!!!!!!我這大頭蝦姨姨,把生日禮物留了在家忘記帶去,我告訴她我買了禮物給她,叫她估我買了甚麽,她估是食物和玩具,我說不是,她叫我明天拿給她,我話唔得閒,下次先啦!早知跟姊姊一樣封利是給她,我也真太大懵了!

晚飯有鮑魚,侍應送上楊桃檸檬汁,她說吃鮑魚前喝,可清清味蕾,鮑魚會好味些,我也不肯定有否幫助,不過味道不錯,吃完主菜當然是甜品,今天的甜品很豐富,先來了熱辣辣的壽包,樣子很可愛,姨甥女最喜歡吃皮,當她吃完皮見到裏面的蛋黃油流出來,她大叫"媽咪,佢漏水呀!"引得我們哈哈笑,吃完壽包,還有桂花榚,杏仁茶和水果,當然少不了生日蛋糕,姊姊做了一個很漂亮的立體蛋糕,是米妮穿着一條大圓裙,米妮上半身是塑膠公仔,比Barbie大小小,下身大圓裙是鋪滿士多啤梨的半圓型蛋糕,蛋糕裹是各種berry,很漂亮和好味,只是蛋糕坐了長途車後溶溶地,d士多啤梨甩左d出黎,上面d忌廉ball ball甩左好多,所以無影相,真可惜.

美甲

昨天行街時見到些美甲產品,試了很多色,最後買了三個色,和一些貼紙,自己回家整,雖然是幾拾圓的貨品,買吓買吓都幾佰元!自己的指甲好易斷,尤期塗完甲油之後,所以要好小心保護,好多時都係整兩三隻手指,而且隻隻手指貼花要有d唔同款先覺得好睇.

杯湯

上次响超市見到這款像杯麵一樣包裝的湯,我叫它杯湯,有三款味道,我選了有菜的忌廉湯和較穩陣的粟米湯,尚有一款蜆湯沒有買,價錢也不便宜,要$14.9一杯,杯內水位指示在中央,即半杯多一點,裏面有些麵包乾,浸完水發漲了味道不錯!

晚飯去了Pokka食,我地叫了提子蘆薈果汁冰,韓式石窩飯,特色飯團,一口牛肉,意粉同鳥冬,食得好飽呀!

Highlight

今天的天氣很好,下午天朗氣清,在車站等車時好曬,我拍了張自己的倒影照片,差點miss了架車.

去了媽媽的家喝湯,喝完去了剪髮,Elsie老是叫我做highlight,便試試看,還是第一次做highlight,出來的效果比預期紅,她說落些髮臘會淡色些,但似乎不是!唯有等佢洗多幾次淡色些吧!

剪完髮去左Harbour city, 想去City super食拉麵,但係勁多人,唯有去最少人既Ocean terminal, 唔知點解今日成個商場都好靜,無乜人,我又去Fuzion度食飯,叫左茄醬鮮蝦燴飯,都幾好味!商場成層都裝修緊,呢個商場硬係做唔起SportX呢層,可能改做Food X 或者Beauty X會好d!!是關Faces好似唔夠位咁!而LV又擴充緊,新港中心又大幅裝修,遲d應該有一番新景象.

燒牛肉稻庭冷烏冬

這幾天人很疲累,回家倒頭便睡,還是熟睡....zzzzzzzz

昨天去了媽媽的家喝湯,然後去了尖沙咀買洗頭水,再去Town gas睇熱水炉,好貴耶!!最平要三千多元,還是不換了,晚上一家人去了吉之島的Pokka吃飯,我叫了一客燒牛肉稻庭冷烏冬,味道不錯,每次去吉之島,都覺得它很靜,沒有多少個客人,如果想靜靜地購物就最適合了.

今天開了個漫長的會議.....zzzzzzzzzzzz 好辛苦呀!亞坤放完大假回來,在日本買了Hello Kitty 燒餅給我,是東京限定版,好可愛,仲幾好食,只係豆沙餡甜了一點,想留幾個比姨甥女,不過就到期,可能到期前都見唔到佢!

買化妝品

家裏的化妝品已經用盡了,我堅持用光才買,以免貪新鮮買多了,早前已看過一些雜誌介紹,心目中有好幾個選擇,和Suen一起去商場睇,先去了Armani睇新嗰隻 base,個sales介紹埋隻防曬底霜,試上手有點閃令令,亦很清爽,只是那個base沒有貨,先買了防曬底霜,過幾天才去取,還欠粉底液,先去了Shisedo試新的那款粉餅,試上手感覺厚了點,可能用慣粉底液,平時用的Laura Mercier是較薄貼的,所以不大喜歡粉餅,而且店裏很多人,便轉了去Bobbie Brown,一直對這品牌有信心,用開它的concealer,很好用,粉底卻太大瓶,所以沒有用,現在新的那些細瓶一點,便買來試試,那sales哥哥替我塗在面上試了兩隻色,效果都很自然,我買了淺一個tone的color,之後去了超市買了一堆零食和車厘茄,那些車厘茄圓圓的很可愛呢!

燒腩仔

前晚成班再去容記食燒腩仔,預早訂左2碟,大家都估估吓,究竟點可以翻熱燒肉仍可保持皮脆肉軟腍,仍然保持水準,另外再叫了條青班兩食,炒片和蒸頭腩,好好味,其它小菜就麻麻地,尤其係送比我地嗰兩隻炸乳鴿,席間大家都喝了很多啤酒,食完成晚响度講笑同影相,d男仔個個飲多兩杯就乜野衰樣都出晒黎,好好笑